Matiu 15
15
Iesu mokámbáróá toParisi láwiꞌ tiꞌaraheꞌ mampeuláꞌi párentána Pueꞌ Ala
(Mrk. 7:1-23)
1Hangkani tempó, bahangapaheꞌ toParisi hai guru-guru agama toIahudiꞌ to hangko i Ierusale lao mampohidupaꞌá Iesu. Rapekuneꞌ, 2“Moapa riꞌi haneꞌi topeguruMu moliungiheꞌ ádáraꞌ toioruntaꞌ? Rápáꞌna, ane mandeꞌheꞌ, tiꞌaraheꞌ sieruꞌ membahoꞌ mouláꞌ áturá ágámántaꞌ.”#15:2 Katoꞌuána, tiꞌara ara áturá mokana i ádá membahoꞌ i Paturoꞌna Musa.
3Nahániki Iesu, “Moapa riꞌi haneꞌi niliungi párentána Pueꞌ Ala i kamampeuláꞌimi ádáraꞌ toiorumi? 4Rápáꞌna, nauliꞌ Pueꞌ Ala, ‘Hangaa-ngaa nubiláꞌ umámu hai inámu.’#15:4 Básá Pesuwuꞌá 20:12. Hai Nauliꞌ wopiꞌi, ‘Heáná to motundaꞌ umána ba inána hangaa-ngaa rahuku mate.’#15:4 Básá Pesuwuꞌá 21:17; Áturá Menómbá 20:9. 5Agáiáná kómu mepaturoꞌkou node: Ane haweꞌ tosaemi membiáꞌ tulungi, peisákou manguliꞌ node: ‘Apa to ara i kódóꞌ to ina kupakeꞌ mokádipurákou, upu miꞌi kudándi ina kupopenómbá i Pueꞌ Ala.’ 6Mewaliꞌ, ngkóráꞌna Pueꞌ Ala to manguliꞌ hangaa-ngaa nibiláꞌ umámi hai inámi, tiꞌara iti to nipeuláꞌi; ádámi peá to nipomahile. 7Mampe to maroꞌa pekou! Toꞌu ntepuꞌu laluitana nabiꞌ Iesaia hangkoia#15:7 Iesaia mate rekeꞌ-rekeꞌna 680 parena hangko tiꞌara mani Iesu rapoánáka. mokana i kómu to manguliꞌ node:
8Nauliꞌ Pueꞌ Ala:
‘Taunaheꞌ iti, i humeraꞌ peá mobiláꞌAꞌ,
agáiáná laluraꞌ karaoꞌ hangko i Kódóꞌ.
9Tiꞌara mobunduꞌ penómbáraꞌ i Kódóꞌ,
láwiꞌ paturoꞌraꞌ paturoꞌ hangko i tauna peá,
tiꞌara paturoꞌ hangko i Kódóꞌ.’ ” (Iesaia 29:13)
10Roo onoꞌ, Iesu mokióꞌmoheꞌ tauna to handaꞌ, haneꞌi Napopahaweꞌáheꞌ ngkóráꞌ pándiriꞌ deꞌe, Nauliꞌ, “Nipehádingi bona niꞌisá. 11Tiꞌara pandeꞌ to mesuaꞌ i ngángántaꞌ to mopakedáikeꞌ i peitána Pueꞌ Ala. Ngkáliꞌna riꞌi, laluita to mesuwuꞌ i humentaꞌ, iti to mopakedáikeꞌ i peitána Pueꞌ Ala.”
12Hangko ionoꞌ, laoheꞌ topeguruNa mengkahungkuꞌ i Hia, rauliꞌ, “Tiꞌara paꞌi Nuisá kakóiꞌna inaoraꞌ toParisi mohádi laluitaMu ininá?”
13-14Nahániki Iesu, “Nipatodáhi peheꞌ! ToParisi iti, nodoheꞌ tudaꞌ-tudaꞌ to tiꞌara natudaꞌ UmáNgkuꞌ to ara i surugáꞌ, hai bateꞌraꞌ ina rarebuki. {Pakaheꞌ manguliꞌ mopaturoꞌheꞌ tobilo, mole} hira riꞌi tadulako to bilo, {láwiꞌ tiꞌaraheꞌ moisá rárá to manótó lao i Pueꞌ Ala}. Hai ane tobilo moteteꞌ hangka tobilona, bateꞌraꞌ ina manawoꞌheꞌ sangkani i lao.”
