Maatiyoos 19
19
Rɔɔriyaaɗ Yeese Ɔɔtɛ Waawanoŋk
(Mar. 10:1-12)
1Saaɓa Yeese toniiɗ any sini nɔɓa ruumek baŋiya, nɛɓa ŋaar Gɛlilaake nɛ kɛɛ ɗooka Yuudaak, sinaana ar ɗeesɔ gɔrɔ Yordanoosuk. 2Nɛɓa nomɛrɗi joop a ɓɔɔkaaŋ, nɛɓa ebɔdɛ sɛɛgiŋ saadi.
3Widerkiɓa ɛɛk joop Paarisik kɛnɔ paarir, nɛɓa kɔɔniyar kɛ, "Pɛgɛdɛ higii nɔ iɗit omaay pakakati a jarti nɛɛk agut kɛygun any sinɛ ɓɛɛlɛkiŋ?"
4Nɛɓa Yeese jumur sɛɛga kɛ, "Kiirɓa ambabɛɛt kɛ, 'Riiɓeɓa Waakoyot tuki nɛɛkɛ mooy a peet?' 5Kiirɓa ambabɛɛt sinɛɓa tonɛɛ kɛ, 'Agut sini ŋɔrkoy iɗit ɛpɛn a ɛmɛs, nɛ lotɛr ɛɛk a jarti nɛɛk, sɛɛg ɛɛk omoŋ a getu pɛɛy.' 6Sɛɛgkoy ɛɛk omoŋ seedi son, ma mokokoy pɛɛy. Agut sini kat pakati iɗit any sinɔɓa lotɛ Waakoyotuk."
7Nɛɓa sɛɛk tonurgeeɗ kɛ, "Anɛɓa tonu Muuse kɛ in gaɓɛ wargatɛ pakakatoŋk iɗit omaay nɔ pakakati a jarti nɛɛk agut jikon?"
8Nɛɓa Yeese tonu sɛɛga kɛ, "Dɛnɛɓa Muuse ɓaŋkawuka ɓayɛtun goŋkuk. Nɛɓa kɔna pɛgɛdɛ kɛnɔ pakakatiikar a jartiyatɔk goŋk, ma mokoɓa ɓɛɛlɛ tuki nɛɛkɛk oko sinik. 9Yakana tona kɔnaaŋ, iɗit sinɔ pakakati a jarti nɛɛk makɔ kir ɗeegarɔn a mooy omk, nɔ boŋu jarti omk ibiɗiiŋ, ma ɓɔrɛ iɗit sinɛ boŋu jarti sinɛkɔ pakakatiikɛkik ibiɗiiŋ."
10Nɛɓa nomtaanak gɛɛnɛ tonur kɛ, "Ɔkɔn ɓɛɛlɛ ɔɔtɛ baabuy a jarti nɛɛkik oko sinikiŋ, nɛ dɔɔs a kɛ boŋɗiit."
11Yakanaɓa Yeese tonu sɛɛga kɛ, "Kɛɛ iɗit sinɔ oolɛ a boŋu rɔɔriyɔn sinik joope sigaagɛɓa gaɓɛɛ sɛɛgak sɔgɔɔsɔyk. 12Ɓartɛɛ joop ɔgɔ a kir oolɛ a boŋɗiiŋ, ma joop ɔgɔ ari sɛɛg iɗit a kir oolɛ a boŋɗiiŋ. Lakɛ joop sigɔ kir boŋɗiitik kɛnɔ oolɛr a ijaagɗi burɛya dariyoŋk. Iɗit sinɔ oolɛ a boŋu pɛɛni sinik in boŋuɗ.
Geeti Yeese Tɔɔmɔk
(Mar. 10:13-16; Luk. 12:15-17)
13Nɛɓa ɗɔkarki joop tɔɔmɔk son lak Yeeseek kɛnɔ riiɓe sɛɛge ari raŋk. Nɛɓa koykoyɛr nomtaanak gɛɛnɛ joop sigɛ ɗɔkarki tɔɔmɔk gɛɛŋkiŋ.
14Yakanaɓa tonu sɛɛga Yeese kɛ, "In kurak tɔɔmɔk son lak eetik. Kat ɓaarɗɛ sɛɛg, agut sinɔ ege burɛ dariyoŋk joop sigɔ rikiter ɛɛk oko sinikik." 15Nɛɓa riiɓe sɛɛge ari nɛɛk raŋk, nɛ geeti sɛɛg, nɛ ŋaar saadiŋ.
