यूहन्ना 15
15
यीशु सच्ची अंगुरा री बैल
1सच्ची अंगुरा री बैल अऊँ हा, अतै मेरा पिता किसान हा। 2जैड़ी डाली मिन्जो मन्ज हा अतै फळ ना दिन्दी, तैतिओ सो कटि दिन्दा हा; अतै जैड़ी फळदी हा, तैतिओ सो छांटदा हा ताकि सो होर फळा। 3तुहै ता तैस बचना री वजह थऊँ जैडा मैंई तुसिओ हुणाऊ हा, शुद्ध हिन। 4तुहै मिन्जो मन्ज डाळी सांईयै बणी रेय्आ, अतै अऊँ तूसु मन्ज। जिंआं डाळी अगर रूखा मन्ज बणी ना रेय्आ ता अपणै आप ना फळी सकदी, तियां ही तुहै भी अगर मिन्जो मन्ज ना बणी रैहन्दै ता ना फळी सकदै।
5अऊँ अंगुरा री बैल सांईयै हा; अतै तुहै डाळी सांईयै हिन। जैडा मिन्जो मन्ज बणी रैहन्दा अतै अऊँ तैस मन्ज सो बडा फळ फळदा, क्ओकि मिन्जो थऊँ अलग भूच्ची करी तुहै कुछ भी ना करी सकदै। 6अगर कोई मिन्जो मन्ज बणी ना रेय्आ ता सो डाळी सांईयै कटि करी फैंकी दिणा, अतै तैस हुक्की गाणा। मणु तियां डाळी जो बटोळी करी अगी मन्ज पाई करी फूकी दिन्दै। 7अगर तुहै मिन्जो मन्ज सदा बणी रैहन अतै मेरा बचन भी तूसु मन्ज सदा बणी रेय्आ, ता जैडा भी मंगलै ता सो तूसु तांयें भूच्ची गाणा। 8मेरै पिता री महिमा ऐत सोगी ही भुन्दी हा कि तुहै मता सारा फळ लैईन, ता ही तूसु मेरै चेलै बनणा।
9जियां पितै मिन्जो सोगी प्यार रखू हा तियां ही मैंई भी तूसु सोगी प्यार रखू हा, मेरै प्यारा मन्ज बणी रेय्आ। 10अगर तुहै मेरै हूक्मा जो मनलै ता, मेरै प्यारा मन्ज बणी रैहणा; जियां कि मैंई अपणै पितै रै हूक्मा जो मनु हा, अतै तसेरै प्यारा मन्ज बणी रैहन्दा हा। 11मैंई ऐह गल्ला तूसु सोगी ठेरैतांये कणैई कि, मेरी खुशी तूसु मन्ज बणी रेय्आ, अतै तुन्दी खुशी पूरी भूच्ची गच्छा।
12“मेरा हूक्म ऐह हा, कि जियां मैंई तूसु सोगी प्यार रखू हा, तियां ही तुहै भी अक्की दूये सोगी प्यार रखा। 13ऐत थऊँ बड़ा प्यार कसी रा भी ना हा कि कोई अपणै मित्रा तांयें अपणै प्राण देय्आ। 14जैडा हूक्म अऊँ तुसिओ दिन्दा, अगर तुहै तैतिओ मनन ता तुहै मेरै मित्र हिन। 15अजा थऊँ बाद मुँ तुसिओ दास ना बलणा, क्ओकि दास ना जाणदा कि तसेरा स्वामी कै करदा हा; पर मैंई तुसिओ मित्र बल्लू हा, क्ओकि मैंई जैड़ी गल्ला अपणै पितै थऊँ हुणुरी सो सब तुसिओ दस्सी दिती हिन। 16तुहै मिन्जो ना चुणुरा पर मैंई तुसिओ चुणुरा अतै तुसिओ नियुक्त करूरा कि तुहै गिच्ची करी फळ लैईन अतै तून्दा फळ बणी रेय्आ, कि तुहै मेरै नां सितै जैडा कुछ पिता थऊँ मंगलै तैस तुसिओ दिणा। 17ईयां गल्ला रा हूक्म अऊँ तुसिओ ठेरैतांये दिन्दा हा कि तुहै अक्की दूये सोगी प्यार रखन।”
संसारा रा बैर
18“अगर संसार तूसु सोगी बैर रखदा, ता तुहै जाणदै हिन कि तिनी तूसु थऊँ पैहलै मिन्जो सोगी बैर रखू हा। 19अगर तुहै संसारा रै भुन्दै, ता संसार अपणै सोगी प्यार रखदा; पर ठेरी वजह थऊँ कि तुहै संसारा रै ना हिन, पर मैंई तुसिओ संसारा थऊँ चुणी लैऊरा हा, ठेरैतांये संसार तूसु थऊँ बैर रखदा हा। 20जैड़ी गल्ल मैंई तूसु सोगी बली थी, ‘दास अपणै स्वामी थऊँ बड़ा ना भुन्दा,’ तैतिओ याद रखा। अगर तिनी मिन्जो सताऊ, ता तुसिओ भी सताणा; अगर तियैं मेरी गल्ल मनी ता तुन्दी भी मनणी हा। 21पर ऐह सब कुछ मणु मेरै नां री वजह थऊँ तूसु सोगी करना, क्ओकि सो मेरै भैजणैवाळै जो ना जाणदै। 22अगर अऊँ ना इन्दा अतै तियां सितै गल्ला ना करदा ता सो पापी ना ठहरदै; पर अबै तियां जो तंयारै पापा तांयें कोई बहाना निय्आ। 23जैडा मिन्जो सितै बैर रखदा सो मेरै पिता सोगी भी बैर रखदा हा। 24क्ओकि मैंई तंयारै मन्जै सो चमत्कार करै जैड़ै होर कसीये ना करूरै ठेरैतांये तियां मन्ज पाप हा; पर अबै ता तियैं मिन्जो अतै मेरै पिता दूनी जो हेरू अतै दूनी सितै बैर करू।” 25ऐह ठेरैतांये भुआ कि सो बचन पुरा भोआ, जैडा पवित्रग्रन्था मन्ज लिखुरा, “तियैं मिन्जो सोगी व्यर्थ बैर करू।”#भज. 69:4; भज. 109:3.
26“पर जैहणै तैस साथी ईणा, जैसियो अऊँ तून्दै बलै पितै री तरफा थऊँ भैजणा, मतलब सच्चाई री आत्मा जैड़ी पितै री तरफा थऊँ नकैन्दी हा, ता तैस मेरी गवाही दिणी हा; 27अतै तुहै भी मेरै गवाह हिन क्ओकि तुहै शुरू थऊँ मेरै सोगी रैह हिन।”
လက္ရွိေရြးခ်ယ္ထားမွု
यूहन्ना 15: GBKNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
This work is licensed under Creative Commons Attribution-ShareAlike 4.0 License.