Matie 11
11
Yoanɛ ato ava lo na kwa ka tɛ Yezo
(Luk. 7.18-35)
1Yezo ĩ kɔ nda hɛ̃ngɔ nyɔ hɛ̃ ava lo sui kɔi ndoni sɛ ko, lo lo so ndo ko, lo gwe ka ya akɔdɔrɔ ti sese ni ko so hangɔ, nga so pangɔ lo tɛ Nzapa hɛ̃ azi.
2Ngoi mɛ Yoanɛ wa hɛ̃ngɔ batisimɔ ka ya bɔlɔkɔ ko, lo ma pa ti alo mɛ Yezo ali. La lo to ambanga ava lo ka tɛ Yezo, 3ya ala hũnda lo ya: “Mɔ du zo mɛ ndo e ma ya, lo na gangɔ, bere e ku zo mɛ ndɛ̃?” 4Yezo agbinya hɛ̃ la ya: “Ĩ diri ĩ gwe, í kambisa hɛ̃ Yoanɛ alo mɛ ĩ ma na ma ĩ, nga na omɛ ĩ hũ na lɛ ĩ. Alo ni lo mɛ: 5ĩ hũ awa ziba ahũ ndo yango, awa zɛ̃ adɔ nɔ na seni, tɛrɛ awa ndiba ati nzɔ̃ni, awa kpua ama ndo ngere ngere, awa kwáni aso. Ĩ ma andopa Nzɔ̃ Pa hɛ̃ awa yɛlɛ. 6Dengɔ bɛ ati na zo ko la ta lo zia yengɔ lo tɛ mbi ma!”
7Ngoi mɛ ava Yoanɛ ĩ gwe wɛ ko, Yezo ato nda pangɔ lo tɛ Yoanɛ hɛ̃ azi butu butu ya: “Zo mɛ ĩ nɔ ka bɛ ndo ĩ hũ lo na? Zo mɛ ĩ hũ lo ko, lo nga ma sã mɛ yá ndoyingi ni? Ipɔ! 8Ko zo mɛ ĩ nɔ kai ĩ hũ lo na? Ĩ nɔ ĩ hũ zo mɛ ayu bɔngɔ ti kota ngere? Ipɔ! Awa yungɔ abɔngɔ ti kota ngere ndodu tɛ la ka ya da tɛ agbia. 9Zo mɛ ĩ nɔ kai ĩ hũ lo na? Ĩ hũ wa pangɔ nyɔ Nzapa? Biani, mbi pa hɛ̃ ĩ ya, zo ko la ĩ nɔ ĩ hũ lo ko, abɛ nga awa pangɔ nyɔ Nzapa ko, lo ɔ la. 10Ta sanga ma, Yoanɛ adu zo mɛ Buku tɛ Nzapa apa tɛnɛ tɛ lo ya: Nzapa apa ya:
‘Ba, mbi to wa pangɔ kwa tɛ mbi uzu tɛ mɔ ya,
Lo lɛkɛ lege hɛ̃ mɔ, mɔ ɔ da.’
11Mbi pa hɛ̃ ĩ ti bɛta tɛnɛ ya, na popo tɛ azi mɛ adú la so lɛ sese olo ko, ta zo kɔi mɛ aɔ Yoanɛ wa hɛ̃ngɔ batisimɔ bɛ gbɔ da ma. Kanda zo mɛ yakere buai ka Kɔdɔrɔ Gbia tɛ Nzapa ko, zo mɛ aɔ Yoanɛ wa hɛ̃ngɔ batisimɔ la. 12Ato na ngoi mɛ ndo Yoanɛ wa hɛ̃ngɔ batisimɔ apa na tɛnɛ tɛ Nzapa, ngbĩi asi na lá olo ko, azi ndotiri to kpengbani na azi ti Kɔdɔrɔ Gbia tɛ Nzapa, ko ala ndogingisa kpengbani ya, ani mu la. 13Azi zu mɛ awa pangɔ nyɔ Nzapa, nga na Mɔizɛ wa sungɔ ndia apa ndo tɛnɛ ti Kɔdɔrɔ Gbia tɛ Nzapa, ko ala pa ndo ni ngbĩi, asi na ngoi tɛ Yoanɛ. 14Wa se ĩ ye ya, tɛnɛ tɛ mbi adu biani ko, Yoanɛ la adu Elia mɛ ndo azi apa lo tɛ lo ya, lo na diringɔ gangɔ. 15Zo ko la ma lo adu da ko, ale lo ma!
