Yaya 11
11
Lasari la bande nun a la faga
1Kaye do le be ɲɔ nun, a be bandiren, a tɔgɔ Lasari. A nun a barenmusenu Mariyama nun Marata be sabatiren Betani saa tɔ le. 2Ale Mariyama le si naa labundɛ madon Marige Isa kɛŋɛnu ma, a ni anu mafitan a kunsige la. Awa, wolo dɔgɛ Lasari bandita. 3Wo butɔ, a barenmusenu ka kiilá lasanba, ka taga a fɔ Isa ye: «Marige, i kanunteŋɛ bele kendeyaren feu.» 4Isa to naata wo kuma mɔɛ, a ko: «Lasari la kɛ bandiya te ma a ye faga la. Kɛ bande la ko be naala Ala la nɔɔra le makɛnɛnna, a si a ma Ala la den kayireŋɛ ni kunnawule sɔtɔ.» 5Wo ka a taran, Isa be Marata nun a dɔgɔ musuma nun Lasari kanuren de. 6Awa, a to ka a mɔɛ, Lasari be bandiren, Isa be ka min na, a mɛn ka tele fila ma ɲɔ tugun. 7Wo kɔma, a ka a fɔ a la talibenu ye aa anu bɛ ni saagi Juda duge tɔ. 8A la talibenu ka a fɔ a ye: «Karamɔgɔ, a bele mɛren Yahude kuntigenu be diren i mabunna, ka i faga, i nɔn be diren saagila ɲɔ le ba?» 9Isa ka anu jaabi, a ko: «Wagati tan nun fila le ma tele dɔndɔ la ba? Ka mɔgɛ be tagamanna tele tɔ, a te a kɛŋɛ latugu, bayi a be kɛ dunuya kɛnɛ yenden. 10Kɔnɔ ka min be tagamanna sue tɔ, a si a kɛŋɛ latugu le, bayi kɛnɛ yo bele a ye.»
11Kɛ kumanu tanbi kɔma, a ka a fɔ anu ye, a ko: «Wo mɔ kanunteŋɛ Lasari be kinnɔgɔren, kɔnɔ n be tagala a lakunɛndula.» 12Talibenu ka a fɔ a ye, anu ko: «Marige, ka a be kinnɔgɔla, a si kendeya le.» 13Adun, Isa ka Lasari la faga koe le fɔ, kɔnɔ talibenu ka a mira a ka kunɛn kinnɔgɛ le la ko fɔ. 14Awa, Isa ka a fɔ anu ye a beeyareŋɛ la, a ko: «Lasari fagata. 15Kɔnɔ a to ma ma n ɲala le, n be ɲagalinden wo la. Wolo mu, wo si naa dɛnkɛnɛya n ma. Kɔtɛ, wo mɔ ma Lasari kɛnna.» 16Tomasi, anu be min ma «Fɛrɛŋɛ», wo ka a fɔ a talibiɲɔgɛnu ye: «Iyon, mɔle tugun, wo mɔ ma, alako wo mɔ nun karamɔgɔ bɛ ni faga.»
Malawule nun abada kise
17Isa la kereŋɛ Betani saa tɔ ɲɔ, a ka a taran Lasari fure ɲan bata tele naani bɔɔ nun gabure butɔ. 18Wo ka a taran, Betani saa, wo be Darisalamu kɛnna le, anu tɛma la yanfaya fayida kilo saba. 19Awa, Juda kaa siyama bata na nun Mariyama nun Marata dɔgɛ la faga kɔntɔre la. 20Bɔɔla Marata ka a mɔɛ Isa be nala, a tagata a labɛndula, Mariyama kan tota sigiren boŋɛ tɔ. 21Marata la kereŋɛ Isa ma, a ko a ma: «Marige, ka i be yan nun, n dɔgɛ te faga nun. 22Kɔnɔ, n ka a lɔn hali kɔtɛ, i ka Ala táran fenfen na, a si wo ma i ye.» 23Isa ko a ma: «I dɔgɛ si naa tawuli le.» 24Marata ka a jaabi, a ko: «N ka a lɔn a si naa tawuli le mɔgɔ fagareŋɛnu wuli luŋɛ kan, lun tɔɛ.» 25Isa ka a fɔ a ye, a ko: «Nde le mu fure lawulilá la, anun malakisilá. Min dɛnkɛnɛyata n ma, a si kise sɔtɔ le, hali a fagareŋɛ. 26Mɔgɔ yo mɔgɔ be balue tɔ, a dɛnkɛnɛyata n ma, a te naa faga feu. I be laaren wo la ba?» 27Marata ka a fɔ a ye, a ko: «Iyon, n Marige, n bata laa a la, ka a fɔla i mu Ala la mɔgɔ masubɛreŋɛ le la, Ala la den kayireŋɛ, min bɛnta nala dunuya.»
28A to banta wo fɔla, a saagita, a ka a dɔgɔ musuma Mariyama kele gundo tɔ. A ka a fɔ a ye: «Karamɔgɔ bata na, a be i kelela.» 29Bɔɔla Mariyama ka wo kuma mɔɛ, a wulita kisanna, a be tagala Isa labɛndula. 30Kɔnɔ Isa ma don wo saa tɔ betunna. A nun Marata bɛnta ka min na, a be ɲɔ le betunna. 31Yahudenu minnu be naren Mariyama bata boŋɛ tɔ faga kɔntɔre la, wonu to ka a yen Mariyama wulita ki min na, a bɔɔta, wonu tugun ka a jokki. A be toren anu ye a be tagala diridula le gaburudula.
