Luka 10
10
Zas k'anena nenane hı'sab eyxhe?
İne I'see haa'ane gafee, g'ulduraaşisqa girxhune cühüt'ıle ğayrı, xhebiyre insan eyxhe: sa Allahne Xaa g'ullux ha'ana cühüt', manasa cühüt' eyxhena Leviyne toxumençena, xhebır'esda insanır samariyeğançena. İyerusalimne şaharene Allahne Xaa g'ullux haa'anbışe, ha'anbıniy düəbı gırgıne İzrailne milletnimee. Manbışis kumag ha'anniy Leviyne nasıleençene cühüt'yaaşe. Samariyebıva manbışik'le eyhenniy, manbı Samariye eyhene cigençe vuxhal-alla. Manbı cühüt'yaaşis k'anen, sa eban milletniy vod. Sa eban milletbıd ixheene, manbışik'le sana-sanbı g'umooceniy vooxhe. Cühüt'yaaşe eyhenniy, samariyabışe din badal hı'ı, mançil-allab manbı sana-sang'uka yugba vooxhenbı deşdiy.
25Sayəqqee Tavratne mə'əllimıs I'sa cuvabıl aqqas ıkkiykan. Mang'vee I'sayke qidghın ha'uyn:
– Mə'əllim, zı hucoo he'eene, aaxiratee ixhees?
26I'see mang'uke qidghın ha'uyn:
– Tavratee hucooyiy otk'un? Vas nəxüdiy g'anmış eyxhe?
27Mang'vee Tavratee otk'uniyn xhinne uvhu:
– Yiğna Rəbbim Allah vorna. Mana hammaşe yik'eka, rıhı'ka, ək'elika gırgıne vas huvuyne gucuka ıkkıykne. Sayid: vas k'anena, vas ğu nəxüriy ıkkan həməxür ıkkiykne.
28I'see mang'uk'le eyhen:
– Ğu qotkuda uvhu. Ğu həməxüd he'ee, manke ğu aaxiratna ixhes.
29Mang'us ıkkiykanan vuc mane gafençe qorkura qığahas, I'sayke qidghın ha'an:
– Eyhe, yizda k'anena haşune?
30I'see mang'uk'le inəxüd uvhu:
«İyerusalimençe Yerixonne şahareqa sa cühüt' gəəng'ə gexhana g'ulduraaşine xıleqa. Manbışe mana q'əra qa'a, getu g'alyaraççena yəqqə qik'as.
31Həməxüd ıxha, mane gahıl İyerusalimençe hamane yəqqı'le, Allahne Xaa g'ullux ha'ana sa gəə eyxhe. Mang'uk'le get'una g'acu, ılğeç'ena hamane yəqqı'ne şene aqvayle. 32Akaran harakat Leviyne toxumençened insaane ha'a: get'uyng'une k'anençe yəqqı'ne şene aqvayle ılğeç'e.
33Hamane yəqqı'n ı'lğəə eyxhena samariyeğançena cune əməleyl. Mang'uk'le get'una g'acu, qiykkın k'anyaqa qexhe. 34Samariyeğançena mang'usqa qıxha ı'xna çaxırıka hodğul, zeytunun q'ışıd qadğu, iyt'alan. Qiyğa, mang'vee g'ulduraaşe get'una alqavhu əməlelqa qıkkekana pılıke aaxvane cıgeeqa, giyğalna mang'us maa'ab g'ullux haa'a.
35Qinne yiğıl mang'vee pılıke aaxvane cigayne xərıng'us huvu q'ölle nuk'rayn pıl eyhen:
– Mang'us g'ullux hee'e, zı huvuynçile hexxada xarcxheene, yı'q'əlqa qömee, zı vas qelesın».
36Qiyğa I'see Tavratne mə'əllimıke qidghın ha'an:
– Ğu nəxüdne hı'sab ha'a, g'ulduraaşisqa girxung'usqa, xhebıng'una nenane k'anena eyxhe?
37Tavratne mə'əllimee eyhen:
– Neng'veeyiy mang'us cun yik' gyotxhuniy haguna, hamana eyxhe.
«Ğunad həməxüd he'e», – I'see mang'uk'le uvhu, – «ı'mı'r yiğna həməxüb vukkee».
လက္ရွိေရြးခ်ယ္ထားမွု
Luka 10: YIQSUM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