Luk 9
9
Uvaʼs itxhaqt quBʼaal Jesuus kabʼlaval inqʼa nikich itxhus tibʼ s-kʼatza tiʼ ipaxsal inqʼa bʼaʼnla txhaq yol
Tio 10.5-15; Kuxh 6.7-13
1Yaʼne imol Jesuus kabʼlaval inqʼa nikich itxhus tibʼ s-kʼatza. Tul taqʼ Jesuus iyakʼil, atz taqʼ Jesuus tiqleʼm tiʼ itukil el jatvatzulxh demoonio t-taanima inqʼa xaol, atz tiʼ ibʼant bʼaʼn inqʼa yaabʼ. 2Tan laʼich motx itxhaq bʼen Jesuus tiʼ ipaxsal inqʼa bʼaʼnla txhaq yol tiʼ ibʼant quBʼaal Tiuxh iqʼesalil kʼatz inqʼa xaol, atz tiʼ ibʼant bʼaʼn inqʼa yaabʼ.
3Tul ech tal Jesuus te inqʼa nikich itxhus tibʼ s-kʼatza s-eche: —Yeʼxhkam invaʼq kam laʼ etiqʼo tetz tiʼ ebʼey: Jitoq vaʼq ebʼaara; jitoq invaʼq etxʼuʼy laʼ etaqʼ bʼen viʼ etxhelebʼ; jitoq etxʼix; jitoq epuaq; atz jitoq vaʼtoʼq etoksaʼm laʼ etiqʼo. 4Atz jabʼiste otzotz laʼ aqʼbʼik ex, tul aʼ laʼ atink ex tzitzi, tetxhal laʼ nal el tzaan ex tu tenam uvaʼe. 5Atz tal invaʼq tenam uvaʼ yeʼ laʼ kʼuluxik ex, tul yek laʼ qʼaʼv ex. Poro laʼ etichu ka inqʼa poqoq tetoq vatz inqʼa xaol, s-kʼutxhbʼal tetz uvaʼ, aʼ vet u kʼaxbʼichil laʼ bʼenk inqʼa xaol taʼn quBʼaal Tiuxh, —xeʼt Jesuus.
6Yaʼne bʼen vet kabʼlaval inqʼa nikich itxhus tibʼ kʼatz Jesuus tuulbʼal inqʼa talaq tenam s-kaqaayil. Tul tal kuxh nikich motx ipaxsavat inqʼa bʼaʼnla txhaq yol tiʼ Jesuus. Atz nikich motx ibʼan bʼaʼn inqʼa yaabʼ t-junun tenam, atz kʼuxh talxh tenam.
Uvaʼs isotz ikʼuul Eroodes Antiipas, tan yeʼ nikich ibʼen s-te jaʼlich quBʼaal Jesuus
Tio 14.1-12; Kuxh 6.14-29
7Tabʼietz vet Eroodes itziulal inqʼa yol uvaʼ nikich ibʼan Jesuus tuchʼ inqʼa nikich itxhus tibʼ s-kʼatza, tul nikich kuxh isotz vet ikʼuul Eroodes s-tiʼ jaʼl nikich bʼanon inqʼa kam. Tan at xaol uvaʼ ech nikich tal s-eche: —Qat itzʼeʼvy Xhun inpaqte. Tul Xhun vete uvaʼ nik bʼanon inqʼa kam inqʼae, —chichichaqe. 8Atz at xaol ech nikich tal s-eche: —Il Eliias uy inpaqte, —chichich inqʼa xaol. Atz at txhan xaol ech nikich alon s-eche: —Aʼebʼ vaʼq inqʼa qʼexsanich tetz viyol quBʼaal Tiuxh s-naʼya qat itzʼeʼvy inpaqte, —chichichaq tiʼ Jesuus.
9Yaʼne ech tal Eroodes s-eche: —¿Jaʼlebʼ kuxh val uvaʼ mamala kam nik ibʼaneʼ, nik vabʼi talaxeʼ? Tan bʼekʼel vet teesal iviʼ Xhun vaʼn. Jitetz Xhune uvaʼ nik bʼanon inqʼa kam, nik valeʼ, —xeʼt Eroodes. Echetz yaʼlichxh vet Eroodes tiʼ tootzaqil Jesuus.{*}#9.9 Eroodes Antiipas uvaʼ nik tal tzitza, tan aʼetz Eroodese, vikʼaol qʼes u Eroodes uvaʼ bʼekʼon iyatzʼax el inqʼa nitxaʼ tu Veleen, eche uvaʼ nik tal tu Tio 2.13-20.
