Jɔɔŋ 3
3
Nikodemɔs cheŋ Yesu
1Baal kʋbala nɛ fa hɛ nɩmɛ, baa yɩrɛ Nikodemɔs. Ʋ fa ŋaa Juu tɩŋŋaa kʋhɩaŋ nɛ a hɛ Farisii tɩŋŋaa tʋɔŋ. 2Tɩtaŋ kʋbala ʋ sii kɔ Yesu teeŋ a bʋl, “Kʋhɩaŋ, la jɩma arɩ ŋ nɛ ŋaa Nɩɩ-la Wɩa sɩ ta dɩ ŋ dagɛ nɩaa. Nʋʋkala bɩ jaŋ wuo ŋaa wʋmagɩla-la ŋ sɩɩ ŋaa, see dɩ Wɩa pɛ tɩɩna lɛ.”
3Ŋɩɩ nɛ Yesu bʋla pʋ, “Wʋtɩtɩɩ nɛ mɩ bʋlaa pɩŋ, nʋʋkala bɩ jaŋ wuo jʋʋ Wɩa kuorii-la tʋɔŋ, see dɩ ba wasa lʋl tɩɩna.”
4Ŋɩɩ nɛ Nikodemɔs pɩɛsʋ, “Ɛɛ nɛ banɩhɩaŋ jaŋ wuo ŋaa dɩ ba bɩra wasa lʋlʋʋ? Ʋ jaŋ bɩra wuo jʋʋ ʋ naaŋ luoruŋ dɩ ʋ bɩra wasa lʋlʋʋ?”
5Yesu bʋl, “Wʋtɩtɩɩ nɛ mɩ bʋlaa pɩŋ, nʋʋkala bɩ jaŋ wuo jʋʋ Wɩa kuorii-la tʋɔŋ, see dɩ Wɩa joŋ ʋ Dɩŋ-zɔmʋŋ hɛ tɩɩna lɛ, dɩ tɩɩna ma pɛ fo Wɩɩchʋɔlɛ lɩɩŋ. 6Nuhuobiine yie lʋl nuhuobiine ʋ kɛŋ mɩɩsɩŋ nɛ tinteeŋ deeŋ lɛ. Wɩa ma yie joŋ ʋ Dɩŋ-zɔmʋŋ a hɛ nʋʋ lɛ ʋ kɛŋ mɩɩsɩŋ Wɩa teeŋ. 7Sɩ́ leŋe dɩ ʋ ŋaa wʋkpuŋkpere ŋ lɛ mɩ sɩ bʋla pɩŋ arɩ ʋ maga dɩ ba wasa lʋlʋŋ. 8Peliŋ yie lu mʋmʋ lee-na kala ʋ sɩ cho nɛ. Ŋ nɩnɩɩ ʋ dɔmɔ, ama ŋ bɩ jɩŋ lee-la ʋ sɩ lɩɩ kʋkɔ, koo lee-la ʋ sɩɩ mʋ. Ʋ saa nagɛ ŋɩɩ nɛ nʋʋkala Wɩa sɩ joŋ ʋ Dɩŋ-zɔmʋŋ hɛ lɛ.”
9Ŋɩɩ nɛ Nikodemɔs pɩɛsɛ, “Ɛɛ nɛ wɩɩŋ deeŋ jaŋ wuo ŋaa?”
10Ŋɩɩ nɛ Yesu bʋla pʋ, “Ŋ ŋaa kerichi-bal nɛ Iziral tinteeŋ lɛ, aŋ bɩ wɩɩŋ deeŋ bʋbʋɔŋ jɩŋ? 11Wʋtɩtɩɩ nɛ mɩ bʋlaa pɩŋ, la yie bʋl wɩɩ-la la sɩ jɩma nɛ, a bʋbʋl wɩɩ-la la sɩ na. Ama ma kʋŋkala bɩ chɛ dɩ ma sɛɩ wɩɩ-la la sɩ bʋla. 12Mɩ bʋl dʋnɩa wɩaa nɛ pɩpɩŋ, ka ŋ bɩ laa dii. Ɛɛ nɛ saa ŋ jaŋ wuo laa dii dɩ mɩ nɛ bʋl Wɩa-jaŋ wɩaa pɩŋ? 13Nʋʋkala ha bɩ Wɩa-jaŋ jɩla, see mɩ-na Nuhuobiine Bie sɩ lɩɩ nɩmɛ kʋ tuu. 14Mosis fa sɩ hɛ gɩrɩ-bine tʋɔŋ, ʋ fa kɛŋ hɔɔŋ a libi dɩmɩŋ nɛ, a joŋo mɛrɛ daaŋ lɛ a kaa jee. Ŋɩɩ tɩtɩa nɛ ba jaŋ kpaasɛ mɩ-na Nuhuobiine Bie ma daaŋ lɛ a kaa jee, 15dɩ nʋʋkala sɩ laa mɩ wɩaa dii wuo kɛŋ mɩɩsɩ-la sɩ bɩ dɛrɛ.
