لوکا 18
18
سنیینگروسچانّی انے مارانگمو۔
1جاگشیگ حضرت عیسیٰ مسیح کھونگرانگی لوبٹوگس گونلا سون ماسونّا توسگیون دُعا ژوگوشیسلا لابجا سالین رومس شیگ شادّا زادس۔ 2”گیالساجیگی نانّگا خُدا میجیگسکھان یانگ میگونلا سیوا میدکھانّی شخ چوکانجیگ یودپین۔ 3تینّا گیالسے نانّگا انے مارانگموجیگ جاگدانگ کھویکا یونگستے جُووا پھولس، ’نگا نگے ڈاو کانے اوسپے ٹھیمسچاد چوا زاد۔‘ 4شخ چوکانی لان مانگپو کھوے جُووا سنانّگا ماتانگس اِین نانگ ستینگجوگا کھوے سام، ’نگا خُدا میجیگسکھان یانگ میگونلا سیوا میدکھان 5اِین نانگ ای انے مارانگموبوے نگا سنانّگا تشیرچوگسپا، نگے کھوا اوسپے ٹھیمسچاد تانگین، تے مانے کھو جاگ تانگ یونگستے نگا سیمسّی تھیلنے نگالچوگین‘۔“
6مسیح مولس، ”ٹھیمسپون، اوسپا ماچوکھانّی رومسپوے کانے لابجا لین۔ 7خُدے تشاننین میدپا کھونّگا دُعا جوکھان، کھونگی لدامسما زادکھانگونلا اوسپے ٹھیمسچاد میزادّا؟ چی خُدے کھونگونلا روگس چوالا گورچوگا زادینّا؟ 8نگے کھیوجا زیرّاد، گیوگسپا کھونگونلا اوسپے ٹھیمسچاد چوا زادِین۔ اِین نانگ اِبنِ آدم یونگی توسلا کھوا دُنیائیکا ایمان چان تھوباینّا؟“
فریسی پا تانگ ٹھالّینکھانّی رومس۔
9رانگ ٹانگپو اینکھانبویکا لوکھیل یانگ جان تشانگما تھوشوگ سامکھان کھاچیگّا، حضرت عیسیٰ مسیح ای رومسپو شادّا زادس، 10”می نیس بیت المقدِس لا دُعا جوالا سونگ، چیگپو فریسی پا یانگ چیگپو ٹھال نینکھان کابوا میگونّی تھوشوگ سامّاد۔ 11فریسی پابو لانگستے کھورانگی سکورلا دُعا چوس، ’خُدے، نگا نیرانگی جان میگون یانگنا چاگپا، مینگانپا، لوگییم چوکھان، یا ای ٹھالنینکھانبو ژوگس میزادچیسلا نگے شُکر جُواد۔ 12نگا ردونجاگی نانّگا لان نیس روزا دوگّاد، یانگ نگے یونگو تشانگمے رچُو کھاگپو نیرانّگا پھولّاد‘۔“
13”اینّانگ ٹھالنینکھانبو جانگونّی سانگ تھاگرینّگا لانگستے گو گھوستے نامکھا ماستا، ڈانگ ردونگین دُعا چوس، ’کیے خُدے، نگا دِیگپاچانلا سنینگرجے زاد‘۔“
14”نگے کھیوجا زیرّاد، خُدے سکوندونلا فریسی پابو مانپا ای میبوا مُعافی تھوبتے کھورانگی کھانگپا لوگستے سونگ چیازیرنا ٹاگپو ستانکھان تشانگما پاسمو چوا زادِین یانگ کھورانگ پاسمو بورکھانبوا سیوا سالّا زادِین۔“
حضرت عیسیٰ مسیح ٹھوگو چھونگونگونلا برکت سالس۔
15جاگشیگ پھاماگونّی ٹھوگو چھونگون گُون حضرت عیسیٰ مسیح چھاگسیا زادتے برکت سالچیسلا کھیونگس۔ تیبو تھونّگاچیگ لوبٹوگسگونّی پھاماگونلا حضرت عیسیٰ سی وبگیال ستانچیسلا کھاسکییس۔
16اِین نانگ حضرت عیسیٰ سی ٹھوگوگون کھونگرانگ یودسا بودّا زادتے مولس، ”ٹھوگو چھونگون گُون گھاگ ماگھاگّا نگا یودسا یونگچوگ، یتسوگسگونّی پھیا خُدے گیالثیدپو این۔ 17نگے کھیوجا لدینبا زیرّاد، خُدے گیالثید ٹھوگو چھونگون گُون تسوگسلا مالینکھانگون تینانّگا مانے ژوگس مینیان۔“
می چھوگپوجیگی رومس۔
18یہُودی پے سپونبوجیگی حضرت عیسیٰ مسیح ٹیس، ”لوبپون زانگپولے، تھامیدپے میتشے نورسکالّا تھوبچیسّی پھیا چی چوگوس؟“ 19حضرت عیسیٰ سی کھوا ٹیا زادس، ”چیپھیا کھیرانگی نگا زانگپو زیرّاد؟ خُدا چیگپو ماستوگ سوانگ زانگپو مان۔ 20کھیرانگی کاگیاگون شیسّانوگ۔ رانگی جیدماد مانپا جانما نیامپو لوسڈیل ماچو، می ماساد، کوماکو، گواہ زون ماتانگ، رانگی ابا تانگ اما سیوا چوس۔“ #18:20 مصر نے شورکھانّی شوقبُوئ 20۔ 12؛ شریعتی شوقبُو نیسپے 5: 16 نے 20
