Luk 5
5
Uvaʼs itxajt quBʼaal Jesuus oxvaʼl inqʼa vinaq tiʼ itxhust tibʼ s-kʼatza; aʼe Simoon, Jakoovo tuchʼ Xhun
Tio 4.18-22; Kuxh 1.16-20
1Atichetz Jesuus titziʼ u mam aʼ Jenesareet, tul mamala tenam nikich motx ikʼoʼpi ok tibʼ kʼatz Jesuus tiʼ tabʼil viyolbʼal quBʼaal Tiuxh. 2Tiletz Jesuus kaʼvaʼl u vaarko uvaʼ atich ka tziʼ u mam aʼ taʼn inqʼa txeyol txay. Tan maʼtichaq teluʼl inqʼa txeyol txay s-tuul, tul eenichaq vet txʼaj tetz inqʼa ikʼatxh.
3Paletz vet jaʼ Jesuus tuul invaʼl u vaarko, u tetzich Simoon, tul ijaq Jesuus bʼaʼnil te Simoon tiʼ ijetxhex ok inbʼiil u vaarko viʼ u mam aʼ. Yaʼne ijetxh vet ok Simoon u vaarko. Tul kʼuqeʼv vet Jesuus s-tuul. Tul xeʼt vet Jesuus tiʼ itxhusux inqʼa xaol, inqʼa atich tziʼ u mam aʼ.
4Yaʼetz vet Jesuus tiʼ itxhusux inqʼa xaol, tul ech tal Jesuus te Simoon s-eche: —Jetxh tel ok u vaarko tuul okaʼp u mam aʼ. Tul kʼonivaq bʼen vekʼatxh tuul u mam aʼ tiʼ itxeyex txay, —xeʼt Jesuus.
5Yaʼne ech tal Simoon te Jesuus s-eche: —Txhusul qetz, poro vaʼxxh aqʼbʼal aqʼonv oʼ tiʼ itxeyex txay. Tul mij invaʼxoʼq txay qutxeya. Pet, tiʼ uvaʼ, axh nik alon, tul toq inkʼoni bʼen u kʼatxh tuul u mam aʼ, —xeʼt Simoon.
6Tul ikʼoni vet bʼen Simoon vikʼatxh tuul u mam aʼ. Tul mamala vet txay motxoʼk tuul u kʼatxh. Tul tetxhichxh irinp vet vikʼatxh Simoon.
7Yaʼne motx tetzbʼe vet tzaan Simoon jolt inqʼa imol s-txeyol txay tiʼ ilotxhoxeʼ. Tan eenich jolt inqʼa txeyol txay tuul invaʼt u vaarko. Ulaqetz veteʼ, tul inojsaaq vet kuʼ inqʼa txay tuul kaʼvaʼl inqʼa vaarko. Tul tetxhichxh vet ipal kuʼ inqʼa vaarko jaqʼ u mam aʼ taʼn talal inqʼa txay.
8-9Tul tira kaj vet taanima Simoon Luʼ tuchʼ inqʼa imol tiʼ inqʼa mamala txay motx itxeya. Imolichetz tibʼ Simoon tuchʼ Jakoovo tuchʼ Xhun, inqʼa ikʼaol Sevedeeo. Tiletz vet Simoon Luʼ u kaebʼal aanima uvaʼ ibʼan Jesuus, tul qael ikuʼ Simoon vatz Jesuus. Tan yekichxh inatxh Simoon u tiqleʼm quBʼaal Tiuxh kʼatz Jesuus. Tul ech tal Simoon te Jesuus s-eche: —¡InBʼaal, jit inkʼulel uvaʼ laʼ atin axh sinkʼatza, tan in kuxh invaʼl vinaq aj paʼvom! —xeʼt Simoon.
10Yaʼne ech tal Jesuus te Simoon s-eche: —Yeʼ kuxh xoʼv axh. Tan in toq bʼanon uvaʼ ech vet toq amolt inqʼa xaol sinkʼatza, eche nik amolt inqʼa txay, —xeʼt Jesuus te Simoon. 11Tiqʼoaqetz kuxh vet eluʼl inqʼa vaarko tziʼ u mam aʼ, tul taqʼaq vet ka s-kaqaayil. Tul txhʼuyeʼvaq vet tiʼ Jesuus.
