Maatiyoos 13
13
Rɔmɛ Iɗit Sinɔ Soowuɗiŋɔŋk
(Mar. 4:1-9; Luk. 8:4-8)
1Ɓeny sinaanɛɓak ŋaarkiɓa Yeese godeey, nɛ kɛɛ dokuɗe goroo sinaanɛ obiiŋɔŋk jɔk. 2Agut sinɔɓa kurakiɗ joop a ɓɔɔkaaŋɔŋk, nɛ tookɛr sɛɛnŋɔŋk nɛɓa Yeese teeŋɛ emɗa raŋana nɛ dokuɗe. Ɛtɛrɓa joop sigɛ ɓɔɔkaak baŋɛ goroo sinaanɛ obiiŋɔŋk jɔk. 3Tonuɓa sɛɛga ola sigɔ ɓɔɔkaaŋɔŋk rɔmɛɛɗ kɛ, "Ŋaarkiɓa ijaagen om kɛnɔ soowɛ wɛykon. 4Saaɓa soowuɗiɗik, nɛɓa wɛykɔk a omoŋ omoŋ ɗiirtar gopana kɛntɛya, nɛ mɛlɛrki teetɔ nɛ koŋar nɛ ɗamar wɛykɔ gɛɛŋk. 5Ma wɛykɔk a omoŋ omoŋ ɗiirtar soona lak ɗoo a tɛmŋɔŋk ɓɛɛlɛ a giɗeek, nɛ agut sinɔ tɛmkuɗ ɗoo nɛɛkɛŋɔŋk ɗiigararkiɓa a gorgorŋ. 6Yakana saaɓa toolɛɛɗ waawuyk nɛ waaŋɛrŋ, agut sinɔ kiiɗɛ tiltilɛɛk nɛɓa paalorarŋ. 7Ma wɛykɔk a omoŋ omoŋ ɗiirtarɓa ɓɛynika kɔɔra nɛ ɓɛyni gɛɛnɛ gaamitar sɛɛg ɗooka nɛ dakɛɛtarŋ. 8Ma wɛykɔk ɔgɔɔk ɗiirtar ɗooka sinɔɔna mentanŋɔŋk, nɛ gaɓɛr taamɛ a ɓɔɔkaaŋ, gaɓɛ omaay taamɛ a ɗibɛ ma omaay pɔlpɔlɛ joop jiitik ma omaay ruumer iɗit a aarin. 9Iɗit sinɔ lak weena sinɔ tiiɗiŋɔŋk, in tiyɛɗ."
Ɔɔtɛ Sinɛ Tonɗiiɗ Yeese Rɔmɛɛɗakɛk
(Mar. 4:10-12; Luk. 8:9-10)
10Saadi baŋiya wideetarɓa ɛɛk nomtaanak gɛɛnɛ son lak Sɛɛnik, nɛ kɔɔniyar kɛ, "Tonɗiikin joopa sigaaga ɓɔɔkaak rɔmɛɛɗ agut jikon?"
11Nɛɓa Yeese jumur sɛɛga kɛ, "Gaɓɛɛɓa iinaka ɗegerɔn any sinɔ dugaaŋɔŋk burɛ dariyoŋkuŋ. Mayakanaɓa sɛŋk sɛɛga kɛɛ gaamit. 12Iɗit sinɛ lakik siipigiɗɛkoyŋ obiigeeɗkoyŋ. Ma iɗit sinɛ kiiɗɛk boŋkuɗɛɛkoy aasi sinɛ lakikiŋ. 13Tonɗiika sɛɛga oko sinik rɔmɛɛɗ agut sinɔ 'Dɛnɛɛrŋ, nɛ kiir mermenɛɛ, tiyɛɛriŋ, nɛ kiir koɓiiɗ.' 14Dusanɛɛ sɛɛge pɛrka Isaayasik sigɛɓa tonɛɛ kɛ,
'Tiyan tiiɗikariŋ, nɛ kiir koɓiiɗ.
Dɛnɛ dɛnɗiikariŋ, nɛ kiir mermenɛ.
15Joop sigi ɓɔɔkaak kilararɓa ɓayɛtun gɛŋkiŋ,
kir tiiɗit ween gɛŋk, motararɓa tamun gɛŋkiŋ kɛnɔ kat dɛnɗi.
Ɔkɔnɓa ki ɓɛɛlan oko sinikiŋ, gunɓa dɛnɛr tamunɛ gɛŋk,
ɛ tiyɛr wenanɛ gɛŋk ɛ koɓur ɓayɛtunɛɛkɛ gɛŋk,
gunɓa weeriik son lak eetik, nɛ gunɓa ebɔda sɛɛgiŋ.'