Uvaʼs inaʼsat quBʼaal Jesuus kaʼl u paan tuchʼ kaʼt u txay tiʼ itzuqbʼel oʼvaʼl mil (5,000) xaol
Tio 14.13-21; Kuxh 6.30-44; Xhun 6.1-14
10Yaʼne qʼaʼv vet inqʼa iapoostol Jesuus inpaqte, inqʼa itxhaqa. Tul motx tal vet ok te Jesuus kam inqʼa ex ibʼaneʼ. Tul tiqʼo vet el Jesuus inqʼa iapoostol xoʼl inqʼa xaol s-jetxhel el. Tul ok vet bʼen Jesuus s-tuchʼ t-val u vaarko, tul yekichaq vet t-val u txʼavaʼ uvaʼ yeʼl xaol s-tuul, uvaʼ naqlich kuxh al kʼatz u tenam uvaʼ Vetsaaida ibʼij. 11Tabʼietz vet inqʼa xaol tal uvaʼ bʼenk Jesuus, tul okaq vet bʼen tiʼ Jesuus. Tul aqʼbʼaq vet tal uvaʼ atich Jesuus. Tul josqʼilxh ikʼult Jesuus inqʼa xaol. Tan yeʼl Jesuus nikich ipal ikʼuul te inqʼa xaol. Tul nikich tal Jesuus vibʼant quBʼaal Tiuxh iqʼesalil t-taanima inqʼa xaol. Tul ibʼan Jesuus bʼaʼn inqʼa yaabʼ.
12Bʼiitichetz kuxh vet iqʼeqxeʼ, tul motx ijetxh vet tzaan tibʼ kabʼlaval inqʼa nikich itxhus tibʼ kʼatz Jesuus. Atz ulaq kʼatz Jesuus. Tul echaq motx tal te Jesuus s-eche: —Txhaq vet bʼen inqʼa xaol. Tul bʼenaq itxhok itxʼix, atz ivatbʼal, xeʼ inqʼa xaol, inqʼa jeqlel t-inqʼa talaq tenam. Tan yeʼl txʼix, atz yeʼl vatbʼal laʼ txhej tzitza tal uvaʼ atil oʼ, —xeʼtaq te Jesuus.
13Yaʼne ech tal Jesuus s-eche: —Yeʼle. Pet antxh ex toq aqʼon itxʼix inqʼa xaol, —xeʼt Jesuus.
Tul echaq tal te Jesuus s-eche: —Poro yeʼl mamala txʼix ati. Pet oʼvaʼl kuxh vatz paan tuchʼ kaʼvaʼt vatz bʼoxich txay ati. Pet taʼn kuxh laʼ ibʼane uvaʼ laʼ bʼen quloqʼ itxʼix jankʼal inqʼa xaol inqʼaa, —xeʼtaq te Jesuus.
14Tul kamal oʼvaʼlenich mil (5,000) vinaq atiche. Tul yeʼl inqʼa ixoq ok s-atxh.
Tul ech tal Jesuus te inqʼa nikich itxhus tibʼ s-kʼatza s-eche: —Bʼanvaq ikuʼ inqʼa xaol. Tul laalavil toxkʼal (50) xaol tiʼ junun qʼuʼtzul ebʼana, —xeʼt Jesuus.
15Tul motxaq inima vet kam uvaʼ tal Jesuus. Tan ibʼekʼaq vet ikuʼ inqʼa xaol s-txhaq qʼuʼtzul.
16Yaʼne ikʼul vet Jesuus oʼvaʼl u paan tuchʼ kaʼvaʼl u bʼoxich txay. Tul saqin jaʼ Jesuus t-amlikaʼ, atz taqʼ Jesuus taʼntiuxh te quBʼaal Tiuxh s-tiʼ. Yaʼne ipil Jesuus s-tuul. Tul taqʼ vet Jesuus te inqʼa nikich itxhus tibʼ s-kʼatza. Aʼetz vet inqʼa nikich itxhus tibʼ kʼatz Jesuus, jatxon el xoʼl inqʼa xaol s-kaqaayil. 17Tul jankʼalxh inqʼa xaol motx txʼaʼoni, tetxhal motx inoj inqʼa xaol s-kaqaayil. Tul aʼl tel imolt inqʼa nikich itxhus tibʼ kʼatz Jesuus kabʼlavat xuʼk viyal u etxhbʼubʼal.
