यूहन्ना 17
17
यीशु री महायाजकीय प्रार्थना अप्पू तांयें
1यीशुऐ ऐह गल्ला करी अतै अपणी हाख्री चुकी करी अम्बरा री कनारी हेरी के बल्लू, “हे पिता, सो टैमं ईच्ची रैऊ हा; अपणै पुत्रा री महिमा कर कि पुत्र भी तेरी जय जयकार करा, 2क्ओकि तैंई तैसिओ सब मणु पुर अधिकार दितुरा कि जिंआ मणु जो तैंई तैसिओ दितुरा तियां सबी जो सो अनन्त जिन्दगी देय्आ। 3अतै अनन्त जिन्दगी ऐह हा कि सो तिजो एकमात्र सचै प्रमात्मैं जो अतै यीशु मसीह जो जैसियो तैंई भैजुरा तैसिओ जाणन। 4जैड़ै कम तैंई मिन्जो करनै जो दितुरै थियै, तैतिओ पुरा करीके मैंई धरती पुर तेरी जय जयकार करी हा। 5अबै हे पिता, तू अपणी महिमा तैसा महिमा सोगी कर जैड़ी संसार री रचना थऊँ पैहलै मेरी तेरै सोगी थी।
अपणै चेलै तांयें
6“मैंई तेरा नां तियां मणु रै सामणै अन्दा जियां जो तैंई संसारा थऊँ मिन्जो तांयें दिता। सो तेरै थियै अतै तैंई तियां जो मिन्जो तांयें दिता, अतै तियैं तेरै बचना जो मनी लैऊ हा। 7अबै सो जाणी गै हिन कि जैडा कुछ तैंई मिन्जो दितुरा सो सब कुछ तेरी कनारी थऊँ हा; 8क्ओकि जैड़ै बचन तैंई मिन्जो दितुरै, मैंई तियां जो तियां तांयें पुजाई दितुरा; अतै तियैं सो ग्रहण करै, अतै सच मनी लैऊ हा कि अऊँ तेरी कनारी थऊँ छूरा हा, अतै विस्वास करू हा कि तैंई मिन्जो भैजुरा हा। 9अऊँ तियां तांयें बिनती करदा; संसारा तांयें बिनती ना करदा पर तियां तांयें जियां जो तैंई मिन्जो दितुरा हा, क्ओकि सो तेरै हिन। 10अतै जैडा कुछ मेरा हा, सो सब तेरा हा, अतै जैडा तेरा हा सो मेरा हा, अतै ऐत थऊँ मेरी महिमा भूई हा। 11अबै मुँ संसारा मन्ज ना रैहणा, पर ईयां संसारा मन्ज रैहणा, अतै अऊँ तिजो बलै इन्दा हा। हे पवित्र पिता, अपणै नां सितै जैडा तैंई मिन्जो दिता हा, तंयारी रक्षा कर कि सो असु सांईयै अक्क भून। 12जैहणै अऊँ तियां सोगी थू, ता मैंई तेरै तैस नां सितै, जैडा तैंई मिन्जो दितुरा हा तंयारी रक्षा करी हा। मैंई तंयारी रखवाली करी हा, अतै अक्क मणु जिनी विनाश जो चुणी लैऊ तैसिओ छड़ी करी होर कोई नष्ट ना भूआ, ठेरैतांये कि पवित्रग्रन्था मन्ज जैडा कणैऊरा सो पुरा भोआ।#यूह. 18:9. 13अबै अऊँ तिजो बलै इन्दा हा, अतै ऐह गल्ला संसारा मन्ज बलदा हा, कि ऐह मेरी खुशी अपणै मन्ज पान। 14मैंई तेरा बचन इन्या जो पुजाई दितुरा; अतै संसारै इन्या सोगी बैर रखू हा, क्ओकि जियां अऊँ संसारा रा निय्आ, तियां ही ऐह भी संसारा रै ना हिन। 15अऊँ ऐह बिनती करदा हा कि तू ईयां जो संसारा थऊँ चूकी लै; पर ऐह भी कि तू तियां जो तैस शैतान थऊँ बचाई रख। 16जिंआ अऊँ संसारा रा निय्आ, तियां सो भी संसारा रै ना हिन। 17सच्चाई सोगी तियां जो पवित्र कर तेरा बचन सच्चाई हा। 18जिंआ तैंई मिन्जो संसारा मन्ज भैजुरा, तियां मैंई भी तियां जो संसारा मन्ज भैजुरा; 19अतै तंयारै तांयें अऊँ अपणै आपा जो पवित्र करदा हा, ताकि सो भी सच्चाई सोगी पवित्र भून।
सबी विस्वासी तांयें
20“अऊँ सिर्फ तियां तांयें ही बिनती ना करू करदा, पर तियां तांयें भी जैड़ै इन्यारै बचना रै द्धारा मिन्जो पुर विस्वास करलै, 21कि ऐह सब अक्क भून; जिंआ तू हे पिता मिन्जो मन्ज हा, अतै अऊँ तिजो मन्ज, तियां ही ऐह भी असु मन्ज भून, जैत थऊँ संसार विस्वास करा तैंई ही मिन्जो भैजुरा हा। 22सो जय जयकार जैड़ी तैंई मिन्जो दिती मैंई ईयांईं जो दिती हा, कि ऐह तियां ही अक्क भून जियां कि अहै अक्क हिन, 23अऊँ तियां मन्ज अतै तू मिन्जो मन्ज कि ऐह सिद्ध भूच्ची करी अक्क भूच्ची गान, अतै संसार जाणा कि तैंई ही मिन्जो भैजुरा, अतै जिंआ तैंई मिन्जो सोगी प्यार रखू तियां ही तैंई तियां सोगी प्यार रखू। 24हे पिता, अऊँ चाहन्दा हा जिंआ जो तैंई मिन्जो दितुरा, जैड़ी अऊँ हा तैड़ी सो भी मेरै सोगी भून, कि सो मेरी तैसा महिमा जो हेरन जैड़ी तैंई मिन्जो दितुरी हा, क्ओकि तैंई संसार री उत्पति थऊँ पैहलै रा ही मिन्जो सोगी प्यार रखू।#यूह. 14:3. 25हे धार्मिक पिता, संसारै मिन्जो ना जाणु, पर मैंई तिजो जाणु; अतै ईंयैं भी जाणु हा कि तैंई ही मिन्जो भैजुरा। 26मैंई तेरा नां तियां जो दसु हा अतै दसदै रैहणा कि जैडा प्यार तिजो मिन्जो सोगी थू सो तियां मन्ज भी रेय्आ, अतै अऊँ तियां मन्ज रैऊ।”
လက္ရွိေရြးခ်ယ္ထားမွု
यूहन्ना 17: GBKNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
This work is licensed under Creative Commons Attribution-ShareAlike 4.0 License.