Yowaana 5
5
Yesu awonia omulwaae hu sidiba
1Luunyuma lwa bino, syabaao esidyaalo sy'Abayudaaya, Yesu yesi yacha Yerusalemu.
2Bulaanu Yerusalemu, aambi neende esiruwa silaangwa, Esiruwa sy'Amakoondi, waliwo esidiba silaangwa mu Luibburania siti “Bbetisata,” esiriho ebigoro bitaanu. 3Mu bigoro ebyo, abalwaae ba buli mbya beyalisaangamo koti, abawofu, abalema, abadataala. 4Malaika w'Omwaami yehaanga mu sidiba mu biha biindi, mani n'adubuula amaachi. Oyo owataangiraanga ohwiiha mu sidiba amaachi nikadubuuhire, yawonesebwaanga buli bulwaae boosi bu yalichiingi nabo. #5:4 nikadubuuhire: Ebyandiiko bihuluundu bihale biindi bisoseheramo ano mu bwiichufu oba mu bwiimbikiti bino biti, ‘nibaliindiriire ohweesera hw'amaachi; olwohuba malaika w'Omwaami yehanga aasi mu sidiba mu biha bikabuhaane, mani asaangulusa amaachi ako: mani buli muundu wataangiraanga ohuseenamo amaachi nikahasaanguluswa, yaonisibwaanga buli mbya y'obulwaae bu yabechaanga nabwo.’ 5Yaluwo omusaacha owamala emyaaka amahumi kadatu neende chitaanu-na-chidatu n'alwaala. 6Yesu niyamubona niyeyaliise ao, yamanya ati, omusaacha oyo yali amalire ao embaka ndeeyi muno, mani n'amuteeba ati, “Odaha ohuwonisibwa?” 7Omusaacha mulwaae oyo yamukobolamo ati, “Omwaami, mbula omuundu yeesi owahangiinga yanyingisa mu sidiba amaachi nikadubuuhire, olwohuba ese lu njolerayo, nyoola omuundu wuundi n'amalire ohwiingiramo hale.” 8Yesu n'amuboolera ati, “Siingira, obukule obuliri bwao okeende.” 9Mani abweene-na-bweene ao, omusaacha oyo yawonisibwa, n'abukula obuliri bwae n'akeenda. 10#Neh 13:19; Yer 17:21. Oludaalo olwo lwali olwa Sabbaato. Abayudaaya nibaboolera omusaacha wali awonisibwe oyo bati, “Olwaleero lwa Sabbaato, haba sofukiirirwa ohukiinga obuliri bwao.” 11Nae yabakobolamo ati, “Omusaacha wumoniisye niye owumbooleere ati, ‘Siingira, obukule obutalihe bwao okeende.’ ” 12Nabo bamuteeba bati, “Omuundu oyo niye wiina ohubooleere ati, ‘Siingira, obukule obuliri bwao okeende’?” 13Nae bulaanu, omusaacha wali awonisibwe oyo, haba siyali amumanyire daawe, olwohuba Yesu yali amalire ohwewerawo, koti lu sidiyiiha sy'abaandu sihoongo muno syali abuundu ao. 14Luunyuma, Yesu yamwakaana haandi n'ali mu Nyuumba ya Nasaae, mani n'amuboolera ati, “Bona, bulaanu oli omulamu, otonoonaangaho haandi daawe, ataali ao esihiramo obubi sichia ohuhukwaaho.” 15Omusaacha oyo yawaawo, mani n'achia n'aboolera Abayudaaya ati yali Yesu owamuwonia. 16Sino nisyo syakera Abayudaaya nibakiiya Yesu, olwohuba yali aholere esiindu sino hu ludaalo lwa Sabbaato. 17Yesu yabakobolamo ati, “Laata buli ludaalo ahola, mani syesi hoyera ohuhola.” 18Sino nisyo esyakera Abayudaaya bamukiiya muno ohumwiita, olwohuba haba siyaakama ohuhalaka elako lidiira hu Sabbaato lyoong'ene, nae haandi yelaanga ohuba Omwaana wa Nasaae, mani niyeehola owaakana neende Nasaae.
Obunyala bw'Omwaana
19Ao Yesu mani n'ababoolera ati, “Mbaboolera obwadyeeri bweene endi, sibulao esiindu syoosi si Omwaana anyala ohuhola hulwae omweene, ohutusaho esyo sy'abona koti Laatang'ene lu asihola; olwohuba buli si Laatang'ene ahola, Omwaana yesi nisyo sy'ahola. 20Olwohuba Laatang'ene adaha Omwaana, mani amweekesa byoosi bi aba n'ahola; haandi achia ohumweekesa emirimo kihiraho neende ekyo, hu munyale ohuwukaho. 21Olwohuba, koti lu Laatang'ene asyuuhisa abafu mani yababeresa obulamu, olwo nilwo lwosi lu Mwaana aberesa obulamu oyo yeesi yaba n'adahisa. 22Laatang'ene haba s'aheengera omusaango ohuhira omuundu yeesi, nae yaberesa Omwaana obunyala bwoosi obw'oheenga emisaango, 23hu baandu boosi banyale ohwiisaanga oluyaali mu Mwaana, koti lu beesa oluyaali mu Laatang'ene. Oyo yeesi oteesa oluyaali mu Mwaana, haba siyeesa oluyaali mu Laatang'ene owamutuma. 24Mbaboolera obwadyeeri bweene endi, oyo owulira emboosi chaange mani yafukiirira oyo owaanduma, ali neende obulamu butaakama; haba saachia huheengerwa omusaango, aba atulire mu hufwa, mani yoola mu bulamu.
