लुका 3
3
बप्तिस्मा के़बिबा युहुन्नारे़ कुइङ्भन्
(मत्ति ३:१-१२; मर्कु १:१-८; युहु १:१९-२८)
1आल्ल रोमि पयम् हाङ् तिबेरियसे़ल्ले़ हाङ् चोगुबा तङ्बे थिक् ङा (१५) के़रे़आङ् वये़ल्ले़ पन्तियस पिलातसे़न् यहुदियाबा सुहाङ्गे़म्बा वये़॥ खे़न् ये़म्मो हे़रोदे़न गालिलसमा सुहाङ्गे़म्बा, कुन्साॽ फिलिप्पे़न् इतुरिया नु त्राकोनितिस थुम्मोबा सुहाङ्गे़म्बा, हे़क्क्याङ् लिसानियासे़न् एबिलेनि थुम्मोबा सुहाङ्गे़म्बा मे़वये़, 2हे़क्क्याङ् हन्नासे़न् नु कैयाफासे़न् मानिङ्वाॽफुसाम्बा वये़त्छि॥ खे़न् ये़म्मो एःक्सादे़न्नो जकरियारे़ कुस्सा युहुन्नाःल्लो निङ्वाॽफु पाःन्जाक्किन् त्ये़आङ् 3खुने़ॽ यर्दन यङ्घङ् खिरिबा लाजेॽओ खाराक् लाम्दिक् चोगे़र लायोलाम् हिन्दे़म्मे़ॽआङ् बप्तिस्मा पोःक्खे़म्मे़ॽ, हे़क्क्याङ् निङ्वाॽफुमाङ्ङिल्ले़ खिनिॽ लायोन् ले़प्मि के़बिरिॽ लॽरिक् इङ्भन् चोगुरो॥ 4हे़क्केलॽरिक् माङ्निङ्वाॽपान् के़बाःप्पा यसैयाःल्ले़ कुसाप्पन्नो युहुन्नारे़ कुयाःम्बेओ साप्ते़आङ् पत्,
“खुने़ॽ एःक्सादे़न्नो अक्खेलॽरिक् के़अःक्पा इक्लारो,
‘दाङ्बाल्ले़ कुमाराम्मिन् यारिप् चोगे़म्मे़ॽआङ्
कुलाम्हाॽ तोःन्दोन् चोगे़म्मे़ॽ!
5के़रे़क् ने़वालाहाॽ लुप्सिङ्ल,
कोःक्मा फाङ्जङ्हाॽ तङ्ङाङ्
ते़ःम्बे पोङ्ल हे़क्क्याङ् इःलाम्हाॽ तोःन्छिङ्ल ताप्फे़ःम्बा लाम्हाॽ नुबा पोङ्ल॥
6हे़क्केलॽरिक् निङ्वाॽफुमाङ्ङिल्ले़ पिरुसिबा कुसे़न्लप्पिन् के़रे़क् मे़न्छाम्गे़न् याप्मिहाॽरे़ मे़निसुॽरो॥’”#यसै ४०:३-५
7मनाहाॽ युहुन्नालाम् बप्तिस्मा पोङ्से़ खे़ॽयो मे़द्ये़॥ युहुन्नारे़ खे़ङ्हाॽ अक्खे मे़त्तुसिर फे़ःक्तुसि, “असेःक्सासे, खिनिॽ कन् के़दाबार के़बप्पा निङ्वाॽफुमाङ्ङिल्ले़ कुघुम्दिङ्लाम् खे़त्छिङ्ङे़म्मे़ॽ फाॽआङ् हाःत्ले़ के़मे़त्तिबे? 8लायोलाम् के़हिन्दिबा पाःन्निन् ओसेःन्दाङ् चोःक्से़ नुबा याःम्बक् चोगे़म्मे़ॽओ॥ आनिगे़ग अब्राहामरे़ कुस्सासिगे़, खे़ल्ले़चोगुल्ले़ खुम्दिङ्लाम् खे़त्छिङ्मा सुक्तिगे़ॽ फाॽआङ् निङ्वाॽ मे़इःत्ते़म्मिन्ने़ॽओ, थेआङ्भे़ल्ले़ निङ्वाॽफुमाङ्ङिल्ले़ग कन् लुङ्हाॽआङ् अब्राहामरे़ कुस्सा चोःक्मा सुक्तुसिॽरो॥ 9निङ्वाॽफुमाङ्ङिल्ले़ कुघासे़न्निल्ले़न् तःन्दिङ्ग सिङ्बुङ्हाॽओ चुक्ते़चुरे़आङ् वाॽरो॥ नुबा सिङ्सेॽ मे़न्धोःक्मनाबा के़रे़क् सिङ्बुङ्हाॽ मे़दाङुआङ् मिओ लाप्मे़देसुॽरो॥”
10मनाहाॽरे़ खुने़ॽ सेःन्मे़दोसु, “हे़क्केग्र आल्लो आनिगे थे चोगुम्बे़बाबे?”
