LUKAS 21
21
Anu sinombahkon nu samian na balu
(Mrk. 12:41-44)
1I Laigan nu Tumpu, i Yesus nontoa to mia-mian kaya nompo'isi doi i uno nu tampat ponsombahkonan. 2Ia nontoa mule' samian na balu anu talalo kasiasi, nompo'isi ohua' na doi tambaga. 3Lantas i Yesus notatae, “Potombihing: balu aiya nompo'isi lebe manjoo' molingkudui iwi-iwi' mian sangga'at. 4Kalana aha iwi-iwi' nombee' labinyo nu halata'nyo. Panyo balu aiya, mau mule' talalo kasiasi, nombee'mo iwi-iwi' anu daagi' hi ia, anu palalu bau kantumuu'annyo.”
I Yesus nonsisik Laigan nu Tumpu mohobo'mo
(Mat. 24:1-2, Mrk. 13:1-2)
5Daagi' ko to mia-mian anu basisik mongkona mosia na ko ima'nyo na Laigan nu Tumpu binunga-bungan nu batu toto ima-ima' tiba paka-pakakas anu osombahkon hi Tumpu. Lantas i Yesus notatae hi aha, 6“Tokaje na tempo'nyo iwi-iwi' anu otoa miu aiya ohobo'akonmo; madi'mo ko batu sambatu pe'e tongkunsun aiya i tampatnyo!”
Kasusa'an ka' ponsakisa'an
(Mat. 24:3-14, Mrk. 13:3-13)
7Aha nompokilawa hi Yesus, “Kita Tuumangku Gulu', hipian na anu sumo atina' timbali? Ka' apaa na tandanyo de han aijo' tempo'nyo timbalimo?”
8I Yesus notatae, “Obala'ingati mae, boli komiu o akali. Da'isan na mian toka mompake sanggong-Ku, ka' motatae, ‘Akumo aiya na Ia!’ ka' ‘Tinokamo na tempo'nyo.’ Panyo boli komiu mombatuki aha. 9Boli mule' komiu mabuhuk de komiu mohongo lele nu pahampatean tiba pahantuda'an. Iwi-iwi' aijo' tionyo timbali imoonanyo. Panyo aijo' misa' alati'nyo tempo'nyomo na kiamat.”
10Lantas i Yesus nolausakon sisik-Nyo tukoo-Nyo, “Bansa sa'angu' mahampate mongewa bansa sangga'at, ka' sa'angu' na negara montumbuhi negara sangga'at. 11Iyayamae toka na luulu' anu daka', balaa' nu kapo'ohopan tiba panyakit anu molele. Saidi' mae toka na hahan anu okabuhuk ka' opalias hondo i langit. 12Panyo ma'isa pe'e iwi-iwi' aijo' toka, komiu o hakopmo ka' o sakisa. O putusi na palakala miu i Laigan Pogalejaan ka' oposoop i uno nu talungku'. Ka' komiu o hela' ka' opokiijo'akon i ahop nu to tomu-tomundo tiba anu batu-batu ko kuasa, kalana komiu anu mombatuki Aku. 13Aijo' na kasampatan hi komiu da mompolele Lele Ma'ima' lengkat mae hi Tumpu. 14#Luk. 12:11-12 Balaniat na komiu da madi' bata-bata pa' apaa na anu tionyo otaloakon miu bau mompototu'u butong. 15Akuje na mombee' hi beleyum potatae tiba kapandean aijo', sahingga madi' ko samian pe'e hi anu sampo bali' miu moko ewa kabai motunde apaa na anu otaloakon miu. 16Komiu saidi' mae nukabisa'i nu tina ka' tuumaum nu to utu-utusum, nu anak nu to tomi-tominsanum tiba to sanga-sangaluyum. Sambagian na komiu saidi' mae nupatei nu aha. 17Komiu saidi' mae nuka'ideki nu mian iwi-iwi', kalana komiu mombatuki Aku. 18Panyo sahamba pe'e na ubakum madi' moko ala tombubut. 19De komiu moko tahan ka' sabaan, komiu saidi' mae salamat.”
