Luu 22
22
Nyɔ̍ klaaᵻ sɔ̌ Jusu u̍h iě ɔ̍ dbǎ
(Matio 26.1-5; Maɛ 14.1-2; Chɔɔn 11.45-53)
1Blèe̍ ɛ̀ se̍-a fù-i dɛ̍ᵻ we̍ poe-ɛ, ɛ̍ peě kɔǎn we̍ wɛ̀, ɛ̀ u̍h-a dǎɛ-a Sììkɛ̍n-a Peě-ɛ. 2Wɛ̀ Nyɔsoa-a slaǎ sà nyɔ̍ klaaᵻ ke telě nǎ poe nyɔ̍-a pɔ̀n jii la̍ i̍ u̍h iě Jusu dbǎ soɛɛ, dɛ̍nu̍ɛ, u̍h-a ple̍ nyɔ̍gbei jǔ.
Juda wɔ̌ɛn Jusu kwlǎ sà tìh i̍
(Matio 26.14-16; Maɛ 14.10-11)
3Wɛ̀ Juda u̍h-a dǎɛ-a Ɛkɛlia-ɛ, iě Setɔn gbǎ dě ɔ̍ ja̍a̍. Kòà-a pùè jɔ̌ sɔɔ̌n laa̍ u̍h-a due bo. 4Wɛ̀ ɔ̍ mu̍ dě Nyɔsoa-a slaǎ sà nyɔ̍ klaaᵻ ke slaǎ sà gbò-a chape we̍. Iě ɔ̍ ke u̍h pu̍e̍e tìh ka ɔ̍ mu̍-a Jusu kwlǎ sà-a nu̍ dě u̍h we̍-ɛ. 5Ɛ̍ tè-e u̍h-a wlùh i̍, iě u̍h po̍ wlu̍ tɔ̀ma̍a̍ u̍h iě wlǐ pɛ̌ɛ. 6Wɛ̀ Juda wɔ̌n. Sɔ ɔ̍ pɔ̀n la̍ jii la̍ i̍ sǔh ɔ̍ iě Jusu kwlǎ sà dě u̍h we̍ wɛ̀ nyɔ̍gbei je̍e la̍a̍n jě.
Jusu po̍ dɛ̍ᵻ gba̍a̍ ɔ̍ iě Sììkɛ̍n Weɛ̍-a di̍-dɛ̍ᵻ di̍
(Matio 26.17-25; Maɛ 14.12-21; Chɔɔn 13.21-30)
7Blèe̍ ɛ̍ se̍-a fù-i dɛ̍ᵻ we̍ poe-ɛ, wɛ̀ ɛ̍ weɛ̍-a peě nyni̍-o. Dǒ ɛ̍ di̍i̍ bo nyɔ̍-a sà-ɛ Sììkɛ̍n-a blawɛ̌ jǔ slaǎ. 8Iě Jusu dbo̍ Pitɛ ke Chɔɔn. Ɔ̍ la̍a̍ dě u̍h we̍, “Mɔ̀ mu̍ mɔ̀ iě Sììkɛ̍n Weɛ̍-a Peě-a di̍-dɛ̍ᵻ gba̍a̍ po̍ dǒ àɔ̀ we̍ à iě di̍.”
9Wɛ̀ u̍h la̍a̍ dě ɔ̍ we̍, “Tàwe̍ àn pɔ̀n à iě i̍h gba̍a̍ po̍-e ɛ?”
