Málɩ́kɩ 8
8
Zozíi nyɛ́ sɔ́kʋ́ nyʋa kɔ́kɔ́mnɩ́ lelilɩ
(Matíe 15.32‑39)
1Bhʋ́ a yrié a mnɩ́ nyʋaá kɔ́kɔ́mnɩ́ ŋnɩlɔ̀ sɔ́kʋ́ Zozíi gɔ̀ wlú, a nɩ́ lelilɛ ka. Ɔ́ wle ɔ́ kʋjɩ̀nyʋ̀àà lé ɔ́ srʋ á, 2ɔ́ anɩ́: «Nyʋaá a wɔlɩ́ɛ́ ka ŋazɩ kʋ́. Ɩ́ nie yɩ́ yrií a ta lé á kʋ mɔ́ɔ gɔ̀ lé anɩ́ li lɛ́ a, 3bhè á nyièdɩ kɔ́kɔ́mnɩ́ wlʋ́ɛ́ datrʋmada. Ànàà kleé bhlá a, nɩ srʋ á mà a mʋ dɛ́ɛ́ á wlʋ́ɛ́ a, á yi nyúzɔ kʋ́ kalɩmɛ yɛ́ɛ.» 4Ɔ́ kʋjɩ̀nyʋ̀àà anɩ́: «Dɛ́ɛ́ à kʋ lɛ́ a, miemie da à kʋ̀, dɛ́gbá nyɔ yi lɛ́ lelilɩ bhá lé ɔ́ yi a nyɛ́ a?» 5Lé ɔ́ yrá á, ɔ́ anɩ́: «Flɔ́ɔbhi zùò a ka lɛ́ a?» Á anɩ́: «À kà flɔ́ɔbhi a gbàásɔ́.»
6Lé ɔ́ srʋ nyʋaá mà a bɔ́ɔ sá. Lé ɔ́ bhá flɔ́ɔ kʋ́ lé ɔ́ pʋ́ɔ́ nyú, lé ɔ́ dédìù mʋ́ lé ɔ́ nyɛ́ ɔ́ kʋjɩ̀nyʋ̀àà mà a bhábha nyʋaá fɩ́ɛ́. 7Á ka la sɔ́kʋ́ zrìyuolɩ a zùò. Lé ɔ́ bháʋ́ mɩ́ lé ɔ́ pɩ́ɩ́ nyú, lé ɔ́ srʋ ɔ́ kʋjɩ̀nyʋ̀àà mà a bhábha nyʋaá. 8Nyʋaá fɩ́ɛ́ li lé á lʋ, lé lelilɩ ji kʋ́. Ɩ̀ ji kʋ́ lé á faa, ɩ́ nie pápɩ́ a gbàásɔ́. 9Á bhɩa lilíé zɔ̀ a, Zozíi srʋ á mà a mʋ yɩ́ a dɛ́ɛ́ á wlʋ́ lé á yi a. Á bhli yuosa nyʋaá dí sɔ́.
Falizɩ́ɛnyʋa yrá lé Zozíi wláa lɛ̀
(Matíe 16.1‑4)
10Zozíi yà ɔ́ kʋjɩ̀nyʋ̀àà sɔ́ pla gɔ́lʋ́ lé á mʋ lókpó á wlele Damanutáa a mnɩ́. 11Mà Falizɩ́ɛnyʋaá ŋnɩ mɔ̀ má a á fa Zozíi kʋbhlalɛ gɔ̀. Mà á kɔ́ zɔ̀ sa, á srʋ ɔ́ mà ɔ́ wláa lɛ̀ ɛ̀ wlʋ́ɛ́ lagɔɔ́ a. 12Á cí saá a, Zozíi a zuzu a mnɩ́, ɔ́ yɩbhlɩ kakamnɩ́lɛ́ saá, lé ɔ́ srʋ á mà: «Ɛ̀kʋ̀ʋ̀ lé amɔ zɩmnɛ́ a nyʋa a yrá lé a ká fɩ́ɛ́ lɛ̀ yɛ́ à? Náa srʋɛ amɔ cɩ́cása a mnɩ́ mà a nɩ́ ka lɛ̀ a múó coco yɛ́!» 13Ɔ́ cí sɩ́tɛ̀ a, ɔ́ɔ wlʋ́ á gɔ̀, lé ɔ́ pla sɔ́kʋ́ gɔ́lʋ́ lé ɔ́ mʋ nyíé a bɩ́.
