Luk 6
6
Uvaʼs pal itxʼitt inqʼa nikich itxhus tibʼ kʼatz quBʼaal Jesuus vivatz inqʼa triigo tu xeem qʼij saavado
Tio 12.1-8; Kuxh 2.23-28
1Echetz ibʼane paqul t-val u xeem qʼij saavado uvaʼs ipal Jesuus xoʼl inqʼa triigo tuchʼ inqʼa nikich itxhus tibʼ s-kʼatza. Tan motx xeʼtaq vet tiʼ itxʼitix ivatz inqʼa triigo. Atz icheʼuaq vet el tiʼ siqʼabʼ. Tul motx xeʼtaq vet tiʼ ikʼuxuxeʼ.
2Nikichetz kuxh motx isaqil taʼn jolol inqʼa fariseeo, tul ech tal inqʼa fariseeo te inqʼa nikich itxhus tibʼ kʼatz Jesuus s-eche: —¿Kam s-tiʼil nik etxʼit inqʼa triigo tu xeem qʼij saavado? Tan yeʼ nik ikuy u qubʼekʼbʼal uvaʼ ech laʼ bʼanaxe tu xeem qʼij saavado, —xeʼtaqe.
3Yaʼne ech tal Jesuus s-eche: —Yeʼetzebʼ nik ibʼen sete uvaʼs nik esikʼlet tuul viyolbʼal quBʼaal Tiuxh uvaʼ tzʼibʼamal ka tiʼ kame uvaʼ ibʼan Daviid tuchʼ inqʼa imol uvaʼs motx ikam t-vaʼy.{*}#6.3 ¿Kam s-tiʼil kantxhaq vitxʼitix vivatz inqʼa triigo vatz inqʼa fariseeo tu xeem qʼij saavado? Tiʼ uvaʼ tan, jeqbʼamalich tzaan val u bʼekʼbʼal taʼn inqʼa kʼuy imam uvaʼ txaj laʼ bʼanax invaʼq aqʼon tuulbʼal u xeem qʼij saavado. Tan aqʼon vet vitxʼitix u triigo vatz inqʼa fariseeo. Pet at jolol aqʼon uvaʼ laʼich utxh ibʼanax tuulbʼal u xeem qʼij saavado, oq uvaʼ yeʼ kuxh taqla laʼ uli, jankʼal eche teesal invaʼq avan viʼ txhiko, atz maq ibʼen invaʼq avan t-jul. Tul nikichetz ikuy inqʼa fariseeo qʼaoq. Atz nikichat ikuy inqʼa fariseeo isolox el tiʼ kam invaʼq etxhbʼubʼal uvaʼ yek laʼ etxhbʼuli. Pet aloq yeʼ nikich ikuy tutxh mam aqʼon tuulbʼal u xeem qʼij saavado, jankʼal eche tok xamal tiʼ ibʼanax tutxh tetxhbʼubʼal. Nikichetz ikuy u bʼekʼbʼal itxʼitix vivatz u triigo oq uvaʼ nikich ikam invaʼq xaol t-vaʼy, eche uvaʼ motx ibʼan inqʼa nikich itxhus tibʼ kʼatz Jesuus. Leviitiko 24.7-9 4Tan paloʼk Daviid tuul viqʼanalil u bʼuʼq tostiuxh. Tul ex ijaq Daviid inqʼa paan te inqʼa oksan yol vatz Tiuxh, inqʼa paan uvaʼ maʼtich toksal vet vatz quBʼaal Tiuxh s-tetz natxhkʼuulabʼal. Tul itxʼaʼ Daviid inqʼa paan. Atz taqʼ Daviid tetz inqʼa imol, inqʼa txhʼuyich s-tiʼ. Tul atz yeʼ nikich ikuy u bʼekʼbʼal uvaʼ ech laʼich ibʼan Daviide. Pet taʼn kuxh inqʼa oksan yol vatz Tiuxh atich tokebʼal tiʼ itxʼaʼaxeʼ, —xeʼt Jesuus.
