लूका 21
21
कंगाल विधवा रा दान
(मरकुस 12:41-44)
1जैहणै यीशु यहूदी रै सभागार मन्ज थू, ता तिनी तैड़ी कई धनवाना जो दान पात्रा मन्ज अपणा-अपणा दान पान्दै हेरू। 2तिनी तैड़ी अक्क गरीबण विधवा दान पात्रा मन्ज दोई पैसै चढ़ान्दै हेरी। 3ता यीशुऐ वलु, “अऊँ तूसु सोगी सच बलदा कि ऐहै गरीब विधवै सबी थऊँ ज्यादा दान दिता हा। 4क्ओकि बाकी सबीये अपणी-अपणी कमाई री बढ़ोतरी थऊँ दान पाऊ हा, पर ऐहै अपणी कमी थऊँ मतलब अपणी सब कमाई पाई दिती हा।”
मन्दरा रै विनाश री भविष्यवाणी
(मत्ती 24:1,2; मरकुस 13:1,2)
5जैहणै कुछ मणु मन्दरा रै बारै मन्ज बल्लू करदै थियै कि ऐह किन्है छैळ पत्थरा अतै दान करूरै समाना सितै सजाऊरा, ता तियां जो यीशुऐ वलु, 6“ऐसा टैमं ईणैबाळा हा, जधैड़ी इआं पत्थरा पुर पत्थर ना रैहणा सब कुछ बरबाद भूच्ची गाणा।”
मुसिवता अतै क्लेश
(मत्ती 24:3-14; मरकुस 13:3-13)
7तियां मन्ज कुछ मणु यीशु थऊँ पुछणा लगै, “हे गुरू, ऐह गल्ला कैहणै भूणी? जैहणै ईयां गल्ला पूरी भूणैबाळी भूणा तैहणा री कै नशाणी भूणी?” 8तिनी वलु, “चौकनै रेय्आ कि कोई तुसिओ भटका ना, क्ओकि मतै मेरै नां लेई करी बलणा, ‘अऊँ सो ही हा,’ अतै ऐह भी बलणा कि, ‘अन्त समा चली आ।’ तुहै तियां पिचो मत चली पैन्दै। 9जैहणै तुहै लड़ाई झगड़ै री खबर हुणन ता डरदै मत, क्ओकि ईयां भूणा जरूरी हा; पर तैहणै भी अन्त ना भूणा।”
10ता यीशुऐ वलु, “जाति पुर जाति अतै राज्य पुर राज्य चढ़ाई करनी हा, 11बड़ै-बड़ै हिल्लण भूणै, अतै जगह-जगह अकाल अतै महामारी पैणी, अतै अम्बरा मन्ज डरावणी गल्ला अतै चिन्ह प्रकट भूणै हिन। 12पर ईयां सबी गल्ला थऊँ पैहलै तियां मेरै नां लेई-लेई करी तुसिओ पकड़ाणा, दुख दिणा अतै तुसिओ यहूदी रै सभागार मन्ज घसिटणा, अतै राजा या प्रधाना रै सामणै तुसिओ लैईणा अतै जेला मन्ज पाणा 13मेरै बारै मन्ज दसणै रा तूसु बलै ऐह ही मौका भूणा। 14ठेरैतांये पैहलै थऊँ ऐह चिन्ता मत करदै कि असु कै बलणा अतै कै जवाव दिणा। 15क्ओकि तैहणै मुँ तुसिओ ऐसै बोल अतै ज्ञान दिणा कि तून्दै कसी भी विरोधी तून्दा सामना या खण्डन ना करी सकणा। 16तून्दै माता-पिता, भाई, रिशतैदारा, अतै यारा कारा भी तुहै पकड़ाई दिणै; ऐठी तक की तुहै मरवाई भी दिणै। 17मेरै नां री व्जहा थऊँ कई मणु तूसु थऊँ नफरत करनी हा। 18पर तून्दा अक्क भी बाल बांका तियां ना करी सकणा। 19अपणै धीरजा सोगी तूसु अपणै प्राणा जो बचाई रखणा।
यरूशलेम रै विनाश री भविष्यवाणी
(मत्ती 24:15-21; मरकुस 13:14-19)