A mányɩ Falizɩ́ɛnyʋa yà Elódʋ sɔ́ kʋ́
(Matíe 16.5‑12)
14Zozíi a kʋjɩ̀nyʋ̀àà drʋ lé anɩ́ flɔ́ɔ fa. Flɔ́ɔbhuo a múó coco kʋ̀ la gɔ́lʋ́ a mnɩ́ a, ámá á fa. 15Lé Zozíi srʋ á, ɔ́ anɩ́: «A mányɩ Falizɩ́ɛnyʋa yà Elódʋ sɔ́ a levílʋɔ́#8.15 levílʋ: Gɔ́zìɛ̀ nie lé flɔ́ɔ pʋ́ bhálɛ. kʋ́!» 16Ɔ́ cí saá a, á bháa cícíé á pʋpʋ́ a nyièdɩ cémʋ́ a nɩ́ flɔ́ɔ ka a ɩ́zà. 17Mà ɔ nyúkwlí bhli wɔlɩ́ɛ́ á cíé a kʋ́ a, ɔ́ yrá á, ɔ́ anɩ́: «Ɛ̀kʋ̀ʋ̀ lé a bhlalɛ a pʋpʋ́ a nyièdɩ a, cémʋ́ a nɩ́ flɔ́ɔ ka a ɩ́zà? A nɩ́ à zà ɩ mnɩ́ núu? Lɛ́gbá kʋ bhè a tɛ́ lɛ́ saá nyúkwlí a, lé a wɛ́ɛ́ nɩ́ à zà wɔlɩ́ɛ́ fɩ́ɛ́ ɩ̀ nilo lɛ a kʋ́ bhli a? 18Lɛ́gbá kʋ̀ bhè a ka lɛ́ yɩ́, lé a nɩ́ yɛ́ lɛ́ kʋ́ a? Lé a ka lɛ́ nyúkwlí, lé a nɩ́ nú lɛ́ a?#8.18 A zɛlɩɩ sáà Zele 5.21; Eze 12.2. A nɩ́ luoo? 19Tányɩɛ́ mʋ́ ɩ́ bhá lɛ́ flɔ́ɔbhié gbɩ́ɛ́, lé ɩ́ bhábha lɛ́ mɩ́ nyʋa a díé sɔ́ɔ́ lé kʋ́gbá a, pápɩ́ɛ́ a zùò ji kʋ́ a?» Á anɩ́: «Pápɩ́ kʋ́gbá sɔ́ ji kʋ́.» 20Ɔ́ anɩ́: «Bhè tányɩɛ́ mʋ́ ɩ́ bhábha lɛ́ flɔ́ɔbhie gbàásɔ́ɔ́ nyʋaá díé sɔ́ a, pápɩ́ a zùò ji kʋ́ a?» Á anɩ́: «Pápɩ́ a gbàásɔ́ ji kʋ́.» 21Ɔ́ anɩ́: «Àà! Bhè cégbá mʋ́ ɩ́ kʋ lé a nɩ́ à zà nú a?»
Zozíi yalɩma yɩ́cucúbhlanyɔ
(Záan 9.1‑11)
22Zozíi yà ɔ́ kʋjɩ̀nyʋ̀àà sɔ́ ŋnɩ Besayidáa. Nyʋa lɔɔ́ yɩ́cucúbhlanyɔ lé á bhibhio mà ɔ gbɔ́ ɔ́. 23Mà Zozíi bhli ɔ́ sɔɔ́ kʋ́ lé, ɔ́ yɔ̀sɔ́ wlʋ́ʋ dúó gwá. Lé ɔ́ bʋ́alɔɔ́ dàdɩ yíjɩ̀, lé ɔ́ gbɛlɔɔ́ glɔ̀gbá jɩ̀ lé ɔ́ yrɔ́ɔ́, ɔ́ anɩ́: «Ɩ̀ yɛ́ lɛ́ kʋ́ ʋ?» 24Nyɔɔ́ dʋdʋ̀ a ɔ́ anɩ́: «Ɩ́ yɛ́ nyʋa kʋ́ lé á námɛ, mà á wlʋ́ mànɩ́ sií.» 25Lé Zozíi ŋwʋ́ ɔ́ sɔ́kʋ́ glɔ̀gbá yíjɩ̀, lé ɔ́ yalɩma. Ɔ yɛ́ yɩ́ cɩɩ kʋ́ wɩ́a a. 26Lé Zozíi srʋ ɔ́, ɔ́ anɩ́: «Mʋ gbó! Nàa ghla dúó mʋ́, mà plɩ́ lé mʋ nà gbó!»
Zozíi ŋwɔ́ɔ Kláyɩ́sɩ
(Matíe 16.13‑20; Lúkɩ 9.18‑21)
27Ɩ̀lɩa lɔ̀fɩ́ɛ́ plɩ́ a, Zozíi yà ɔ́ kʋjɩ̀nyʋ̀àà sɔ́ mʋ Sezalée, lóo Filípʋ anɩ Sezalée a gbakɩ. Á kʋ nyúzɔ kʋ mʋʋ̀da lé Zozíi yrá á, ɔ́ anɩ́: «Bhè nyɔ gbá ɩ́ ŋwɔ́ɔ a, cégbá nyʋa cíé ná zà a?» 28Ɔ́ kʋjɩ̀nyʋ̀àà anɩ́: «Áá! Nyʋa àna nie mà mɔ̀ ŋwɔ́ɔ Zán Batísɩ, lé àna nie mà mɔ̀ ŋwɔ́ɔ Elíi. Lé àna nie sáà mà Lagɔ a nékʋ́cinyʋa a nyièdɩ a nyɔ ɩ̀ ŋwɔ́ɔ.» 29Ɔ́ anɩ́: «Bhè amɔ mɔ̀glʋ̀, a anɩ́ ɩ́ ŋwɔ́ɔ a?» Pɩ́ɛ́lɩ sa né a, ɔ́ anɩ́: «Mɔ̀ ŋwɔ́ɔ Kláyɩ́sɩ#8.29 Kláyɩ́sɩ: Bhʋ́anɩ ŋnɩ́ɛ́ a gba ŋwɔ́ɔ mà, nyɔɔ́ lɩ̀à ɔ́mɔ́ Lagɔ sa à lé ɔ́ cíè ɔ̀ kà ʋ́ kɔ́ a nyʋa neé sa à..» 30Pɩ́ɛ́lɩ cíí kɔ́ɔ̀kʋ́ a, Zozíi ɔ́ɔ nyɛ́ á tába, ɔ́ anɩ́: «A ná cɩ́lɩɩ́ nyɔ gɔ̀.»
