लुका 24
24
ईशूओ ज़िऊंदै हणअ
(मत्ती 28:1-10; मरकुस 16:1-8; युहन्ना 20:1-10)
1पर हबते पैहली धैल़ी तिंयां दोती दोथी तिन्नां खुशबूदार च़िज़ा ज़ुंण तिन्नैं बणांईं ती, तिन्नां निंईं करै घोरी सेटा लै नाठी। 2तिन्नैं भाल़अ कि सह बडी टोल्ह आसा घोरीए मोहरै का पोर्ही बदल़ी दी। 3तेखअ भाल़अ तिन्नैं भितरी कि प्रभू ईशूए ल्हास बी निं इधी आथी। 4एसा गल्ला भाल़ी तिंयां झशकुई कि अह कै हुअ और हेरे, तिधी आऐ दूई मर्ध च़मकदार झिकल़ै बान्हैं दै और तिंयां खल़्हुऐ तिन्नां सेटा।
5तिंयां ज़ांऊं डरी, और पृथूई बाखा मुंह ढोल़ी करै रही ता तिन्नैं दूई दूतै बोलअ, “तम्हैं ज़िऊंदै लोल़ी मूंऐं दै मांझ़ै किल्है आसा लागी दी? (प्रगट की दी गल्ला 1:18; मरकुस 16:5-6) 6सह निं इधी आथी, पर सह हुअ ज़िऊंदअ; आद करा कि ज़धू सह गलील लाक्कै त, तधू तेऊ कै बोलअ त, 7‘अह आसा ज़रूरी कि मुंह मणछे शोहरू पापी मणछ ढाकी कैद करे और तिंयां मुंह क्रूसा दी मारी पाए और हुंह चिऊथै धैल़ै ज़िऊंदअ होए।’”
8तेखअ आई तिन्नां ईशू खोज़ी दी गल्ला आद। 9तेखअ ठुर्ही तिंयां घोरी सेटा का च़ेल्लै सेटा लै और तिन्नैं खोज़ी सारी गल्ला गैरा च़ेल्लै का और होरी सोभी का। 10ज़ुंणी शधाणूं का ईंयां गल्ला खोज़ी, तिंयां ती मगदल़ गराऊंए मरिअम, योआना, याकूबे आम्मां मरिअम और होर बेटल़ी बी आसा ती।
11पर तिन्नें गल्ला लागी तिन्नां ज़ेही बेकार और तिन्नैं निं तिन्नें गल्लो विश्वास किअ। 12तेखअ उझ़ुअ पतरस और सह ठुर्हअ घोरी सेटा लै और तिधी भाल़ै तेऊ सिधै झिकल़ै पल़ै दै। ज़ुंण हुअ त तेता भाल़ी हुअ सह रहैन, संघा फिरअ सह घरा लै बापस।
इम्माऊस गराऊंऐं बाता ईशू च़ेल्लै संघै
(मरकुस 16:12,13)
13तेखअ तेसा ई धैल़ी तै लागै दै तिन्नां मांझ़ै दूई च़ेल्लै इम्माऊस नांओंऐं गराऊंआं लै डेऊंदै, सह आसा त येरुशलेम नगरी का कोई सात मील दूर। 14तिंयां तै इना गल्ले बारै आप्पू मांझ़ै गल्ला करदै लागै दै ज़ुंण हूई ती। 15ज़ांऊं तिंयां आप्पू मांझ़ै गल्ला-बाता और पुछ़-ज़ाच़ करदै तै लागै दै, ता ईशू आअ और सह लागअ तिन्नां संघै हांढदअ। 16पर तिन्नें आछी ती एही बंद कि तिंयां निं ईशू बछ़ैणीं सकै।
17ईशू पुछ़अ तिन्नां का, “तम्हैं आप्पू मांझ़ै हांढदी-हांढदी आप्पू मांझ़ै किज़ै गल्ला करा?”
तिंयां खल़्हुऐ दुखी ज़िहै। 18इहअ शूणीं बोलअ एकी कलोपास नांओंए मणछै, “तूह कै येरुशलेम नगरी एक्कै मणछ आसा परदेसी कि ज़हा का इहअ थोघ बी निं आथी कि इना धैल़ै येरुशलेम नगरी कै-कै हुअ।”
19ईशू पुछ़अ तिन्नां का, “कै गल्ला हुई?”
