YOHANES 15
15
I Yesus pung u anggori ko kahingang
1I Yesus sau nangul᷊i, “Ia i'i pung u anggori ko kahingang, dang I Yamang-Ku mutatal᷊ung sasuange. 2Apang lelange ko su Punge ko ta muwua, potokang-E, dang apang lelange ko pia wuange, ghahingang raunge l᷊au tal᷊uaheng-E, tadeau wuange manamba lebe maul᷊i. 3I kumu seng mabursi ual᷊ingu tintiro ko seng nitintiro si kumu. 4Katanae pakasimbau dingang-Ku dang Ia l᷊ai mang matatana simbau dingang i kumu. Lelange sisane ta makapuwua, su l᷊ikuri sie matatapi su punge. Kere'e l᷊ai i kumu kitang botonge muwua, boko tatapi masimbau dingang-Ku.
5Ia i'i pung u anggori, dang i kumu kaul᷊ie lelange. Taumata ko tatapi masimbau dingang-Ku dang Ia dingange, sarung muwua maul᷊i; watu'u su l᷊ikuri Ia, i kumu ta makakoa manga apa. 6Taumata ko ta matatapi masimbau dingang-Ku, sarung irume musul᷊ung u lelang, bou e'e mahango. Manga lelang ko kere'e sarung ikomol᷊i ihunu su l᷊al᷊ung u putung, bou e'e itutung. 7Boko i kumu tatapi masimbau dingang-Ku dang tatintiro-Ku matana su l᷊al᷊ung u naung i kumu, pundote si Yamang apang ko ikao i kumu; ndou e'e sarung raringihang. 8Boko i kumu muwua maul᷊i, I Yamang-Ku ipakawantughi; dang dingang kere'e i kumu tinga-tingari makoa tumatuhu-Ku. 9Musul᷊ung kere I Yamang kumindaghi u Ia, kere'e l᷊ai Ia kumindaghi i kumu. Pakatatapi i kumu muwiahi kere taumata ko Daku ikukindaghi. 10Boko i kumu mupal᷊al᷊eng u apang parenta-Ku, i kumu tatapi satia su kakindaghi-Ku, musul᷊ung u Ia tatapi satia su kakindaghi I Yamang watu'u mupal᷊al᷊eng apang parenta-E.
11Kaul᷊ie i'i Daku ihabari si kumu, tadeau l᷊al᷊iaghi-Ku ene su l᷊al᷊ung u naung i kumu dang l᷊al᷊iaghi kumu masuku. 12#Yoh. 13:34, 15:17; 1Yoh. 3:23; 2Yoh. 5Ko i'i parenta-Ku: pukakindaghiko simbau dingang ko wal᷊inge, musul᷊ung kere Ia kumindaghi i kumu. 13Taumata ko makindaghi u manga ghawe'e e'e ko taumata munggile u puwawiahie si sire. 14I kumu manga ghawe-Ku, boko i kumu tumuhu apang ko Daku iparenta si kumu. 15Ia seng ta mukui l᷊ai si kumu l᷊ang, watu'u l᷊ang wugha ngu apang koateng u mawunge. Ia mukui si kumu ghawe, watu'u kaul᷊ie ko seng Daku nikaringihi bo I Yamang, seng mbuae Daku nihabari si kumu. 16Wal᷊inge i kumu namile si Sia, ko Ia namile si kumu, dang nundoi i kumu pal᷊al᷊eng tadeau puwua pakaul᷊i – apang wuange ko ta mawinasa. Kuteu I Yamang sarung mangonggo si kumu apang ko ipundokang i kumu si Sie su l᷊al᷊ung u areng-Ku. 17Ko i'i parenta-Ku si kumu: Pukakindaghiko singkatau dingang ko wal᷊inge.”
I kumu ipubunsi u dunia
18“Boko i kumu ipubunsi u dunia, tinaungete himoneu Ia seng kahorokange nipubinsi u dunia. 19Kiko i kumu koa u dunia, dunia sarung kumindaghi i kumu kere koae. Kateho Ia seng namile si kumu bou dunia i'i, inau i kumu l᷊ai seng wal᷊inge koa u dunia. E'e sabapie i kumu ipubunsi u dunia. 20#Mat. 10:24; Luk. 6:40; Yoh. 13:16Tinaungete apang ko seng mbuae Daku nihabari si kumu, ‘L᷊ang ta nangilebe l᷊abo bou mawunge.’ Boko i sire seng mbuae nutingkai si Sia; i sire l᷊ai sarung mutingkai si kumu. Boko i sire tumuhu tintiro-Ku, i sire l᷊ai sarung tumuhu su tintiro ngi kumu. 21Kaul᷊ie e'e sarung koateng i sire si kumu, watu'u i kumu ko tumatuhu-Ku, watu'u i sire wugha ngi Sie ko nundoi u Ia. 22Kiko Ia ta nusumongo dang ta nuhabari kaul᷊ie si sire, i sire ta nubardosa. Arawe i'i i sire mang takoae alasange l᷊ai guna ngu dosa ngi sire. 23Taumata ko mubinsi u Ia, i sie l᷊ai mubinsi I Yamang-Ku. 24Kiko su tal᷊oara i sire Ia ta nukoa mang hal᷊i ko mborong ta nikoa u taumata ko wal᷊inge, i sire ta nubardosa, arawe orasi i'i i sire seng nakawua apang hal᷊i ko Daku nikoa, dang i sire nubinsi u Ia dang l᷊ai I Yamang-Ku. 25#Mzm. 35:19, 69:5Kateho mang seng mambeng kere'e, tadeau maganapi apang ko mawawohe su l᷊al᷊ung u Buki u Torati sire, e'e ko: ‘I sire mubinsi u Ia takoae punguange.’
26Ia sarung mundoi si kumu Mutatul᷊ung ko asal᷊i bo I Yamang. I Sie e'e ko Roh ko sarung mupakal᷊ahe kabanarang u hal᷊i u Mawu Ruata. Boko I Sie musumongo, I Sie sarung mangonggo u kasaksiang hal᷊i u Ia. 27Dang i kumu l᷊ai mambeng mangonggo u kasaksiang u hal᷊i u Ia, watu'u i kumu seng tuwei mahundingang u Ia mborong bou titae.
လက္ရွိေရြးခ်ယ္ထားမွု
YOHANES 15: PLT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