16Wɩa cho dʋnɩa nɩaa a mʋ kieli, ŋɩɩ nɛ tɩɩ ʋ joŋ ʋ Bii-bala a pɩla, dɩ nɩɩ-la kala sɩ laa ʋ wɩaa dii, ŋ bɩ jaŋ lɛl, ama ŋ jaŋ kɛŋ mɩɩsɩ-la sɩ bɩ dɛrɛ. 17Wɩa bɩ ʋ Bie ta dɩ ʋ kʋ tuu laa dʋnɩa nɩaa wɩaa jɩŋ, ama dɩ ʋ laa dʋnɩa nɩaa ta. 18Nʋʋ na-kala sɩ laa Yesu wɩaa dii, ʋ bɩ jaŋ dii ʋ tɩɩna sarɩya a joŋ cheeriŋ pʋ, ama nɩɩ-la kala sɩ bɩ ʋ wɩaa laa dii, ʋ paala dii ʋ tɩɩna sarɩya a joŋ cheeriŋ pʋ nɛ, bɛɛ wɩaa ʋ bɩ Wɩa Bii-bala-la wɩaa laa dii. 19Wɩɩ-la sɩ tɩɩ Wɩa dii dʋnɩa nɩaa sarɩya a joŋ cheeriŋ pɩba nɛ ŋ-la: Pʋlʋmʋŋ kʋ tuu dʋnɩa nɛ, ama nɩaa cho birimiŋ nɛ a kɩɩ pʋlʋŋ-la, bɛɛ wɩaa baa ŋaa wʋbɔŋŋɔɔ nɛ. 20Nʋʋ na-kala sɩɩ ŋaa wʋbɔŋŋɔɔ bɩ pʋlʋmʋŋ cho, ʋ bɩ pʋlʋmʋŋ tʋɔŋ lɩɩ, bɛɛ wɩaa ʋ bɩ chɛ dɩ ʋ wʋbɔmɔ-la lɩɩ pʋlʋmʋŋ. 21Ama nʋʋ na-kala sɩɩ ŋaa wʋzɔŋŋɔɔ cho pʋlʋmʋŋ a yie lɩlɩɩ pʋlʋmʋŋ tʋɔŋ, dɩ nɩaa wuo na arɩ ʋʋ ŋaa wʋzɔmɔ-la Wɩa doluŋ lɛ nɛ.”
Jɔɔŋ cheŋ Yesu
22Ŋɩɩ harɩŋ nɛ Yesu arɩ ʋ harɩ-tooroo lɩɩ Jerusalɛm lɛ aŋ ha hɛ Judiya tinteeŋ lɛ a dieni mʋa nɩmɛ aa fo nɩaa Wɩɩchʋɔlɛ lɩɩŋ. 23Jɔɔŋ ma fa hɛ lee kʋbala baa yɩrɛ Aanɔŋ lɛ nɛ a kpagɛ Salɩm aa fo nɩaa Wɩɩchʋɔlɛ lɩɩŋ, bɛɛ wɩaa lɩɩŋ fa yʋga kɩŋkɛŋ nɩmɛ. Nɩaa mʋmʋ ʋ teeŋ bʋa kala ʋ fufoba Wɩɩchʋɔlɛ lɩɩŋ. 24(Bʋa-la lɛ dɩ ba ha bɩ Jɔɔŋ kaa tɔ dɩa.)