Uvaʼs ibʼant quBʼaal Jesuus bʼaʼn val u vinaq uvaʼ qʼajchil nikich ibʼan vitxhiʼoʼl
Tio 8.1-4; Kuxh 1.40-45
12Eenichetz vet Jesuus t-val u tenam tuulbʼal Galileea, tul ul val u vinaq uvaʼ qʼajchil nikich ibʼan vitxhiʼoʼl. Ajtetz ilix Jesuus taʼn u vinaq, tul joqel ikuʼ t-txʼavaʼ tiʼ ijaqt bʼaʼnil te Jesuus. Tul ech tal te Jesuus s-eche: —InBʼaal, tetxhal laʼ inbʼan bʼaʼn tu yaabʼil, oq axh laʼ saʼon, —xeʼte.
13Yaʼne taqʼeʼl Jesuus iqʼabʼ, tul ikan Jesuus u vinaq. Tul ech tal Jesuus s-te s-eche: —Ee, nik insaʼeʼ. ¡Bʼan vet bʼaʼn! —xeʼt Jesuus. Tul yekich ibʼan vet bʼaʼn vitxhiʼoʼl u vinaq.
14Yaʼne ibʼekʼ Jesuus te u vinaq uvaʼ yeʼxhabʼil invaʼq xaol laʼich tal s-te uvaʼ Jesuus bʼanon bʼaʼn. Tul ech tal Jesuus s-te s-eche: —Bʼaxa tzij quxh kʼutxh eebʼ vatz vaʼq u oksan yol vatz Tiuxh, tiʼ uvaʼ yeʼl vet u yaabʼil seʼe. Tul iqʼo inqʼa oya uvaʼ bʼekʼel ka taʼn Moisees tiʼ bʼen animat u kʼutxhbʼal tetz vatz inqʼa xaol uvaʼ txʼael vet axh vatz quBʼaal Tiuxh, —xeʼt Jesuus.{*}#5.14 Aʼ nik tal u bʼekʼbʼal uvaʼ, bʼaxa tzij laʼ bʼen ikʼutxh tibʼ u yaabʼ vatz u oksan yol vatz Tiuxh tuulbʼal vitenam uvaʼs laʼ ibʼant vet bʼaʼn. Poro yeʼxhabʼil laʼ tal s-te tuulbʼal uvaʼs yeʼnaq ex ikʼutxheʼt tibʼ vatz u oksan yol vatz Tiuxh. Pet aʼetz vet u oksan yol laʼ alon el viʼ jankʼal inqʼa xaol uvaʼ bʼaʼn vet u xaol uvaʼ qʼajchil nik bʼanon vitxhiʼoʼl, ech uvaʼe nik tal tu Leviitiko 14.1-32.
15Kʼuxhetz aʼ tal Jesuus uvaʼ yeʼxhabʼil laʼ alax s-te, pet aʼl tel ipaxin itziulal u kaebʼal aanima uvaʼ ibʼan Jesuus te u vinaq uvaʼ qʼajchil nikich ibʼan vitxhiʼoʼl. Tul mam xaol motx imol vet tibʼ tiʼ tabʼil inqʼa yol uvaʼ nikich tal Jesuus, atz tiʼ ibʼant Jesuus bʼaʼn inqʼa yaabʼ. 16Pet aʼl nikich ibʼen vet Jesuus t-inqʼa txʼavaʼ, uvaʼ yeʼl xaol jeqlelich s-tuul, tiʼ inatxht Tiuxh tzitzi.
Uvaʼs ibʼant quBʼaal Jesuus bʼaʼn val u vinaq, uvaʼ tzeʼuʼxich kuxh itxhiʼoʼl taʼn yaabʼil, tul ikuy quBʼaal Jesuus ipaʼv
Tio 9.1-8; Kuxh 2.1-12
17Paquletz uvaʼ sebʼtich itxhusun Jesuus xoʼl inqʼa xaol t-val u otzotz, tul atich jolol inqʼa vinaq tzitzi uvaʼ fariseeoich u tuqʼeʼybʼal. Tul atich jolt inqʼa aj txumbʼal, txhusul tetz ibʼekʼbʼal inqʼa tij imam Israeel. Tul kʼuqlichaq xoʼl inqʼa xaol. Tul talaq kuxh tzajnaʼqiche. Tan at inqʼa een tzajnaʼqich t-inqʼa talaq tenam tuulbʼal Galileea. Atz at inqʼa een tzajnaʼqich t-inqʼa talaq tenam tuulbʼal Judeea. Atz at inqʼa een tzajnaʼqich tu tenam Jerusaleen, antxh tuulbʼal Judeea. Tul tira atich tiqleʼm Jesuus taʼn quBʼaal Tiuxh tiʼ ibʼant Jesuus bʼaʼn inqʼa yaabʼ t-inqʼa yaabʼil.
