Mateu 13
13
Chishimo chamuka-kukuva
(Mako 4:1-9; Luka 8:4-8)
1Halikumbi vene lize, Yesu alovokele muze muzuvo nakuya nakutwama kuchijiva.
2Kaha kwahomenene mazavu amavulu avatu nakumujingilika, ngocho engilile muwato nakutwamamo, kaha aze mazavu osena emanyine kungenge.
3Kaha avalwezele vyavivulu muvishimo ngwenyi, Ivwenu! Muka-kukuva ayile nakukuva.
4Ikiye hakukuva, yimwe yaholokelele kukulo yajila, kaha tujila vejile nakuyilya.
5Yikwavo yaholokelele hamavu amalolwa, haze kahapwile mavu amavuluko. Kaha hahaze vene yasokele, mwomwo kayapwile hamavu amavuluko.
6Oloze omu lyazundukile likumbi yapapukile, kaha hakuhona miji, yomine chau.
7Yikwavo yaholokelele mukachi kamingonga, kaha yize mingonga yakolele nakuyijiha.
8Yikwavo yaholokelele hamavu amwaza nakwima manona — halinona hilinona, eli likulukaji (100), eli makumi atanu nalimwe (60), eli makumi atatu (30).
9 Ou ali namatwitwi evwilile.
Mwomwo ika Yesu ahanjikile muvishimo?
(Mako 4:10-12; Luka 8:9-10)
10Kaha tumbaji twenyi vapandamine kuli ikiye, vamuhulishile ngwavo, Mwomwo ika uli nakuhanjika kuli vakiko muvishimo?
11Kaha Ikiye avakumbulwile ngwenyi, Enu vanamihane kutachikiza mangana ápwile akusweka awangana wamwilu, oloze vakiko kavavahànyinechoko.
12 Mwomwo weshowo áli navyo navakamuwezelako, kaha mwakapwa navyakulisala. Oloze weshowo keshi navyoko, chipwe chize áli nacho navakamutambulacho.
13Shikaho nguli nakuhanjika kuli vakiko muvishimo, mwomwo omu vali nakutala kaveshi nakumonako, kaha omu vali nakwivwa kaveshi nakwivwishisako chipwe kuvalumbunukila.
14Shikaho, mazu aupolofweto waIsaya anatesamo muli vakiko, akwamba ngwavo,
Kwivwa namwivwa, oloze kacheshi kumilumbunukilako.
Kumona namumona, oloze kacheshi kumitumbunukilako.
15Mwomwo michima yavatu ava yinambumbula,
Matwitwi avo kwivwa kanawa chiku,
Meso avo akulalavika,
Kuchina navamona nameso,
Nakwivwa namatwitwi,
Nakuvalumbunukila mumichima
Mangana vakinduluke nguvahindule.
16 Oloze anatokwa meso enu mwomwo ali nakumona, namatwitwi enu nawa mwomwo ali nakwivwa.
17Mwomwo mwamuchano nangumilweza ngwami vapolofweto navaka-kwoloka vavavulu vafwililile kumona evi muli nakumona, oloze kavavimweneko, vafwililile kwivwa evi muli nakwivwa, oloze kavavivwileko.
Yesu mwalumbununa chishimo chamuka-kukuva
(Mako 4:13-20; Luka 8:11-15)
18Ivwililenu jino mwaya chishimo chamuka-kukuva.
19Weshowo mwevwa awa mazu awangana nakuzeneka kumulumbunukila, uze wamupi mweza nakunyanga awa vanakuu mumuchima wenyi. Eyi yikiko yakukuva kukulo yajila.
20Oloze yize yakukuva hamavu amalolwa — ikiye uze mwevwa mazu, kaha hahaze vene mwawatambula nakuwahilila.
21Oloze keshi namiji yakuzama muli iveneko, napu watando yayindende kaha. Oloze hakumona makava chipwe kumuyanjishila hamazu, hahaze vene himwaseza vyalufwelelo.