11युहुन्नारे़ नोगप् पिरुसि, “हाःत्ले़ ने़त्छि चाङ् कत्तुॽ, खे़ल्ले़ मे़ङ्गप्मनाबान् लत्छा पिरुर, हे़क्क्याङ् हाःत्ले़ चामा कत्तुॽ, खे़ल्ले़ चामा मे़ङ्गप्मनाबान्नु हासु चर॥”
12हे़क्क्याङ् एःङ्याङ् के़भोङ्बाहाॽआङ् खे़ॽयो बप्तिस्मा पोङ्से़ मे़द्ये़आङ् युहुन्नान् सेःन्मे़दोसु, “सिक्साम्बे, आल्ल आनिगे़ग थे चोगुम्बे़बाबे?”
13युहुन्नारे़ खे़ङ्हाॽ मे़त्तुसि, “खिनिॽ रोमि थिम्मो साप्ते़आङ् के़बप्पाआङ्धो मनाहाॽलाम् यरिक् एःङ्याङ् मे़भोक्खे़म्मिन्ने़ॽ॥”
14हे़क्क्याङ् थक्सुबाहाॽआङ् खे़ॽयो मे़द्ये़आङ् “आनिगे़ग?” फाॽआङ् सेःन्मे़दोसुरो॥
खे़ङ्हाॽ युहुन्नारे़ अक्खे मे़त्तुसि, “खिनिॽआङ् वेॽ मनाहाॽलाम् साक्के़ल्ले़क् नु इङ्ले़क्पा आप्तिक्लाम्बा याङ् मे़भोक्खे़म्मिन्ने़ॽ, कर के़घोसुम्बा फाॽयाङ्ङो खिनिॽ निङ्वाॽ तासे़म्मे़ॽ॥”
15हे़क्क्याङ् मनाहाॽरे़ खुनिॽ निङ्वाॽबो ता लॽरिक् मे़हाङ्घुर निङ्साङ् मे़जोगुबा निङ्वाॽफुमाङ्ङिल्ले़ सेःन्दुबा ख्रिस्ते़ङ्ग बा कन् मेःम्बि फाॽआङ् खुनिॽ निङ्वाॽबो मे़मे़त्छिङ्लो॥ 16युहुन्नारे़ खे़ङ्हाॽ के़रे़क् नोगप् पिरुसि, “इङ्गाॽग खिनिॽ च्वाःत्तिल्ले़ बप्तिस्मा पिनिङ्, कर इङ्गाॽनुःल्ले़ मुक्साम्साबाधिक् तार पत्॥ इङ्गाॽग योक् कुइसिक् कुलाङ्सुप् नाम्हाॽ फाःङ्माआङ् मे़लाॽआन्लो॥ खुने़ॽग सेसेमाङ् नु मिःल्ले़ बप्तिस्मा के़बिरिॽरो॥ 17कुभॽएःत्तिल्ले़ सिन् आःम्मा फाॽआङ् खुने़ॽ यारिप् वाॽ, हे़क्क्याङ् खुने़ॽ तुगुर सुप्सुआङ् सिन् चाधोःक्लाओ चिक्खुॽ हे़क्क्याङ् कुहक्हाॽ आप्फाल्ले़आङ् मे़न्छिमनाबा मिओ हाःन्दुदेसुॽरो॥” 18हे़क्केलॽरिक् खुने़ॽ यरिक् परिक्ले़न् सिक्कुम्दिङ् खाहुन्हाॽ पिरुसिर सुनाइङ् इङ्भन् से़सुरो॥ 19कर युहुन्नारे़ सुहाङ्गे़म्बा हे़रोदे़न फे़ःक्तु, थेआङ्भे़ल्ले़ खुने़ॽ कुअङे़ःक्मा हे़रोदियासे़न् मेःक्खिम् मे़त्तुआङ् वये़, हे़क्क्याङ् वेॽ यरिक् फे़न् याःम्बक्हाॽआङ् चोगुआङ् वये़रो॥ 20हे़रोदरे़ युहुन्नान् पुङ्लाहिम्मो साक्तुआङ् आल्लसाङ् यरिक् फे़न्याःम्बक्किन् योॽरुरो॥
