توریت شریف: پَیدایش 21
21
1فِر رب جِس طرح آخیا سی، بی بی سارہ پر نظر کیتی، تے رب نے وعدے نے مطابق 2او حاملہ ہوئی۔ حضرت اِبراہِیم نے کہار اُنہاں نی بُڈی عمر وِچ اللّٰہ تعالیٰ نے مقرر کِیتے وے ٹیم پر پُتر جمیا۔ 3فِر حضرت اِبراہِیم اپݨے پُترے نا ناں، جیہڑا بی بی سارہ کولوں جمیا سی، اسحاق رخیا۔ 4تے رب نے حُکم نے مطابق حضرت اِبراہِیم اپݨے پُترے نیاں سُنتاں جمݨے تُوں بعد اٹھویں دیہاڑے کیتیاں۔ 5جس ویلے اُنہاں نا پُتر جمیا تے حضرت اِبراہِیم سو سال نے سݨ۔
6بی بی سارہ آخیا، ”رب مِکی خُوشی نال ہسایا اے، تے سارے سُݨنے آلے وی مہاڑے نال خُوشی وِچ ہسسݨ۔ 7کَے کوئی حضرت اِبراہِیم کی اے گل آخی سکݨا سی کہ سارہ بچّیاں کی دُدھ پلاسی؟ پر ہُݨ میں اُنہاں نی بڈھی عُمر وِچ مُنڈا جمیا.“
8فِر اسحاق بڑا ہویا، تے اِس نا دُدھ چُھڑایا گیا. تے حضرت اِبراہِیم اُس نے دُدھ چھوڑاݨے آلے دیہاڑے بہُوں خوشی کیتی۔ 9پر بی بی سارہ تکیا کہ حضرت اِبراہِیم نا دوآ پُتر جیہڑا بی بی ہاجؑرہ مِصری وِچوں جمیا سی، اسحاق نا مذاق اُڑاݨا سی۔ 10فِر بی بی سارہ حضرت اِبراہِیم کی آخیا، ”اِس لونڈی کی تے اِس نے پُترے کی کہروں کڈی شوڑو، کِیئانکہ اے مہاڑے پُترے اسحاق نال وارث نی بݨݨ لغا.“
11پر حضرت اِبراہِیم کی اے گل بہُوں مَندی لغی، کِیئانکہ اِسمٰعیل وی اُنہاں نا پُتر سی۔ 12پر اللّٰہ تعالیٰ اُنہاں کی آخیا، ”جیہڑی گل سارہ اپݨی لُونڈی تے اُس نے پُترے نے بارے وِچ آخی، اُس نا بُرا ناں من. ساراہ نی گل منی کِہن، کِیئانکہ اِسحاق نال تُہاڑی نسل قائم رہسی. 13تے اُس لونڈی نے پُترے کولوں وی میں اِک قوم پیدا کرساں، کِیئانکہ او وی تُہاڑی نسل اے۔“
14فِر حضرت اِبراہِیم سویرے سویرے اُٹھے، تے روٹی تے پاݨِیئے نی اِک مشک کِنہی کے بی بی ہاجرہ نے مونڈیاں پر رخی. اُنہاں حضرت اسماعیؑل کی بی بی ہاجرہؑ نے حوالے کِیتا، تے اُنہاں کی روانہ کِیتا. او ٹُری گئے، تے بیر سبع نے بیاباناں وِچ پھِرݨ لغی پئے۔
15جس ویلے مَشک وِچوں پاݨی مُکی گیا، بی بی حاجرہ اپݨے پُترے کی اِک چَہاڑی نی چھاواں تھلے رخی شوڑیا۔ 16تے آپوں اُس نے سامݨے کُج فاصلے پر دور جائی کے بیٹھے، تے دِلے وِچ آخݨ لغے کہ ”میں اپݨے پُترے نا مرنا تے ناں تکاں۔“ تے فِر روݨ لغی پئے.