10Iě ɔ̍ la̍a̍, “Pò mɔ̀ nyni̍ wlɔ̀-ɛ, mɔ̀ ke jɔ̍gbau due-a mu̍ gbèɛ̀ɛn, ɔ̍ tè tee̍ dlǔ. Nɛ̀ mɔ̀ wɔ̀ dǒ ɔ̍ de̍e̍ mɔ̀ iě dě gbò kɔn di̍i̍ ɔ̍ mu̍-a mu̍-ɛ pa̍. 11Nɛ̀ mɔ̀ sèàɛ̍ gbò joi wlùh, mɔ̀ la̍a̍, ‘À Dlǔtu la̍ toe àɔ̀ dihwi̍h gbòju, tà ɔ̍ ke ɔ̍ kòà-a mu̍-a Sììkɛ̍n Peě-a di̍-dɛ̍ᵻ di̍-iɛ.’ 12Nɛ̀ ɔ̍ mu̍ mɔ̀ ja̍i̍ gbòju klaa ɛ̀ dɛ̍ᵻ kli̍hgbɛ̍ nɛ-a dě di̍i̍-ɛ toe. Dě mɔ̀ iě dɛ̍ᵻ kli̍hgbɛ̍ gba̍a̍ po̍-e.”
13Wɛ̀ u̍h mu̍, iě u̍h jě ìh kɔn taǐn Jusu sèàɛ̍-a u̍h wlùh-ɛ. Wɛ̀ u̍h po̍ Sììkɛ̍n Peě-a di̍-dɛ̍ᵻ gba̍a̍.
Joi-a wìe̍dɛ
(Matio 26.26-30; Maɛ 14.22-26; 1 Kɔwlɛntiɔn 11.23-25)
14Ti̍ nyni̍-aɛ, wɛ̀ Jusu ke ɔ̍ gba̍tòà tìèe̍ i̍ dǒ teble̍ gbɔ̀. 15Iě ɔ̍ la̍a̍ dě u̍h we̍, “Ɛ̍ nu̍ ǎn wlùh dɛ̍ kaa̍ mɔ̀ ke ǐn ke à iě Sììkɛ̍n Peě-a di̍-dɛ̍ᵻ di̍ sasǎ wɛ̀ iě tìh jě-ɛ dǔ. 16Dɛ̍nu̍ɛ, ǎn sèàɛ̍ mɔ̀ wlùh, ǐn se̍ i̍h di̍ mu̍ dɛ te̍e̍ wɛ̀ dɛ̍ᵻ ìh kɔ̍-a dǒ ǐn pùn i̍-ɛ, i̍h iě nɛ dě Nyɔsoa-a kmɔ̌ wlu̍ i̍ kɔn-ɛ di̍i̍.”
17Wɛ̀ Jusu dǔ kàu̍n-u, iě ɔ̍ po̍ Nyɔsoa tlɔ̌. Ɔ̍ la̍a̍, “Mɔ̀ dǔ ɛ̀ la-a mɔ̀ iě ɛ̍ mɔ̀-a chɛ̀ jii̍ gblè. 18Ǎn sèàɛ̍ mɔ̀ wlùh, sɔ da̍a sèàn blǐ ǐn se̍ nmɔ̍ la nǎ mu̍ dɛ te̍e̍ wɛ̀ Nyɔsoa-a kmɔ̌ wlu̍ i̍ kɔn-ɛ iě ji̍.”
19Wɛ̀ ɔ̍ dǔ blèe̍ gba̍n-a, iě ɔ̍ po̍ Nyɔsoa tlɔ̌. Wɛ̀ ɔ̍ chɛɛn ɛ̍ i̍, iě ɔ̍ nyǐ ɛ̍ ɔ̍ kòà. Ɔ̍ la̍a̍, “Ɛ̀ la ǎn ku̍ bo [ɛ̍ sà-ɛ slaǎ dǒ mɔ̀ we̍. Mɔ̀ di̍ ɛ̀ la wɛ̀ ǎn tìh iě dǒ mɔ̀ wlì i̍ sǐ.” 20U̍h wɔ̀-a dɛ̍ di̍-ɛɛ, wɛ̀ ɔ̍ nyǐ u̍h kàu̍n laa̍ ke. Iě ɔ̍ la̍a̍, “Kàu̍n la, ɛ̍ bo ɛ̀ nu̍ ku̍o̍ delee Nyɔsoa po̍ dǒ ǎn nymɔ̍ ɛ̀ wlǎ-a i̍ dǒ mɔ̀ we̍-ɛ we̍.]