ये़सुन् बप्तिस्मा पोङ्
(मत्ति ३:१३-१७; मर्कु १:९-११)
21थिक्ये़न् काक् मनाहाॽ बप्तिस्मा मे़बोःक्खे़ल्ले़ ये़सुःन्नाङ् बप्तिस्मा पोःक्खे़॥ हे़क्क्याङ् खुने़ॽ तुवा चोगुर पत्छे़ल्ले़ ताङ्साक्पे़न् हरे़आङ् 22सेसेमाङ्ङिन् पुत्तुःक्के हे़क्के ये़आङ् खुने़ॽ कुसम्दाङ् चुक्ते़, हे़क्क्याङ् साङ्ग्राम्पेदाङ्ङोलाम् इक्लाधिक् ये़, “खे़ने़ॽ इङ्गाॽ आमिःम् आस्साने़रो॥ खे़ने़ॽनु इङ्गाॽ साॽरिक् सःत्ताङ्ङाङ् वाॽआरो॥”
ये़सुरे़ कुधाःक् मिङ्स्रान्
(मत्ति १:१-१७)
23आल्ल ये़सुरे़ माङ्से़वा याःम्बक् चोःक्मा हेःक्तुल्ले़ खुने़ॽ तङ्बे सुम्बोङ् (३०) के़रे़आङ् वये़॥ खुने़ॽ मे़न्छाम् याप्मिहाॽरे़ मे़इःत्तुबा कुइसिक् युसुफरे़ कुस्सा वये़रो॥ 24युसुफे़न् हे़लिरे़ कुस्सा, हे़लिन् मतातरे़ कुस्सा, माताते़न् ले़बिरे़ कुस्सा, ले़बिन् मे़ल्चिरे़ कुस्सा, मे़ल्चिःन् जन्नैरे़ कुस्सा, जन्नैःन् युसुफरे़ कुस्सा वये़रो॥ 25युसुफे़न् मत्ताथियासरे़ कुस्सा, मत्ताथियासे़न् आमोसरे़ कुस्सा, आमोसे़न् नाहुमरे़ कुस्सा, नाहुम्मिन् इस्लिरे़ कुस्सा, इस्लिन् नग्गाइरे़ कुस्सा, 26नग्गाइन् माथरे़ कुस्सा, माथे़न् मत्ताथियासरे़ कुस्सा, मत्ताथियासे़न् सेमैनरे़ कुस्सा, सेमैने़न् योसे़खरे़ कुस्सा, योसे़खे़न् योदारे़ कुस्सा वये़॥ 27योदान् योआनरे़ कुस्सा, योआने़न् रेसारे़ कुस्सा, रेसान् यरुबाबेलरे़ कुस्सा, यरुबाबे़ल्ले़न् सालतिएलरे़ कुस्सा, साल्तिएल्ले़न् नेरिरे़ कुस्सा वये़रो॥ 28हे़क्क्याङ् नेरिन् मे़ल्किरे़ कुस्सा, मल्किन् अद्दिरे़ कुस्सा, अद्दिन् कोसामरे़ कुस्सा, कोसाम्मिन् एलमातमरे़ कुस्सा, एलमातम्मिन् एरे़ल्ले़ कुस्सा वये़रो॥ 29हे़क्क्याङ् एरे़न् यहोसुरे़ कुस्सा, यहोसुन् एलिएजरले़ कुस्सा, एलिएजरे़न् योरिम्रे़ कुस्सा, योरिम्मिन् मातातरे़ कुस्सा, माताते़न् ले़बिरे़ कुस्सा वये़रो॥ 