5Atz echat tal Jesuus s-eche: —Echatetz kuxh ine, in, u Kʼaola uvaʼ qat bʼen in s-alam aanima. Tan at vet viqleʼm tiʼ talax kam laʼ ibʼan inqʼa nik itxhus tibʼ sinkʼatza tu xeem qʼij saavado, —xeʼt Jesuus te inqʼa fariseeo.
Uvaʼs ibʼant quBʼaal Jesuus bʼaʼn iqʼabʼ val u vinaq tu xeem qʼij saavado
Tio 12.9-14; Kuxh 3.1-6
6Antetzxh tuulbʼal invaʼt u xeem qʼij saavado, tul paloʼk Jesuus t-invaʼt u kʼulbʼal tibʼ inqʼa tij imam Israeel. Tul xeʼt vet Jesuus txhusun xoʼl inqʼa xaol. Atichetz val u vinaq tzitzi uvaʼ kʼoxhiʼxich kuxh paqʼil iqʼabʼ, visebʼal. 7Tul nikich kuxh isaqil Jesuus taʼn jolol inqʼa fariseeo, atz taʼn jolol inqʼa nikich txhusun ibʼekʼbʼal inqʼa qumol s-tijaq imam Israeel. Tul aʼichaq isaʼ tiltaʼ, oq laʼich ibʼan Jesuus bʼaʼn u vinaq tuulbʼal u xeem qʼij saavado, echetz laʼich motx itxhej iyole tiʼ ixotxhox Jesuus.
8Poro tootzaqich vet Jesuus titzʼabʼal inqʼa xaol inqʼae. Tul ech tal Jesuus te u vinaq, uvaʼ kʼoxhiʼxich paqʼil iqʼabʼ, s-eche: —Txakpen. Tul avul s-quxoʼl, —xeʼt Jesuus s-te.
Yaʼne bʼen vet ok u vinaq txakeʼvoq xoʼl inqʼa xaol. 9Tul ech tabʼi Jesuus te inqʼa iqʼesal s-eche: —Toq vabʼi val u yol sete: ¡Nik kol ikuy inqʼa qubʼekʼbʼal uvaʼ laʼ qubʼan bʼaʼnil te invaʼq xaol tu xeem qʼij saavado! Pet ¡maq aʼ, u yeʼbʼaʼn, laʼ qubʼana! ¡Laʼ kuxh quvatzi ikam invaʼq xaol; pet maq laʼ qutxum u qʼij isaq! —xeʼt Jesuus.
10Tul yeʼxhabʼil invaʼq tzaqʼbʼi. Yaʼne itiila saqi Jesuus ivatz inqʼa xaol. Tul ech tal Jesuus te u vinaq s-eche: —¡Jikbʼa vaqʼabʼ! —xeʼt Jesuus.
Tul ijikbʼa vet u vinaq viqʼabʼ. Tul yekich ibʼan vet bʼaʼn viqʼabʼ u vinaq inpaqte.
11Yaʼne motx lakp vet iviʼ inqʼa fariseeo tuchʼ inqʼa nikich txhusun ibʼekʼbʼal inqʼa tij imam Israeel. Tul xeʼtaq vet tiʼ iyolox s-vatzaq kam laʼich ulbʼel Jesuus taʼn.{*}#6.11 ¿Kam s-tiʼil yeʼ nikich ibʼan te inqʼa fariseeo vibʼant quBʼaal Jesuus bʼaʼn inqʼa yaabʼ tu xeem qʼij saavado? Tan aʼ nikich motx titzʼa inqʼa fariseeo uvaʼ mam aqʼon nikich ibʼan quBʼaal Jesuus s-vatz tiʼ ibʼanax bʼaʼn invaʼq yaabʼ. Tul yeʼetz nikich ikuy vibʼekʼbʼal quBʼaal Tiuxh ibʼanax invaʼq nimla aqʼon tuulbʼal u xeem qʼij saavado s-vatz. Pet aloq kaqaay koqxh nikich motx ibʼanvat uvaʼ yeʼ nik ikuy ibʼanax vaʼq tal aqʼon. Pet at imol uvaʼ ootzaqimal taʼn, tul nikich ikuy s-te ibʼant invaʼq aqʼon. Pet nikich kuxh motx itxhiʼan tiʼ quBʼaal Jesuus, tan mamala xaol txhʼuyich s-tiʼ, atz mamala kaebʼal aanima nikich ibʼan quBʼaal Jesuus. Pet ech koq inqʼa fariseeo, tan yeʼxhkam invaʼq kaebʼal aanima nikich motx ibʼaneʼ. Tul yeʼxh jankʼal xaol txhʼuyichaq s-tiʼ. Echetz s-tiʼile txhiʼanyaqichxh vet tiʼ quBʼaal Jesuus.