21“Jɛ nyɔ̍ ɔ̀ mu̍-a ǐn kwlǎ sà-ɛ, ɔ̍ bo ɔ̀ ke ǐn ke à gbo̍a̍ɛ-a sɔ̍n jǔ da̍a teble̍ kɛ̍n. 22Nyi̍ɔ̍-a Jǔ-a mu̍ mɛ̌ dǒ ka Nyɔsoa nu̍-a ɛ̍ i̍ dbǎ-a we̍. Jɛ nyɔ̍ ɔ̀ sà-a ɔ̍ kwlǎ-ɛ, chlě dǒ ɔ̍ we̍.”
23Wɛ̀ u̍h tè we̍ i̍ tèle-ɛ gbɔ̀, pò u̍h-a nyɔ̍we̍ bo ɔ̀ mu̍ ɛ̍ nu̍ kɔ̌ɔ.
Kòà-a sǔh sà wɔ̍ɔ̍n i̍ nyɔ̍ ɔ̀ ku̍-a wɔ̍n-ɛ tìh
24Wɛ̀ wɔ̍ɔ̍n i̍ sà-a gbǎ dě kòà nynɛ̌ dǒ u̍h-a nyɔ̍ jɔ ku̍-a wɔ̍n ɔ̀ sìì-a ɔ̍ ba̍ᵻ kli̍hgbɛ̍-ɛ dɛ we̍. 25Iě Jusu la̍a̍ dě u̍h we̍, “Ùh se̍-a Juu nyɔ̍-ɛ u̍h-a blǔh baaᵻá nui u̍h-a nyɔ̍ bloa̍ joi dɛ kɛ̍n i̍. Wɛ̀ nyɔ̍ ùh blě-a tùn dǒ u̍h dlǔwèàì-ɛ, iě u̍h-a dǎɛ u̍h-a chɛ̀ dɛ̍ᵻ chɛ̀ nu̍ nyɔ̍. 26Jɛ ɛ̍ se̍-o mɔ̀ɔ̍ nɔ̀ɔ̍ nynɛ̌ i̍ nmɔ. Iě pò nyɔ̍ ku̍ wɔ̍n dě mɔ̀ nynɛ̌ ɔ̍ sìì ɔ̍ ba̍ᵻ i̍-ɛ, nɛ̀ ɔ̍ bo ɔ̀ iě jǔwɛ wɔ̀ dě mɔ̀ nynɛ̌, wɛ̀ dlǔtu iě pòi̍ju wɔ̀. 27Jɔ tè-a i̍ dǒ teble̍ gbɔ̀ u̍h-a dbee-a jǔ-ɛ ke, jɔ dbee-a nyɔ̍ jǔ-ɛ, u̍h nɛ-a sɔɔ̌n-ɛ, jɔwe̍ bo ɔ̀ ku̍ wɔ̍n ɛ? Jɔ tè-a i̍-ɛ bo ɔ̀ ku̍ wɔ̍n. Jɛ ǐn nɛ nɔ̌ mɔ̀ nynɛ̌ ka nyɔ̍ jǔ dbee nyɔ̍-ɛ.
28“Mɔ̀ɔ̍ bo ùh nyna ǐn de̍e̍ i̍ dě ǎn jua̍i̍ sàɛ̀-ɛ kli̍hgbɛ̍ di̍i̍. 29Ɛ̍ tìh-ɛ, ka ǐn Baa nu̍-a ǐn nyɔ̍ wlu̍ i̍ kɔn-ɛ kwa̍ tèè-ɛɛ, kǎ ǐn nu̍ ɛ̍ mɔ̀ kwa̍ tèè-ɛ ke. 30Wɛ̀ mɔ̀ iě dǒ ǎn teble̍ kɛ̍n dɛ̍ di̍-i, mɔ̀ iě nǎ dě ǎn kmɔ̌ wlu̍ i̍ kɔn-ɛ di̍i̍. Wɛ̀ mɔ̀ iě dǒ nynɛ̌ gbalǎᵻ kɛ̍n i̍ tìèe̍, wɛ̀ mɔ̀ iě Eslɔɛ nyɔ̍-a chɛ̌tu-a pùè jɔ̌ sɔɔ̌n wlu̍ i̍ kɔn.”