18Aqʼbʼetz vet jolol inqʼa vinaq uvaʼ txhelemich val u yaabʼ viʼ txʼatxh tzeʼ taʼn. Tan tzeʼuʼxich kuxh itxhiʼoʼl u vinaq taʼn yaabʼil. Tul saʼich motx paloʼk tuchʼ u yaabʼ tuul u otzotz tiʼ taqʼax ok vatz Jesuus uvaʼ tala. 19Poro kam koq laʼich motx tulbʼe ipaloʼk, tan mamala xaol atiche. Pet aʼl motx ijaʼ vet tiviʼ u otzotz tuchʼ u yaabʼ uvaʼ atich viʼ txʼatxh tzeʼ. Tul itxhokaq vet ijaqax iviʼ u otzotz. Yaʼne taqʼaq vet koʼp u yaabʼ viʼ txʼatxh tzeʼ vatz Jesuus.
20Tiletz vet Jesuus uvaʼ kʼuqlichaqxh ikʼuul inqʼa txhelen tetz u yaabʼ uvaʼ laʼ ibʼan Jesuus bʼaʼn u yaabʼ, tul ech tal Jesuus te u yaabʼ s-eche: —Txa, qat inkuy sotzsal vet inqʼa apaʼv, —xeʼt Jesuus.
21Yaʼne echaq motx titzʼa inqʼa txhusul tetz inqʼa bʼekʼbʼal s-eche: —¿Kametzxh txhan vet tiqleʼm naq uvaʼe nik taleʼ? ¡Tira nik teesa naq iqʼij quBʼaal Tiuxh tuchʼ u yol uvaʼe! Tan yeʼxhabʼil invaʼq laʼ kuyun ipaʼv inqʼa xaol. Pet taʼn kuxh quBʼaal Tiuxh laʼ kuy sotzsan inqʼa paʼv, —xeʼtaq t-taanima.
22Naletz kuxh ibʼen u titzʼabʼal inqʼa vinaq te Jesuus, tul ech tal Jesuus s-te s-eche: —Yeʼ vaq ebʼan kaʼl ekʼuul te taanima tiʼ u yol uvaʼ qat vala. 23Pet itzʼavaq, ¿jabʼisteetz uvaʼ yeʼ laʼ oleʼv in s-tiʼ nik etitzʼa? ¿Maq, tiʼ uvaʼ?: «Qat inkuy sotzsal vet inqʼa apaʼv,» chaq in te u yaabʼ. ¿Maq, tiʼ uvaʼ?: «Lakpen. Tul xaon veteʼ,» chaq in s-te. 24Pet toqetz inkʼutxh sete uvaʼ at viqleʼm taʼn quBʼaal Tiuxh tiʼ ikuy sotzsal ipaʼv inqʼa xaol tuulbʼal uvaʼ at in tzitza vatz u txʼavaʼ, in, u Kʼaola uvaʼ qat bʼen s-alam aanima, —xeʼt Jesuus.
Tul ech tal Jesuus te u vinaq, uvaʼ tzeʼuʼxich kuxh itxhiʼoʼl taʼn yaabʼil, s-eche: —Nik val see: Lakpen, tul lak vatxʼatxh tzeʼ. Tul quxh tavotzotz, —xeʼt Jesuus.
25Tul yekich ibʼan vet bʼaʼn u yaabʼ. Atz lakp vet u yaabʼ ech ivatz inqʼa xaol uvaʼ atich tzitzi. Tul ilak vet vitxʼatxh tzeʼ uvaʼ xoklich s-viʼ. Tul bʼen vet t-totzotz. Tul oqichxh vet ichiibʼ tiʼ toksal iqʼij quBʼaal Tiuxh.{*}#5.25 ¿Kam ibʼan quBʼaal Jesuus tiʼ ikʼutxhuxeʼ uvaʼ at tiqleʼm tiʼ ikuyux vipaʼv inqʼa xaol? Aʼ ikʼutxhvat quBʼaal Jesuus tiʼ ibʼanax bʼaʼn val u yaabʼ uvaʼ tzeʼuʼxich kuxh vitxhiʼoʼl. Aʼetz u tetxhlale uvaʼ quBʼaal Tiuxh aqʼon tiqleʼm quBʼaal Jesuus tzitza vatz txʼavaʼ.