Uvaʼs taqʼt quBʼaal Jesuus tiqleʼm kabʼlaval inqʼa nikich itxhus tibʼ s-kʼatza tiʼ ipaxsal inqʼa bʼaʼnla txhaq yol tiʼ quBʼaal Jesuus
Tio 10.1-4; Kuxh 3.13-19
12Antetzxh tuulbʼal inqʼa qʼij inqʼae, tul bʼen Jesuus t-val u vitz tiʼ inatxhax Tiuxh. Tul vaʼlxh aqʼbʼal inatxh Jesuus quBʼaal Tiuxh tzitzi. 13Echetz vet eqal s-qʼiil, tul motx isaʼ tzaan Jesuus inqʼa nikich itxhus tibʼ s-kʼatza. Tul itxaj vet el Jesuus kabʼlaval inqʼa vinaq s-xoʼl. Tul motx taqʼ vet Jesuus tiqatz tiʼ tok s-paxsan tetz inqʼa bʼaʼnla txhaq yol tiʼ Jesuus. 14Aʼetz ibʼij inqʼa bʼen siapoostol Jesuus inqʼaa: Simoon, uvaʼ toksa Jesuus vaʼt ibʼij s-Luʼ, Lixh, uvaʼ antxh titzʼinich Luʼ, Jakoovo, vikʼaol Sevedeeo, Xhun, Piʼl, Tuʼl, 15Tio, Maxh, Jakoovo, vikʼaol Alfeeo, Simoon, uvaʼ atich ok xoʼl inqʼa bʼanol txhʼaʼo tiʼ vitenam, 16Juudas, u titzʼinich vaʼt Jakoovo, tuchʼ vaʼt u Juudas, u aj Karioote, uvaʼ oksan Jesuus tiqʼabʼ inqʼa iqʼesal uqʼeʼybʼal.
Uvaʼs ibʼant quBʼaal Jesuus bʼaʼn mamala yaabʼ vatz inqʼa nikich itxhus tibʼ s-kʼatza
Tio 4.23-25
17Kuʼetz vet ul Jesuus viʼ u vitz tuchʼ kabʼlaval inqʼa iapoostol, inqʼa paxsan tetz inqʼa bʼaʼnla txhaq yol tiʼ Jesuus, tul atinaq vet t-val u txhaqʼaala. Tul aʼ atink tal uvaʼ atich vet jolt inqʼa nikich itxhus tibʼ kʼatz Jesuus, atz tal uvaʼ nikich txʼebʼonk mamala xaol. Tan tal kuxh tzajnaʼqlich inqʼa xaol. Atich aj Judeea, aj Jerusaleen, aj Tiiro tziʼ maar, aj Sidoon. Tan aʼichaq isaʼ inqʼa xaol tabʼit inqʼa iyol Jesuus. Atz at inqʼa xaol oybʼaliche. Tul aʼaqich isaʼ ibʼant bʼaʼn taʼn Jesuus. 18Atetz inqʼa xaol inqʼa nikich ikʼaxbʼisal taʼn demoonio, tul yek nikich ibʼan bʼaʼn taʼn Jesuus. 19Tul mamala xaol nikich saʼon ikanax Jesuus, tan atich tiqleʼm Jesuus taʼn quBʼaal Tiuxh tiʼ ibʼanax bʼaʼn inqʼa yaabʼ s-kaqaayil.