Jusu la̍ Pitɛ-a mu̍ ɔ̍ tìh-i tòlo
(Matio 26.31-35; Maɛ 14.27-31; Chɔɔn 13.36-38)
31Jusu la̍a̍, “Samo, Samo, Setɔn sà-ɛ wlu̍ kɛ̍n ɛ̍ iě mɔ̀-ɔ slɛ̌n ka klè joi-a fùn kwǐ kɛnɛ̌ i̍-ɛ. 32Jɛ ǐn ba̍le dǒ àn tàà wɛ̀ àn wlùh gbaɛ je̍e ìn si̍h wɔ̍n po̍. Nɛ̀ pò ìn fèàɛ̀ nɔ̌ ǐn we̍ dode̍-ɛ, nɛ̀ ìn po̍ ìn de̍di̍i̍ᵻ gbǐh ku̍u̍ ke o.”
33Iě Pitɛ la̍a̍, “Joi, ǐn gbàɛ̀ iě dě ìn we̍ kasoo gbǎ wɛ̀ iě-e mɛ̌-ɛ.”
34Jusu la̍a̍, “Pitɛ, ǎn sèàɛ̍ ìn wlùh, àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛ dǔ sɔ̀nwɔ̍i̍n.”
Jusu tù ɔ̍ kòà slɛ̌n
35Wɛ̀ Jusu la̍a̍ dě ɔ̍ kòà we̍, “Ti̍ ǐn dbo̍-a mɔ̀ wɛ̀ mɔ̀ se̍-a pɔsɛ̍ ke, gbèèkǔ ke bu̍h-u po̍-dɛ̍ᵻ gba̍-ɛ, dɛ̍ bo ɛ̀ kɔn tìh nu̍ mɔ̀ i̍ ɛ?”
Iě u̍h la̍a̍, “Dɛ̍-a tìh se̍ à i̍ nu̍.”
36Jusu la̍a̍, “Jɛ kaka la̍ nyɔ̍ ɔ̀ blě-a pɔsɛ̍ ke gbèèkǔ-ɛ, nɛ̀ ɔ̍ dǔ ɛ̍-ɛ. Nɛ̀ nyɔ̍ ɔ̀ se̍-a plàn chlɛ̀n blě-ɛ, ɔ̍ ple̍ ɔ̍ dɛ̍wlo̍o̍ ɔ̍ iě due tɛ̀n. 37Nyɔsoa-a chlǐh-wlu̍ la̍a̍, ‘U̍h-a mu̍ ɔ̍ dɛ̍ᵻ sɔ̀nᵻ nyɔ̍ slè-e.’ Bɔ̌ ǐn sèàɛ̍ mɔ̀ wlùh, ɛ̍ kɔn ɛ̍ iě chɛ̀-ɛ gbǎ dǒ ǐn pùn. Dɛ̍nu̍ɛ, dɛ̍ᵻ ìh chlǐh-a dǒ ǎn dɛ we̍-ɛ, i̍h-a nɛ la̍-ɛ.”
38Wɛ̀ ɔ̍ kòà la̍a̍, “Joi, gbɛ̀n-e, plàn chlɛ̀nᵻ sɔɔ̌n la.”
Iě ɔ̍ la̍a̍, “I̍h tìè i̍.”
