Gyn 4
4
Yeezu Ane A Samareya Teŋɛ Pɔge Yɛlɛ
1A Yeezu naŋ da wa baŋ ka a Faraziimine da woŋ ka O nyɛrɛ la potuuribo kyɛ korɔ noba yaga suobu a gaŋ Gyɔɔn, 2(Yeezu meŋɛ naane da terɛ a suobu, kyɛ O potuuribo la da terɛ); 3O da yi la a Gyudiya paaloŋ a leɛ gaa a Galili paaloŋ. 4Kyɛ a da ferɛɛ la ka O tu a Samareya paaloŋ poɔ gaa a be. 5Lɛ la ka O da wa a Samareya teŋkpoŋ kaŋ yuori naŋ di Sika, naŋ are peɛle a weɛ na Gyekɔb naŋ da da ko o bidɔɔ Yuzɛb. 6A Gyekɔb bulee da be la a be. Kyɛ a Yeezu naŋ da bale a O kyɛmmo poɔ la so ka O da wa zeŋ a bulee noɔreŋ. A da e ŋa ŋmenaa pozentaa saŋ.
7Samareya pɔge kaŋ da waɛ la ka o ɔŋ koɔ̃, ka Yeezu da yeli ko o, “Ko ma koɔ̃ ka N nyu.” 8(A Yeezu potuuribo da gaa la a teŋkpoŋ poɔ ka ba te da bondirii.) 9A Samareya pɔge da soore la a Yeezu, “Wola ka fõõ Gyuu neɛ na sɔre koɔ̃ maa naŋ e Samareya neɛ zie?” (A Gyuumine ane a Samareya noba da ba tuoro.) 10Ka a Yeezu da yeli sɔge O, “Ka fõõ da baŋ a Naaŋmen kyɔɔtaa, ane neɛ na naŋ la yele korɔ fo, ‘Ko ma koɔ̃ ka N nyu,’ fo da na sɔre O la ka O da ko fo koɔ̃ naŋ terɛ nyɔvore.” 11Ka a pɔge da yeli ko O, “Daana, fo ba taa bon na ɔŋ ne a koɔ̃, kyɛ ka a bulee waa zuluŋ; yeŋ ka fo na nyɛ a kɔŋvore? 12Fo mɔɔ waa la kpoŋ gaŋ a te sããkoma Gyekɔb naŋ da ko te a bulee ŋa, ka o biiri ne ba donne zaa da nyuuro a bulee ŋa koɔ̃ be?” 13Ka Yeezu da leɛ yeli ko o, “Neɛzaa naŋ nyu a koɔ̃ ŋa, kɔŋnyuuri na leɛ kpɛ o la. 14Kyɛ banaŋ naŋ nyu a koɔ̃ N naŋ na ko ba, kɔŋnyuuri daŋ koŋ la kpɛ ba zaa. A koɔ̃ na N naŋ na tere, na leɛ la bulnimiri ba poɔŋ, ka a bullo yire a terɛ nyɔvore naŋ ba taa baaroo.” 15Ka a pɔge da yeli ko O, “Daana, ko ma a koɔ̃ ŋa, ka kɔŋnyuuri ta la kpɛ ma zaa, bee ka N ta la waana kyɛ ɔnnɔ koɔ̃.”
