Lúkɩ 13
13
A cíe a nyumogbɩ̀ɛ̀ sá!
1Bhʋ́ a tányɩɛ́ nyʋa yi lé á srʋ Zozíi wɔlɩ́ɛ́ ɩ̀ ŋnɩ Galiléenyʋa a, ɩ́mɩ́ ŋwɔ́ɔ mà, Pilátɩ srʋ nyʋa lé á bhlá nyʋaá à mʋ Lagɔ bʋbɔ̀ kà a. 2Lé Zozíi srʋ á mà: «A dùòkʋ́ Galilée a nyʋaá Pilátɩ srʋ nyʋa lé á bhlá lɛ́ a, á nyumoé plɩ́ Galiléenyʋa ànàà fɩ́ɛ́ a nyumoé gɔ̀ a, ɩ́zà ɔ́ srʋ nyʋa lé á bhlá a? 3Náa srʋɛ amɔ mà à nɩ́ ɩ́mɩ́ ŋwɔ́ɔ, mà a nɩ nɩ́ aa nyumoé a gbʋ́ wlʋ́ a, ámá bhísakʋ́ a na ká kɛ́zɔ̀ kúu. 4Nyʋa a kʋ́gbá gbàátaá Silowée wlʋkádʋ̀ɔ̀ bhli wá jɩ̀ lé à kú a, a yì saá mà a nyumoé zù lé ɛ́ plɩ́ Zelízalɛ́mʋ a nyʋa fɩ́ɛ́ a nyumoé gɔ̀? 5À nɩ́ sáà ɩ́mɩ́ ŋwɔ́ɔ, sɩ́tɛ̀ mʋ́ ɩ́ cí mà, a nɩ nɩ́ aa nyumoé a gbʋ́ wlʋ́ a, cémʋ́ nyʋa kú lɛ́ a, sɩ́tɛ̀ mʋ́ a na ká kúu.»
Figíesuó ʋ̀ nɩ́ trʋ a, ʋ núnúó
6Zozíi pá núnúó lé ɔ́ srʋ á mà: «Nyɔ a múó glɩ figíesu ɔ́ glayʋlàgbaá, suó mʋ lé ʋ́ ŋnɩ trʋda. Tányɩ a múó ʋ́ kanyɔ yi ʋ wlú bhí sa ka mà ɔ nɩ́ ʋ wlú bhúó ŋnɩ. 7Ɩ́ nio lé ɔ́ srʋ lágbàà a mnɩ́ a nɔnʋzrɩ̀nyɔ̀ɔ̀ mà: Lɩkpɩ ta lɛ̀ lé ɩ́ yie figíesuó lɩ̀à wlú dʋdʋ̀ kà lé nɩ́ ŋnɩ ʋ wlú bhúó, díú kʋ́ mà ʋ ná srí flɛ́flɛ̀sa bhʋ́anɩ dʋ̀dʋ̀drèè jɩ̀! 8Bhʋ́ nɔnʋzrɩ̀nyɔ̀ɔ̀ srʋ ɔ́ mà: Kanyɔɔ̀, cíe sɔ́kʋ́ mʋ́ sá lʋkpaá lɩ̀à a múó a zà bhè kʋ́ʋ́ gɔ̀ a dʋ̀dʋ̀ɔ̀ wlúu lé kʋ́ʋ́ gɔ́zɩ gɔ̀ ŋwʋ́. 9Nɩ nɩ sɩ́tɛ̀ a, mɔ̀ yì mà lʋkpaá à yie a, ʋ́ yi trʋ, ʋ nɩ nɩ́ yɩ́ trʋ a, kʋ̀ʋ̀ yɩ́ kʋ́ dí.»
Nyɔbhleyruó kʋ́ Zozíi yalɩma bhlɛ́kaŋwnɔ
10Zúfʋnyʋa a nyɔbhleyru a múó kʋ́, Zozíi kʋ zúfʋcɛcɩwlʋ a mnɩ́ nyʋa a cɩ́ada, 11mà ŋwnɔ́ a múó kʋ̀ nyʋaá nyièdɩ a, lɩkpɩ kʋ́gbá lɩkpɩ gbàáta lɛ̀ lé nyumozùzu nie lé ɔ nɩ́ míi ɔ ká mʋ́ gbálɔ̀, ɔ́ɔ glelo mʋ́. 12Tányɩɛ́ mʋ́ Zozíi yɛ́ ɔ́ a, ɔ́ srʋ ɔ́, mà: «Ŋwnɔ́ɔ̀, nà gúó ya zɩmnɛ́ bhɩa.» 13Ɔ́ gbɛlɔɔ́ glɔ̀gbɩ́ jɩ̀ a, ŋwnɔ́ɔ́ kʋ dáamúó lé ɔ́ yalɩma lé ɔ́ bháa ʋ́ Lagɔ a ŋwnú fafʋ́ kʋ́.