Uvaʼs talt Luʼ uvaʼ, aʼ quBʼaal Jesuus u Kriisto
Tio 16.13-20; Kuxh 8.27-30
18Paquletz uvaʼ nikich inatxh Jesuus Tiuxh t-val u txʼavaʼ uvaʼ yeʼl xaol jeqlel s-tuul, aloq atich inqʼa nikich itxhus tibʼ kʼatz Jesuus s-naqli. Tul ech tal Jesuus s-eche: —¿Jaʼletz in nik tal inqʼa xaol? —xeʼt Jesuus.
19Tul ech tal inqʼa nikich itxhus tibʼ kʼatz Jesuus s-eche: —At xaol nik alon seʼe uvaʼ, axh Xhun, u aqʼol kuʼ xaol xeʼ aʼ. Tan aʼ nik tal inqʼa xaol uvaʼ qat itzʼeʼvy Xhun inpaqte. Atz at xaol nik alon uvaʼ, axh Eliias, uvaʼ qat qʼaʼv inpaqte. Tul at xaol nik alon uvaʼ kamal axh vaʼq inqʼa qʼexsanich tetz viyol quBʼaal Tiuxh s-naʼya uvaʼ qat itzʼeʼvy inpaqte, —xeʼtaq te Jesuus.
20Yaʼne ech tal Jesuus s-eche: —Pet ¿keʼchetz ex? ¿Jaʼletz in, nik etaleʼ? —xeʼt Jesuus.
Tul ech tal Luʼ s-eche: —Aʼ axhe u Kriisto, uvaʼ tzajnaʼql kʼatz quBʼaal Tiuxh, —xeʼt Luʼ.
Uvaʼs talt quBʼaal Jesuus uvaʼ tetxhal laʼich kam quBʼaal Jesuus, tul laʼich itzʼeʼv quBʼaal Jesuus inpaqte
Tio 16.21-28; Kuxh 8.31—9.1
21Yaʼne itiila bʼekʼu ka Jesuus u yol te inqʼa nikich itxhus tibʼ s-kʼatza uvaʼ yeʼxhabʼil s-te laʼich motx talvat uvaʼ aʼich Jesuus u Kriisto. 22Tul ech tal Jesuus s-eche: —Kʼuxhetz inxh u Kʼaola uvaʼ qat bʼen in s-alam aanima, poro mij kuxh toq kaoq utxhchil s-viʼ, tiʼ inkʼaxbʼisaleʼ. Tan toq txhiʼkʼuulaloq in taʼn viqʼesal u tenam, atz taʼn inqʼa iqʼesal oksan yol vatz Tiuxh, atz taʼn inqʼa nik txhusun ibʼekʼbʼal inqʼa qumol s-tijaq imam Israeel. Tul tetxhal toq yatzʼaxoq el in. Poro titoxv qʼij, tul laʼ itzʼeʼv in inpaqte, kʼuxh maʼt inkam veteʼ, —xeʼt Jesuus.
23Yaʼne ech tal Jesuus te s-kaqaayil, inqʼa nikich abʼin u yol, s-eche: —Jaʼl ex, uvaʼ nik esaʼ etok tzaan s-viʼ tiʼ ebʼen s-niman vetz, tul aʼ isaʼ uvaʼ jit aʼ bʼenk ekʼuul tiʼ tatxhval inqʼa kam vatz u txʼavaʼ. Atz ex, yeʼ laʼ tanbʼan etxhʼuyeʼv s-viʼ jun qʼij, kʼuxhetz ech laʼ ekʼaxbʼ tiʼ etxhʼuyeʼv s-viʼ, eche nik ikʼaxbʼ vaʼq pereexho tiʼ tiqal ikurus. 24Atz jaʼl ex, uvaʼ nik saʼon ekolt u qʼij esaq vatz u kʼaxkʼo tiʼ innimaleʼ, tul aʼetz exe, uvaʼ yeʼl iyaʼebʼal imotxebʼal laʼ etzʼeqt u qʼij esaq. Pet jaʼletz ex, uvaʼ laʼ tzʼeqon u qʼij esaq tiʼ innimaleʼ, tul aʼetz exe, uvaʼ laʼ kolox u qʼij esaq taʼn quBʼaal Tiuxh vatz u kʼaxkʼo. 25Tan kam koq eloq s-te kʼuxh mam kam laʼ itxʼak invaʼq xaol vatz u txʼavaʼ oq aʼ laʼ itzʼeq u qʼij isaq u taanxelal tiʼ yeʼ inimat in. 26Tul jaʼl ex, uvaʼ laʼ chʼixv ex tiʼ etalt etibʼ s-niman vetz, atz laʼ chʼixv ex te vinyol, echatetz laʼ inchʼixve sete uvaʼs laʼ vul inpaqte tuchʼ u nimla vatineʼ, atz tuchʼ u nimla tatin vinBʼaal, atz tuchʼ u nimla tatin inqʼa loqʼola txhaq aanxel, in, u Kʼaola uvaʼ qat bʼen s-alam aanima. 27Pet nik val sete uvaʼ: At jolol ex toq etil ibʼant quBʼaal Tiuxh iqʼesalil tzitza vatz txʼavaʼ, —xeʼt Jesuus te inqʼa nikich itxhus tibʼ s-kʼatza.