15Nauliꞌ Peturuꞌ, “Guru, Nupakanótóáꞌangkaiꞌ ngkóráꞌ pándiriꞌ to Nupahaweꞌ ininá.”
16Mehániꞌ Iesu, “Tiꞌara mani ripaꞌi niꞌisá lempóna? 17Pandeꞌ to mesuaꞌ i lalu ngángántaꞌ, lao i taꞌintaꞌ, haneꞌi liliu mesuwuꞌ. {Tiꞌara iti to mopakedáikeꞌ i peitána Pueꞌ Ala.} 18Ngkáliꞌna riꞌi, laluita to kadake to mentóáꞌ hangko i laluntaꞌ hai mesuwuꞌ i humentaꞌ, onoꞌ riꞌi to mopakedáikeꞌ i peitána Pueꞌ Ala. 19Láwiꞌ hangko i laluntaꞌ mesuwuꞌ mampopengaa pekiri to kadake, álána ara to mepapate, mebualosi, mobábehi bábehiá to metitidiꞌi, manako, mosabiki dongkoꞌ hai mopakóiꞌ tauna ntániꞌna. 20Bábehiá to noꞌonoꞌ, iti to mopakedáikeꞌ i peitána Pueꞌ Ala. Agáiáná ane mandeꞌkeꞌ hai tiꞌarakeꞌ sieruꞌ membahoꞌ, tiꞌara iti to mopakedáikeꞌ i peitána Pueꞌ Ala.”
Hadua towawine to tiꞌara toIahudiꞌ membiáꞌ tulungi i Iesu
(Mrk. 7:24-30)
21Hangko ionoꞌ, Iesu pohuꞌ hangko i tampoꞌ Genesare, lao i tampoꞌ to hungkuꞌ i kótá Tiru hai Sido,#15:21 Tiru hai Sido: Básá to teukiꞌ i wóiꞌ Matiu 11:21. hai topeguruNa meuláꞌheꞌ. 22Ionoꞌ, haweꞌ miꞌi hadua towawine toKánáꞌá, to tiꞌara toIahudiꞌ, lao meraruaꞌ oaꞌ i Iesu, nauliꞌ, “Pueꞌ, pemuleꞌána Datu Daudiꞌ! Nupokaꞌahiꞌaꞌ wongkódóꞌá! Ánáꞌkuꞌ towawine napesuaꞌi tokadake, hai rumihi kamaduꞌana.”
23Agáiáná Iesu tiꞌara mehániꞌ. Laoheꞌ topeguruNa mengkahungkuꞌ, hai ara to membiáꞌ, nauliꞌ, “Guru, Nuhuoꞌ miꞌi bona towawine iti pohuꞌ, láwiꞌ paka mekióꞌ-kióꞌ napasimbuku meuláꞌ i kitaꞌ.”
24Nauliꞌ Iesu i towawine iti, “Pueꞌ Ala mohuoꞌAꞌ bona mai peAꞌ motulungi toSáráeliꞌ, láwiꞌ nodoheꞌ dimbá to tiꞌara ara to mampoewu.”
25Agáiáná towawine iti lao peá molingkudu i bitina Iesu, nauliꞌ, “Pueꞌ, Nutulungiaꞌ, wongkódóꞌá!”
26Nahániki Iesu, “Io toKánáꞌákoꞌ. Tiꞌara maroꞌa moala pandeꞌraꞌ ánángkóiꞌ, haneꞌi raweꞌi ahu.”#15:26 ToSáráeliꞌ rapándiriꞌ nodo ánángkóiꞌ. To tiꞌaraheꞌ toSáráeliꞌ rapándiriꞌ nodo ahu. Tunggáiána Iesu tiꞌara mopakóiꞌ towawine iti, ngkáliꞌna riꞌi mampehukáꞌ pepoináláina, onoꞌ miꞌi haneꞌi mopakeꞌ laluita to molempónga ahu to rapiaraꞌ. Tunggáiána Iesu, Ia mai sieruꞌ motulungi toIahudiꞌ.
27Agáiáná mehániꞌ towawine iti, nauliꞌ, “Toꞌu ntepuꞌu Pueꞌ, agáiáná ara woꞌo ahu to mandeꞌ wutaꞌ to manawoꞌ hangko i mejá.”
28Hangko ionoꞌ, nauliꞌ Iesu, “Maróhó ntepuꞌu pepoináláimu! Apa to nuhárungá, mewaliꞌ miꞌi mouláꞌ peundeꞌámu.” I tempó iti woꞌo, nalalu mpuꞌu miꞌi ánáꞌna towawine toKánáꞌá iti.