14Mà zúfʋcɛcɩwlʋɔ́ á kámanyɔɔ́, cémʋ́ Zúfʋnyʋa a nyɔbhleyru kʋ́ Zozíi yalɩma ŋwnɔ́ a, wɔlɩ́ɛ́ nɩ́ ɔ duo kʋ́ náa, ɩ́ ka ŋnɩ́ lé ɔ́ srʋ jrè gɔ̀ a nyʋa mà: «Yri gbɩ́flɔ́ a tányɩ mʋ́ nyɔ ka lé ɔ ká nɔnʋ zrɩ, ɔ̀ nɩ yrá lé ɔ̀ kà yalɩma a, ɩ́mɩ́ mnɩ́ ɔ nɩ yii, a ná yi Zúfʋnyʋa a nyɔbhleyru kʋ́!»#13.14 A zɛlɩɩ sáà Námɛɛ́ 20.9‑10; Detro 5.13‑14. 15Bhʋ́ Kláyɩ́sɩ sané, ɔ́ anɩ́: «Yrʋnyʋa yɩ, Zúfʋnyʋa a nyɔbhleyru kʋ́ amɔ mɔ̀glʋ̀ a nɩ́ vlulo á dòdòbhlìi yà a jákásɩ sɔ́ lé a nɩ́ sɩɩ́ liìda a, lé a nɩ́ fɩɩ́ nyíé gɔ̀ mná ka a? 16Bhè ŋwnɔ́ɔ̀ ŋwɔ́ɔ à tɩtɔ Ablaámʋ a yʋ́ lé Dɩ́blʋ ŋwʋ́ jɩ̀ lé lɩkpɩ kʋ́gbá lɩkpɩ gbàáta lɛ̀ zɩmnɛ́ a, ɛ̀kɛzà Zúfʋnyʋa a nyɔbhleyru lɛ̀ a, zà a ná sɔɔ́ jɩ̀ɩ?»
17Zozíi cí sɩ́tɛ̀ a, nyʋaá fɩ́ɛ́ à nɩ́ la mɔ́ bɩ́ kʋ́ a, zʋ̀ʋ yi laa kʋ́, náma wɔlɩ́ɛ́ Zozíi nɩ a, ɩ́ ka la jrèè a mnɩ́ a nyʋa a lɔ̀fɩ́ɛ́ lɔlɔ kʋ́.
Siyue ŋwɔ́ɔ mutádɩ a, ɛ núnúó
(Matíe 13.31‑32; Málɩ́kɩ 4.30‑32)
18Zozíi cí sɔ́kʋ́ mà: «Lɛ́gbá wlʋ́ʋ lɛ́ Lagɔ a Léyibhlɩɛ́ lɩ̀à a? Lɛ́gbá ɩ́ yie lɛ́ kɛtɛkʋ́ pápa áa? 19Mà nɩ̀ yɛ́ɛ a, nànɩ siyue tòyilɛ̀ á wlele mutádɩ̀yie a, lé nyɔ glɩ ɔ zalɩdɛ́ɛ a mnɩ́ a, lé ɛ̀ wlʋ́ lé ɛ́ nyniì, lé ɛ plɩ́ su kádʋ lé nimni páa ʋ lábhɩɛ́ a mnɩ́ níní a.»
Flɔ́ɔ a bháabháagɔ̀zɩ̀ɛ̀ a núnúó
(Matíe 13.33)
20Zozíi anɩ́: «Lɛ́gbá Lagɔ a Léyibhlɩɛ́ wlʋ́ lɛ́ kɛtɛkʋ́ bhè ɩ́ yie lɛ́ pápa áa? 21Lagɔ a Léyibhlɩɛ́ wlʋ́ mànɩ́ flɔ́ɔ a bháabháagɔ̀zɩ ŋwnɔ́ bhá lé ɔ́ ŋwʋ́ flɔ́ɔ pʋ́ bhɛ̀gɩdrè a mnɩ́ lé ɛ̀ bhá a.»
Izrayɛ́lɩ yi lɛ́ Lagɔ a Léyibhlɩɛ́ a mnɩ́ plaa?
(Matíe 7.13‑14; 21.23)
22Zozíi bhlie díé yà bìdíé sɔ́ kʋ̀ nyúzɔ kʋ́ a, ɔ́ plɩ́ɛ́ ɔ́ mnɛ Zelízalɛ́mʋ bhè ɔ́ cɩ́alɛ nyʋa. 23Lé nyɔ a múó yrɔ́ɔ́ mà: «Kanyɔɔ̀, nyʋaá nà kà ʋ́ neé wlʋ́ a, a nɩ́ ka zumòò?» Bhʋ́ Zozíi srʋ ɔ́ mà: 24«A ŋwʋ́ fɩ́ a ká srínitòyilɛ̀ɛ̀ a mnɩ́ bléè, mà náa srʋɛ amɔ mà, kɔ́kɔ́mnɩ́ yrá yɩ́ lɛ a mnɩ́ a bléleé bhè a nɩ́ ka yɩ́ lɛ míi.