16“Mbi lengbi ti hangɔ azi ti ngoi olo na ana? Ala kpa nga ma ayangambi mɛ adunga so lɛ kɔdɔrɔ, la ambanga ndoili afɔ̃ la na kɔngɔ, apa hɛ̃ la ya: 17‘E dɛ ngɔ hɛ̃ ĩ ya, ĩ dɔ dɔ, ko ta ĩ dɔ dɔ ma! E ye bia ti vundu hɛ̃ ĩ ya, ĩ to to, ko ta ĩ to to ma!’ 18Yoanɛ aga ndo, akɛ̃ tɛngɔ bɛta tɛ, akɛ̃ nga nyɔngɔ vinɔ, ko azi apa ya: ‘Lo na siɔ tɔrɔ ya tɛrɛ lo!’ 19Mbi Nyi Zo mbi ga, mbi ndotɛ bɛta tɛ, mbi ndonyɔ nga vinɔ, ko azi apa ya: ‘Ĩ ba kɔli olo, kwa tɛ lo bo la tɛngɔ tɛ na nyɔngɔ vinɔ. Tɛ lo afɔ̃ lo la awa sɔrɔngɔ lapo na awa lingɔ siɔ ye!’ ” La Yezo apa nga ya: “Ndara tɛ Nzapa ndofa anzɔ̃ lo mɛ Nzapa ali.”
Ambanga kɔdɔrɔ mɛ azi ni akɛ yengɔ lo tɛ Yezo
(Luk. 10.13-15)
20La Yezo ato nda belangɔ azi ti kɔdɔrɔ mɛ ndo lo li aye ti kpɛnɛ tɛ lo sĩni ka tɛ la. Lo bela la, na lo mɛ ya, ta ala gbinya ndo bɛ la ma. Lo pa hɛ̃ la ya: 21“Ĩ awa kɔdɔrɔ ti Kɔrazɛnɛ, siɔ lo ati na ĩ! Ĩ awa kɔdɔrɔ ti Bɛtɛsaida, siɔ lo ati na ĩ! Ta sanga ma, aye ti kpɛnɛ mɛ ndo mbi li so tɛ ĩ, se adu ya, mbi li ndo ni ka tɛ azi ti kɔdɔrɔ ti Tirɛ nga na ti Sidona ko, ale ala yu kunyɛ, ahĩni tɛrɛ la na mbi wá, so fangɔ ya, ani gbinya bɛ ani wɛ. 22Nda mɛ mbi pa hɛ̃ ĩ ya, na lá ti fangɔ ngbanga gbanda ko, etumbu tɛ ĩ aɔ gbanda etumbu tɛ azi ti Tirɛ na ti Sidona la. 23Wa adu tɛ ĩ azi ti Kapɛrnaumɛ ko, ĩ da bɛ ĩ ya, Nzapa aya gbanda ĩ akpã ka yayu? Ipɔ! Nzapa azu gbanda na ĩ ka lifɛlo. Ta sanga ma, aye ti kpɛnɛ mɛ ndo mbi li so tɛ ĩ, se adu ya, mbi li ndo ni ka tɛ azi ti kɔdɔrɔ ti Sɔdɔmɛ ko, ale kɔdɔrɔ ni ko ade bo dɛngɔ na lá olo kpɔ. 24Nda mɛ mbi pa hɛ̃ ĩ ya, na lá ti fangɔ ngbanga gbanda ko, etumbu tɛ ĩ aɔ gbanda etumbu tɛ azi ti Sɔdɔmɛ la.”
Ĩ ga mbi zu na bɛ ĩ
(Luk. 10.21-22)
25Na ngoi ko ndo ko, Yezo apa ya: “Oo Baba, mɔ Gbia ti yayu, mɔ nga Gbia ti tise, mbi hɛ̃ mɔ sia kɔli, ta sanga ma, ye mɛ mɔ hɔndɛ na awa ndara, mɔ hɔndɛ nga na awa mbɛti ko, mɔ fa ni na ambumbusɛ azi. 26Biani, Baba, seni bo la, na lo mɛ ya, mɔ ye ndo ya adu bo nga so, ko ade bɛ mɔ.
27“To mbi azia ye zu na ti mbi. Ta zo kɔi ahĩnga mbi mɛ Nyi lo ma, kanda bo lo la lo hĩnga mbi. Ko ta zo kɔi ahĩnga nga To mbi ma, kanda bo mbi mɛ Nyi lo, nga na azi mɛ mbi ye fangɔ lo na la, la e hĩnga lo.
28“Ĩ azi ko la ĩ nzɛ̃, ĩ nga na sɔngɔ bɛ ko, ĩ ga ge tɛ mbi, mbi zu na bɛ ĩ. 29Ale mbi na ĩ e li kwa ndoni kɔi, ko ĩ manda tɛnɛ tɛ mbi, ta sanga ma, mbi dede zo, mbi ndongara nga tɛrɛ mbi, ko tɔrɔ tɛrɛ ĩ na luangɔ ndo ti wɔngɔ na tɛrɛ lo. 30Kwa mɛ mbi e na ĩ na lingɔ na dungɔ woni, ko kumba mɛ mbi na hɛ̃ngɔ ĩ na dungɔ yapuni.”
လက္ရွိေရြးခ်ယ္ထားမွု
Matie 11: NGB87
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Ngbandi New Testament © United Bible Societies, 1987.