GIING'EETA 33
33
Yakobo gwaroonyi Esawu
1Ng'ata gagatkat Yakobo gheanyangaaschi ak ghoang'wearda, ak ging'ulayi, ghwaan Esawu, nea goodeana fih bughalaji ang'wan. Ak gooheeli diibiga Leya ea gea Raheli ea hawi iyeenya bea gadiyeeda. 2Ak gageanu ghwayiin haweega gadiyeeda mwadi sea diibiga nyaawa, ak gabassa Leya ea diibigaaschi, nea Raheli sea Yosefu ghwanung' gahuuydeana sean. 3Ak goosheedeawa niny sean, nea iissa gwatkuy aba ng'eanyi niba ispwa, ea eeyi bwak ea gwaneekiissa orjeeda ghaamwat.
4Nea Esawu ghafwach gawa roonyeeda, ak ghwadeapta, ak goobissa gheata ak ghwasam, ak gooyeawda duwaawi. 5Iidu nea gagatkat Esawu gheanyangaaschi ak ghwadaah gadeemga ea diibiga, ak gwayeesha, “Suh geabeang'a indeawiin?” Ghwalamda Yakobo ak gwayeesha, “Suh diibiga adaw ASEETA soomjeandaang'u gil aba bariinyeega.” 6Hean gwaneekiit gwealajeega, sea diibiga nyaawa, ak gwatkuy aba ng'eanyi. 7Gwasunu Leya ea diibigaaschi gwaneekiit ak gwatkuy aba ng'eanyi; ak gahuuydean Yosefu sea Raheli ak gwaneekiit, ak gwatkuy aba ng'eanyi. 8Ak ghwalamda Esawu ak gwayeesha, “Nih gidaabwa fiisu sean deenu earoonyeewiin?” Ghwasha Yakobo nea gwayeesha, “Gweagu gideaba geagasayi danyas alooheeda aba madeeda ng'utamiideanyu.” 9Ghwalamda Esawu ak gwayeesha, “Geandeawi dugwa deayeat orjeediyya, mideawana haleanjeeda indeawi ghoah gaagu.” 10Gwayeesha Yakobo, “Manda, geamuscheey, ii naanyaschi alooheeda aba madeeda gheanyangaagu, abeeda gumwasi haleanjeeda eagoonyi aba geatindeanyu; aba gideaba deaktaang'u aba huumwa gawuurji deakta gheamamda ASEETA, aba alooheeda isinnean aniini. 11Geamuscheey, ang'waanya haleanjeeda guskuseega siyeaneey, aba gideaba ASEETA nisinnean ng'asheega miyaas, ea gideaba geandeawi, nigoonan haleanjeeda saang'a.” Hean gamearmearani ea ghamwas ghoang'waay.
12Ng'ata gwayi Esawu, “Asi eebissiina eeweaya bareanyeakaasa, ak gaydeasheedeawaneegwa.” 13Ghwalamda Yakobo ak gwayeesha, “Ng'utamiideanyu ginali gideaba diibiga manda uurjeenga, nea gammiisa gideaba gaydang'ula nooga ea dugwa ea muhooga; nea iisinung' gaweay askweareanagi, gaygameewa haleanjeeda sean. 14Asi asheedeawana soomjeandaang'u, ak gaydeadu geashtaang'u nea geajiileanyi, nea ghaanung' gwadeena beata dugwa eadeayeewi nea gwadeena beata diibiga ea danyasa ng'utamiideanyu ng'eanyiida Edomu.”
15Ng'ata gwayi Esawu, “Nung' danung'uneey fuga mwaatkwa eandeawi.” Ak gwayeesha Yakobo niny, “Aba naaha? Geagasayi danyas alooheeda aba madeeda ng'utamiideanyu.” 16Hean ghwayam geaw Esawu eaweedida gabiikta Edomu. 17Nea Yakobo gawa ng'eanyiita Sukoti, ak ghwadeas gheannyi, ea jiroonga dugwaaschi; ak geeguura gheawungeaba ng'eanyiita Sukoti. 18Ak ghwahita Yakobo mujiineeda Shekemu nea gaba seayu, mida jeeda ng'eanyiida Ganaani, nea gwaleabu Badan-aramu; ak gwasissa maheemajeandaanyi murdeeda mujiini. 19Ak ghwashaaha ng'eanyiita heeda orjooga Amori, was ghweanda Shekemu aba lapiyaji bughala was ng'eanyiida angoorsa maheemajeandaanyi. 20Ak gwadeeksa heeda wagiida ak gaguura El-Elohe-Israeli.
လက္ရွိေရြးခ်ယ္ထားမွု
GIING'EETA 33: BG15
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bible in Datooga © Bible Society of Tanzania, 2015.