Uvaʼs ijalp tilix quBʼaal Jesuus
Tio 17.1-8; Kuxh 9.2-8
28Vajxaqilichetz vet qʼij talt Jesuus inqʼa yol inqʼae, tul tiqʼo Jesuus Luʼ s-tiʼ, tuchʼ Jakoovo tuchʼ Xhun. Tul yekich jaʼ Jesuus s-tuchʼ viʼ val u vitz tiʼ inatxhax Tiuxh. 29Sebʼtichetz inatxht Jesuus Tiuxh, tul jalp tilix ivatz Jesuus. Tul oqxhich vet isaqal u toksaʼm Jesuus. Atz litzʼkabʼinyichxh veteʼ. 30Tul yeʼ kuxh taqla ul kaʼvaʼl u vinaq yolon kʼatz Jesuus: Poro Moiseesich tuchʼ Eliias. 31Tul litzʼkabʼinyichxh tilixeʼ. Tul aʼ nikich motx iyol, u yol tiʼ vikamebʼal Jesuus uvaʼ een laʼich bʼen tzoqpisalik inqʼa yol tiʼ Jesuus tu tenam Jerusaleen.{*}#9.31 ¿Kam nik elkaʼp u yol —vitzoqpisal inqʼa yol tiʼ quBʼaal Jesuus, —chiche? Aʼ nik elkaʼpun tiʼ jankʼalxh inqʼa kam uvaʼ laʼich palk quBʼaal Jesuus tiʼ itzoqpisal jankʼal inqʼa yol uvaʼ tzʼibʼamich ka s-tiʼ tuul viyolbʼal quBʼaal Tiuxh, atz tiʼ vitzoqpisal kam uvaʼ nikich ijaq quBʼaal Tiuxh s-txhojbʼal tetz vipaʼv inqʼa xaol, tul tira laʼ kuyux vet vipaʼv, atz tiʼ itzoqpisal toksal viqʼesalil tiqʼabʼ quBʼaal Jesuus. Atz nima tel kuxh inqʼa kam ex tzoqpoq tiʼ vikam quBʼaal Jesuus.
32Poro kamyichxh vet Luʼ t-vataʼm tuchʼ inqʼa imol. Ajtetz motx el vet ivataʼm, tul ajtxh motx tila uvaʼ litzʼkabʼinyichxh vet tatin Jesuus. Tul ajtxh motx til txaklich vet Moisees tuchʼ Eliias kʼatz Jesuus. 33Ilichetzxh vet Moisees tuchʼ Eliias nikich tel bʼen kʼatz Jesuus, tul ech tal vet Luʼ te Jesuus s-eche: —Txhusul qetz, tira bʼaʼn uvaʼ laʼ kaj bʼeeq oʼ tzitza. Tul toq qubʼit oxvoʼq tal patxh. Vaʼletz eetz. Vaʼt tetz Moisees. Atz vaʼt tetz Eliias, —xeʼt Luʼ. Poro yeʼ nikich ibʼen te Luʼ kam uvaʼ nikich tal te Jesuus.