Jusu ba̍le-e dě Ɔle-Tu̍ᵻá Tlu̍h kɛ̍n
(Matio 26.36-46; Maɛ 14.32-42)
39Wɛ̀ Jusu sɔ dǒ wlɔ̀, iě ɔ̍ mu̍ dě Ɔle-Tu̍ᵻá Tlu̍h kɛ̍n ɔ̍ ke ɔ̍ kòà ke, ɛ̀ nu̍-a ɔ̍ tǐwai dɛ̍ se̍e̍-ɛ. 40Ɔ̍ nyni̍-aɛ, iě ɔ̍ la̍a̍ dě u̍h we̍, “Mɔ̀ ba̍le wɛ̀ mɔ̀-ɔ je̍e blu̍ja̍a̍ gbǎ.”
41Iě ɔ̍ sɔ dǒ u̍h we̍ ɔ̍ mu̍ tà nyɔ̍ po̍ sɔɔ̌ gbo̍-ɛ, ɛ̍ mu̍-a nyni̍-ɛ. Wɛ̀ ɔ̍ po̍ kɔlu̍ᵻ wlù iě ɔ̍ ba̍le. 42Ɔ̍ la̍a̍, “Baa, pò ìn wɔ̌n-ɛ, nɛ̀ ìn sà ǐn kàu̍n la wɔ̍i̍n. Jɛ dɛ̍ àn pɔ̀n-a bo ɛ̀ ìè nɛ, ɛ̍ se̍ naɛ̍ ǐn se̍ dǎ.” [ 43Wɛ̀ Nyɔsoa-a ǐnchɔ̀ sɔ dě ja̍i̍wlɔ̀ ɛ̍ wlǔh-i ɔ̍ i̍. Iě ɛ̍ po̍ ɔ̍ gbǐh ku̍u̍. 44Wɛ̀ ɔ̍ ba̍le dɛ̍blɔ, dɛ̍nu̍ɛ, nɛ̀ ɛ̍ chlɛ̌n-ɛ ɔ̍ wlùh. Nɛ̀ ka nymɔ̍-a tǒ dǒ bloɔ̍-ɛ, kǎ sù ɛ̀ wlǔh-a ɔ̍-ɛ, ɛ̍ nu̍ tǒ-ɛ.]
45Ɔ̍ wɔ̀-a ba̍le-ɛ, iě ɔ̍ mu̍ dě ɔ̍ kòà we̍. Ɔ̍ iě-a mu̍-ɛ, nɛ̀ u̍h gboǎɛ nyinɔ̍ i̍ wɛ̀ dǒ wɔɛ-a sǔh we̍. 46Wɛ̀ ɔ̍ la̍a̍ dě u̍h we̍, “Dɛ̍nu̍ mɔ̀-a mɔ̌ ɛ? Mɔ̀ sɔ bloɔ̍ mɔ̀ iě ba̍le, wɛ̀ mɔ̀-ɔ je̍e blu̍ja̍a̍ gbǎ.”
Jusu gbɛ̍n-ɛ
(Matio 26.47-56; Maɛ 14.43-50; Chɔɔn 18.3-11)
47Jusu nɛ dǒ wlu la̍ wɛ̀ nyɔ̍ tlùgbei̍ ji̍. Nɛ̀ Juda ɔ̀ po̍-a Jusu-a kòà pùè jɔ̌ sɔɔ̌n-ɛ, ɔ̍ bo ɔ̀ blě u̍h kwa̍. Wɛ̀ ɔ̍ mu̍ Jusu wlì ɔ̍ iě ɔ̍ gblèè. 48Wɛ̀ Jusu la̍a̍ dě ɔ̍ we̍, “Juda, nyɔ̍ gblèè-ɛ bo àn mu̍ Nyi̍ɔ̍-a Jǔ kwlǎ sà-ɛ ae?”
49Kòà ùh ke Jusu na-aɛ, u̍h juo dɛ̍ ɛ̀ mu̍-a nɛ-ɛ, iě u̍h la̍a̍, “Joi, à nu̍ à plàn chlɛ̀nᵻ à iě u̍h we̍ fɔ̀n ae?” 50Iě u̍h-a due tba̍ Nyɔsoa-a slaǎ sà nyɔ̍-a dlǔtu-a kèi̍ dɛ̍, ɔ̍ chɛ̍n ɔ̍ di̍na̍ doun i̍.