25“Mbaboolera obwadyeeri endi, esiha sichia ohwoola, haandi simalire ohwoola, abafu lu bachia ohuwulira ekono ly'Omwaana wa Nasaae. Mani abo abaliwulira bahabe abalamu. 26Olwohuba koti lu Laatang'ene ali enjaako y'obulamu, mu ngeri nasilala eyo, yaberesa Omwaana wae obunyala bw'enjaako y'obulamu. 27Haandi yamuberesa obunyala bw'ohuheenga emisaango, olwohuba niye Omwaana w'Omuundu. 28Esyo sitabawukisa daawe; olwohuba esiha sichia ohwiicha, abo boosi abali mu biriindwa bachia ohuwulira ekono lyae 29#Dan 12:2. mani babitulemo. Abo abaholaanga ebilai, bahasyuuhire mani baaba abalamu. Nae abo abaholaanga ebibi, bahasyuuhire mani baheengerwe emisaango.
Yesu bi ahola nibyo ebyomiisa by'alomaloma
30“Ese sinyala ohuhola esiindu syoosi hulw'obunyala bwaange omweene daawe. Heenga omusaango koti lu Nasaae yaamboolera ohukuheenga. Mani sakira eheenga y'emisaango yaange y'obwadyeeri, olwohuba ese haba siholera hu bi ndaha daawe, nae holera hu ebyo owaanduma by'adaha. 31Nikali mbwe ese omweene niise owetusira obuloli, obuloli bwaange buba si bwadyeeri daawe; 32nae yiluwo owuundi otusa obuloli bundiiraho, mani manyire endi, obuloli bwatusa obundiiraho, bwadyeeri nibwo. 33#Yow 1:19-27; 3:27-30. Eng'we mwatuma bawamwaanda eyiri Yowaana, mani n'alomaloma obwadyeeri bweene. 34Sikali mbwe obuloli bundiiraho butula hu baandu sa; nae ese mbaboolera sino hu munyale ohuwonisibwa. 35Yowaana yali etaara lyaaduha haandi elihosa. Nae eng'we mwadaha ohumala esiha sidiidi syoong'ene nimwehoyera mu bulafu. 36Nae ndi neende obuloli buhuluundu buhiraho obwa Yowaana. Olwohuba ebyo bi hola, Laata bi yamboolera ohwooseresa, ebyeene ebyo nibyo ebyeekesa biti, Laata yaanduma. 37#Mat 3:17; Mrk 1:11; Luk 3:22. Laata owanduma oyo, niye omweene owomiisa ati omweene niye owaanduma. Eng'we haba simuwuliraangaho ekono lyae kata nabudiidi, oba ohubona koti lu afwaana. 38Haandi emboosi yae haba simuyibiiha mu myooyo kyeeng'we, olwohuba haba simufukiirira oyo yi yatuma. 39Mukoonyeresa mu byandiiko byoolerefu, olwohuba mubaasa muti, omwo nimwo omuli obulamu butaakama. Haandi ebyeene ebyo nibyo bi nomanomaho; 40nae eng'we muhaya ohwiicha yi ndi ohunyoola obulamu. 41Ese haba singoonya ohunyoola oluyaali ohutula eyiri abaandu daawe. 42Nae ese manyire endi eng'we haba simwaheera Nasaae mu myooyo kyeeng'we. 43Ese ndeecha mu liita lya Laata, nae eng'we haba simunjakaanira daawe; nae owuundi niyeecha mu liita lyae omweene, oyo niye yi muchia ohumwaakaanira. 44Munyala mutye ohufukiirira, nimukoonya onyoola oluyaali ohutula eyiri abaandu basyeeng'we, nae haba simudeeba hu luyaali lutula eyiri Nasaae mulala yeeng'ene? 45Mutabaasa muti neese ochia ohubawabira eyiri Laata. Musa niye ochia ohubawaabira, oyo yi mwataamo esuubi lyeeng'we. 46Nikali mbwe mwafukiirira mu Musa, syesi mwahafukiiriremo, olwohuba Musa yandiika ebinomanomaho. 47Nae nimutafukiirira mu bi Musa yaandiika, munyala mutye ohufukiirira emboosi chaange?”
လက္ရွိေရြးခ်ယ္ထားမွု
Yowaana 5: SAMDC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©Bible Society of Kenya, 2019
©Bible Society of Uganda, 2019