34Sebʼtichetz iyolon Luʼ tuchʼ Jesuus, tul ajtxh motx til ikuʼl val u suʼtzʼ s-tiibʼa. Tul tira motx xoʼvaq veteʼ uvaʼs ijuptxʼaq taʼn u suʼtzʼ. 35Yaʼne ajtxh motx tabʼi iyolon kuʼl quBʼaal Tiuxh xoʼl u suʼtzʼ. Tul ech tal quBʼaal Tiuxh s-eche: —Aʼetz naqe vinKʼaol uvaʼe, uvaʼ kamxh in s-tiʼ. Aʼetz enima kam uvaʼ nik tal naq, —xeʼt quBʼaal Tiuxh. 36Yaʼetz vet iyolon kʼul quBʼaal Tiuxh, tul tilaq veteʼ uvaʼ ijunalich kuxh vet Jesuus. Tul yeʼxh tal invaʼq talvat kam uvaʼ motx tila. Pet ataqich kuxh vet s-kʼuul, tuulbʼal inqʼa qʼij inqʼae.
Uvaʼs ibʼant quBʼaal Jesuus bʼaʼn val u xaak uvaʼ atich ok demoonio t-taanima
Tio 17.14-21; Kuxh 9.14-29
37Echichetz vet s-eqal, tul kuʼ vet ul Jesuus viʼ u vitz tuchʼ inqʼa nikich itxhus tibʼ s-kʼatza. Tul mam tenam ul kʼulun Jesuus. 38Tul ech nikich tal isichʼin val u vinaq, uvaʼ txhʼuyich xoʼl inqʼa xaol, s-eche: —¡Txhusul qetz, bʼan bʼaʼnil te vatz inkʼaol! Tan taʼnxh naqe. 39Tul il val u demoonio atoʼk t-taanima vatz inkʼaol. Tul bʼeeno nik ikʼaxbʼisal taʼn. Tan at uvaʼ yeʼ kuxh taqla nik isichʼin naq taʼn. Tul tzetpumalxh naq nik ibʼaneʼ. Yaʼne nik kuxh tel vet pulubʼ itziʼ naq taʼn. Tul kaaroxh nik itxhaqpul vet ka naq taʼn. 40Qatetz injaq bʼaʼnil te txhaqnaq inqʼa nik atxhuseʼ uvaʼ laʼ teesa el txhaqnaq u demoonio t-taanima vinkʼaol, poro yeʼl txhaqnaq nik toleʼveʼ, —xeʼt u vinaq te Jesuus.
41Yaʼne ech tal Jesuus te inqʼa xaol s-eche: —¡Tiyiilaq palsan yol! Atz ¡tiyiilaq elnaʼq viʼ t-bʼey, ex inqʼa itzʼlel ex txheel! ¿Echetz kol kuxh laʼ vatine sexoʼl nik enatxheʼ? Atz ¿echetz kol kuxh laʼ intxʼebʼt ibʼen inuqul u yole sete tiʼ eqejt in? Aqʼ tzaan vakʼaol sinvatz, —xeʼt Jesuus.{*}#9.41 Aʼ nik tal u kastiiya: ‹generación incrédula y perversa,› chiche. Aʼ ex tiqʼo tzaan quBʼaal Jesuus tiʼ viyol uvaʼ tal quBʼaal Tiuxh tiʼ inqʼa tij imam Israeel uvaʼ ipalsat viyol quBʼaal Tiuxh uvaʼs motx ipal tu tzaqa txʼavaʼ. Tan yeʼ motx iqej viyol quBʼaal Tiuxh, tiʼ uvaʼ tetxhal laʼich motx okaʼp tu txʼavaʼ Kanaan. Tan motx xoʼv te inqʼa aj Kanaan. Echetz talt vet quBʼaal Tiuxhe tiʼ inqʼa tij imam Israeel uvaʼ motx kuxh kam vet ka tu tzaqa txʼavaʼ, ech uvaʼe nik tal tu Deuteronoomio 1.34-40. Tul tal quBʼaal Tiuxh paqte tu Nuumeros 14.35. Tul echatich kuxh vipalsan yolil inqʼa tij imam Israeel inpaqte, inqʼa atichaqe uvaʼs ipal quBʼaal Jesuus vatz txʼavaʼ. Tan yeʼat nikich motx iqejeʼ uvaʼ, aʼich quBʼaal Jesuuse u Kriisto.
42Iletzxh vet u xaak nikich tokaʼp vatz Jesuus, tul yekich pakʼel ikuʼ u xaak t-txʼavaʼ taʼn u demoonio. Tul tira tzetpumalxh u xaak nikich ibʼanax taʼn u demoonio.
Yaʼne iyaj Jesuus u demoonio. Tul ituki el Jesuus t-taanima u xaak. Tul ibʼan vet u xaak bʼaʼn taʼn Jesuus. Tul taqʼ vet ok Jesuus u xaak te vibʼaal. 43Tul mamala xaol motx kaj taanima tiʼ u nimla tiqleʼm quBʼaal Tiuxh uvaʼs ibʼant u xaak bʼaʼn taʼn Jesuus.
