1 MUSA Bindu 1
Bindu 1
Panompaon ni Naibata bani Langit pakon Tanoh ampa Haganup Isini
1Bani mula ni mulani itompa Naibata ma langit pakon tanoh.
2Tapi seng marrumang anjaha lumei do tanoh on; hagolapan do manrongkob luhung ai,anjaha mayap-ayap do Tonduy ni Naibata i atas bah ai.
3Dob ai marsahap ma Naibata, “Jadi ma ho na lihar!” Gabe lihar ma tongon.
4Iidah Naibata ma na dob dear na lihar ai; isirang Naibata ma na lihar ai humbani na golap ai.
5Jadi igoran Naibata ma na lihar ai arian, anjaha na golap ai igoran borngin. Bod ma ari, siang ma ari use, ai ma ari na parlobei.
6Dob ai marsahap ma Naibata, “Jadi ma ho hajangkajang iparsitongahan ni sagala bah, bahen parsirangan ni bah humbani bah!”
7Ibahen Naibata ma hajangkajang ai gabe parsirangan ni bah na i toruh ni hajangkajang ai humbani bah na i atas hajangkajang ai. Anjaha jadi ma sonai.
8Igoran Naibata ma hajangkajang ai langit. Bod ma ari, siang ma ari use, ai ma ari na paduahon.
9Marsahap ma use Naibata, “Martumpu ma sagala bah na i toruh ni langit in hubani sada ianan, ase taridah na horah.” Anjaha jadi ma sonai.
10Igoran Naibata ma na horah ai tanoh, anjaha partumpuan ni bah ai igoran laut. Iidah Naibata ma, domma dear ai.
11Marsahap ma use Naibata, “Ipantubuhkon tanoh in ma poyon-poyon, suan-suanan na marbatu, ampa hayu na marbuahkon buah na marbatu, marsiboan masamni i tanoh on.” Anjaha jadi ma sonai.
12Ipantubuhkon tanoh in ma poyon-poyon, suan-suanan na marbatu marsiboan masamni ampa hayu na marbuahkon buah na marbatu marsiboan masamni. Iidah Naibata ma, na dob dear ai.
13Bod ma ari, siang ma ari use, ai ma ari na patoluhon.
14Marsahap ma use Naibata, “Jadi ma panondang i hajangkajang ni langit in, bahen parsirangan ni arian pakon borngin, bahen tanda pakon titi ni panorang, ari pakon tahun,
15bahen panondang i hajangkajang ni langit in, laho manondangi tanoh on!” Anjaha jadi ma sonai.
16Jadi itompa Naibata ma dua panondang bolon; panondang sibanggalan ai manrajai arian, panondang sietekan ai manrajai borngin. Itompa do homa bintang-bintang.
17Inahkon Naibata ma sidea hu hajangkajang ni langit ai laho manondangi tanoh on,
18laho manrajai arian pakon borngin ampa manirang na lihar humbani na golap. Iidah Naibata ma, domma dear ai.
19Bod ma ari, siang ma ari use, ai ma ari na paompatkon.
20Marsahap ma Naibata use, “Manjuluri ma ibagas bah in na tinompa na manggoluh, anjaha marhabangan ma manuk-manuk i atas ni tanoh, ibagas hajangkajang ni langit in!”
21Jadi itompa Naibata ma binatang laut na banggal-banggal pakon sagala na tinompa na marhosah na manggoluh ibagas bah, marsiboan masamni, ampa sagala manuk-manuk na marhabong, marsiboan masamni. Iidah Naibata ma, domma dear ai.
22Ipasu-pasu Naibata ma ganupan ai, nini ma, “Manggompari anjaha lambin gargar ma hanima, goki hanima ma bah ni laut in;” lambin bueini ma homa manuk-manuk i atas tanoh on.
23Bod ma ari, siang ma ari use, ai ma ari na palimahon.
24Marsahap ma use Naibata, “Ipantubuhkon tanoh in ma na tinompa na manggoluh, marsiboan masamni, pinahan, binatang na manjulur pakon binatang na i talun marsiboan masamni.” Anjaha jadi ma sonai.
25Jadi itompa Naibata ma binatang-binatang marsiboan masamni, pakon pinahan marsiboan masamni, ampa sagala binatang na manjulur i atas tanoh on, marsiboan masamni. Iidah Naibata ma, domma dear ai.
Panompaon ni Naibata bani Jolma
26Marsahap ma use Naibata, “Tompa Hita ma jolma songon rupan-Ta, pakon songon parlahouta, ase irajai sidea dengke na i laut, manuk-manuk na i awang-awang, pinahan, pakon ganup tanoh on, ampa sagala binatang na manjulur i atas tanoh on.”
27Jadi itompa Naibata ma jolma in songon rupa-Ni, songon rupa ni Naibata do itompa sidea; dalahi pakon naboru do sidea itompa.
28Dob ai ipasu-pasu Naibata ma sidea, nini ma dompak sidea, “Manggompari anjaha lambin manggargar ma hanima, goki hanima ma tanoh on anjaha patunduk ma in; rajai hanima ma dengke na i laut, manuk-manuk na i awang-awang, pakon sagala binatang na manjulur i atas tanoh on.”
29Marsahap ma use Naibata, “Hubere ma bennima sagala suan-suanan na marbatu bani sab tanoh on, ampa sagala hayu na marbuahkon buah na marbatu, ai ma gabe sipanganonnima.
30Tapi bani haganup binatang na iatas tanoh on, haganup manuk-manuk na i awang-awang ampa haganup na manjulur i atas tanoh on, sagala na marhosah, poyon pakon naporon na maratah ma Hubere panganon ni sidea.” Anjaha jadi ma sonai.
31Jadi iidah Naibata ma sagala na tinompa-Ni ai, domma dear tumang. Bod ma ari, siang ma ari use, ai ma ari na paonomkon.
လက္ရွိေရြးခ်ယ္ထားမွု
1 MUSA Bindu 1: BTS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bibel, Simalungun Bible (revised ed.) © Indonesian Bible Society, 2007.