16Ka Yeezu da yeli ko o, “Gaa te boɔle fo serɛ, kyɛ leɛ wa.” 17Ka a pɔge da yeli sɔge O, “N ba taa serɛ.” Ka Yeezu da yeli ko o, “Yelmeŋɛ la ka fo yeli ka fo ba taa serɛ, 18bonso, serebɛ banuu la ka fo kuli, kyɛ a onaŋ fo naŋ taa pampana ŋa ba waa fo serɛ. A lɛ fo naŋ yeli e la yelmeŋɛ!” 19Ka a pɔge da yeli ko O, “Daana, N nyɛɛ la ka fo waa la Ŋmen-yelmanna. 20Te sããkommine da maŋ puori la Naaŋmen a taŋ ŋa zu, kyɛ ka yɛnee Gyuumine yeli ka zie na a naŋ fere ka noba maŋ puori Naaŋmen la Gyɛruzɛlɛm teŋɛ poɔ.” 21Ka Yeezu da yeli ko o, “Pɔge, sage de N yɛlɛ. A saŋ waana la ka yɛ koŋ la puoro a Saa a taŋ ŋa zu bee Gyɛruzɛlɛm poɔ. 22Yɛ Samareya noba puoro la bon yɛ naŋ ba baŋ, kyɛ tenee Gyuumine puoro la bon te naŋ baŋ, bonso, a Gyuumine zie la ka faabo yi. 23Kyɛ a saŋ tara la, a saŋ gba taɛ la, ka banaŋ naŋ puoro ne ba poore zaa na puori a Saa ne a vooroŋ ane yelmennoŋ. Bonso, a bama taaba la ka a Saa boɔrɔ ka ba puori O. 24Naaŋmen waa la vooroŋ, ka banaŋ naŋ puoro O, seŋ ka ba puori O a vooroŋ ane yelmennoŋ poɔ.” 25Ka a pɔge da yeli ko O, “N baŋ ka a Mɛzaaya#4:25 Mɛzaaya: A Mɛzaaya tɛgɛ la a ‘Kirista.’ waana la” (Ona la ka ba boɔlɔ Kirista). “Ka Onaŋ wa wa, O na manne la yelzaa ko te.” 26Ka Yeezu yeli ko o, “Maa la a lɛ, a soba ŋa naŋ yele a yɛlɛ korɔ fo.”
27A lɛ poɔŋ meŋ la ka O potuuribo da leɛ yi a teŋɛ poɔ wa. Ba nɔɛ zaa da maaɛ la ne ba naŋ wa nyɛ O ka O ne pɔge yele yɛlɛ. Kyɛ neɛzaa da ba soore, “Boŋ ka fo boɔrɔ?” bee, “Bonso ka fo yele yɛlɛ ne a pɔge?” 28Lɛ la ka a pɔge da bare a o koɔ̃ yuori kyɛ da leɛ gaa a teŋkpoŋ poɔ a te yeli ko a noba: 29“Yɛ wa nyɛ dɔɔ kaŋ naŋ yeli n nyɔvore yɛlɛ zaa N naŋ da e a ko ma! Ona mɔɔ tɔɔ wa la a Mɛzaaya wɛ?” 30A noba da yi la a teŋɛ poɔ a gaa a Yeezu zie.
31Kyɛ a O potuuribo da sɔre O la a yele, “Daana, di bonkaŋ wɛ.” 32Kyɛ ka O da yeli ko ba, “N taa la bondirii na di kyɛ ka yɛ naŋ ba baŋ a yɛlɛ.” 33Lɛ la ka a potuuribo da leɛ soorɔ taa, “Neɛ kaŋ tɔɔ wa taa bondirii wa ko O wɛ?” 34Ka Yeezu da yeli ko ba, “N bondirii la ka N toŋ a soba na naŋ toŋ ma poboɔbo; a toŋ ka a te baare. 35Yɛ mɔɔ ba maŋ yeli, ‘Kyuuri anaare la kyɛre ka a weɛ boma deebo saŋ na ta’? Kyɛ maa yele korɔ yɛ, yɛ leɛ kaa a weɛ gyeere, a nyɛ lɛ a weɛ boma naŋ be seŋ deebo. 36A weɛ bonkyeɛrɛ nyɛrɛ la o toma san-yɔɔ, a pãã wuoro tewɔmɔ laŋna taa a nyɔvore naŋ ba taa baaroo eŋɛ, ka a boreborɔ ane a weɛ bonkyeɛrɛ na lantaa kyellɛ. 37Lɛ la ka a yeluu ŋa e yelmeŋɛ, ‘Neɛ kaŋ maŋ bore la, kyɛ ka kaŋ meŋ kyɛ.’ 38N toŋ yɛ la ka yɛ te kyɛ boma na yɛ naŋ ba toŋ ka a yi. Noba mine la toŋ ka a yi, ka yɛ te kpɛ a ba toma poɔ.”