Zozíi srʋ ɔ́ kʋjɩ̀nyʋ̀àà wɔlɩ́ɛ́ nà kɔ̀ɔ ŋnɩ a
(Matíe 16.21‑28; Lúkɩ 9.22‑27)
31Ɩ̀lɩa á lɔ̀fɩ́ɛ́ plɩ́ a, bhʋ́ Zozíi srʋ ɔ́ kʋjɩ̀nyʋ̀àà ɔ́ cɩ́alɛ a, mà: «Nyɔɔ́ a Yuwliyʋɔ́ ka lé ɔ yɛ́ kalɩmɛ kɔ́kɔ́mnɩ́; dɔ̀panyʋaá, Lagɔ̀bʋ̀bɔ̀nyʋ̀àkádàà yà lɔ̀ a másɛnyʋaá sɔ́ yio zrìi fɩ́ɛ́ lé nyʋa yio bhlá, mà ta yruó kʋ́ ɔ́ yi galɔ̀.» 32Ɔ nɩ́ zízìè yɩ́ ámá wɔlɩ́ɛ́ yɩ́, ɔ́ɔ srʋɛ yɩ́ ámá ɔ́ kalɩmɛɛ́ a wɔlɩ́ɛ́. Ɔ́ cí lɛ́ saá, Pɩ́ɛ́lɩ wleloó koté kʋ́, lé ɔ́ srʋ ɔ́ mà, ɔ ná cí sɩ́tɛ̀. 33Mà Zozíi yrɩ́bha lé ɔ́ gà ɔ́ kʋjɩ̀nyʋ̀àà klʋ́ lé ɔ́ zalɩmà Pɩ́ɛ́lɩ jɩ̀ yɩ́ lé ɔ́ srʋ ɔ́ mà: «Wlʋ́ mɔ́ɔ gwá, Dɩ́blʋʋ̀! Nyʋa bhísakʋ́ ɩ̀ bhobho, mà nɩ́ bhobho Lagɔ bhísakʋ́.»
Zozíi a kʋjɩ̀jɩ́ɛ́
34Lé Zozíi mnè jrèè yà ɔ́ kʋjɩ̀nyʋ̀àà sɔ́ sá, lé ɔ́ srʋ á mà: «Ɔ̀ nɩ̀ yrá lé ɔ̀ kà mɔ́ɔ kʋ́ jɩ́ a, ɔ drʋ ɔ nyoku kʋ́, ɔ gbɩdɩ̀ ɔ kúsuó lé ɔ jɩ́ mɔ́ɔ kʋ́. 35Ɔ̀ nɩ̀ bhla ɔ kɔ́ kʋ́ a, ɔ́ yi ʋ́ tɩ. Mà ɔ̀ nɩ̀ tɩ ɔ kɔ́ ná zà a, lé Lagɔ a Námadìè a zà a, ɔ́ yi ʋ́ neé wlʋ́. 36Nɩ̀ yɛ́ kɔ́ a námɛɛ́ a lɔ̀fɩ́ɛ́ lé nɩ̀ tɩ nà zuzu a, bʋ̀zɛ̀ gbá ɩ̀ yɛ́ á? 37Lɛ́gbá nyɔ yi bhá lé ɔ́ yi ɔ kɔ́ mʋ́ zizìè a? 38Nyɔɔ́ nɩ ka zʋ kʋ́ a lé ná niwɔlɩ nɩ ka sáà zʋ kʋ́ bhʋ́anɩ bhehi li jànyɩ̀ɛ̀ bhè bhàlʋ̀jànyɩ̀ɛ̀ lɩ̀à sɔ́ a mnɩ́ a, yruó kʋ́ Nyɔɔ́ a Yuwliyʋɔ́ yà kplɔkplɔzìzìè sɔ́ nɩ yi ɔ Tʋ́ a blɔ̀blɔ́ɔ́ a mnɩ́ a, bhʋ́anɩ nyɔɔ́ ɔ́ yi sáà mɔ́ zʋ̀ kʋ́ ka a.»
လက္ရွိေရြးခ်ယ္ထားမွု
Málɩ́kɩ 8: NEY
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active), Wycliffe Bible Translators, Inc. All rights reserved.