26Jankʼaletzxh vet inqʼa xaol, inqʼa motx ilon u yol, tan tira kaayaqichxh vet taanima. Tul toksaaq vet iqʼij quBʼaal Tiuxh. Tul ech motx tal vet taʼn mam xoʼval s-eche: —¡Yaʼnetzxh paqule qat qil inqʼa kaebʼal aanima! —chichichaq veteʼ.
Uvaʼs talt quBʼaal Jesuus itxhʼuyeʼv Levii s-tiʼ
Tio 9.9-13; Kuxh 2.13-17
27Eletz vet ul Jesuus tu otzotz, tal uvaʼ ibʼanvat u vinaq bʼaʼn uvaʼ tzeʼuʼxich kuxh itxhiʼoʼl t-yaabʼil, tul bʼen vet Jesuus. Tul til Jesuus val u vinaq uvaʼ Leviich ibʼij. Kʼuqlich ok vatz val u meexha tiʼ ijaqax puaq tetz Rooma. Tul ech tal Jesuus te Levii s-eche: —Txhʼuyeʼven s-viʼ, —xeʼt Jesuus.
28Txakp vet Levii, tul taqʼ vet ka Levii inqʼa kam s-kaqaayil. Tul txhʼuyeʼv vet tiʼ Jesuus.
29Yaʼne ibʼekʼ vet Levii ibʼanax val u bʼaʼnla txʼix t-totzotz tiʼ toksal iqʼij Jesuus. Tul mamala imol Levii motx aqʼbʼi, inqʼa antxh jaqolaqich puaq tetz Rooma, atz tuchʼ jolt xaol. Tul vaʼl txʼaʼonk Jesuus s-tuchʼ.
30Atichetz jolol inqʼa nikich txhusun ibʼekʼbʼal inqʼa qumol s-tijaq imam Israeel tuchʼ jolt inqʼa fariseeo, motx xeʼt tiʼ teesal iqʼij inqʼa nikich itxhus tibʼ kʼatz Jesuus. Tul ech motx tal s-te s-eche: —¡Kam s-tiʼil vaʼl nik motx txʼaʼonk ex, atz nik motx ukʼk ex aʼ tuchʼ inqʼa jaqol puaq tetz Rooma, atz tuchʼ jolt aj paʼvom! —xeʼtaqe.
31Yaʼne ech tal Jesuus s-eche: —Jankʼalxh inqʼa xaol uvaʼ bʼaʼn ikʼuul, tan yeʼl tzʼakvil nisaʼon s-te. Pet taʼnxh inqʼa yaabʼ nisaʼon tzʼakvil s-te. 32Echetze u vatineʼ, tan qat tzaj in tu amlikaʼ, poro jit aʼ inqʼa xaol ul inlotxheʼ, inqʼa yeʼl ipaʼv nik inatxheʼ. Pet aʼ ulk in tiʼ inqʼa aj paʼvom, tiʼ uvaʼ laʼ motx titzʼa tibʼ t-inqʼa ipaʼv vatz quBʼaal Tiuxh, —xeʼt Jesuus.{*}#5.32 Nik ibʼan tibʼ quBʼaal Jesuus eela tuchʼ vaʼl aj tzʼak uvaʼ nik tzʼakan vitxhiʼoʼl inqʼa xaol. Tul jitetz kuxh taʼn vitxhiʼoʼl inqʼa xaol nik ibʼan quBʼaal Jesuus bʼaʼn, pet nikat ibʼan bʼaʼn u taanxelal inqʼa xaol vatz quBʼaal Tiuxh. Tan aʼ, ul itxhok quBʼaal Jesuus, uvaʼ laʼ kuyux vipaʼv inqʼa xaol taʼn quBʼaal Tiuxh, jatvaʼl inqʼa laʼ motx titzʼa uvaʼ aj paʼvom Tul laʼ motx ijaq ikuya s-tiʼ. Nikat tal quBʼaal Jesuus uvaʼ ant inqʼa iqʼesal uqʼeʼybʼal nik isaʼ tzʼakvil tetz taanxelal. Ant laʼ motx ijaq ikuya tiʼ inqʼa ipaʼv, eche uvaʼ ibʼan Levii. Tan yeʼ nikich titzʼa inqʼa qʼesal uqʼeʼybʼal uvaʼs atich ipaʼv vatz quBʼaal Tiuxh. Pet bʼaʼnich kuxh tatin s-vatz nikich motx taleʼ.