51Jɛ Jusu la̍a̍, “Bɔ̌ ɛ̍ ba̍ nu̍-ɛ dɛ.” Iě ɔ̍ tǔh jɔ̍gbau laa̍ ɔ̍ doun i̍, wɛ̀ ɛ̍ bɔ̌.
52Wɛ̀ Jusu la̍a̍ dě slaǎ sà nyɔ̍-a klaaᵻ ke, slaǎ sà gbò-a chapeᵻ ke nyɔ̍ klaaᵻ ùh ji̍-a ɔ̍ gbɛ̍n la̍-ɛ we̍, “Ɛ̀ mɔ̀ nu̍-a plàn chlɛ̀nᵻ ke gbòmina̍ᵻ kwa̍ i̍ blě-ɛ wɛ̀ mɔ̀ nu̍-a ji̍-ɛ, nɛ̀ ka nyɔ̍ la̍ mɔ̍ jlǐ-nyɔ̍-ɛ. 53Ka sɔ̀n-a sɛ̀n-aɛ, kǎ ǎn nɛ dě mɔ̀ we̍ Nyɔsoa-a slaǎ sà gbò sɔ̀n, dǒ-o nɔ̀ɔ̍, mɔ̀ se̍ ǐn sɔ̍n pùn gba̍. Jɛ nɛ̀ jɛwɛ̀ mɔ̀-a ti̍ nyni̍ dɛbo, ɛ̍ ke kwile naɛ gbǐh ke.”
Pitɛ tòlo Jusu-a tìh-i
(Matio 26.57-58, 69-75; Maɛ 14.53-54, 66-72; Chɔɔn 18.12-18, 25-27)
54Wɛ̀ u̍h gbɛ̍n Jusu iě u̍h gba̍ ɔ̍ dě slaǎ sà nyɔ̍-a dlǔtu blǐ gbò. Iě Pitɛ wɔ̀ dǒ u̍h de̍e̍, jɛ nɛ̀ ɔ̍ ti̍ɛ̍ɛn u̍h we̍ i̍. 55U̍h tbà nɛ̍ dǒ gbò-a gbàɛ̍gbà-a wèa̍, iě u̍h tìèe̍ tàdùè i̍. Wɛ̀ Pitɛ tè i̍ dě u̍h nynɛ̌, 56iě nynɔ̌gbaɔ jǔ due ɔ̀ nu̍-a pòi̍ju-ɛ jě ɔ̍. Wɛ̀ ɔ̍ gbɛ̀n Pitɛ ja̍ sòo̍sòo̍, iě ɔ̍ la̍a̍, “Jɔ̍gbau la ɔ̍ ke Jusu-a na ke o.”
57Jɛ Pitɛ tòlo-e, ɔ̍ la̍a̍, “Nynɔ̌ chɛ̀, ǐn se̍ ɔ̍ juo o.”
58Ɛ̍ wlè-o wɛɛ iě nyɔ̍ dɔɔ jě ɔ̍. Wɛ̀ ɔ̍ la̍a̍, “Mɔ̀ la, mɔ̀ nyɔ̍ la u̍h-a due ke o.”
Jɛ Pitɛ la̍a̍, “Jɔ̍gbau chɛ̀, ɛ̍ se̍ mɔ̍ o.”
59Ɛ̍ wlè-o chɛ̀gbɛɛ iě jɔ̍gbau dɔɔ bla̍ dlǔ i̍, ɔ̍ la̍a̍, “Ǐn juo ɛ̍ kleǐn jɔ̍gbau la ɔ̍ ke Jusu na. Dɛ̍nu̍ɛ, ɔ̍-ɔ Kaladii jǔ ke.”
