ILOOWALI 1
1
Wungguli pilopowalia ngoilanggubu alamu
1Tou̒ bohulio, wakutu Allahu Taa̒ala lolumulo lopowali mai ngoilanggubu aalamu, 2dunia diipo omoodeli, wau donggo mopuyoo̒to daa̒. Auhe daa̒ u obuo̒lo laba-labaalo, ulolau̒be totoonulalo u hitua-tuawua, yilanggube lou̒ modio̒loma tutu, bo kawasa Allahu Taa̒ala loi̒loyoo̒ totudu lotaluhu. 3Allahu Taa̒ala lotahuda, “Mowaliilo mobaango!” Tulusi woluo mobaango. 4Allahu Taa̒ala sanangi loo̒onto sua̒li boito. Tulusi bilua̒a-Lio mobaango boito monto dio̒lomo, 5wau tilanggula-Lio mobaango boito “Dulahu” wau dio̒lomo boito “Hui”. Hui lopaluto, wau lowaliilo mola dimodupo. Ui-uitolo dulahee ubohulio.
6-7Lapatao̒ Allahu Taa̒ala lotahuda, “Mowaliilo mola kuba tuwau u molayade taluhu boito mowali duluo, wau longotongao̒ taluhu todelomo dulo tambati u bubuua̒yawa.” Tulusi sua̒li boito yilowali. Odi-odieelo mola Allahu Taa̒ala lohutu kuba u lopobua̒ taluhu uwoluo to walungo kuba boito lonto taluhee u woluo toitaatio. 8Kuba boito tilanggula-Lio “Hulungo”. Hui lopaluto wau lowaliilio mola dimodupo. Ui-uitolo dulahee u oluolio.
9Lapatao̒ Allahu Taa̒ala lotahuda, “Mamusi taluhu u woluo to walungo lo hulungo tumolohe ode tambati tuwau, tilinggula huta maa oontonga.” Lapatao̒ sua̒li boito yilowali. 10Allahu Taa̒ala lolanggula huta boito “Tudulio”, wau yimoi̒o lo taluhu boito tilanggula-Lio “Deheto”. Wau Allahu Taa̒ala sanangi loo̒onto sua̒li boito. 11Allahu Taa̒ala luli lotahuda, “Mamusi huta mopobutu mai totoonulalo pilomulo u hidala-dalaala, deu̒yito-yito pilomulo u mongohi mai tilapulo u hibotu-botua, wau pilomulo u mongohi mai tilapulo huhuu-ngowalo.” Lapatao̒ sua̒li boito yilowali. 12Odi-odieelo mola huta helo pobutu mai totoonulalo pilomulo u hidala-dalaala. Wau Allahu Taa̒ala sanangi loo̒onto sua̒li boito. 13Tou̒ hui lopaluta mola, lowalilo mai dimodupo. Ui-uitolo otolu lodulahu.
14-15Lapatao̒ Allahu Taa̒ala lotahuda, “Mamusi woluo uu̒u-pangowalo mobaango tohulungo umopo tilangai dunia u momua̒a dulahu monto hui, wau u mopobilohei saaa̒ti tumulio dulahu, taunu, wau dulahu buka lo agama.” Yi sua̒li boito yilowali. 16Odi-odieelo mola Allahu Taa̒ala helohutu oluo upango mobaango uleidaa̒ deu̒yito-yito mato lodulahu motolo kawasa dulahu, wau hulalo motolo kawasa hui; wewolio mao̒ leeto pilopowali-Lio olo popoo-liyamalo. 17Allahu Taa̒ala lopo tambati mao̒ uu̒u-pangowalo motilango boito tohulungo u mopo tilangai dunia, 18u motolo kawasa dulahu wau hui, wau u momua̒a mobaango monto modio̒lomo. Wau Allahu Taa̒ala sanangi loo̒onto sua̒li boito. 19Hui lopaluto, wau lowaliilo mola dimodupo. Ui-uitolo dulahee u opaatio.
20Lapatao̒ Allahu Taa̒ala lotahuda, “Mamusi todelomo taluhu mou̒uu̒pa dadaata mahaluku hitumula u hidala-dalaala, wau todulente dadaata bubuu-rungiyalo hitombo-tombota.” 21Yi Allahu Taa̒ala lopowali mao̒ bibii-natangiyalo rakisasa lodeheto, wau totoonulalo mahaluku hidala-dalaala u hitumula todelomo taluhu, wau totoonulalo bulungi u hidala-dalaala. Wau Allahu Taa̒ala sanangi loo̒onto sua̒li boito. 22Allahu Taa̒ala lobalakati mao̒ ngoa̒amilalo boito wolo longohi mai palenta ode mahaluku u hitumula todelomo taluhu alihu motonggalao̒ mopoo̒polu deheto, wau to bubuu-lungiyala alihu oduhenga mola dadaata. 23Hui lopaluto wau lowaliilo mola dimodupo. Ui-uitolo dulahu u olimolio.
24Lapatao̒ Allahu Taa̒ala lotahuda, “Mamusi huta mopolualai totoonulalo binatangi lo tudulio u hidala-dalaala, u moluamo wau u molinggelo, udaa̒ meaalo kikiio̒.” Tulusi sua̒li boito yilowali. 25Odi-odieelo mola Allahu Taa̒ala helohutu mai ngoa̒amilalo boito wau Tio sanangi loo̒onto sua̒li boito.
26Lapatao̒ Allahu Taa̒ala lotahuda, “Botia Ito mamopowali manusia u mamowali debo odelo ito wau u tutuuwauwa wolanto. Timongolio mamotolo-kawasa to totoo-lawaalo, bubuu-rungiyalo, wau totoonulalo binatangi uwewo, mopio u moluamo meaalo u molinggelo, mopio udaa̒ meaalo kikiio̒.” 27Odi-odieelo mola Allahu Taa̒ala helo powali mai manusia, wau pilopowali-Lio timongoli debo odelo batanga-Lio lohihilao. Pilopowali-Lio timongolio talolai̒ wau taabua. 28Lapatao̒ bilalakati-Lio timongolio wolo tahuda “Potolo walao̒olo wau potolo wombuulo mola u dadaata, alihu walimu mai motibiluloa̒ to ngoilanggubu dunia wau motolo kawasa mao̒. Timongoli wohiya-U̒ mai tuugasi molaala totoo-lowaalo, bubuu-rungiyalo, wau ngoa̒amila binatangi wewo u molinggelo. 29Duo̒lo ua̒alomu wohi-U̒ mai olemu totoonulalo pilomulo hidala-dalaala u mongohi mai tilapulo u hibotu-botua wau huhuu-ngowaalo. 30Bo to ngoa̒amila bulungi wau binatangi molinggelo u wewolio, wohiya-U̒ mai huo̒yoto wau pilomulo u oduungo odelo ua̒alolio.” Yi sua̒li boito yilowali mai. 31Allahu Taa̒ala lomilohe totoonulalo hitua-tuawua umaa pilohutu-Lio boito, wau Tio sanangi daa̒. Hui lopaluta wau lowaliilo mola dimodupo. Ui-uitolo dulahee u olomolio.
လက္ရွိေရြးခ်ယ္ထားမွု
ILOOWALI 1: LAIGOR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