Uvaʼs iyolon quBʼaal Jesuus xoʼl inqʼa nikich itxhus tibʼ s-kʼatza
Tio 5.1-12
20Yaʼne isaqi Jesuus inqʼa nikich itxhus tibʼ s-kʼatza. Tul ech tal Jesuus s-xoʼl s-eche:
—At vibʼaʼnil quBʼaal Tiuxh setiibʼa
ex, inqʼa nik natxhon tetaanxelal
uvaʼ atel vibʼaʼnil quBʼaal Tiuxh
nik isaʼon sete nik enatxheʼ.
Tan aʼetz exe, uvaʼ toq ibʼan quBʼaal Tiuxh
iqʼesalil tetaanima.
21At vibʼaʼnil quBʼaal Tiuxh setiibʼa
ex, inqʼa ayaʼlxh ekʼuul nik esaʼ
kam uvaʼ laʼ taqʼ quBʼaal Tiuxh sete,
eche nik ivaʼy vaʼq xaol.
Tan aʼl laʼ eleqt tel vinuqul
kʼatz quBʼaal Tiuxh,
eche nik inoj vaʼq xaol taʼn u txʼix.
At vibʼaʼnil quBʼaal Tiuxh setiibʼa
ex, uvaʼ nik etoqʼ vatz quBʼaal Tiuxh.
Tan xamtel laʼ chiibʼ ex
taʼn quBʼaal Tiuxh.
22At vibʼaʼnil quBʼaal Tiuxh setiibʼa
ex, uvaʼ laʼ txhiʼkʼuulal ex.
Atz yeʼ laʼ saʼax ex.
Atz laʼ eesal eqʼij.
Atz laʼ tal ex inqʼa xaol
s-yeʼbʼaʼn tiʼ eqejt in,
in, u Kʼaola uvaʼ qat bʼen s-alam aanima.
23Oqetz ech laʼ ulbʼel exe,
tul yeʼl ex laʼ txumun ex,
pet laʼ kuxh chiibʼ ex.
Tan niimxh u txʼaqaʼm
uvaʼ laʼ bʼen etil
tu amlikaʼ.
Tan echat kuxh motx teesal
iqʼije
inqʼa qʼexsanich tetz viyol
quBʼaal Tiuxh s-naʼya
taʼn inqʼa kʼuy emam,
inqʼa tij imam Israeel,
inqʼa yeʼ motx niman
inqʼa qʼexsanich tetz
viyol quBʼaal Tiuxh.
24Pet txumlebʼalxh evatz,
ex, inqʼa txʼiol iqʼij,
tan tulxh u kʼaxkʼo setiibʼa.
Tan tzitza kuxhte
vatz txʼavaʼ
toq etilvat u bʼaʼnil.
25Atz txumlebʼalxh evatz,
ex, inqʼa tzʼeqelxh etatin
vatz quBʼaal Tiuxh
nik enatxheʼ,
tan tulxh u kʼaxkʼo setiibʼa.
Tan aʼ, yeʼ nik ibʼen sete,
kam tele
uvaʼ nik isaʼ quBʼaal Tiuxh
sete.
Atz txumlebʼalxh evatz,
ex, inqʼa chiibʼiy kuxh ex
s-txheel,
poro xamtel laʼ kʼayun ex,
atz laʼ oqʼ ex
taʼn mam txumlebʼal.
Tan tulxh u kʼaxkʼo setiibʼa.
26Atz txumlebʼalatxh evatz,
ex, inqʼa nik toksal eqʼij
taʼn inqʼa xaol
kʼuxh jit aʼ vinuqul nik etaleʼ,
tan tulxh u kʼaxkʼo setiibʼa.
Tan echat kuxh uvaʼe,
nikich ibʼan inqʼa kʼuy
emam tiʼ toksal iqʼij
inqʼa nikich tal tibʼ
s-qʼexsanich tetz
viyol quBʼaal Tiuxh,
pet jit aʼ vinuqul nikich taleʼ.