16Yakana agut sinɔ sɔɔk dɛnɗiiɗ tamun goŋkŋɔŋk ɛ tiiɗiɗ ween goŋkŋɔŋk iinak geetitaanak. 17Eekeer tona kɔnaaŋ, ɗɛyɛrkɛɓa joop pɛrkaakoŋk a joop sigɔ mentaanaŋɔŋk a ɓɔɔkaaŋ a gun dɛnɛr any sinɛ dɛnɛɛrik nɛɓa kir taanta, ɗɛyɛrkɛɓa a gun tiyɛr any sinɛ tiyɛɛrik nɛɓa kir weenta.
Wooru Yeese Rɔmɛ Iɗit Sinɔ Soowuɗiŋɔŋk
(Mar. 4:13-20; Luk. 8:11-15)
18"Sisɔ in tiyɛ wooran rɔmɛ iɗit sinɔ soowuɗiŋɔŋk. 19Wɛykon sinɛkan ɗiiriri gopana kɛntɛyak gayi a iɗit sinɔ tiyɛ pɛɛni burɛ Waakoyotoŋk nɛ ki koɓiɗik. Nɛ sisa mɛlki setan nɛ boŋiiɗ pɛɛni sinɛɓa soowɛɛ sɛɛne ɓayaayk. 20Ma sinɛkan soowɛɛ ɗook sinɔɔnɛ ɓɛɛlɛ a giɗeek gayi a iɗit sinɔ tiyɛ pɛɛni nɛɛk sisa nɛ boŋu yaakatik, 21yakana kiiɗ beeɗit agut sinɔ kiiɗɛ tiltilɛɛk, nɛ Saa mɛlkiɗ rakatɛɛ maŋk epapayk agut pɛɛni nɛɛkik nɛ ŋɔr ŋaadiyɛ. 22Wɛykon sinɛkan soowɛɛ ɓɛynikɛ kɔɔruk gayi a iɗit sinɔ tiyɛ pɛɛni nɛɛk ɔɔtɛya sinɔɔna balaaŋɔŋkuk. Mayakana koɓiiɗ ɗoo sinik a pori woriyoŋk, nɛ ɓakɛyɗi nɛ guuguny ɓayaaya nɛɛkak, nɛ gaamiir pɛɛni nɛɛk ɗooka nɛ dakɛ a ki gaamit taamɛ. 23Ma wɛykon sinɛkan soowɛɛ ɗook sinɔɔnɛ mentanŋɔŋkuk gayi a iɗit sinɔ tiyɛ pɛɛni nɛɛk nɛ gaamuŋɔŋk. Nɛ iɗit sinɛ gaɓɛ taamɛ, gaɓɛ omaay taamɛ a ɗibɛ ma omaay pɔlpɔlɛ joop jiitik ma omaay ruumer iɗit a aarin."
Rɔɔriyaaɗ Yeese Rɔmɛ Ŋɔnyun Sinɔ Ŋɛɛwɛnŋɔŋkuk
24Tonuɓa sɛɛga Yeese rɔmɛ om kɛ, "Burɛ dariyoŋk gayi a iɗit sinɔɓa soowɛ wɛykon sinɔ mentanŋɔŋk taawoy nɛɛkɛkik. 25Yakana saaɓa ɗeegararɗi joop baŋɛk, mɛlki gumaaken nɛ soowɛ wɛykon ŋɔnyun sinɔ ŋɛɛwɛnŋɔŋk ɗamat nɛɛkɛ kɔɔr nɛ ŋaariŋ. 26Nɛ saaɓa ɗiigarkiɗ ɗama nɛɛkɛkik nɔ gaɓɛ taamɛk, nɛ sisa dɛnɛɛ ŋɔnyun sinɛ ŋɛɛwɛnŋɔŋk.
27"Wideetarɓa ɛɛk ijaager sigɛ ɗumaat taawak son lak sɛɛnik nɛ kɔɔniyar kɛ 'Suumi naŋk, moko kanto soowun wɛykon sinɔ mentanŋɔŋk taawoy nookɛk? Nɛ kus ŋɔnyun sini ŋɛɛwɛnŋɔŋk eet?'
28"Nɛɓa sɛŋk tonu sɛɛga kɛ, 'Ariɗikɔ any sini gumaaken.'
"Nɛɓa ijaageer gɛɛnɛ kɔɔniyar kɛ, 'Ɗɛyin a kɛɛɗii montii ŋɔnyun sini ŋɛɛwɛnŋɔŋkuŋ?'