Uvaʼs tabʼil inuqul te quBʼaal Jesuus tiʼ u maqo ibʼ tiʼ txʼaʼoʼm tiʼ inatxhax Tiuxh
Tio 9.14-17; Kuxh 2.18-22
33Yaʼne ech motx tal inqʼa iqʼesal uqʼeʼybʼal te Jesuus s-eche: —Bʼaʼn uvaʼ nik motx ibʼan inqʼa nik itxhus tibʼ kʼatz Xhun, tan bʼiitxhaqul tuul nik motx imaq itxʼaʼon tiʼ inatxhax Tiuxh. Tul echat kuxh uvaʼe nik motx ibʼan inqʼa nik itxhus tibʼ kʼatz inqʼa fariseeo. Petetz koq inqʼa nik motx atxhuseʼ, tan tira yeʼ nik motx imaq tibʼ tiʼ itxʼaʼoneʼ. Tan ¡aʼ kuxh txʼaʼoʼm tuchʼ ukʼa aʼ nik motx ibʼaneʼ! —xeʼtaq te Jesuus.
34Tul ech tal Jesuus s-eche: —¿Maqetz laʼ isaʼ imaqt inqʼa xaol itxʼaʼoneʼ, inqʼa at tuulbʼal u tzʼaloʼm, oq uvaʼ ant atil u aj tzʼaloʼm s-xoʼl? Yeʼ laʼ isaʼa.{*}#5.34 ¿Kam s-tiʼil nik tal quBʼaal Jesuus u yol tiʼ u aj tzʼaloʼm? Aʼ s-tiʼil, tan aʼ, quBʼaal Jesuuse nik ibʼan tibʼ eela tuchʼ u aj tzʼaloʼm. Tul aʼ nik ibʼan quBʼaal Jesuus eela u chelem ixvaak tuchʼ inqʼa nikich itxhus tibʼ s-kʼatza, atz tuchʼ inqʼa niman tetz. Tuulbʼaletz u tzʼaloʼm, tan at etxhbʼubʼal, atz at aʼ, kametz koq s-tiʼil laʼ imaq u xaol itxʼaʼoneʼ. Pet vatz inqʼa tij imam Israeel, tan aʼ nikich motx ijaq te quBʼaal Tiuxh tiʼ tul u Kriisto. Pet atichetz vet u Kriisto s-xoʼl, tul jit vet tetxhal laʼich imaq itxʼaʼon tiʼ inatxhax Tiuxh. 35Echetze u vatin sexoʼl, tan ech vatin, eche u aj tzʼaloʼm. Pet il inqʼa qʼij tuleʼ uvaʼ laʼ eesal el in sexoʼl. Bʼantan yaʼnetze laʼ utxh vet imaqt tibʼ inqʼa nik itxhus tibʼ sinkʼatza tiʼ itxʼaʼon tiʼ inatxhax Tiuxh, —xeʼt Jesuus.
