مادتھا 3
3
حضرت یُوؔحنّا ٰ غوتا سالکھانّی میگون ڈالڈیگ زادس۔
1لو مانگپوے ستینگنے غوتا سالکھان یوحنّانی چھوسشادچیس گوزوگس، کھونگی یہُودیہ ریستونگی نانّگا میگونلا چھوس شادین 2مولس، ”نامکھے گیالثید نیموا لیبستے اینوگ، گیودپا چوستے خُدے چھوگسلا سیمس گیورشیگ۔“ 3پیغمبر حضرت یسعیاہ پیغمبری غوتا سالکھان یوحنّانی سکورلا مولدوگ،
”ریستونگی نانّگا سکاد چھینموجیکّی مولین،
’مسیح پھیبشیسلا ڈالڈیگ چوس،
یانگ کھونگی پھیبسلام بُو ٹانگپو چوس‘۔“ #3:3 حضرت یسعیاہ شوقبُو 40۔ 3
4یوحنّانی رنگابونگی بالّا تھاگسکھانّی کوس تانگ سکیدپا کوے سکیراگ چینّگادپین۔ کھونگی کھارجی نی بوتسیگ تانگ ریستونگی رانگسی اِنپین۔ 5طِطُس یروشالیم، یہُودیہ گانگپو تانگ یوردان لونگپا گانگپوے میگون کھونّگا ستاچیس تانگ نیانّالا سونگ۔ 6کھونگونی رانگرانگی دِیگپے لاسگون میگونّی لدُونلا شادس پاسانگ یوحنّانی کھونگونلا یوردان لژانگسپو ے نانّگا غوتا سالّا زادس۔
7اِین نانگ فریسی پا تانگ صدُوقی پا مانگپوجیک غوتا لینّا یونگین زیگستے یوحنّانی مولس، ”رُولی اولاد گون، یونگچیسچانّی خُدے چھادپانے شور زیرتے کھیوجا سپانگ سوی پھودس۔ 8دِیگپا چوچیس سپانگستے خُدے لامیکا ڈولکھانّی ڈاسبو سمینچوگ۔ 9یانگ کھیوجے ماسامشیگ ’نگاجا حضرت اِبراہیم اولاد این پاسانگ تھارین۔‘ نگے کھیوجاگونلا زیرّاد، خُدا ردواگونّی نانگنے حضرت اِبراہیم پھیا اولاد زاد نیا نین۔ 10شانگ چوشیگ۔ ستاری نی لچانگماگونّی سیکا بورتے دوگ، ڈاسبو زانگپو ماسمینکھانّی لچانگما تشانگما چادتے میے نانّگا پھانگین۔“
11نگے کھیوجا گیودپا چوستے خُدے چھوگسلا سیمس گیورچیسلا چھوی غوتا تانّگاد۔ اِین نانگ نگے ستینگنے سکیودچیسچان، کھونگ نگے سانگ مانّگا وانگچان، یانگ نگا نی جابشی تسوگسلا کھونگی پابھو کھورچیسّی اوسپا مید۔ کھونگی ہلژخمہ رُوح تانگ میے غوتا سالین۔ 12جینگبادپے یولتھاگّا زار نیامپو، ٹو تانگ پھوگما پھیستے ٹو کھورانگی بانّگے نانّگا یانگ پھوگما میے نانّگا ثاگّا تسوگسلا کھونگ یانگ کھونگرانگی میگون تانگ می نگانپاگون سوسوا پھیا زادِین۔
حضرت عیسیٰ سی غوتا لینّا زادس۔
13تینے حضرت عیسیٰ مسیح گلِیلی یولجونگسنے یوردان لژانگسپو ا یوحنّانے غوتا لینّالا سکیودس۔ 14اِین نانگ یوحنّانی حضرت عیسیٰ سی غوتا لینچیسنے گھاگچیسّی سونڈوس چوین مولس، ”نگا نیرانگی نگا غوتا سال گوشیس اینوگ۔ تینے نیرانگ نگیکا غوتا لینّا چیا سکیودتے این؟“
15حضرت عیسیٰ سی حضرت یُوؔحنّا ٰ مولس، ”داگسا نگا غوتا لینچوگ چیازیرنا ایزوگ چوچیسپوے نگاتانگی خُدے تھوگون ڈوب چوگّانوگ۔“ تینے حضرت یُوؔحنّا ٰ کھونّگا غوتا سالچیسلا تھاد۔
16غوتا نامستے حضرت عیسیٰ چھوی نانگنے پھینّگاچیگ، نامکھا بیتے، پھورگونجیکّی تشولّا خُدے رُوح بابستے کھونگی کا جوگسا زادس۔ 17یانگ نامکھانے سونگسکادشیگی مولس، ”اِیبو نی نگے چیسپے بُوژا این، کھیرانگ نیامپو نگا ماثانٹے تھادپو این۔“
လက္ရွိေရြးခ်ယ္ထားမွု
مادتھا 3: LBJNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Ladakhi Bible by The Love Fellowship is licensed under Creative Commons Attribution-ShareAlike 4.0 License.