29Nɛɓa sɛŋk tonu sɛɛga kɛ 'In ɓɛɛlɛɛɗ agut sinɔ ɔkɔn kɔɔ montɛɛr ŋɔnyun sini ŋɛɛwɛnŋɔŋkuŋ, nɛkɔɔ montɛɛr a ɗama nɛɛk agut omoŋ. 30In ɓɔlɔɔrɛr agut omoŋ nɔ mɛlɛɛɗa ɔɔtɛya ɗootanoŋk. Saakoyk tonaakoy joopa sigaaga ɗootiɗiik kɛ in tɛɛnan jeemɛ montɛɛ ŋɔnyun sini ŋɛɛwɛnŋɔŋk nɔ tɛlɛlɛyɛ nɔkɔɔ moɗɛɛ maɗ. Ma ɗama nɛɛk in tolɛɛ nɔ gaɓɛ palɛya naakaak."
Rɔɔriyaaɗ Yeese Rɔmɛ Wɛykon Saanoyk
(Mar. 4:13-20; Luk. 8:11-15)
31Tonuɓa sɛɛga Yeese rɔmɛ om kɛ, "Burɛ dariyoŋk gayi a iɗit sinɔ boŋu wɛykon taamɛ saanoyk nɛ soowɛ taawoy nɛɛkɛkik. 32Wɛykon sinɛ kɛygun tɛm wɛykɔkɛ baŋɛŋ, ma saakoy ɓɔlɔɔrɛɗik kaalɛkoy ŋɔnyi baŋɛ a gayɛ a kɛɛt. Nɛ mɛlɛrki teetɔɔk dariyoŋk, nɛ kɛnyarɗi wɛykɔk rɛkɛnakɛ gɛɛnɛk."
Rɔɔriyaaɗ Yeese Rɔmɛ Irsokoŋk
(Luk. 13:20-21)
33Tonuɓa sɛɛga rɔmɛ om kɛkar kɛ, "Burɛ dariyoŋk gayi a irso sinɔ boŋu jarti omaay, nɛ malaayɛɛɗ otii sinɔ ooko jiitik nɛ ari malɛytan nɛɛk a gupuuye baŋɛk."
Rɔɔriya Yeese Rɔmɛɛɗakɛ Agut Jikon?
34Tonuɓa Yeese sini baŋɛ rɔmɛɛɗ joopa sigaaga ɓɔɔkaak, kɛɛ any sinɔɓa tonu sɛɛga a kiiɗɛ rɔmɛk. 35Dusanɛɛ sineene sinɛɓa tonɛɛ ete pɛrkaakakoŋk kɛ,
"Ɓuukaakoy ato naak rɔmɛɛɗ.
Waasaakoy any sinɔɓa dugiɗi a tukiɗi saaɓa riiɓeeɗɛ ɗook."
Wooru Yeese Rɔmɛ Ŋɔnyun Sinɔ Ŋɛɛwɛnŋɔŋk
36Ŋɔrɓa Yeese joop sigɛ ɓɔɔkaak saadi nɛ guuguny godeya. Nɛ wideetar ɛɛk nomtaanak gɛɛnɛ son lak sɛɛnik nɛ tonurgeeɗ kɛ, "Tonute tina wooran rɔmɛ ŋɔnyun sinɔ ŋɛɛwɛnŋɔŋk sinɛ ar taawoy takik sinɛkɔ tonunk."
37Nɛɓa sɛŋk jumur kɛ, "Sinɛkan soowɛ wɛykon sinɔ mentanŋɔŋkuk Tɔɔn Etoŋk. 38Ma taawa nɛɛk ɗoo sini, ma wɛykon sinɛ mentanŋɔŋk joop sigɔ ege burɛ Waakoyotoŋk nɛŋkik. Ma ŋɔnyun sinɛ ŋɛɛwɛnŋɔŋk joop sigɔ ege burɛ setanik nɛŋkik. 39Ma sinɛɓa soowuɗi nɔ ŋaark gumaaken setan. Ma toota nɛɛk pedi ɗookoŋk, ma joop sigɛ ɗootiɗiik wosɛytaanak Waakoyotoŋk.
40"Oko sinɛkoy montɛɛɗɛ ŋɔnyun sini ŋɛɛwɛnŋɔŋk nɔ moɗɛɛɗɛ maɗik, ɓɛɛlɛkoy ɓɔrɛ pedi ɗookoŋk oko sinik. 41Wosɛykikoy Tɔn Etoŋk wosɛytaanak gɛɛŋk, nɛkoy sɛɛk boŋiitar joop sigɛ arir joop ɔgɔ a tikiɗiiŋɔŋk a joop sigɔ ijaagir ola sigɔ ŋɛɛwɛɛŋɔŋk baŋɛ burɛɛ nɛɛkɛ walasa. 42Nɛkoy sɛɛg orur maɗa goopanoŋk. Nɛkoy saadi lakɛ duri a ɗama ŋedakoŋk. 43Ma joop sigɛ mentaana taamɛkɛ Waakoyotoŋkuk, ɗaawurkoy burɛɛ Ɛpɛn nɛŋkik a ito waawuy. Iɗit sinɔ lak weena sinɔ tiiɗiŋɔŋk, in tiyɛɗ.