22Yize yakukuva mumingonga — ikiye uze mwevwa mazu, kaha hakuzakamina vyamyaka yino, nakutangisa chaluheto, hinavihonesa mazu, kaha hinawazeneka kwima mihako.
23Oloze yize yakukuva hamavu amwaza — ikiye uze mwevwa mazu nakuwevwishisa. Ikiye vene mwemanga mihako nakulovola, aha likulukaji (100), hakwavo makumi atanu nalimwe (60), heka makumi atatu (30).
Chishimo chambuto yayisasu mukachi katiliku
24 Avatelelele chishimo chikwavo ngwenyi, Wangana wamwilu vanaufwanyisa namutu ákuvile mbuto jamwaza muwande wenyi.
25Oloze shimbu vapwile vatu jenyi mtúlo, muka-kole wenyi ejile nakukuvamo mbuto yayisasu#13:25 Mbuto akuvile muka-kole yapwile yakulifwana natiliku, oloze yapwile yayisasu yikwechi ulembe wakujiha mutu. mukachi katiliku nakuliyila kwenyi.
26Kaha omu yasokele mbuto nakwima, hahaze vene nayize mbuto yayisasu nawa yasolokele.
27Kaha vandungo jauze mwenyawande vejile nakumuhulisa ngwavo, Ove mwata, kumana muwande wove kawakuvilemo mbuto yamwazako? Nyi eyi mbuto yayisasu yinafumu kulihi?
28Avakumbulwile ngwenyi, Muka-kole ikiye nalingi chuma kana! Vandungo jenyi hinavamuhulisa ngwavo, Shikaho unasake tuyenga tukayivunyemo tahi?
29Oloze ikiye avakumbulwile ngwenyi, Nduma, kuchina hakuvunya mbuto yayisasu, namukavunyina kumwe natiliku.
30Jechenu tuhu josena jikolele hamwe palanga nahakwaha. Kaha hangonde yakwaha nangukalweza vaka-kwaha ngwami, Vangilenu kukungulula mbuto yayisasu nakuyikasa mikuta mikuta, muyoche. Oloze tiliku, yikungulwilenu muchisete chami.
Chishimo chambuto yamusetale
(Mako 4:30-32; Luka 13:18-19)
31Avatelelele chishimo chikwavo ngwenyi, Wangana wamwilu unafwane nge mbuto yamusetale, yize ambachile mutu nakuyitumba muwande wenyi.
32Yikiko yapwa yayindende chikuma kuhambakana jimbuto josena, oloze nge yinakolo lyehi nayitohwa kuhambakana vimbuto vikwavo vyosena, naupwa mutondo waunene, kaha tujila vahelu naveza nakutungila maswa hamitango yawo.
Chishimo chachimbalwila
(Luka 13:20-21)
33Avatelelele chishimo chikwavo ngwenyi, Wangana wamwilu unafwane nge chimbalwila, chize ambachile pwevo nakuchisweka hakuchichingasana muunga watiliku wavyesekelo#13:33 Chesekelo chimwe chapwile 7 kilo yaunga. vitatu, swi-i nomu chayangililile mwosena.
Hafumine Yesu kuvatela vishimo
(Mako 4:33-34)
34Vyosena evi Yesu avihanjikile muvishimo kumazavu aze. Kahanjikilenga navo chakuzeneka chishimoko,
35mangana mazu ahanjikile kapolofweto atesemo, ngwenyi,
Nangulokolola mukanwa kami nakuta vishimo,
Nangutufula ovyo vyapwile vyakusweka kufuma hakwala chihela chakaye.
Yesu mwalumbununa chishimo chambuto yayisasu mukachi katiliku
36Haze vene asezele aze mazavu, engilile muzuvo. Kaha tumbaji twenyi vapandamine kuli ikiye nakumwamba ngwavo, Tulumbunwine chize chishimo chambuto yayisasu yamuwande.
37Avakumbulwile ngwenyi, Muka-kukuva mbuto yamwaza Ikiye Mwanamutu.
38Wande ukiko kaye. Mbuto yamwaza yikiko vana vawangana. Mbuto yayisasu yikiko vana vauze wamupi.