30हे़क्क्याङ् ले़बिन् सिमियोनरे़ कुस्सा, सिमियोने़न् यहुदाःल्ले़ कुस्सा, यहुदान् युसुफरे़ कुस्सा, युसुफे़न् योनामरे़ कुस्सा, योनाम्मिन् एलियाकिमरे़ कुस्सा वये़रो॥ 31एलियाकिम्मिन् मलेआरे़ कुस्सा, मलेआःन् मिन्नारे़ कुस्सा, मिन्नान् मत्ताथारे़ कुस्सा, मत्ताथान् नातानरे़ कुस्सा, नाताने़न् दाउदरे़ कुस्सा वये़रो॥ 32हे़क्क्याङ् दाउदे़न् यिसैरे़ कुस्सा, यिसैन् ओबेदरे़ कुस्सा, ओबेदे़न् बोअजरे़ कुस्सा, बोअजे़न् सल्मोनरे़ कुस्सा, साल्मोने़न् नहसोनरे़ कुस्सा वये़रो॥ 33नहसोने़न् अम्मिनादाबरे़ कुस्सा, अम्मिनादाबे़न् आरामरे़ कुस्सा, आराम्मिन् हेस्रोनरे़ कुस्सा, हेस्रोने़न् पेरेजरे़ कुस्सा, पे़रे़जे़न् यहुदाःल्ले़ कुस्सा वये़रो॥ 34यहुदान् याकुबरे़ कुस्सा, याकुबे़न् इसहाकरे़ कुस्सा, इसहाक्किन् अब्राहामरे़ कुस्सा, अब्राहाम्मिन् तेरहरे़ कुस्सा, तेरहन् नाहोरले़ कुस्सा वये़रो॥ 35हे़क्क्याङ् नाहोरे़न् सरुगरे़ कुस्सा, सरुग्गे़न् रउरे़ कुस्सा, रउन् पेलेगरे़ कुस्सा, पेलेगे़न् एबेररे़ कुस्सा, एबेरे़न् सेलहरे़ कुस्सा वये़रो॥ 36हे़क्क्याङ् सेलहन् कैनानरे़ कुस्सा, कैनाने़न् आर्पक्छदरे़ कुस्सा, आर्पक्छदे़न् सेमरे़ कुस्सा, से़म्मिन् नुहारे़ कुस्सा, नुहन् ले़मे़खरे़ कुस्सा वये़रो॥ 37हे़क्क्याङ् ले़मे़क्खे़न् मतुसेलहरे़ कुस्सा, मतुसेलहन् हनोकरे़ कुस्सा, हनोक्के़न् ये़रे़दरे़ कुस्सा, ये़रेदे़न् महलाले़लरे़ कुस्सा, महलाले़न् कैनानरे़ कुस्सा वये़रो॥ 38केनाने़न् एनोसरे़ कुस्सा, एनोसे़न् सेतरे़ कुस्सा, सेते़न् आदमरे़ कुस्सा, आदम्मिन् निङ्वाॽफुमाङ्ङिल्ले़ कुस्सा वये़रो॥
လက္ရွိေရြးခ်ယ္ထားမွု
लुका 3: LIF
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2009, 2023, Wycliffe Bible Translators, Inc. All rights reserved.