Yowaana 1
1
Emboosi y'obulamu
1Muhuchaaka Emboosi yaluwo, haandi Emboosi yali neende Nasaae, haandi Emboosi yali Nasaae. 2Ohutulira elalira muhuchaaka Emboosi yali alala neende Nasaae. 3Nasaae yabitira mu Mboosi ohuloonga ebiindu byoosi, sibulao esiindu syoosi esyaloongwa ataali Emboosi. 4Obulamu bwali mu mweene oyo, #1:4 Obulamu bwali mu mweene oyo: Oba haandi obulamu obwo bwali obulafu bw'abaandu. 5Obulafu obwo bwaaduhira mu siirima, mani esiirima nisitanyala ohuyiingira obulafu daawe.
6 #
Mat 3:1; Mrk 1:4; Luk 3:1,2. Aliwo omuundu owatumwa ohutula eyiri Nasaae, olaangwa Yowaana. 7Yeecha ohweekesa abaandu ebidiira hu bulafu. Yeecha ohubeekesa, boosi banyale ohuwulira haandi bafukiirire. 8Yowaana wuno haba siyali obulafu obwo daawe, nae yeechia ohweekesa abaandu ebidiira hu bulafu obwo.
9Obulafu bwadyeeri bweene obuhosera buli muundu nibwo obwali bwiicha mu syaalo. 10Emboosi yali mu syaalo. Nasaae yaloonga esyaalo ohubitira mu Emboosi. Nae Emboosi niyali mu syaalo, esyaalo haba sisyamumanya daawe. 11Yeecha mu syaalo syae syeene, nae abaandu bae beene haba sibamwaakaanira daawe. 12Nae abo boosi abamwaakaanira, abo abafukiiririra mu liita lyae, yababeresa obunyala bw'ohweehola abaana ba Nasaae. 13Beehola abaana ba Nasaae mu ngeri eyitaali eya buli ludaalo, abo abateebulwa neende amabaanga, kata neende mu bunyala bw'omubiri, oba ohudaha hw'omuundu, nae hulw'obunyala bwa Nasaae.
14Emboosi yeehola omuundu, mani n'amenya alala naafwe, niyeechula embabaasi alala neende obwadyeeri; efwe hwabona oluyaali lwae luhoongo muno, koti oluyaali lw'Omwaana mudeerwa wa Nasaae. 15(Yowaana yatusa obuloli bu mudiiraho, mani yehuuma n'aboola ati, “Wuno niye oyo yi ndalomalomaho nimboola endi, ‘Oyo ochia ohwiicha enyuma waange, yaahira oluyaali muno, olwohuba oyo yaluwo ese nitaabaao.’”) 16Haandi ohutula mu bwiichufu bwae obwo nibwo fwesi bu hwabeeresebwa embabaasi mbitiirifu. 17Olwohuba Nasaae yaleeta amalako ohubitira mu Musa; nae embabaasi neende obwadyeeri byeecha ohubitira mu Yesu Kristo. 18Abulao omuundu yeesi owabonaho Nasaae; ohutusaho Omwaana mudeerwa wa #1:18 ohutusaho Omwaana mudeerwa wa: Ebyandiiko bihuluundu bihale biindi bisoma biti, ‘Nasaae, oyo oli silala neende Nasaae, haandi oli aambi muno neende Laatang'ene, niye owatutuumbulira koti lu Nasaae ali.’
Ohuyaala hwa Yowaana Omubatiisi
(Mat 3:1-12; Mrk 1:1-8; Luk 3:1-18)
19Mani buno nibwo obuloli bu Yowaana yatusa, Abayudaaya nibamutumira abalaamisi neende Abaleefi ohutula Yerusalemu ohumuteeba bati, “Ewe niiwe naanu?” 20Haba siyekaana ohukobolamo daawe, nae yeyama n'aboola ati, “Ese haba siniise Kristo.” 21#Mal 4:5; Amal 18:15,18. Mani nibamuteeba bati, “Niiwe naanu? Niiwe Elija?” Nae yaboola ati, “Haba daawe.” “Niiwe omunabbi?” Nae yakobolamo ati, “Haba daawe.” 22Mani nibamuteeba bati, “Niiwe naanu? Tuboolere sihuchia ohukobola mu baandu batutumire. Ni siina syeene si welomalomaho?” 23#Yis 40:3. Yowaana yaboola ati, “Ese ndi ekono ely'oyo oli ohuhuumira mu siparara ati, ‘Kololose engira y'Omwaami,’ koti lu omunabbi Yisaaya yaboola.”
24Bulaanu, abaandu abali nibabatumire bali Abafarisaayo. 25Ao mani nibamuteeba bati, “Lwasiina obatiisa, n'otaali Kristo, oba Elija, oba omunabbi?” 26Yowaana yabakobolamo ati, “Ese mbatiisa neende amaachi; nae yiluwo oweemere akatikaati weeng'we yi mutaamanyire, 27oyo owunoondaho enyuma, yi tahoyera kata ohuboolola esia ch'ebiraato byae.” 28Ebyo byaliwo Bbetani, engereha wa Yorodaani, yi Yowaana yabatiisiraanga.