21کھوے حضرت عیسیٰ سی زیرس، ”تے تشانگما نگے چھونگتوسنے پھارلا ثونگستے این“
22تیبو سانّاچیگ حضرت عیسیٰ سی کھوا مولس، ”تارُونگ کھیورانّگا چوگوشیس چیگ لوستے دوگ۔ سونگ یانگ کھیرانگی گیونور تشانگما تسونگستے پینیبو نیالباچانگونلا تونگ، نامکھے نانّگا کھیورانّگا بانگدزود تھوبین۔ تینے یونگستے نگے گیابنے ڈونگس۔“ 23تیبو تشورّاچیگ، کھوا تشیرکھا ثانٹے یونگس چیازیرنا کھو ما چھوگپو یودپین۔ 24حضرت عیسیٰ سی کھوا زیگستے مولس، ”چھوگپوگون خُدے گیالثیدّی نانّگا لیبچیس تسامشیگی کاگسپو مانوگ۔ 25تانتان، می چھوگپو خُدے گیالثیدّی نانّگا لیبچیسّی سانگ کھابّی میگنے رنگابونگ بینگچیسپو لامو چھین۔“
26تیبو تشورکھانگونّی کھونّگا ٹیس، ”تینے سُوا تھارپا تھوبین۔“
27حضرت عیسیٰ سی لانسالس، ”میا چو مینیانچیسپو خُدا زاد نیانّانوگ۔“
28حضرت پطرؔس سی حضرت عیسیٰ سی زیرس، ”زیگسّانگ نگاجے چیتشانگما پھانگستے نیرانّگا ڈانگسپین“
29کھونگی کھونگونلا مولس، ”نگے کھیوجا لدینبا زیرّاد، خُدے گیالثیدّی پھیا کھانگپا یا ناما یا فونو نو یا پھاما یا ٹھوگو پھانگسکھان تشانگمالا، 30اینّا میتشے نانّگا، تیگونّی لداب مانگپو ماتشاد خُدے گیالثیدّی توسلا تھامیدپے میتشے تھوبین۔“
حضرت عیسیٰ مسیح لان سومپا کھونگرانگ ڈونگشیسّی لونگستان سالّا زادس۔
31حضرت عیسیٰ مسیح کھونگی لوبٹوگس چوگنییسپو سوسو کھیرتے مولس، ”نگاتانگون کیینلا یروشالیمّا چھاچیس اینوگ، یانگ پیغمبر گونّی اِبنِ آدمی سکورلا ڈیسکھان تشانگما ڈانڈا ڈوبین۔ 32کھو یہُودی مانکھان گُونی لاگا ستاداین یانگ کھونگونی کھوا ٹھیلبا ستانتے، چھیلماگ تانگ ستالچاگ گیابستے ساداین۔ 33یانگ جاگ سومپے جاگّا یانگسکیار کھو سونتیا لانگین۔“
34اِین نانگ لوبٹوگس گونلا کھونگی مولکھانگون چانگ ہاماگو۔ تے سپیرے تونگون سانگوے نانّگا بورپا کھونگونلا ہاگو ماتھوب۔
جارا لتسانگکھانجیگ پھانچوگا زادس۔
35حضرت عیسیٰ مسیح تانگ کھونگی لوبٹوگسگون، یریحُو ے نیموا یود زانے، جاراجیگ لامی تھاما لتسانگاین دُوگستے یودپین۔ 36تیکانے میتشوگسشیگ چھین یودکھانبو تشورتے کھوے کھونگونلا چی چھین اینوگ زیرتے ٹیس؟ 37کھونگونی زیرس، ”ناصرة پا حضرت عیسیٰ سی سکیودین اینوگ۔“ 38تینے کھوے کُوچو تانگین زیرس، ”حضرت عیسیٰ، گیالپو حضرت داؤد ّی اولاد نگیکا سنینگرجے زاد۔“
39سنگونلا چھاکھانگونّی کھوا کھاسکییستے چوبچود زیرس، اِین نانگ کھوے مانّگا کُوچو تانگستے زیرس، ”گیالپو حضرت داؤد ّی اولاد، نگیکا سنینگرجے زادّانگ۔“
40حضرت عیسیٰ سی ڈولّا مازادّا جوگس یانگ جارا بو کھونگی لدُونلا کھیونگچیسلا مولس۔ کھو حضرت عیسیٰ سی لدُونلا لیبّاچیگ، کھونگی کھوا ٹیا زادس، 41”نگے کھیرانگی پھیا چی چو۔“
کھوے زیرس، ”مسیح لے، نگا یانگسکیار تھونگ چوگّا زاد۔“
42حضرت عیسیٰ سی کھوا مولس، ” کھیرانگی تھونگچیسّی کھیود پو لین، کھیرانگی ایمانی کھیرانگ پھانچوگستے این۔“ 43تینّامالّا کھوا تھونگتھوب، خُدا ستودپا پھولین حضرت عیسیٰ سی ڈانگستے سونگ۔ می تشانگمے تیبو تھونّگاچیگ کھونگ یانگ خُدا ستودپا پھولس۔
လက္ရွိေရြးခ်ယ္ထားမွု
لوکا 18: LBJNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Ladakhi Bible by The Love Fellowship is licensed under Creative Commons Attribution-ShareAlike 4.0 License.