25Tányɩɛ́ mʋ́ gbó a kanyɔ nɩ bhle yɩ́ lɛ ɔ gbó a, jrùkʋ́ a na ká lɛ kʋʋ lé a ká lɛ kplu bhɩtɩ a ká cí mà: Kanyɔɔ̀, ɩ́ bhìè ka àmɔ̀ gbó klʋ́ àyé, bhʋ́ ɔ́ na ká yɩ́ lɛ amɔ srʋ mà: Nɩ́ amɔ yì! 26A yi yɩ́ lɛ cí mà: À yà mɔ̀ sɔ́ lile wá kʋ́, lé à mnálɛ wá kʋ́, lé ɩ̀ cɩ́alɛ wá à bhlé a dú a trí a mnɩ́ nyʋa Lagɔ wɔlɩ́. 27Ɔ́ yi sɔ́kʋ́ amɔ srʋ mà: Nɩ́ kɛ̀ nyʋa a ŋwɔ́ɔ a, yì, a wlʋ́ mɔ́ yɩ́ kʋ́, amɔɔ́ nie nyumogbɩ̀ɛ̀ a!
28Tányɩɛ́ mʋ́ a na ká yɩ́ lɛ Ablaámʋ, Izákɩ, Zakɔ́bʋ, lé Lagɔ a nékʋ́cinyʋaá fɩ́ɛ́ Lagɔ a Léyibhlɩɛ́ a mnɩ́ yɛ́ a, bhè amɔ a ká yɩ́ lɛ jrùkʋ́ tuo a, bhʋ́ a na ká yɩ́ lɛ ŋwí lé a ká yɩ́ lɛ glàa li. 29Nyʋa yi bhlɩ́ɛ́ fɩ́ɛ́ jɩ̀ wlʋ́ á yi yi, dɛ́ yrʋ́ la lɛ, dɛ́ ʋ́ bhli lé, nyʋa àna yi jie a blɛ kʋ́ wlʋ́, àna yi jie a zɔ̀ wlʋ́ á yi yi, lé á lɔ̀fɩ́ɛ́ yi ɔ̀ Lagɔ a Léyibhlɩɛ́ a mnɩ́ lida wlú ŋnɩlɔ. 30Bhʋ́ a tányɩɛ́, nyʋa à nà kà bɩ́ bhɩa, á nyièdɩ a bhlɔ̀bhlɔ̀ ana yi drɩ̀ plɩ́ɩ̀ lé ànàà kʋ̀ la drɩ̀ a, á yi bɩ́ plɩ́ɩ̀.»
Zozíi bhɔtɔ Zelízalɛ́mʋ a nyʋa a zà
(Matíe 23.37‑39)
31Zozíi kʋ cíida, lé Falizɩ́ɛnyʋa a zùò ŋnɩ ɔ́ gɔ̀, lé á srʋ ɔ́, mà: «Wlʋ́ bhlɩ́ɛ́ lɩ̀à jɩ̀ kà mʋ, mà lóo Elódʋ mʋ́mɔ mɔ̀ ɔ ká mɔ̀ bhlá!» 32Bhʋ́ Zozíi srʋ á mà: «A mʋ a srʋ Elódʋ wlʋ́ mànɩ́ gboglìzàla a mà: Ɩ́ jɩ́lɛ nyumozìzi, ɩ́ yalɩmalɛ gupuonyʋa zɩmnɛ́ lé kɛ́ɛ̀lɛ, ta yruó kʋ́ ɩ́ yi zɔ̀ bhɩa. 33Sɩ́tɛ̀ ɩ́ kʋ lé ɩ́ ka lé ká ná nyúzɔ̀ɔ̀ bhli zɩmnɛ́, kɛ́ɛ̀lɛ lé kɛ́àlɩ́, mà nyɔ nɩ ŋwɔ́ɔ Lagɔ a nékʋ́cinyɔ a, ɔ nɩ́ ka lé ɔ ká bhlɩ́ ànɛ jɩ̀ kúu à nɩ̀ nɩ́ Zelízalɛ́mʋ ŋwɔ́ɔ a.
34Wé! Zelízalɛ́mʋ, Zelízalɛ́mʋ! Mɔ̀ bhlá Lagɔ a nékʋ́cinyʋa, lé ɔ̀ pá nyʋaá Lagɔ la mɔ̀ a cɔ́kpalɩ lé ɔ̀ bhlá á a a, bhè ná duo yrá la nà yúó a kʋgʋ̀gwlàlɛ̀ɛ ɩ̀ nyoku gɔ̀ cémʋ́ kɔkɔga gʋ́gwlalɛ a yúó kʋ́ lé á gbí á jɩ̀ a, mà a nɩ́ɩ kʋ́ ŋwnʋ́. 35Naa, náa srʋɛ amɔ mà a gbóó yi wɔlɔ, a nɩ́ ka yɩ́ sáà mɔ́ yɛ́, tányɩ nà kà kɛ́ ʋ́ kʋ lé a ká kɛ́ cí mà: Mɔ̀ɔ yi Kanyɔ a ŋnɩ́ɛ́ mʋ́ a, Lagɔ a nyúpajɔ̀lʋ̀ɔ̀ ŋnɩ mɔ̀ kʋ́!»
လက္ရွိေရြးခ်ယ္ထားမွု
Lúkɩ 13: NEY
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active), Wycliffe Bible Translators, Inc. All rights reserved.