Iesu mopakauriꞌ handaꞌ tauna
29Roo onoꞌ, Iesu hai topeguruNa pohuꞌmoheꞌ hangko ionoꞌ, molumaoheꞌ mewiwi i rano Galilea, haneꞌiheꞌ mempanaiꞌ lao i buluꞌ-buluꞌna, hai Iesu mehoda mepaturoꞌ. 30Tauna mobárárámoheꞌ lao i Iesu. Moántiheꞌ topaluꞌ, tauna to mongkuha, tobilo, to tiꞌara peisá molaluita hai to tiꞌara ralalu. Rapahungkuꞌheꞌ i lindoꞌna Iesu, hai Napakauriꞌheꞌ. 31Tingkáráꞌheꞌ tauna to handaꞌ moita upu-upu to napakauriꞌ Iesu: tauna to tiꞌara peisá molaluita, molaluitamoheꞌ, tauna to mongkuha mauriꞌ, topaluꞌ molumaomoheꞌ, hai to bilo meitamoheꞌ, mewaliꞌ rakamaleá ntepuꞌu apa to mewaliꞌ iti.#15:31 Básá Iesaia 29:18-19. Básá woꞌo to teukiꞌ i wóiꞌ Matiu 11:5. Onoꞌ miꞌi haneꞌi tauna to handaꞌ iti mampomahileheꞌ Pueꞌ Ala to rapenómbái toSáráeliꞌ.
Iesu mopaꞌandeꞌ iba sábuna tauna
(Mrk. 8:1-10)
32Roo onoꞌ, Iesu mokióꞌheꞌ topeguruNa, Nahángáꞌáheꞌ, “Maꞌahiꞌ laluNgkuꞌ moitaheꞌ tauna to handaꞌ deꞌe. Tálu miꞌi aloraꞌ ieneꞌ, tiꞌara piꞌi ara pandeꞌraꞌ. Tiꞌara tuꞌu inaoNgkuꞌ mohuoꞌheꞌ mesuleꞌ tangaꞌraꞌ marimi. Holoheꞌ paꞌi i rárá.”
33Rauliꞌ topeguruNa, “Iumbákeꞌ paꞌi ina molámbiꞌ pandeꞌ to magáná ina tapopaꞌandeꞌáheꞌ tauna to nodeꞌe kahandaꞌraꞌ, láwiꞌ karaoꞌkeꞌ hangko i wánuá hai kaꞌaraꞌántaꞌ deꞌe tiꞌara ara apa-apa.”
34Iesu mekuneꞌ i hira, Nauliꞌ, “Hangapa wuaꞌna rótiꞌ to ara i kómu?”
Ara to mohániki, “Pitu peá wuaꞌna, hai bouꞌ to kókóiꞌ bahangapa peá báꞌána.”
35Hangko ionoꞌ, Iesu mohuoꞌmoheꞌ tauna to handaꞌ mehoda i tampoꞌ, 36haneꞌi moala miꞌi rótiꞌ to pitu wuaꞌna hai bouꞌ to kókóiꞌ bahangapa báꞌána iti, mekakae i Pueꞌ Ala. Roo onoꞌ, Nabiseꞌ-biseꞌ miꞌi haneꞌi Naweꞌiheꞌ topeguruNa bona ragáláꞌ-gáláꞌáheꞌ tauna to handaꞌ. 37Mandeꞌmoheꞌ upu-upu duuꞌraꞌ mabuhu. Karooraꞌ mandeꞌ, pelábiána pandeꞌ rarámpu topeguruna Iesu, pitu mani kárándina to mahile.#15:37 Kárándi iti mahile mani hangko i kárándi i Matiu 14:20, nodo to rapakeꞌ, tempóna Paulu raulu hangko i bente kótá i lalu kárándi to mahile. Básá Suro 9:25. 38Kahandaꞌraꞌ to mandeꞌ i tempó iti, iba sáburaꞌ tobaleilo, tiꞌara mani teimbaꞌ towawine hai ánángkóiꞌ.
39Roo onoꞌ, Iesu mohuoꞌmoheꞌ tauna to handaꞌ mesuleꞌ lao i wánuáraꞌ, haneꞌi Ia hai topeguruNa moduangaheꞌ lao i tampoꞌ Magada.
လက္ရွိေရြးခ်ယ္ထားမွု
Matiu 15: NTBEP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bahasa Behoa Shorter Bible © Indonesian Bible Society, 2015.