Uvaʼs talt quBʼaal Jesuus inpaqte uvaʼ tetxhal laʼich kam quBʼaal Jesuus
Tio 17.22-23; Kuxh 9.30-32
Poro tuulbʼaletz uvaʼ kaayichxh taanima inqʼa xaol tiʼ inqʼa mamala bʼaʼnil uvaʼ nikich ibʼan Jesuus, tul ech tal Jesuus te inqʼa nikich itxhus tibʼ s-kʼatza s-eche: 44—Txhabʼavaqxh ikaj inqʼa yol teviʼ inqʼa nik val sete. Tan kʼuxh inxh u Kʼaola uvaʼ qat bʼen s-alam aanima, poro tetxhal kuxh toq aqʼaxoq ok in tiqʼabʼ inqʼa iqʼesal u tenam, —xeʼt Jesuus.
45Tul yeʼ nikich ibʼen inqʼa yol te inqʼa nikich itxhus tibʼ kʼatz Jesuus. Tan yeʼ nikich taqʼ quBʼaal Tiuxh tootzaqi. Poro nikich motx ixoʼv tiʼ tabʼil tel u yol te Jesuus.
Uvaʼs itxhust quBʼaal Jesuus inqʼa xaol, tiʼ uvaʼ yeʼ laʼ taqʼ bʼen tibʼ siqʼesal
Tio 18.1-5; Kuxh 9.33-37
46Yaʼne xeʼtaq vet inqʼa nikich itxhus tibʼ kʼatz Jesuus tiʼ iyojtaq tibʼ s-vatzaq, tiʼ uvaʼ jabʼiste invaʼq s-te nim tiqleʼm laʼich ibʼana uvaʼs laʼich ibʼant Jesuus iqʼesalil.
47Poro yekich bʼen te Jesuus kam uvaʼ nikich motx titzʼa t-taanima. Tul isikʼle tzaan Jesuus val u nitxaʼ. Tul itxakbʼa Jesuus s-txala. 48Tul ech tal Jesuus s-eche: —Jaʼl ex, uvaʼ ayaʼlxh ekʼuul laʼ ekʼul vaʼq inqʼa nitxaʼ tiʼ vetootzaqit in, tul inetze nik ekʼul in. Tul jabʼiletz ex, uvaʼ laʼ kʼulun in, tul aʼetz vinBʼaale, nik ekʼuleʼ uvaʼ txhaqon tzaan in. Tan jabʼil ex, uvaʼ nik etiqʼo kuʼl etibʼ, tul aʼetz exe, uvaʼ nim etiqleʼm vatz quBʼaal Tiuxh, —xeʼt Jesuus.{*}#9.48 ¿Kam nik elkaʼp inqʼa yol uvaʼ ech tal quBʼaal Jesuus s-eche?: —Jaʼl ex, uvaʼ ayaʼlxh ekʼuul laʼ ekʼul vaʼq inqʼa nitxaʼ tiʼ vetootzaqit in, tul inetze nik ekʼul in, —chiche. Aʼ nik tal quBʼaal Jesuus uvaʼ laʼ tiqʼo kuʼl tibʼ inqʼa nikich itxhus tibʼ s-kʼatza tiʼ ikʼulux jolt inqʼa imol s-niman tetz Jesuus. Tul at taanima tiʼ inqʼa niman tetz Jesuus laʼ ibʼana. Pet jit aʼ laʼich ibʼan inqʼa nikich itxhus tibʼ kʼatz quBʼaal Jesuus, eche uvaʼ nikich ibʼan inqʼa iqʼesal uqʼeʼybʼal xoʼl inqʼa tij imam Israeel. Tan tira yeʼ nikich motx ilotxh inqʼa xaol tiʼ tiqʼol viyolbʼal quBʼaal Tiuxh s-bʼaʼn. Tio 18.5
Uvaʼs talt quBʼaal Jesuus tiʼ jaʼl u xaol uvaʼ eela iyol quBʼaal Jesuus s-tuchʼ
Kuxh 9.38-40
49Yaʼne ech tal Xhun s-eche: —Txhusul qetz, qat qil val u vinaq uvaʼ nik ituki el demoonio t-taanima inqʼa xaol tuchʼ abʼij. Tul qat qumaq s-tiʼ, tan jit qumol qibʼ s-tuchʼ, oʼ inqʼa nik qutxhus qibʼ sakʼatza, —xeʼt Xhun te Jesuus.
