Matiye 17
17
Magawti ziiti Iisa kayaati dambi
(Elloŋ Mark 9.2-13, Lik 9.28-36)
1Gaa maa gu leeɗe meeni bizgiƴi, gaa Iisa kolliɗiy ma gata, ini Piyer o Zak ma sinti kee Yaaya. Gaa kaatikkikoo kayco ka dambu kaƴi aɗe siƴƴa. 2Gaa magiɗe unco, wigisanti ɓeele aleŋ paato o kaɗiŋgeetee deero purta tal aleŋ bahaarane. 3Gaa kaytiŋ ka ga Muusa ma giiti nabiinice Eliyas oomiyyoo, guu beneyɗo ma Iisa. 4Gaa Piyer beneyyiyyee oko Iisa gaa: «Miltini, daana ke nuntinne iŋee. Kii oyye na leewa zubiŋgee subba, kaƴi oko kii o kaƴi oko Muusa o kaƴi oko Eliyas.» 5Gata ƴa beneyya missa, gii n̰irɗe ma ɓelaa asiɗiy tagga. Guu giyyiɗe ur̰e min aatti n̰irɗiti ma beneyya gee: «Gata keeke ay Runtu, na ƴekkaa ta kaw. Parhantu parattí aaye oko gata. Geewoŋga beneyti!» 6Gaa maa gu jobookeetee Iisa kotti giyyicca ur̰e taata, guu solliɗe gu wecciɗiy onninco kiɗaati o gu ɓaye ta kaw. 7Gaa Iisa asiyyoo wikirco kaaka, gaa kulla kaƴi aɗe ga eesiyya ma pitti o ga beneyya gaa: «Wacoŋ, aɗoŋ ɓaya ɗa!» 8Gaa maa gu cipilɗiy kayyeeco, gu elle pe gaa Iisa kayti ka.
9Gaa maa gu berewɗo min dambi, gaa Iisa sartiyiyyoo gaa: «Haaŋ, aɗoŋgu gemma ɗa gaari kooko maa ku elle ya oko gimu kaƴi namma ya wikinne maa ga Runti Gimi asiɗo naɗa min muuti!» 10Guu jobookeetee inniyya goo: «A ayme gu aalimnigee ku Kitamniti Muusa beneyɗo goo ga nabiinice Eliyas ƴa omma ma asaa?» 11Gaa tiiliyyoo gaa: «Ay seene appe, ay gata ƴa omma ma asaa ga asiɗiy pana gaari paracco ma bottolco. 12A naa pa beneyyatoŋ kadar ga Eliyas aseero appe, guu giimi alɗiya ibina ɗa. Guu leeɗeega soopa ka miɗɗa paratti maa gu aŋka. A Runti Gimi kulla gu akkiya diigiya pe goŋŋa aɗe.» 13Ay ma beneyti keeke appe, gu jobookeetee ibinɗe kadar ga beneyya ma gaartee Yaaya ma batasayya giimi.
Rayyiditi miica maa ga pumpul bagakka
(Elloŋ Mark 9.14-29, Lik 9.37-43a)
14Maa ga Iisa yookiɗe min dambi ma jobookeetee ku subba saripco giimi ku maani, gaa miiɗi kaƴi asiyyee saripti. Gaa darsiɗe unti, 15o ga beneyya gaa: «Miltu, ellu saamuwti runtu. Gata lekka pumpul o ga deegeyyiya ta tirta. Diiman ga solokka okkati e baŋ pa ammo. 16Naa itiriyyooga oko jobookeecam, guu alɗe gederra ɗa gu rayyidiyya.» 17Gaa Iisa tiiliɗe gaa: «Kuŋ giimi ka haŋka keeke, ku dowwiy ɗa galbigeetoŋ oko naa o ku ibina pe ka miɗɗa ka. Kuu e na nowottatoŋ pe soo ya minke ku maa ku duwɗiy galbigeetoŋ oko naa? Na deeɗitoŋ soɓorro pe ya minke? Itirnawga miica iŋee!» 18Gaa maa gu itiriyyeega, ga Iisa makkiyyee oko aarinniti miici, ga aarinne oomiɗe. Gaa min oko wikinne kaaka saa, ga miica rayyidiɗe. 19Gaa min oko kaaka, gu jobookeetee Iisa kayco ka pe sappiyyee katta, guu inniyya goo: «A nii soo ayme ni alɗe gederra ɗa ni pittiyya?» 20Gaa Iisa tiiliyyoo gaa: «Kuu gederre ɗa, ay asan gi amannitoŋ paalta ka missa. Na beneyyatoŋca seene: Gii amannitoŋ yaata aleŋ ronti gandirati ka, ku gederra ku beneyyiyyee oko dambu keeke kuu: “Paru min iŋeekite ki kaatiɗo ta gonek”, ga dambu kaaka parakka. Lekka ɗa payya ya maatiki ma beterratoŋ. 21A gata pa, aarinne aleŋ keeke okomma illa ma inno oko Mellayi o samkiyo.»
Iisa tasaa payya muutti o naɗawti
(Elloŋ Mark 9.30-32, Lik 9.43b-45)
22Gaa meene kaƴi payya maa ga Iisa ma jobookeetee temeɗɗe sawa kiɗa ta Galilee, ga beneyyiyoo gaa: «Runti Gimi gu akkiya bira picco giimo. 23Guu guta asiyya dee. Gaa oko meene ma daa ta subba pa ga asiɗo naɗa min muuti.» Maa gu giyyiyya beneyti keeke, guu zorontiyɗe ta tirta.
Iisa o Piyer pelekka miiri ka girti Mellayi
24Gaa Iisa ma jobookeetee asiɗe geegar ka Kaparnawom. Maa gu sarɗe, guu sokookee ku miiri ka girti Mellayi wirriyya Piyer. Guu inniyya goo: «Garaawatoŋ pelekka ɗa aɗe miiri ka girti Mellayi e?» 25Gaa Piyer tiiliyyoo gaa: «Haa, pelekka.» Maa ga Piyer un̰n̰iɗe giiri, gaa Iisa ommiɗe saa ga inniyya Piyer gaa: «Simo Piyer, gaa oko kii ka, kii me pe oko beneyyi keeke? Ay ini we ma pelekka miiri o patanti oko salaataŋgee koo ku dunuune teete? Ay melleeti darriti e, e gu turi?» 26Gaa Piyer tiiliyyee gaa: «Ay turi ma pelekka.» Gaa Iisa beneyyiyyee gaa: «A kaaka pa gu melleeti darriti pelekka ɗa ya maatiki. 27A maa ke alɗiyoogu niŋga ɗa galbigeeco pa, ki addo baharriti, kii uwwicca celbeneekcum. Buusu ka omma maa ki bakamma kaaka pa, ki cimmiya. Kii iyyeega biiti pa, ki gasakka tammaye ta guruzzi ma arakka pilko ta miiri oko naa o oko kii. Kaaka pa ki icciyya kii pilkiyyeŋ.»
လက္ရွိေရြးခ်ယ္ထားမွု
Matiye 17: mmy
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2019, Wycliffe Bible Translators, Inc. All rights reserved.