I Yesus binasisik mongkona pohobo'an nu Yerusalem
(Mat. 24:15-21, Mrk. 13:14-19)
20“De otoa miu na Yerusalem nutumbuhimo nu suludadu, osumbu'mo miu taalu' madi'mo pin kota aijo' o ideimo. 21Tempo' aitu mian anu kiijo' i Yudea, tionyo malai mokiita' i bungkutnyo. Aha anu i kota, tionyo mompala'i kota, ka' aha anu i sambiha' nu kota, bolimo minsoop i uno nu kota. 22#Hos. 9:7 Kalana sina-sinaa aijo' aitumo na ‘Sina-sinaa Hukuman Onabu'akonmo,’ da tiba anu sumo aijo' tinimbalimo apaa na anu tinulismo i uno nu Kitab nu Tumpu. 23Paya'na ko ideknyo sina-sinaa aitu hi to bouboune anu poboa ka' hi to tina-tina anu daagi' momposusu bungamea'! Lipu' aiya saidi' mae mongoa'imo kasusa'an anu daka', ka' Tumpu mohukummo bansa aiya. 24Daagi' ko anu opatei nu bajak, daagi' mule' ko anu oboa salaku anu i hakop, oboa i lipu-lipu' nu mian; ka' to mia-mian anu madi' monsumbu' Tumpu, mompeja-peja'mo i Yerusalem sampe mingkot na tempo' anu tinantukanmo nu Tumpu hi aha.”
Katokaan Anak nu Mian
(Mat. 24:29-31, Mrk. 13:24-27)
25 #
Yes. 13:10, Yeh. 32:7, Yl. 2:31, Why. 6:12-13 “Hi batuje nu sinaa, bitu'on ka' to manda-mandala' otoaje na tandanyo haha aijo'. I dunia aiya bansa-bansa mabuhukmo ka' bingongmo mongahopi buhook tiba bokon to daka-daka' nu ambai. 26Mian mongoa'i buhuk mompaipatemo mongahopi apaa na anu jadimo i songko-songko nu dunia aiya, kalana anu mongkuasai aita' mae i langa saidi' mae kalangkabutmo. 27#Dan. 7:13, Why. 1:7 I tempo'mo aitu na Anak nu Mian toka i uno nu kundom tiba kuasa-Nyo anu o angga'i. 28De hahan aijo' montampu'unimo jadi, pobulamo ka' bangonakon na ubakum kalana gagana' uuka komiu oposalamatmo.”
Pangajalan mongkona kau' ara
(Mat. 24:32-35, Mrk. 13:28-31)
29Lantas i Yesus nonsisikakon hi aha kantuangan sumo uuka, tukoo-Nyo, “Soba' toa na kau' ara, ka' iwi-iwi' na kau' sangga'at. 30De londeknyo montampu'unimo kantoan, osumbu'mo miu saba' malia'mo na tempo' nu posinaa. 31Sumo aitumo mule' de komiu montoamo hahan aitu timbalimo, osumbu'mo miu saba' Tumpu malia'mo mompalentah susumo Tomundo.
32Da osumbu' miu! Hahan aijo' timbalimo de to mia-mian tempo' uuka silakamo iwi-iwi'. 33Langit ka' tano' mingkot, panyo potataeng-Ku tataap sidu-sidutu'.”
Palalu bajaga-jaga
34“Ojagai na butongum, boli komiu talalo mongka'ima'i mombau bau-bauon ka' lewa' monginum inumon anu moko langu, kabai talalo mompotutugakon kapalaluan nu kantumuu'anum, sahingga komiu madi' mosadia sampe toka sinaanyo aijo' anu nu potolokengkeng mae. 35Kalana Sinaa aijo' toka sumo pangkun pohakop mian iwi-iwi' i dunia aiya. 36Saja' bajaga-jaga ka' balado'a, da komiu mahoson na mongahopi iwi-iwi' na anu saidi' mae timbali, ka' komiu moko ala mangadap hi Anak nu Mian.”
37 #
Luk. 19:47
I Yesus nompogulu' i Laigan nu Tumpu sina-sinaa, ka' malomnyo mambamo i Bungkut nu Zaitun ka' jojoongmo kiijo' mae. 38Iwi-iwi' na mian saja' toka daagi' subu i Laigan nu Tumpu mohongo i Yesus mompogulu'.
လက္ရွိေရြးခ်ယ္ထားမွု
LUKAS 21: LAILOE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