50Tul ech tal Jesuus s-eche: —Yeʼ koq qat emaq naqe s-tiʼ. Tan jabʼiste u xaol uvaʼ yeʼxhkam nik itxhiʼan s-qiʼ, aʼetz u xaole uvaʼ eela quyol s-tuchʼ, —xeʼt Jesuus.
Uvaʼs yeʼ ikʼulux quBʼaal Jesuus taʼn inqʼa xaol tuulbʼal Samaaria
51Bʼiitichetz kuxh vet ileqt viqʼiil ibʼen Jesuus t-amlikaʼ, tul tira ikʼayi vet Jesuus ikʼuul tiʼ ibʼen tu tenam Jerusaleen. 52Tul ibʼaxabʼsa bʼen Jesuus kaʼl inqʼa itxhaq t-val u tal tenam tuulbʼal Samaaria, tiʼ tabʼil tal uvaʼ laʼich motx vatka. 53Poro yeʼl Jesuus kʼulux tuchʼ inqʼa nikich itxhus tibʼ s-kʼatza, tan bʼenaq te inqʼa aj Samaaria uvaʼ, aʼich u tenam Jerusaleen kʼaqich taʼn Jesuus.{*}#9.53 ¿Kam s-tiʼil yeʼ kʼulux inqʼa tij imam Israeel taʼn inqʼa aj Samaaria? Yeʼ motx kʼulux taʼn, tan jatxelaqichxh tibʼ s-naʼyla yol. Tan yujelich kuxh vet tatin inqʼa aj Samaaria tuchʼ jolt inqʼa jitich tij imam Israeel. Pet jit tira koqxhich tijaq imam Israeel inqʼa aj Samaaria vatz inqʼa tij imam Israeel. Tul jitich eela inqʼa inatxhon Tiuxh nikich motx ibʼaneʼ. Tan yeʼ nikich isaʼ inqʼa aj Samaaria ibʼen natxh Tiuxh tu nimla atibʼal tuulbʼal u tostiuxh tu Jerusaleen. Pet aʼ nikich motx natxhkʼuulank viʼ u vitz Jeresiim uvaʼ tinaaqaʼich u tenam Samaaria. Tul nikichetz tixva inqʼa aj Samaaria inqʼa tij imam Israeel. Tul mij nikich ikuy ipal t-vitxʼavaʼ, tul aʼetz koq laʼich motx bʼenk txhan vet tiʼ inatxhax Tiuxh t-Jerusaleen. Xhun 4.20-24
54Tiletz vet Jakoovo tuchʼ Xhun, inqʼa nikich itxhus tibʼ kʼatz Jesuus, uvaʼ yeʼ kʼulux Jesuus, tul ech motx tal vet te Jesuus s-eche: —QuBʼaal, ¿maq laʼ asaʼa uvaʼ laʼ qujaq ikuʼl xamal t-amlikaʼ?, [eche uvaʼ tabʼit kuʼl Eliias xamal s-naʼya.] Tul tira laʼ motx tzʼeʼeʼl inqʼa xaol inqʼae, —xeʼt Jakoovo tuchʼ Xhun te Jesuus.#2 Reeyes 1.9-16
55Yaʼne sutxhqʼ Jesuus tiʼ iqul tiʼ iyolon tuchʼ inqʼa nikich itxhus tibʼ s-kʼatza, inqʼa txhʼuyich s-tiʼ. Tul iyaj Jesuus Jakoovo tuchʼ Xhun tiʼ u yol uvaʼ tala. [Tul ech tal Jesuus s-eche: —Tira yeʼ etootzaqle jaʼl nik kʼoopin ex tiʼ talax u yeʼbʼaʼn uvaʼe.] 56[Tan jit aʼ ulk in tiʼ iyatzʼax inqʼa xaol, in, u Kʼaola uvaʼ qat bʼen s-alam aanima. Pet aʼ ulk in tiʼ ikolox inqʼa xaol tu kʼaxkʼo, —xeʼt Jesuus.] Tul yekich vet Jesuus tuchʼ inqʼa nikich itxhus tibʼ s-kʼatza t-vaʼt u tal tenam.