60Jɛ Pitɛ la̍a̍, “Jɔ̍gbau chɛ̀, ìh àn bla̍-aɛ, ǐn se̍ i̍h-a dɛ i̍ juo.”
Dǒ tàdùè laa̍, wlu̍ sǐi dě ɔ̍ wɔ̍ɔ̍n sǔh iě suuh slò. 61Wɛ̀ Joi fèàɛ̀, iě ɔ̍ gbɛ̀n Pitɛ ja̍. Iě wlu̍ ɔ̍ bla̍-a dě Pitɛ we̍-ɛ ɛ̍ dǔ dǒ ɔ̍ wlì i̍ sǐ-ɛ. Ɔ̍ la̍a̍, “Àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛ dǔ sɔ̀nwɔ̍i̍n.” 62Pitɛ sǐ-a sɔ̀n-ɛ, iě ɔ̍ fìn dɛ̍blɔ dɛ.
U̍h nui Jusu jlii̍h kɛ̍n i̍ iě u̍h bla̍ ɔ̍
(Matio 26.67-68; Maɛ 14.65)
63Nyɔ̍ ùh-a tù-a Jusu jlǐhɛ̍-ɛ, u̍h nui ɔ̍ jlii̍h kɛ̍n i̍ iě u̍h bla̍ ɔ̍. 64Wɛ̀ u̍h bla̍ ɔ̍ jliɛ̍ jlǐh, iě u̍h tèle ɔ̍ i̍, u̍h la̍a̍, “Po̍ gbànwli à iě jě. Nyɔ̍ bo ɔ̀ tba̍ ìn dɛ̍ ɛ?” 65Wɛ̀ u̍h po̍ ɔ̍ wlu̍ dɔu diih pùn i̍.
Jusu nɛ dǒ Juu-a taɔ jǔ
(Matio 26.59-66; Maɛ 14.55-64; Chɔɔn 18.19-24)
66Sɔ̀n sɛ̀n-aɛ, wɛ̀ nyɔ̍ klaaᵻ ke, Nyɔsoa-a slaǎ sà nyɔ̍ ke telě nǎ poe nyɔ̍ gbǎ tàdùè. Iě u̍h ja Jusu dǒ u̍h jǔ. Wɛ̀ u̍h la̍a̍, 67“Pò ìn tù Nyɔsoa-a Chèɛ̀ Tba̍ju-ɛ, nɛ̀ ìn sèàɛ̍ à wlùh.”
Jɛ ɔ̍ la̍a̍ dě u̍h we̍, “Pò ǐn sèàɛ̍ mɔ̀ wlùh-ɛ, mɔ̀ se̍ ɛ̍ tìh chɛ̀-ɛ po̍ mu̍. 68Nɛ̀ pò ǐn tèle mɔ̀ dɛ̍ i̍-ɛ, mɔ̀ se̍ ǎn wlu̍ pɔ̀n we̍ sà mu̍. 69Jɛ sɔ da̍a sèàn blǐ-ɛ, Nyi̍ɔ̍-a Jǔ-a mu̍ i̍ tè dǒ Nyɔsoa ɔ̀ Blě-a Gbǐh Kli̍hgbɛ̍-ɛ di̍na̍ we̍.”
70Wɛ̀ u̍h kli̍hgbɛ̍ la̍a̍, “Nɛ̀ɛ̍, mɔ̀ Nyɔsoa-a Jǔ ae?”
Iě ɔ̍ la̍a̍ dě u̍h we̍, “Mɔ̀ɔ̍ bo ùh dǎ laǎn.”
71Wɛ̀ u̍h la̍a̍, “À se̍ sàànsi̍i̍h dɔɔ i̍ pɔ̀n dɛ. À chɛ̀ wɔ̌n ɔ̍ wlu̍ wɛ̀.”
လက္ရွိေရြးခ်ယ္ထားမွု
Luu 22: KDNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Western Krahn published as KU̍O̍ DELEE © The Bible Society in Liberia, 1999.