25Ŋɩɩ nɛ Jɔɔŋ harɩ-tooroo dɔnsʋŋ arɩ Juu tɩɩna kʋbala kɛŋ lɩɩŋ sɔmʋŋ wɩaa kaa lɩlɛrɛ. 26Ba mʋ Jɔɔŋ teeŋ a pɩɛsʋ, “La kʋhɩaŋ, ŋ liisi baal-la fa sɩ hɛ Jɔdaŋ fuo-la sɛmɛ dɔŋɔ wɩaa nɛ, nɩɩ-la wɩaa ŋ sɩ bʋla? Lɛɛlɛ ʋ maa fo nɩaa Wɩɩchʋɔlɛ lɩɩŋ nɛ, nɩaa kala mʋmʋ ʋ teeŋ.”
27Ŋɩɩ nɛ Jɔɔŋ bʋl, “Nʋʋkala bɩ jaŋ wuo kɛŋ kʋŋkala, see dɩ Wɩa joŋo pʋ. 28Ma tɩtɩa hɛ nɩmɛ nɛ, ka mɩ bʋl arɩ mɩ dee bɩ Kirisito ŋaa, nɩɩ-la Wɩa sɩ lɩɩsa, ama Wɩa ta tɩmmɛ nɛ dɩ mɩ laa ʋ sɩpaaŋ. 29Ha-falɩŋ tɩɩna nɛ tɩɩ haala, ama dɩ ha-falɩŋ tɩɩna nandɔŋɔ nɛ chɩŋ nɩmɛ a jijegili wɩalɩŋ ba sɩɩ bʋl, ʋ tʋɔŋ yie tɔrɛ nɛ dɩ ʋ nɛ nɩɩ ha-falɩŋ tɩɩna-la yikoro. Ŋɩɩ tɩtɩa nɛ mɩ tʋɔŋ ma tɔrɛ woruŋ Yesu nyuŋ. 30Ʋ maga dɩ ʋ nɛ mɩɩra kʋ ŋaa nɩbalɩŋ, ka dɩ mɩ mɩɩra ŋaa nɩ-bie.”
Nɩɩ-la sɩ lɩɩ Wɩa-jaŋ
31Nɩɩ-la sɩ lɩɩ Wɩa-jaŋ nɛ kɩɩ kʋŋkala. Nɩɩ-la sɩ lɩɩ tinteeŋ ŋaa tinteeŋ kʋŋ nɛ aa bʋl tinteeŋ wɩaa. Ama nɩɩ-la sɩ lɩɩ Wɩa-jaŋ nɛ kɩɩ kʋŋkala. 32Ʋʋ bʋl wɩalɩŋ ʋ sɩ na aŋ nɩɩ ma nɛ, ama nʋʋkala bɩ ʋ niiŋ wɩaa sɛyɛ. 33Nɩɩ-la kala sɩ sɛɩ ʋ niiŋ wɩalɩŋ jɩma arɩ Wɩa hɛ nɩmɛ nɛ a kɛŋ wʋtɩtɩɩ. 34Mɩ-na Nɩɩ-la Wɩa sɩ tɩma, mɩɩ bʋl Wɩa niiŋ wɩaa nɛ, bɛɛ wɩaa Wɩa joŋ ʋ Dɩŋ-zɔmʋŋ doluŋ kala a pɩmɛ nɛ. 35Mɩ Nyɩmma Wɩa cho mɩ-na ʋ Bie, a joŋ ʋ doluŋ kala a hɛ mɩ nɩsɩŋ lɛ. 36Nɩɩ-la kala sɩ laa mɩ-na Wɩa Bie wɩaa dii, ʋ kɛŋ mɩɩsɩ-la sɩ bɩ dɛrɛ, ama nɩɩ-la kala sɩ bɩ mɩ-na Wɩa Bie wɩalɩŋ ka to, ʋ bɩ jaŋ kɔ dɩ ʋ kɛŋ mɩɩsɩ-la sɩ bɩ dɛrɛ, ama Wɩa jaŋ na baanɩŋ ʋ tɩɩna nyuŋ a kaa mʋ wuu.
လက္ရွိေရြးခ်ယ္ထားမွု
Jɔɔŋ 3: SIS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©Ghana Institute of Linguistics Literacy and Bible Translation 1984, 2014