20“जैहणै तुहै यरूशलेम जो सेना रै घेरै मन्ज हेरलै ता जाणी लै कि तैस पक्का उजड़ी गाणा। 21ता तैस टैमैं जैड़ै यहूदिया रै परदेसा मन्ज भून सो पहाड़ा जो नह्ही गान; अतै जैड़ै यरूशलेम मन्ज भोलै सो बाहर निकळी गच्छैं; अतै जैड़ै ग्राँ मन्ज भोलै सो तैड़ी थऊँ बाहर मत गान्दै। 22क्ओकि ऐह बदला लैणैं रै दिन भूणै हिन, जैत मन्ज प्रमात्मां री लिखुरी गला पूरी भूच्ची गाणी। 23तियां दिन मन्ज जैड़ी गर्भवती भूणी अतै जैड़ी दुध पयाणै बाळी माता भोली तियां पुर हाय! क्ओकि ईयां तांयें बड़ै बुरै दिन भूणै हिन। 24तियां सबी जो बड़ी बेरहमी सितै मारी दिणा, अतै गुलाम बणाई करी कई होरी देशा मन्ज भैजी दिणै। अतै जैहणै तिकर गैर यहूदी रा टैमं पुरा ना भूच्ची गला तैहणै तिकर यरूशलेम गैर यहूदी पैरा थलै रोंदणा हा।
मणु रै पुत्रा रा दोबारा ईणा
(मत्ती 24:29-31; मरकुस 13:24-27)
25“सूरज, चाँद, अतै तारै मन्ज होर जिन्नै चमत्कार हुजणै हिन; अतै धरती मन्ज हर मणु पुर विपदा भूणी हा। क्ओकि तियां समुंद्र रा गड़गड़ात अतै लैहरा री छेड़ा थऊँ ड़री गाणा। 26ड़रा री वजह थऊँ दुनिया मन्ज ईणैबाळी विपदा जो हेरदै-हेरदै मणु री जानी मन्ज जान ना रैहणी, क्ओकि अम्बरा री शक्ति हिलाई गाणी हिन। 27तैहणै तियां मणु रै पुत्रा जो सामर्थ अतै बड़ी महिमा सितै बदळा मन्ज ईन्दै हेरना। 28जैहणै ईयां भूणा लगला ता, सिधै भूच्ची करी अपणै मुण्डा ऊपर चूकैं; क्ओकि तून्दा छुटकारा नेड़ै भूणा।”
अंजीरा रै रूखा रा उदाहरण
(मत्ती 24:32-35; मरकुस 13:28-31)
29यीशुऐ तियां जो अक्क उदाहरण हुणाऊ “अंजीर रै रूखा अतै सब रूखा जो हेरा। 30जियां जियां तैत मन्ज लून्गा नकैन्दी, ता तुसिओ पता लगी गान्दा कि तोन्दी लगी पैई हा। 31ऐस तरीकै जैहणै तुहै ईयां गल्ला जो हेरन, ता ऐह जाणी लेय्आ कि प्रमात्मैं रा राज्य यानी कि यीशु रा दुआ आगमन नजदीक हा। 32अऊँ तूसु सोगी सच बलदा कि जैहणै तक ऐह गल्ला भूच्ची ना गाहली तैहणै तिकर ऐस युगा रा अन्त ना भूणा। 33अम्बर अतै धरती अपणी जगह थऊँ बदली सकदै हिन, पर मेरी गल्ला कदी भी ना टलणी।”
जागदै रेय्आ
(मत्ती 24:36-44; मरकुस 13:32-37)
34“ठेरैतांये सावधान रेआ, ईयां ना भोआ कि तून्दै मन लापरवाह, शराबी अतै ऐसा जिन्दगी री चिन्ता मन्ज सुस्त भूच्ची गान, अतै आखरी दिन तूसु पुर अक्क फंदै सैईऐ ईच्ची पेआ। 35क्ओकि सो पूरी धरती पुर सब रैहणैवाळै पुर ऐस तरीकै ही ईच्ची रैहणा। 36ठेरैतांये जागदै रेआ अतै हर टैमैं प्रार्थना करदै रेआ कि तुहै ईयां सब ईणैबाळी घटना थऊँ बचणै अतै मणु रै पुत्रा रै सामणै खड़णी रै काबल वणा।”
37सो दिनै मन्दरा मन्ज उपदेश करदा थू, अतै राती बाहर गिच्ची करी जैतून नां रै पहाड़ा पुर रैहन्दा थू; 38अतै भ्यागा तड़कै-तड़कै ही तैस शहरा रै कई मणु तसेरी गल्ला हुणनै तांयें मन्दरा मन्ज तैस बल्लै इन्दै थियै।
လက္ရွိေရြးခ်ယ္ထားမွု
लूका 21: GBKNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
This work is licensed under Creative Commons Attribution-ShareAlike 4.0 License.