Uvaʼs talt quBʼaal Jesuus uvaʼ tetxhal laʼ isaʼ inqʼa niman tetz Jesuus inqʼa xaol, inqʼa nik txhiʼkʼuulan
Tio 5.38-48; 7.12
27Pet jatvaʼl ex inqʼa nik abʼin vinyol, toq val sete: Saʼvaq inqʼa xaol, inqʼa nik itxhiʼan setiʼ. Atz bʼanvaq u bʼaʼn te inqʼa xaol, inqʼa nik iyan ivatz sete. 28Tul jaqtaq bʼaʼnil tiibʼa inqʼa xaol, inqʼa nik yoqʼon ex. Tul natxhvaq Tiuxh tiʼ inqʼa nik kʼaxbʼixsan ex. 29Oqetz jaʼl laʼ qʼoson paqʼoq txala etziʼ, tul yeʼl ichʼexel laʼ etaqʼa. Pet aʼl laʼ esutxhqʼit ok inpaqʼite. Atz oq jaʼl laʼ maon vetxhas oksaʼm sete, tul ant vetoksaʼm tetz vatz etxhiʼoʼl laʼ etaqʼ s-te. 30Oq jaʼl invaʼq uvaʼ laʼ jaqon invaʼq kam sete, aqʼtaq s-te. Atz oq jaʼl laʼ iqʼon invaʼq kam etetz, tul yeʼ laʼ ejaq vet s-te. 31Kametzxh uvaʼ nik esaʼe laʼ bʼanax sete taʼn inqʼa xaol, tul aʼetz uvaʼ, laʼ ebʼane te inqʼa xaol.
32Pet oq taʼn kuxh nik esaʼ inqʼa xaol uvaʼ nik saʼon ex, tul kametz koq etxʼaqaʼm laʼ taqʼ quBʼaal Tiuxh s-tiʼ. Tan echat kuxh uvaʼe nik ibʼan inqʼa aj paʼvom s-vatzaq, inqʼa yeʼ nik qeon quBʼaal Tiuxh. Tan nikaq motx isaʼ tibʼ s-vatzaq, tul taʼn kuxh nik isaʼ inqʼa nik saʼon. 33Atz oq taʼn kuxh nik ebʼanvat bʼaʼnil te inqʼa xaol, uvaʼ nik bʼanon bʼaʼnil sete, tul kametz koq laʼ ekʼul te quBʼaal Tiuxh s-tiʼ. Tan echat kuxh uvaʼe, nik ibʼan inqʼa xaol s-vatzaq, inqʼa yeʼ nik qeon quBʼaal Tiuxh. 34Atz oq taʼn kuxh laʼ etaqʼvat invaʼq kam etetz s-kʼam te invaʼq xaol, uvaʼ at nik etil s-tiʼ, tul kametz koq laʼ ekʼul te quBʼaal Tiuxh s-tiʼ. Tan echat kuxh uvaʼe, nik ibʼan inqʼa xaol s-vatzaq, inqʼa yeʼ nik qeon quBʼaal Tiuxh. Tan nikat taqʼ kamaq tetz s-kʼam te vimol, poro at nik til s-tiʼ.
35Pet ech koq ex, tan saʼvaq inqʼa xaol, inqʼa nik itxhiʼan setiʼ. Tul kʼutxhvaq u bʼaʼnil s-te. Atz aqʼvaq kam etetz ikʼameʼ. Tul yeʼl kʼambʼal tetz laʼ etabʼi s-te. Oqetz ech laʼ ebʼane, tul aʼetz u quBʼaal Tiuxh laʼ aqʼon val u nimla txʼaqaʼm sete. Echetz laʼ ekʼutxhte uvaʼ, ex vet kʼaol imeʼal u quBʼaal Tiuxh uvaʼ sibʼ at jaʼp t-amlikaʼ. Tan at vibʼaʼnil quBʼaal Tiuxh tiibʼa inqʼa xaol, inqʼa yeʼ nik aqʼon taʼntiuxh te quBʼaal Tiuxh, atz inqʼa nik bʼanon u yeʼbʼaʼn. 36Pet oybʼavaq ivatz inqʼa xaol, eche uvaʼ nik toybʼat quBʼaal Tiuxh evatz.