Rɔɔriyaaɗ Yeese Rɔmɛ Giɗeek Sigɔ Eemɛyɛŋɔŋkuk
44"Burɛ dariyoŋk gayi a wori sinɔɓa dugɛ taawoy takik. Nɛsaa laŋkiɗ iɗit omaay nɛ duge kɛkar. Agut sinɔ yaageeɗŋɔŋk nɛ kɛɛ ɓalɗi ant sinaanɛ lakik baŋɛ, nɛ ɓali taawa sinɛ."
Rɔɔriyaaɗ Yeese Rɔmɛ Workeyoŋk
45"Maɓɔrɛ burɛ dariyoŋk gayi a iɗit sinɔ ɓaɓaliiɗ ɓolaatuuruwɛɛk, iɗit sinɔ ɗɛyɛ ɓaliiɗa worke sinɔ mentanŋɔŋkuk. 46Nɛsaa laŋiiɗ worke sinɛ obi gati nɛɛkɛŋɔŋk, nɛ kɛɛ ɓalɗi ant sinaanɛ lakik baŋɛ nɛ ɓali worke sinɛ.
Rɔɔriyaaɗ Yeese Rɔmɛ Any Kondiyeetoŋkuk
47"Burɛ dariyoŋk gayi a any kondiyeetoŋk sinɔkɔ oriirɛ gɔrɔwa sinɔɔna obiiŋɔŋk nɛ tolɛ komoyeer oltiiroŋk baŋɛk. 48Nɛ saa enyɛɛriɗik, nɛ joop sigɛ kondiyɗik puruuterki gɔrɔwa sinaana obiiŋɔŋk kɛntɛya. Nɛ dokurɗe saadi, nɛ koŋar sigɛ mentaanak nɛ gaɓɛr sɛɛg anta, ma sigɛ ŋɛɛwɛk orur sɛɛgiŋ. 49Pedi ɗookoŋk ɓɛɛlɛkoy oko sinik. Mɛlɛrkikoy wosɛytaanak Waakoyotoŋk, nɛ pakatirki tikitaanak joope sigaagɛ mentaana taamɛkɛ Waakoyotoŋkuk. 50Nɛkoy orur sɛɛg maɗa goopanoŋk, lakɛkoy saadi duri a ɗama ŋedakoŋk."
51Tonuɓa sɛɛga Yeese kɛ, "Mɛlɛkɔ kɔna sini baŋɛŋ?"
Nɛɓa tonurgeeɗ kɛ, "Ii."
52Nɛɓa sɛɛga tonu kɛ, "Kɛygun wooɗ rɔɔriytan higi Muuseek sinɔ ɗeger burɛ dariyoŋkuk gayi a ɗumat woriya sinɔ boŋku any sinɔ tɔɔnuk a sinɔ bɔɔlɔŋk nyon riiɓoŋkuk."
Laŋkiɓa Yeese Ɓooyan Naajireete
(Mar. 6:1-6; Luk. 4:16-30)
53Saaɓa Yeese ruumeeɗ toni rɔmɛɛɗak sigik, nɛɓa ŋaar saadiŋ. 54Nɛ mɛlɛ katamɛya nɛɛkaak, nɛ tuke rɔɔriyɔɔna joop sigɛ ɓɔɔkaak godeey nɛŋk tolɛɛɗoŋk Ayuuduk. Reemɗiɓa sɛɛk ɓayɛtun gɛŋk nɛ tonur kɛ, "Laŋkɔ iɗit sini ɗegerɔn ɛɛkoŋk sini a ɓaŋkawuka sini ijaagiɗ sɔɔriyɛ sigik eet? 55Moko sini tɔɔn ijaagenkɔ kɛɛnoŋk? A mokoto ɛmɛs Maariyam? ma moko manyaakak Yaykoob a Yoosep a Simion a Yuudaa? 56Ma manyaakak sigɛ peetakik baŋɛ moko sɛɛg a eteŋk? Anɛ iɗit sini laŋki any sini eet?"
57Nɛɓa jɔɔlɛyɛ sɛɛg nɛ dakɛr a kir boŋiɗ.
Nɛɓa Yeese tonu sɛɛga kɛ, "Kɛɛ eemɛyɔɔn iɗit pɛrkaakoŋk ɗook nɛɛkɛ a nyaki nɛɛkɛk, ma eemɛyɛ nyon omalte."
58Kiɓa ijaagɛ sɔɔriyɛ saadi a ɓɔɔkaaŋ agut sinɔɓa kirɗi ŋaaditik.
လက္ရွိေရြးခ်ယ္ထားမွု
Maatiyoos 13: KSTM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