तिन्नैं बोलअ इहअ, “नासरत नगरीओ ईशू ज़ुंण परमेशर और सोभी लोगा नेल़ काम और बैणा दी शगती आल़अ और परमेशरो गूर त, 20सह धर्मीं ढाकअ बडै परोहितै और हाकमै कि तेऊ लै दैणीं मौते सज़ा और सह मारअ तिन्नैं क्रूसा दी। 21पर हाम्हां ती एही आशा कि एऊ दैणअ इस्राएला लै दुशमण रोम राज़ा का छ़ुटकारअ। पर इहअ निं हई सकअ। इना गल्ला का लाऊआ हुई तेऊ मरी हई आझ़ चअन धैल़ी।
22“हाम्हां मांझ़ै कई बेटल़ीए गल्ला शूणीं झाखुऐ हाम्हैं होर बी, तिंयां नाठी दोती घोरी दी ज़िधी सह दाबी त डाहअ द। 23तिन्नां निं ईशूए ल्हास तिधी भेटी और तिंयां बोला इहअ कि तिन्नां भेटै तिधी स्वर्ग दूत और तिन्नैं स्वर्ग दूतै बोलअ इहअ कि ईशू हुअ ज़िऊंदअ। 24म्हारै साथी मांझ़ै बी नाठै कई घोरी सेटा भाल़ै और ज़िहअ तिन्नैं बेटल़ी बोलअ त तिन्नैं बी भाल़अ तिहअ ई, पर सह निं भाल़ी तिन्नैं।”
25तेखअ बोलअ ईशू आपणैं तिन्नां च़ेल्लै लै, “हे ऐडै मणछो, तम्हैं आसा तिन्नां गल्ला दी विश्वास करना लै बडै भारी नांसमझ़ ज़ुंण परमेशरे गूरै मसीहे बारै आसा शास्त्रा दी खोज़ी दी! 26अह कै ज़रूरी नांईं त आथी कि मसीहा दुख भुगती करै आपणैं प्रतपा लै डेओए?” 27तेखअ समझ़ाऊअ तेऊ तिन्नां का परमेशरे गूर मुसा और होरी गूरे कताबा का शुरू करी करै पबित्र शास्त्रा दी खोज़ै दै बधाना का आपणैं बारै लिखी दी सारी गल्लो मतलब। (युहन्ना 1:45; लुका 24:44; बधान 18:15)
28तेतरी गऐ तिंयां तेऊ गराऊंआं नेल़ पुजी। ज़ांऊं तिंयां तिधा लै डेऊंदै लागै ता तेऊए हांढणें साबा का ज़ाण्हूंअ इहअ थोघ कि सह च़ाहा त तिन्नां का बी आजू डेऊणअ। 29पर तिंयां लागै तेऊ का एही अरज़ करी तेऊ तिधी रोकदै, “हाम्हां संघै दै आझ़ बैल़ी रहणैं ऐबै गई सान्ह पल़ी।” तेखअ नाठअ सह तिन्नां संघै भितरा लै।
30ज़ांऊं सह तिन्नां संघै रोटी खांदअ बेठअ, ता तेऊ किअ रोटी ढाकी करै शूकर और रोटी चोल़ी करै लागअ तिन्नां लै दैंदअ। 31तेखअ तिन्नें आछी खुल्ही और तिन्नैं बछ़ैणअ कि अह आसा प्रभू, पर ईशू हुअ तिन्नें आछी सेटा का लोप।
32तेखअ की तिन्नैं आप्पू मांझ़ै गल्ला, “बाता हांढदी ज़ांऊं सह हाम्हां संघै गल्ला करदअ त लागअ द और पबित्र शास्त्रा का मतलब समझ़ाऊअ, म्हारै दिलै तै ज़िहै खुशी दी बुआल़ लागै दै एछदै।” 33तिंयां उझ़ुऐ तिधा का तेभी संघा पुजै राची भितरी तिंयां येरुशलेम नगरी। तिन्नैं भाल़ै कि ईशूए गैरा च़ेल्लै और होर साथी तै तिधी कठा हुऐ दै। 34तिंयां तै लागै दै बोलदै, “प्रभू ईशू हुअ सच्च़ी ज़िऊंदअ और शमौन पतरसा का बी शुझुअ।” 35तेखअ खोज़ी तिन्नैं बी तिन्नां का बाता हुई दी गल्ला और इहअ बी खोज़अ कि रोटी खांदी बारी हाम्हैं सह किअ करै बछ़ैणअ।
ईशू च़ेल्लै का शुझणअ
(मत्ती 28:16-20; मरकुस 16:14-18; युहन्ना 20:19-23; शधाणूं 1:6-8)