36Tul ech kaʼt u yol uvaʼ txumbʼalimal talt Jesuus s-eche: —Yeʼxhabʼil invaʼq laʼ jakʼun tzaan inbʼeeq akʼ kʼoj, tul laʼ ikʼoa ok tiʼ invaʼq oʼtla oksaʼm. Tan oq ech laʼ ibʼane, tul antxh vet u akʼla kʼoj laʼ litxʼon vet u oksaʼm. Tan jitoq laʼ ikʼul tibʼ u akʼla kʼoj tuchʼ u oʼtla oksaʼm.{*}#5.36 ¿Kam nik elkaʼp u yol tal quBʼaal Jesuus tiʼ u oʼtla oksaʼm tuchʼ u akʼla kʼoj? U oʼtla oksaʼm, tan aʼ nik elkaʼpun u oʼtla txumbʼal tiʼ inimal inqʼa bʼekʼbʼal uvaʼ tal ka quBʼaal Tiuxh te Moisees. Tan chianaʼqich kuxh te inqʼa tij imam Israeel vinimal inqʼa oʼtla bʼekʼbʼal. Pet u akʼ kʼoj, tan aʼ nik elkaʼpun tiʼ inqʼa akʼla txumbʼal ul tal quBʼaal Jesuus xoʼl inqʼa xaol. ¿Kam nik elkaʼp vilitxʼt u akʼla kʼoj u oʼtla oksaʼm? Aʼ nik elkaʼpun, tiʼ uvaʼ jit nal laʼ tok vet inqʼa iqʼesal uqʼeʼybʼal tiʼ inimal kam uvaʼ ul tal quBʼaal Jesuus, tan chianaʼqichaq vet s-te vinimal inqʼa oʼtla bʼekʼbʼal.
37Atz jitoq laʼ utxhi uvaʼ, aʼ laʼ aqʼaxik kuʼ u taʼl uuva uvaʼ yaʼnaq kuxh ipotxhʼox el, tuul invaʼq oʼtla tzʼuʼm, u tatibʼ aʼ. Tan oq ech laʼ ibʼane, tul laʼ rinp vet u tzʼuʼm taʼn. Tan laʼ iqʼuʼ vet tibʼ u taʼl uuva tuul u tzʼuʼm, tul laʼ motx vet el u qʼuʼich taʼl uuva s-tuul. Tul laʼ yan vet u oʼtla tzʼuʼm, atz yeʼ laʼ bʼanbʼel veteʼ.{*}#5.37 ¿Kam nik elkaʼp u oʼtla tzʼuʼm? Aʼ nik elkaʼpun tiʼ inqʼa tij imam Israeel uvaʼ, aʼ kuxh chianaʼq s-te inimal inqʼa oʼtla bʼekʼbʼal. Xaʼtetze tal quBʼaal Jesuus uvaʼ jit nal laʼ ichian s-te inimal u akʼla txumbʼal uvaʼ ul tal quBʼaal Jesuus. Pet koq u akʼla tzʼuʼm, tan aʼ nik elkaʼp tiʼ inqʼa xaol, inqʼa nikich motx ixeʼt vet tiʼ inimal inqʼa akʼla txumbʼal uvaʼ ul tal quBʼaal Jesuus. ¿Kam nik elkaʼp u taʼl uuva uvaʼ nimal vet qʼij ipotxhʼox el? Aʼ nik elkaʼp tiʼ u oʼtla txumbʼal tiʼ inimal inqʼa oʼtla bʼekʼbʼal uvaʼ tal quBʼaal Tiuxh te Moisees. Pet koq u taʼl uuva, uvaʼ yaʼnaqxh ipotxhʼox el, tan aʼ nik elkaʼp tiʼ u akʼla txumbʼal uvaʼ yaʼnxh ul ipaxsa quBʼaal Jesuus xoʼl inqʼa niman tetz. Tan tira jalelich tibʼ u akʼla txumbʼal uvaʼ nikich itxhus quBʼaal Jesuus tuchʼ u txumbʼal uvaʼ nikich itxhus inqʼa qʼesal uqʼeʼybʼal xoʼl inqʼa tij imam Israeel. 38Pet aʼ laʼ aqʼaxik kuʼ u taʼl uuva, uvaʼ yaʼnaq kuxh ipotxhʼox el, tuul invaʼq akʼla tzʼuʼm. Echetz laʼ itxakune u taʼl uuva; atz laʼ txakun u tzʼuʼm inpaqte. 39Tan jabʼil xaol uvaʼ chianaʼq tukʼal qʼuʼich taʼl uuva s-te, uvaʼ naʼy ipotxhʼox el, tul laʼ koq isaʼ tukʼal u taʼl uuva uvaʼ yaʼn ipotxhʼox el. Tan ech laʼ tal s-eche: «Oqxh ichiʼl u naʼyla qʼuʼich taʼl uuva,» toq taleʼ, —xeʼt Jesuus.
လက္ရွိေရြးခ်ယ္ထားမွု
Luk 5: ixlC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2016, Wycliffe Bible Translators, Inc. All rights reserved.