Uvaʼs talt quBʼaal Jesuus uvaʼ yeʼxhkam vaʼq laʼ maqon vitxhʼuyeʼv inqʼa xaol tiʼ quBʼaal Jesuus
Tio 8.18-22
57Atichetz ok Jesuus tiʼ bʼey tuchʼ inqʼa nikich itxhus tibʼ s-kʼatza, tul ech tal val u vinaq te Jesuus s-eche: —QuBʼaal, nik insaʼeʼ laʼ txhʼuyeʼv in seʼe, kʼuxh talxh laʼ bʼenk axh, —xeʼt u vinaq.
58Yaʼne ech tal Jesuus s-te s-eche: —Bʼaʼn txoo inqʼa yak, tan at ijul txoo tal uvaʼ laʼ vatk txoo. Atz kʼuxh txoo, inqʼa tzʼichin uvaʼ nik ixichʼan vatz amlikaʼ, tan atat isok txoo. Pet ech koq in, u Kʼaola uvaʼ qat bʼen s-alam aanima, tan yeʼl injeqeʼvbʼal t-invaʼq tenam, —xeʼt Jesuus.{*}#9.58 Aʼ nik tal quBʼaal Jesuus tuchʼ viyol uvaʼ yeʼl txhojbʼal laʼ ikʼul inqʼa txhʼuyich tiʼ quBʼaal Jesuus. Tul yeʼl ivatbʼal laʼich taqʼ quBʼaal Jesuus.
59Yaʼne ech tal Jesuus te invaʼt u vinaq s-eche: —Txhʼuyeʼven s-viʼ, —xeʼt Jesuus.
Tul ech tal u vinaq te Jesuus s-eche: —InBʼaal, kuy s-ve uvaʼ bʼaxa toq nal kamoq qʼes inbʼaal, tul laʼ inmuq ka qʼes, yaʼnetze laʼ txhʼuyeʼv in seʼe, —xeʼte.
60Tul ech tal Jesuus s-eche: —Imuqeʼn tibʼ inqʼa xaol s-vatzaq, inqʼa tira yeʼl qʼij isaq taanxelal vatz quBʼaal Tiuxh. Pet quxh paxsa u yol tiʼ vibʼant quBʼaal Tiuxh iqʼesalil t-taanima inqʼa xaol, —xeʼt Jesuus te u vinaq.
61Yaʼne ech tal txha vaʼt u vinaq te Jesuus s-eche: —InBʼaal, kuy s-ve uvaʼ bʼaxa toq val inbʼen te junun vitzʼin vatzik inqʼa at t-votzotz, yaʼne laʼ txhʼuyeʼv in seʼe, —xeʼt te Jesuus.
62Tul ech tal Jesuus s-eche: —Yeʼ laʼ utxh itxhʼuyeʼv inqʼa xaol s-viʼ, inqʼa een kuxh taanima tiʼ kam inqʼa nik til tu totzotz. Tan bʼane laʼ koq ikuy vibʼant quBʼaal Tiuxh iqʼesalil tu taanima. Tan jankʼal eche vaʼq xaol uvaʼ sebʼt ikoon tuchʼ vaʼk, tan bʼane, laʼ koq utxhi uvaʼ aʼl laʼ isaqin ka tiʼ iqul, —xeʼt Jesuus.{*}#9.62 Jankʼal inqʼa xaol, inqʼa nik ikoon tuchʼ vaʼk, tan yeʼ laʼ isaʼa uvaʼ vaʼten laʼ isaqi u xaol tuchʼ vikooneʼ. Tan oq ech laʼ ibʼane, tul laʼ kuxh motx ikoyi tibʼ u taqʼon. Oqetz kole oq aʼl laʼ isaqin ka tiʼ iqul, tan tira laʼ yan u taqʼon. Pet aʼ isaʼ uvaʼ jikxh laʼ ibʼen ivatz tiʼ u taqʼon, tul jiketzxh bʼen elkaʼp u taqʼon uvaʼ kʼaqel taʼn tuchʼ u vaʼk. Echetze uvaʼ tal quBʼaal Jesuus te u vinaq, tan aʼ tal quBʼaal Jesuus uvaʼ jitoq laʼ el taanima tiʼ inqʼa kam uvaʼ kaay vet ka. Pet taʼnxh u tetz quBʼaal Jesuus laʼ toksa vet bʼen titzʼabʼal s-tiʼ.
လက္ရွိေရြးခ်ယ္ထားမွု
Luk 9: ixlC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2016, Wycliffe Bible Translators, Inc. All rights reserved.