32Mariyama la kereŋɛ Isa ma, a ka a yen, a sujuduta a ye. A ko a ma: «Marige, ka i be yan nun, n dɔgɛ te faga nun.» 33Isa to ka Mariyama yen a be dila, anun Yahudenu minnu be a kɔma, wonu tugun be dila, wo ka a juse tɔɔrɔ koola, a suunuta. 34A ka anu maɲininka, a ko: «Wo ka Lasari baadɛ mina?» Anu ka a fɔ a ye: «Marige, na yan, i ni ɲɔ yen.» 35Wo butɔ, Isa dita. 36Wolo ka a ma, Yahude donu ko: «Wo a fɛlɛ, a be a kanuren ki min na!» 37Donu tugun ka a fɔ: «Kɛ min ka ɲabɔnɛ ɲanu laka, a te nɔ Lasari latangala nun faga ma ba?»
Lasari lawuli koe faga ma
38Wo mɛn ka Isa juse tɔɔrɔ koola, a ka a kun sɔ gaburudula la. Wo gabure mu fanmɛ le la, a da be hibbɛren kure le la. 39Isa ka a fɔ mɔgɛnu ye: «Wo kure bɔɔ a da la!» Fagabaga barenmuse Marata ka a fɔ a ye, a ko: «N Marige, kɛ tɛmuɛ a kuɲɛ be bɔɔla bayi a la faga bata tele naani bɔɔ.» 40Isa ka a jaabi, a ko: «N ka min fɔ i ye nun, i bele a talɔnden, ka a fɔla, ka i dɛnkɛnɛyata, i si Ala sɛnbɛ yen de?» 41Wo butɔ, anu ka kure bɔɔ ɲɔ. Isa ka a ɲa layɛlɛ kantɔ, a ko: «Baaba, n be i tantula bayi i bata n kulɛ lamɔɛ. 42Nde ka a lɔn wagate bɛ i be n kulɛ lamɔɛla. Kɔnɔ jama min be sɔren n na miliŋɛ tɔ ka, n ka a fɔ wondelen na ko la, alako ka anu si dɛnkɛnɛya, ka a fɔla ile le ka n nasanba.» 43Isa to banta wo fɔla, a ka a kulɛ mayɛlɛ sɛnbɛ la, a ko: «Lasari, bɔɔ!» 44Wo butɔ, ale fagabaga bɔɔta, a kɛŋɛnu nun a bolenu be makitiren kasange la. A ɲakɔtɔ be mabutinden kuta la. Isa ka a fɔ anu ye: «Wo a mafulen, wo ni a to a ni taga.»
Janfa makitireŋɛ Isa kunma
45Awa, Yahudenu minnu tagata Mariyama bata, bɔɔla anu ka a yen Isa ka kɛ kabanakoe ma, anu siyama dɛnkɛnɛyata a ma. 46Kɔnɔ donu be anu tɛma, wonu tagata Farisinu taran. Isa ka kabanakoe min ma, anu ka wo ɲamakaran anu ye. 47Wo kɔma, sarika lakela kuntigenu anun Farisinu ka Yahude kuntigenu madɛn, anu ko: «Wo mɔ be fen mala? Bayi kɛ kaye be kabanako siyama le mala! 48Ka mɔ ka a to a fan bolo, mɔgɛ bɛ si dɛnkɛnɛya a ma. Wo kɔma, Rɔmu kaanu si na le, anu ni naa mɔ la Ala batu bon banba tiɲa, anun mɔ bɔnsɛ!» 49Mɔgɔ dɔndɔ be anu tɔ, a tɔgɔ Kayifa, ale le mu sarika lakela kuntigi banba la wo saŋɛ la. Wo ka a fɔ anu ye, a ko: «Wole ma fenfen lɔn. 50Wo bele a fahamuren mɔgɔ dɔndɔ la fagala jama la ko la, wolo fisa wo ye, alako wo mɔ bɔnsɛ bɛ kana bɔnɔ.» 51Adun Kayifa ma wo kuma fɔ a yɛtɛ hanige la. Ale le to mu sarika lakela kuntigi banba la wo saŋɛ la, a ka wahawe fɔ iko nabiyonmɛ, a ko: aa Isa be fagala le a bɔnsɛ faliŋɛ la. 52Iyon, a be fagala le, kɔnɔ a bɔnsɛ tun faliŋɛ ma. A be fagala le, alako a ni Ala la deŋɛnu tugun madɛn, minnu be mafatanden dula bɛ tɔ, a ni anu bɛ ma jama dɔndɔ la.
53Awa, kabɔɔ wo lun Yahude kuntigenu ka natá jigan Isa faga koe la. 54Wolo ka a ma, Isa bele tagamanna kɛnɛ tɔ bitugun Yahudenu tɛma, fɔ a bɔɔta ɲɔ ka taga dula do le tɔ, janfue dala, saa min tɔgɔ Efirayimu. A nun a la talibenu tagata to ɲɔ la.
55Wo ka a taran, Yahudenu la Hɔrɔya Sale bata sutuya. Jamanɛ mɔgɔ siyama tagata Darisalamu, alako anu ni saniyan yannun Sale be kela.#11:55 Taureta Musa, kitabu naaniɲɔgɛ, sora 9, haaya 6 han 10. 56Anu be Isa ɲinila. Anu be sɔren Ala batu boŋɛ butɔ wagate min tɔ, anu be a fɔla ɲɔgɔn ye: «Wo be fen de miraren? Isa si na Sale tɔ ba, ka a te na?» 57Sarika lakela kuntigenu anun Farisinu dun bata yamɔre sa ka a fɔla aa mɔgɔ min yo ka Isa dula lɔn, aa a ni anu lalɔn, alako anu ni a bita.
လက္ရွိေရြးခ်ယ္ထားမွု
Yaya 11: MOG
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