39Kaha uze Muka-kole ayikuvile, ikiye liyavolo. Ngonde yakwaha yikiko kukuma chamyaka yino. Vaka-kwaha vakiko vangelo.
40Shikaho, ngana muze veji kukungululanga mbuto yayisasu nakuyocha nakakahya, mukiko vene nachikapwa hakukuma chamyaka yino.
41Mwanamutu mwakatuma vangelo jenyi mangana vakakungule nakufumisa vyakuvulumwisa vyosena muwangana wenyi, kaha vipapwoki vosena
42navakavambila mulilungu lyakakahya — mwamuze vene navakapwanga nakulila jimbimbi nakulingenjunga kumazo.
43Haze vene vaka-kwoloka navakamunyikanga nge likumbi muwangana waSevo. Ou ali namatwitwi evwilile.
Luheto lwakuvumbika muwande
44Wangana wamwilu unafwane nge luheto lwakuvumbika muwande, olu awanyine mutu nakulushikila. Hakuwahilila chapwile mumuchima wenyi, ayile nakulanjisa vyenyi vyosena, nakulanda uze wande.
Pela yandando yayinene
45Cheka nawa wangana wamwilu unafwane nge muka-kusekasana mwatonda jipela#13:45 Pela yapwa usanga utoma wandando yayinene chikuma. Vajiwana mujimbangambanga jamukalungalwiji. jamwaza alande.
46Ikiye hakuwana pela yimwe yandando yayinene chikuma, ayile nakulanjisa vyenyi vyosena nakuyilanda.
Lyoji lyachikokela
47Cheka nawa, wangana wamwilu unafwane nge lyoji lyachikokela vafuchile mukalungalwiji, kaha vakuchikililemo vaishi vamiyachi yosena.
48Omu lyazalile, valikokelele kutunda, kaha vatwamine nakukungulwila vamwaza mumitonga, oloze vavapi vavambilile.
49Mukiko vene nachikapwa hakukuma chamyaka yino. Vangelo navakeza nakuhandununa vavapi kufuma muli vaka-kwoloka,
50nakuvambila mulilungu lyakakahya, mwamuze vene navakapwanga nakulila jimbimbi nakulingenjunga kumazo.
Vyavihya nevi vyamwaka
51Vyosena evi vinamilumbunukila tahi? Vamukumbulwile ngwavo, Eyo Mwata.
52Kaha avambile ngwenyi, Shikaho muka-kusoneka himuka-kusoneka vánanangwila vyawangana wamwilu nafwane nge mutu mwenyazuvo, éji kulovolanga vyavihya nevi vyamwaka kufuma kuluheto lwenyi.
Yesu navamukana kuNazaleta
(Mako 6:1-6; Luka 4:16-30)
53Kaha chasolokele, omu Yesu akumishile kuhanjika muvishimo evi, afumineko.
54Kaha omu ahetele kwimbo lyenyi, avanangwilenga musunangonga#13:54 Tala ha4:23. yavo. Ngocho valikomokelele nakulihwojola ngwavo, Kulihi nawane Ou Mutu mangana awa nevi vilinga vyangolo?
55Ou keshi Ikiye Mwana uze muka-kusongako? Naye keshi ikiye Maliyako? Vasongo jenyi vamalunga kaveshi vakiko vaYakova naYosefwe naShimona naYutako?
56Kaha kumana vasongo jenyi vamapwevo vosena katweshi navoko? Nyi vyosena evi naviwane kulihi?
57Kaha vamufutukilile. Oloze Yesu avambile ngwenyi, Kapolofweto vamulemesa kweka kaha, keshi mwimbo lyenyi nakuzuvo yenyiko#13:57 MuchiHelase ngwavo, Kapolofweto kazeneka kavumbiko, shina mwimbo lyenyi nakumahyenyi kaha..
58Kaha kuze kalingilileko vilinga vyangolo vyavivuluko, hakuzeneka chavo kufwelela.
လက္ရွိေရြးခ်ယ္ထားမွု
Mateu 13: LUE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Society of Zambia