Ahakoondi hayere ha Nasaae
29Hu ludaalo luloondaho, Yowaana yabona Yesu niyeecha n'achoomere yali, mani n'aboola ati, “Bone, ahakoondi hayere wa Nasaae, oyo omalao ebyonoono by'esyaalo! 30Wuno niye oyo yi ndalomalomaho endi, ‘Enyuma waange yiluwo omuundu oli ohwiicha owuuhira oluyaali, olwohuba oyo yaluwo ese nitaabaao.’ 31Ese mweene sindali nimumanyire; nae esyo nisyo esyandeeta ohubatiisa neende amaachi, hu anyale ohumanyiswa eyiri abaandu ba Yisiraeli.” 32Yowaana yatusa obuloli n'aboola ati, “Ese ndabona Mwooyo niyeeha koti eguugu ohutula Muukulu, mani n'amudoong'aho. 33Ese syesi haba sindali nimumanyire; nae oyo owaanduma ohubatiisa neende amaachi yamboolera ati, ‘Oyo yo'onabona Mwooyo n'amwiihaho mani yamudoong'aho, oyo niye obatiisa neende Mwooyo Mwoolerefu.’ 34Mani ese ndabona, haandi mbeekesa endi oyo niye Omwaana wa Nasaae.”
Abeeki ba Yesu bataangira
35Hu ludaalo luloondaho, haandi Yowaana yali niyeemere alala neende abeeki bae babiri; 36yabona Yesu naali ohukeenda, mani n'aboola ati, “Bone ahakoondi hayere wa Nasaae!” 37Abeeki bae abo bawulira n'aboola atyo mani nibaloonda Yesu. 38Yesu yakaluuhana, yaababona nibamuloonda, mani n'abateeba ati, “Siina syeene si muli ohukoonya?” Nabo bamukobolamo bati, “Rabbi (amahuluundu mbwe, Omweekesa) wamenya yeena bweene?” 39Yesu yababoolera ati, “Mwiiche mubone.” Mani nibachia nibabona yi yali niyamenya; nibaba nae oludaalo olwo lwoosi, olwohuba chali nichiri esaa ehumi ch'engoloobe. 40Mulala hu babiri abawulira Yowaana, mani n'amuloonda yali Anderea, mwaanang'ina Simooni Petero. 41Yataangira ohubona Simooni mwaanang'ina, mani n'amuboolera ati, “Hunyoolere Mesaaya” (amahuluundu mbwe Kristo). 42Mani n'amuleeta eyiri Yesu. Yesu yamulingaala yaaboola ati, “Niiwe Simooni omwaana wa Yowaana? Ochia ohulaangwaanga Keefa” (amahuluundu mbwe Petero).#1:42 Keefa: Emboosi Petero mu lulimi Lugiriki yeekesa mbwe Olwaanda.
Yesu alaanga Filipo neende Natanaeli
43Nibwahya echuli, Yesu yaheengao ohuchia Galilaaya. Yanyoola Filipo mani n'amuboolera ati, “Noonde.” 44Nae bulaanu, Filipo yali owa Bbetasaida, esiko sihuluundu sya Anderea neende Petero. 45Filipo yanyoola Natanaeli, mani n'amuboolera ati, “Hwaakaanire oyo yi Musa yandiikaho mu Malako neende yi banabbi baandiikaho, Yesu Omunasareeti, omwaana wa Yosefu.” 46Natanaeli yamuboolera ati, “Mani siliwo esiindu silai syoosi esinyala ohutula Nasareeti?” Nae Filipo yamuboolera ati, “Ewe yiicha obone.” 47Yesu niyabona Natanaeli niyeecha, yamuboolera ati, “Bone, Omuisiraeli mweene, otaliho ohweebachirisa hwoosi daawe!” 48Natanaeli yateeba Yesu ati, “Wuumanyire otye?” Yesu yamukobolamo ati, “Filipo n'asisiiri oohwiicha ohuhulaanga, hubweene nooli aasi w'omusaala mutuli.” 49Natanaeli yamukobolamo ati, “Omweekesa, niiwe Omwaana wa Nasaae! Niiwe Omutuki wa Yisiraeli!” 50Nae Yesu yamukobolamo ati, “Ofukiirira olwohuba huboolere endi, hubweene nooli aasi w'omusaala mutuli? Ochia ohubona ebiindu bihira bino.” 51#Huc 28:12. Yesu haandi n'ameeda ohumuboolera ati, “Huboolera obwadyeeri bweene endi, mwahabone Ekulu niliikuulwe, haandi bamalaika ba Nasaae nibaniina haandi nibeeha hu Omwaana w'Omuundu.”
လက္ရွိေရြးခ်ယ္ထားမွု
Yowaana 1: SAMDC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©Bible Society of Kenya, 2019
©Bible Society of Uganda, 2019