Uvaʼs itxhust quBʼaal Jesuus inqʼa xaol, tiʼ uvaʼ yeʼ laʼ iyol tibʼ s-vatzaq
Tio 7.1-5
37Yeʼl vipaʼv vemol laʼ etaleʼl uvaʼ nik etileʼ, tul echatetz yeʼ laʼ talt quBʼaal Tiuxh vepaʼve sete. Atz yeʼl iqʼij vemol laʼ eteesa tiʼ vipaʼv, tul echatetz yeʼ laʼ teesal eqʼije taʼn quBʼaal Tiuxh. Pet kuyvaq ipaʼv vemol kam uvaʼ nik ibʼan sevatz, tul echatetz laʼ ikuyt quBʼaal Tiuxhe vepaʼv. 38Lotxhvaq emol, echatetz laʼ elotxhoxe taʼn quBʼaal Tiuxh. Tan aʼl sibʼ laʼ ilotxh vet ex quBʼaal Tiuxh, eche laʼ ibʼan vaʼq xaol uvaʼ tzʼeqelxh laʼ ipajt taqʼax invaʼq kam etetz. Atz aʼl laʼ ipitxhʼt tel bʼen tuul invaʼq atibʼal. Atz aʼl laʼ itiʼnsat u atibʼal tiʼ ibʼen tel bʼitoʼq s-tuul. Atz aʼl laʼ itilp tel el s-tiibʼa laʼ ibʼana. Tan jankʼalxh uvaʼ laʼ ebʼan te inqʼa xaol, tul antetzxh uvaʼe, laʼ ibʼan quBʼaal Tiuxh sete, —xeʼt Jesuus.
39Tul ech vaʼt u txhusbʼal uvaʼ txumbʼalimal talt Jesuus s-eche: —Yeʼ laʼ ebʼan etetz, eche uvaʼ nik etil kʼatz inqʼa iqʼesal uqʼeʼybʼal. Tan echaq tatin, eche invaʼq tzot. Tan yeʼ laʼ utxhi uvaʼ antxh invaʼq tzot laʼ txhʼiqin invaʼt imol s-tzotil. Tan oq ech laʼ ibʼane, tul tzum kuxh laʼ motx ibʼen t-jul s-kaʼbʼil. 40Atz eche invaʼq xaol, uvaʼ yaʼn nik itxhus tibʼ, tan aʼ koq u txhusul ibʼ palnaʼq tootzaqibʼal viʼ u txhusul tetz. Pet oq laʼ iyaʼlu tibʼ tiʼ itxʼakt vitxhusbʼal, tul eelaetz kuxh vete viqʼanbʼ tuchʼ u txhusul tetz laʼ ibʼana. Echetz aʼ, etil, kam uvaʼ nik inkʼutxh sevatz. Tan in txhusul etetz.
41Tul yeʼ laʼ isaʼa uvaʼ, aʼ laʼ etil u tal paʼv uvaʼ nik ibʼan vemol, tul aʼ yeʼ nik etil u nimla paʼv uvaʼ nik ebʼaneʼ, eche tilt u xaol vaʼq tal chʼis tivatz vimol, tul aʼ yeʼ nik til u potzoʼm uvaʼ atoʼk tu tetz. 42Tul yeʼ laʼ isaʼa ech laʼ etal te vemol s-eche: «Paʼve uvaʼ nik abʼaneʼ,» chaq ex s-te. Tul jit aʼ bʼaxa nik etanbʼa u paʼv uvaʼ nik ebʼaneʼ. Eelaatetze tuchʼ u xaol uvaʼ: «Toq veesa u chʼis tavatz,» chaq te vimol, tul aʼ yeʼ nik teesa el u potzoʼm uvaʼ atoʼk tu tetz. Oqetz ech uvaʼe nik ebʼane, tul bʼan vatzetz kuxh exe. Pet aʼ bʼaxa etanbʼa u paʼv uvaʼ nik ebʼaneʼ, echetz laʼ utxh vet etalte te vemol tiʼ itanbʼat u paʼv.