17اللّٰہ تعالیٰ مُنڈے نے روݨے نی واز سُݨی، تے فِر خُدا نے فرشتے آسمانے وِچوں بی بی ہاجرہ کی واز دِتی، ”ہاجرہ، تُکی کے ہوئی گیا؟ ناں ڈر! اللّٰہ تعالیٰ تہاڑے مُنڈے نی واز سُݨی کِہندی۔ 18اُٹھ، تے اپݨے مُنڈے کی سنبھال، کِیئانکہ اللّٰہ تعالیٰ اُس وِچوں اِک بڑی قوم بݨاسی۔“
19فِر اللّٰہ تعالیٰ بی بی ہاجرہ نیاں اکھیاں کھولیاں، تے اُنہاں پاݨِیئے نا اِک کھُوہ تکیا. اُنہاں جائی کے مشک پاݨِیئے نال پَہری آندی، تے مُنڈے کی پلایا۔
20جُوں جُوں حضرت اِسماعِیل بڑے ہوݨے گئے، تے اللّٰہ تعالیٰ اُنہاں نال سی. او فاران نیاں بیاباناں وِچ رہݨ لغے، تے تیر انداز بݨے۔ 21اُنہاں نی ماؤ اُنہاں واسطے مِصری زناݨی کیتی۔
22اُنہاں دیہاڑیاں وِچ بادشاہ ابی ملک تے اُس نے سپاہ سالار فِیکُول حضرت اِبراہِیم کی اچھی کے آخیا، ”ہر کم جیہڑا تُساں کرنے او، اُس وِچ اللّٰہ تعالیٰ تُساں نال ہوݨا۔ 23اِس واسطے تُساں ہُݨ مہاڑے سامݨے اللّٰہ نی قسم کھاؤ کہ نہ مہاڑے نال، نہ مہاڑیاں پُتراں نال، تے نہ ہی مہاڑیاں پوتریاں نال تُساں تہوکھہ فریب کرسو. جِس طرح میں تُساں نال اچّا سلُوک کیتا، اِسے طرح تُساں وی مہاڑے نال تے اِس مُلخے نال جتھے تُساں رہݨے او اچّا سلُوک کرو۔“
24حضرت اِبراہِیم آخیا، ”میں قسم کھاݨا آں.“
25فِر حضرت اِبراہِیم اِک کھُوئے نے بارے وِچ جیہڑا بادشاہ ابی ملک نیاں نوکراں زبردستی کھسیا سی، بادشاہ کی شِکایت کِیتی۔ 26بادشاہ آخیا، ”مِکی پتہ ہی نی کہ اے کم کس کیتا. تُساں وی مِکی نی دسیا، تے میں وی ہالے تک اِس نے بارے وِچ کُج نی سُݨیا سی۔“
27فِر حضرت اِبراہِیم پہڈاں، بکریاں، گانئیاں تے داند کہنی کے بادشاہ کی دِتے، تے دوآں آپے وِچ معاہدہ کِیتا۔ 28حضرت اِبراہِیم پہڈاں نیاں سَتاں بچیاں کی کہنی کے لادا الگ کِیتا۔ 29اے تکی کے بادشاہ حضرت اِبراہِیم کی آخیا، ”اِنہاں ستاں پہڈاں نیاں بچیاں کی لادے رخݨے نا کَے مطلب اے؟“
30حضرت اِبراہِیم جواب دِتا، ”تُساں اے سَت پہڈاں نے بچے مہاڑے کولوں کہنو، تانکہ اے مہاڑے گواہ ہوݨ کہ اے کھُوہ میں کھُݨیا۔“
31اِس واسطے اُس جغہ نا ناں بیر سبع یعنی قسم نا کھُوہ رخیا گیا، کِیئانکہ اُتھے اُنہاں دوآں قسم کھادی سی۔ 32اِس طرح اُنہاں بیر سبع پر معاہدہ کِیتا.
فِر بادشاہ ابی ملک تے اُس نی فوج نے کمانڈر فِیکُول دوئے اُٹھی کے فلستیناں نے مُلخے در مُڑی گئے۔ 33حضرت اِبراہِیم بیر سبع وِچ اِک درخت لایا، تے اُس جغہ اپر اُنہاں رب اگے دُعا کیتی، جیہڑا ابدی خُدا اے۔ 34حضرت اِبراہِیم بہوُں دیہاڑے فلستیاں نے مُلخے وِچ رہے۔
လက္ရွိေရြးခ်ယ္ထားမွု
توریت شریف: پَیدایش 21: phr
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Text (c) 2021 Noor-e-Kashmir
Audio (p) 2021 Noor-e-Kashmir