Iɗit Sinɔ Lak Worik
(Mar. 10:17-31; Luk. 18:18-30)
16Saadi wideerɓa ɛɛk iɗit omaay son lak Yeeseek, nɛ kɔɔniy kɛ, "Rɔɔriytano, dɔɔs a ijaaga any sinɔ mentanŋɔŋk kɛ jikon nɔkoy laŋiiɗa wɛɛŋa sigɛkoy nɔkoy nɔkoyk?"
17Nɛɓa Yeese tongeeɗ kɛ, "Kɔɔniyinte any sinɔ mentanŋɔŋk agut jikon? Mentan Waakoyo sinɛ omoŋɔŋk dakɛɗa. Ɔkɔn ɗɛyin guugunyɔn wɛɛŋaka sigaagakoy nɔkoy nɔkoykuŋ nɛ kooru sekiyɛ gɛɛŋk."
18Nɛɓa iɗit sinɛ kɔɔniy kɛ, "Sekiyɛ wook?" Nɛɓa Yeese tongeeɗ kɛ, "Kat ɓokotɗikin, kat ibiɗiikin, kat agalɗikin, kat waasin nyon, 19eemɛy ŋaaŋa a ɓaaɓa, poru iɗit sinɛ beeɗiir jɔkikentik oko sinɛ poriiɗin ɛɛk nookuk."
20Nɛɓa ateeny sinɛ tongeeɗ kɛ, "Kooraaɓa sekiyɛ sigi baŋɛ, anɛte in ŋayɗi omaay jikon?"
21Nɛɓa Yeese tongeeɗ kɛ, "Ɔkɔn ɗɛyin a iin daktan, mak nɔ kɛɛɗin ɓalɗiikin ant sinaanɛ lakink baŋɛ nɔ gaɓun wori nɛɛk sankaanaka, laŋinkoy gati nɛɛk dari. Nɛ saadi baŋiya, kusun nɔte nomkun."
22Yakana saaɓa iɗit sinɛ tiyɛɛɗ any sinik, nɛɓa ŋaar ma ŋadiŋ agut sinɔɓa lakiɗ wori a obiiŋɔŋk.
23Nɛɓa tonu Yeese nomtaanaka gɛɛna kɛ, "Eekeer tona kɔnaaŋ, morɛ ɓaŋkawu guugunyɔn burɛya dariyoŋk joopa sigɔɔga latu worikiŋ. 24Tona kɔnaaŋ kɛkar, bala sinɔ guugunyɗu tagak sinɔɔnɛ tool marpeyoŋkuk ɔɔtɛ sinɔɔnɛ gun guugunyɗu iɗit sinɔ lak worik burɛya Waakoyotoŋkuk."
25Saaɓa nomtaanak gɛɛnɛ tiyɛrɗi sinik, nɛɓa reemɗi ɓayɛtun gɛŋk jɛt, nɛ tonur kɛ, "Anɛkoy oolɛ a bɔdɛ wooɗ?"
26Nɛɓa Yeese mermen sɛɛg, nɛ tonu sɛɛga kɛ, "Ki gayɛ sini eta, mayakana Waakoyota gayɛ any baŋɛ."
27Nɛɓa Petros jumurgeeɗ kɛ, "Ŋɔrkiikɔ any baŋɛ, nɛ ne nomiiŋ. Anɛkoy laŋii jikon?"
28Nɛɓa Yeese tonu sɛɛga kɛ, "Eekeer tona kɔnaaŋ, saakoy dokiiɗiɗe Tɔn Etoŋk barsum nɛɛkɛ eemɛyɔɔnoŋk ɗook sinaanɛkoy mɛlkik tɔɔnuk, nɛkoy ɓɔrɔ dokiirɗe iinak sigɛte nomɛɛrik a iinak suumiyɛ barsumatɔkɛ eemɛyɔɔnoŋk sigɔɔgɛ aarin a pɛɛyk, nɛkoy pɛrɛdɛɛr komoyeerɛ Israeelik sigaagɛ aarin a pɛɛyk. 29Iɗit sinɛ ŋɔr nyak nɛɛk, a manyaakakik, a manyaakak sigɛ peetakik, a ɛpɛn, a ɛmɛs, a tɔɔmɔk gɛɛŋk maŋk taawa nɛɛk agut eetik baŋɛ laŋkoy a suɗaktaanak ɗibɛ, laŋkoy wɛɛŋa sigɛkoy nɔkoy nɔkoyk. 30Mayakana joop a ɓɔɔkaaŋ sigɛ ɔɗɔweerk baŋiyeerkoy, ma joop sigɛ baŋiyeerk a ɓɔɔkaaŋ ɔɗɔweer koy."
လက္ရွိေရြးခ်ယ္ထားမွု
Maatiyoos 19: KSTM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