Uvaʼs ibʼant quBʼaal Jesuus eela inqʼa xaol tuchʼ viʼoq tzeʼ uvaʼ, aʼ vivatz laʼ aqʼon ootzaqiloq
Tio 7.15-20
43Echatetz tatin inqʼa xaol, eche inviʼoq tzeʼ. Tan jabʼiste u tzeʼ uvaʼ kantxhaq vivatz nik taqʼeʼ, tul kantxhaqla tzeʼetze u tzeʼ. Pet jabʼiste u tzeʼ uvaʼ bʼaʼn vivatz nik taqʼeʼ, tul bʼaʼnla tzeʼetze u tzeʼ. 44Tan aʼ laʼ iltxhik vet u tzeʼ tiʼ vivatz oq bʼaʼn, atz maq kantxhaq u tzeʼ. Tan iigo koq vivatz u chʼiʼx laʼ taqʼa, atz uuva koq laʼ taqʼ inpaqte. 45Echatetz uvaʼe, laʼ tilix u xaol tiʼ vitxumbʼal uvaʼ nik ibʼaneʼ. Tan aʼ viyolon laʼ kʼutxhun kam uvaʼ at tu taanima. Tan oq bʼaʼnla xaol, tul aʼetz u bʼaʼnil, laʼ ikʼutxha. Eche vaʼq kaaxha uvaʼ kolel kuʼ txʼijbʼal qʼij s-tuul. Pet oq kantxhaqla xaol u xaol, tul aʼetz u kantxhaqe laʼ ikʼutxha. Tan jabʼiste uvaʼ at tu taanima u xaol, tul aʼ uvaʼe, nik ijaʼul, tul nik teluʼl titziʼ.
Uvaʼs ibʼant quBʼaal Jesuus eela inqʼa xaol tuchʼ kaʼvaʼl u kuʼebʼ ixeʼ otzotz
Tio 7.24-27
46Kam koq eloq s-te kʼuxh ech nik etal s-ve s-eche: «Axh quBʼaal, axh quBʼaal,» kʼuxh chich ex, tul oq yeʼ nik ebʼaneʼ kam uvaʼ nik val sete. 47Tan jaʼl u xaol uvaʼ nik txhokon in, tul nik tabʼi inqʼa inyol, atz nik inima, toqetz val sete kam eela s-tuchʼ. 48Tan eela tuchʼ val u vinaq uvaʼ bʼaxa ikʼot jul uvaʼ sibʼ bʼeni, tetxhal ikoʼp kʼatz val u sivan tiʼ taqʼax jaʼ u totzotz. Aʼetz vet u sivan taqʼ ka jaqʼ vixeʼ u totzotz. Uletz vet val u mam kaqiqʼ jabʼal, tul el vet inqʼa aʼ. Aʼetz ul tajsavat ok tibʼ viyakʼil u aʼ tiʼ u otzotz, poro yeʼl u aʼ oleʼv tiʼ itiʼnsal u otzotz. Tan txhabʼamich itzaj ixeʼ u otzotz viʼ u sivan.
49Pet jaʼl u xaol uvaʼ nik abʼin vinyol, tul yeʼ nik inima kam uvaʼ nik valeʼ, eelaetze tuchʼ vaʼt u vinaq uvaʼ, aʼ kuxh ibʼitvat jaʼ u totzotz viʼ txʼavaʼ. Tul yeʼ taqʼ kaj sivan jaqʼ vixeʼ u totzotz. Uletz vet val u mam kaqiqʼ jabʼal, tul el vet inqʼa aʼ. Aʼetz ul tajsavat ok tibʼ viyakʼil u aʼ tiʼ u otzotz, tul nal kuxh ikoʼp vet u otzotz. Tul tira mam yol isotz vet el u otzotz, —xeʼt Jesuus.
လက္ရွိေရြးခ်ယ္ထားမွု
Luk 6: ixlC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2016, Wycliffe Bible Translators, Inc. All rights reserved.