Yohane 2
2
Machellello a okwati wa o Kana
1Viviralle mallapo meelli waakhalla machellello a okwati mu etawoni ya Kana o echigawo ya Galileya. Amennya a Yesu yaari wenko. 2Navettho Yesu ni oohudderaaye yahiithaniwa wuukwatininko. 3Vinyo amanlleeye, amennya a Yesu yaallota wa olliyooyo wi, “Vinyo ohaamallella.”
4Yesu ahaakhulla wi, “Moowe, muhikilleelle yawi keere, enthawaaka khenaphiye.”
5Amennya a Yesu yahaalleella oorumeyella a okwati wi, “Erive ello eyo mwanaka aneereeye uulamuleni wi mweere, erani.”
6Ayuda aakhalla ni malamulo a meellihello. Nave ekaamba ya yeella vaakhalla mino dditthanu ni mmodda. Orive muno woophwanella oddalla ni maaddi owaatamella malita 100. 7Vano Yesu ahaalleella oorumeyellaalle wi, “Ddallihani minonndda ni maaddi.” Yaaddalliha ophiyera vaddullu. 8Eerille ddiiddo ahaalleella wi, “Vano rikanimoni maaddi amodda nave mwaavelleelle wa muullupalli a okwatoolle.” Sika yaavelleella maaddaalle wa olliyooyo. 9Maaddaayo yaatthattuwa vinyo nave ahaallawiha. Olliyooyo khaadduwenlle nko waavenyenre vinyooyo koma oorumeyella yaarikalle maaddaalle yaadduwella. Vano aamwiithana ootthelloolle, 10amulleella wi, “Arive muthu anaamba omukawa vinyo ooddiva wunchichi nave athu awiithaniwa yamuwirya munchichi, sika anamukawa vinyo ooddiva vang'ono. Koma weyaano woomusunga vinyo ooddiva wunchichi ophiyera vano!”
11Yesu aheera ddoottikhiniha ddawaambanndda o Kana o Galileya. Wenko ahuupullulla ntitimiho naye nave oohudderaaye yaamukhulupilila.
12 #
Mat 4.13
Ddimallille nndda, Yesu, amennya, asinne ni oohudderaaye yaaya o etawoni ya Kaperenao nko yakhallilliiwawo mallapo ooyeva.
Yesu anawiikariha athu mu enyumba ya Mulluku
(Mat 21.12-13; Mrk 11.15-17; Luk 19.45-46)
13 #
Eks 12.1-27
Enthawi ya Ehakallallo ya Paska a Ayuda yahaatamella, sika Yesu aaya o Yerusalemu. 14Mu enyumba ya Mulluku ahaaphwanya athu ekullihaka eng'ombe, enkhosa ni ekhunda navettho athu awaakakhaniha makobiri ekeraatthille mwemmo. 15Vano aapanga muwashullo wa mikwe awiikarihamo athu attheene mu enyumba ya Mulluku mulle vamodda ni enkhosa ni eng'ombe, aarukunusa matebulo a athu awaakakhaniha makobiraalle ni oparapasa makobiriiwa. 16Ahaalamulella ookulliha ekhunda wi, “Khumihanimoni nndda! Muhitthattuse enyumba ya Attiitthaaka wi ekhalle musika!” 17#Mas 69.9Vano oohudderaaye yahuupuwella wi mawu a Mulluku enallota wi, “Echikondaaka va enyumbaanyu oneerokoononga miyaano.”
18Vano attekweene a Ayuda* yaamukoha wi, “Munaawoonihe echizindikiro yawiidde wi nyuwaano mookhalla ni olamulello waweera nndda?”
19 #
Mat 26.61; 27.40; Mrk 14.58; 15.29 Yesu ahaakhulla wi, “Kumullani enyumba ya Mullukweella nave kineeroyimakattho mallapo mararu.”
20Yaamukoha wi, “Ethiyo oneeroyimakattho m'mallaponi mararu enyumba ya Mulluku ella yaamakiwa miyakha 46?”
21Koma enyumba ya Mulluku Yesu alloteeye yaari mwiillaaye. 22Sika avenyihiweeye wa ookhwa, oohudderaaye yahuupuwella wi aallota yeella nave yaakhulupilila mawu a Mulluku ni nnddo aallotille Yesu.
Yesu annadduwella mirima dda athu attheene
23Yesu aariiye mu Yerusalemu enthawi ya Ehakallallo ya Paska, anchichi yaakhulupilila mwa olliyooyo yoonilliiwa ddoottikhiniha eerilleeye. 24Koma Yesu khaakhulupililalle alliwaayo kaambiiwa ahaadduwella attheene. 25Khavaapaalleyattho wi mmodda amulleelle dda yaayo kaambiiwa olliye yeekhaaye aadduwella mirima ddiwa.
လက္ရွိေရြးခ်ယ္ထားမွု
Yohane 2: MW2019
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bible in Elhomwe © The Bible Society of Malawi, 2019.