36तिंयां तै इना गल्ला करदै ई लागै दै कि ईशू खल़्हुअ आप्पै तिन्नां सेटा और तिन्नां लै बोलअ, “तम्हां सोभी लोल़ी शांती हुई।” 37पर तिंयां सोभ डरै, और तिन्नैं ज़ाणअ इहअ कि हाम्हां का शुझुअ भूत। 38ईशू बोलअ तिन्नां लै, “तम्हैं किल्है डरै और थारै मनैं किल्है आसा बैहम। 39मेरै हाथा-खूरा भाल़ा, हुंह आसा सह ई। मुंह छुंआं किल्हैकि आत्मां दी निं हाड-मास हंदअ ज़ुंण हाड-मास तम्हैं मुखा भाल़ा।”
40इहअ बोली करै रहैऊऐ ईशू तिन्नां का आपणैं हाथ खूर।
41पर तिन्नां निस्सअ खुशीए मारै विश्वास हई और तिंयां हुऐ रहैन, ता ईशू तिन्नां का पुछ़अ, “तम्हां का खाणां लै बी आसा किज़ै?” 42तिन्नैं दैनअ भूज़ी दी माह्छ़लीए एक टांक। 43ईशू ढाकी तिन्नां सम्हनै और खाई।
44तेखअ बोलअ ईशू तिन्नां लै, “ईंयां आसा मेरी तिंयां गल्ला ज़ुंण मंऐं तम्हां संघै रही करै तम्हां का खोज़ी ती कि अह आसा ज़रूरी कि ज़ेतरी बी गल्ला, मुसा गूरे बधान और परमेशरे गूरै लिखी दी भज़ने कताबा दी मेरै बारै आसा लिखी दी, तिंयां लोल़ी पूरी हुई।”
45तेखअ दैनी तेऊ तिन्नां लै पबित्र शास्त्रा दी तेऊए बारै लिखी दी गल्ला समझ़णा लै बुधि। 46तेऊ बोलअ तिन्नां लै इहअ, “अह आसा शास्त्रा दी पैहलै ई लिखअ द कि मसीहो दुख भुगती करै मरनअ आसा ज़रूरी पर चिऊथै धैल़ै हणअ सह मरी करै भी ज़िऊंदअ। (याशायाह 53:5; लुका 24:7)
47 “तिन्नैं आसा इहअ बी लिखअ द कि ज़ुंण तेऊ दी विश्वास करे तिन्नां लै आसा ज़रूरी कि तिंयां हर ज़ैगा एसा गल्लो प्रच़ार करे ताकि लोग पाप छ़ाडी करै परमेशरा बाखा लै फिरे और परमेशर तिन्नें पाप माफ करे। मसीहा पिछ़ू हांढणै आल़ै लागा अह खुशीओ समाद प्रच़ार ज़रूरी करनअ किल्हैकि परमेशरै आसा तिंयां एते ई तैणीं छ़ाडै दै। पैहलै करनअ तिन्नां येरुशलेम नगरी प्रच़ार और तेखअ सारै संसारे सोभी ज़ातीए लोगा सेटा लै। 48तम्हैं आसा इना सोभी गल्ले गवाह।
49 “भाल़ा, ज़ुंण करार मेरै बाप्पू परमेशरै आसा की दी, सह करनी मुंह तम्हां दी पूरी और ज़ेभै तैणीं तम्हैं स्वर्गा का शगती निं भेटे तेभै तैणीं रहै एसा ई नगरी।”
ईशूओ स्वर्गा लै डेऊणअ
(मरकुस 16:19,20; शधाणूं 1:9-11)
50तेखअ निंयैं ईशू तिंयां सोभ येरुशलेम नगरी का बागै बेतनियाह गराऊंऐं तैणीं, संघा आपणैं हाथ च़की करै दैनी तिन्नां लै बर्गत। 51तेखअ हुअ बर्गत दैंदी-दैंदी तिन्नां का ज़ुदअ और तिन्नें आछी सम्हनै च़कअ ईशू स्वर्गा लै। (शधाणूं 1:9; भज़न 47:5)
52तिन्नैं टेक्कअ ईशू सेटा माथअ और बडी खुशी-खुशी फिरै येरुशलेम नगरी लै बापस 53तिंयां करा तै धैल़ परमेशरो शूकर और धैल़ हआ तै मांदरै कठा।
လက္ရွိေရြးခ်ယ္ထားမွု
लुका 24: OSJNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
This work is licensed under Creative Commons Attribution-ShareAlike 4.0 License.