39A Samareya noba yaga naŋ da yi a teŋkpoŋ na poɔ da sage de la a Yeezu yɛlɛ a yi a danseɛ a pɔge naŋ da di zuiŋ, “O da yeli la yɛlɛ na zaa N naŋ da e n nyɔvore poɔ ko ma.” 40Azuiŋ, a Samareya noba naŋ da wa a Yeezu zie, ba da sɔre O la ka O kpeɛrɛ ne ba. A Yeezu da kpɛ la a be beri ayi. 41Ka noba yaga da sage de O yɛlɛ a O kannoo zuiŋ. 42Ba da yeli ko la a pɔge, “A ba la e ka fo yeluu la so ka te sage de O yɛlɛ, bonso, temenne woŋ la a O kannoo a baŋ ka serɛzaa, Ona la a andonɛɛ Faara.”
Yeezu Naŋ Leɛ Gaa A Galili Paaloŋ
43A beri ayi naŋ da wa tɔle, Yeezu da yi la a be gaa a Galili paaloŋ. 44(Bonso a Yeezu meŋɛ da yeli ka Ŋmen-yelmanna ba nyɛrɛ gyeremɛ o meŋɛ teŋɛ poɔ). 45O naŋ da wa a Galili, a teŋɛ deme da tuori de O la, ba naŋ da nyɛ bonna zaa O naŋ da e a tigri zie a Gyɛruzɛlɛm poɔ, bonso, ba meŋ da gaa la a tigri zie.
Yeezu Naŋ Da Saŋ Neŋkpoŋ Kaŋ Bidɔɔ
46Lɛ la ka Yeezu da leɛ gaa a Keeina teŋɛ naŋ be Galili paaloŋ poɔ, a be O naŋ da e ka koɔ̃ leɛ dãã. A naayiri tonton-neŋkpoŋ kaŋ da be la a be, ka o bidɔɔ beɛrɛ gaŋ Kapanum teŋɛ poɔ. 47O naŋ da wa woŋ ka Yeezu yi la a Gyudiya paaloŋ wa Galili, o da gaa te sɔre O la, ka O wa saŋ a o bidɔɔ, bonso a bie da tɔgle la kũũ. 48Lɛ la ka Yeezu da yeli ko o, “Ka yɛnee ba nyɛ yelwulii ane nɔmaa toma, yɛ koŋ sage de.” 49Ka a tonton-neŋkpoŋ da yeli ko O, “Neŋkpoŋ, naŋ sigi wa ka a n bie ta wa kpi.” 50Ka Yeezu da yeli ko o, “Gɛrɛ, a fo bidɔɔ na nyɛ la laafeɛ.” A dɔɔ da sage de la yɛlɛ a Yeezu naŋ da yeli ko o, a da leɛ kulo. 51O naŋ da naŋ be a sobiriŋ kyɛnɛ kulo la ka a o gbaŋgbaare zo tuori o a da yeli ko o ka a o bie nyɛ la laafeɛ. 52Lɛ la ka o da soore ba wagre na poɔ naŋ da la ka a bie da piili nyɛrɛ o meŋɛ. Ka ba da yeli ko O, “Zããmeŋ ŋmenaa gbel-yeni saŋ la ka a o entoloŋ da baare.” 53A bie saa da baŋɛɛ la ka a saŋ ŋa poɔ la ka a Yeezu da yeli ko o, “A fo bidɔɔ na nyɛ la laafeɛ.” Lɛ la ka o ne o yideme zaa da sage de a Yeezu yɛlɛ. 54A ŋa da la a yelwulaa ayi soba Yeezu naŋ da e, O naŋ da yi a Gyudiya leɛ gaa a Galili paaloŋ.
လက္ရွိေရြးခ်ယ္ထားမွု
Gyn 4: DNTTP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
First New Testament in Dagaare Language © The Bible Society of Ghana, 2013.