TĨĨGI WERE 31
31
Jakob fer Kanaan
1Jakob kal laa wããre maga jar ni Laban wããn wo mono : Ga Jakob yãã fẽẽre mani pan naa wo go ɓuy, diŋ wersen ga á daʼ horog sen mo deŋ no. 2Jakob ko mokay lay no, nen Laban bay see ɓe doo ma taŋgun no wa so lay. 3Doo kay nono, Manwur wii Jakob ga : Fer ɓi sir ni pããre ɓo wo, ti ɓaŋ mani ɓo no, ndi joŋ ge yaŋ de ɓo. 4Jakob kal ɗe Rasel wo de Leya maga hay wo le go mbásga ɓiŋ horog ɓen wo no. 5Á wii ra ga : Ndi ko patala mokay nen pan ɓay bay see ɓi doo ma keɓaa taŋgun no wa so, day Baa mani pan ɓin de ɓi. 6Nday yaŋ mbay de koge de see ɓay lay ga ndi joŋ joŋre go ne pan ɓay de egre ɓi ɓuy. 7Day pan ɓay mbuɗ foo ɓi, á dog coo poɗge ɓin ɓaale hwale. Day Baa laa hã faage ne hẽn maga á mo joŋ me de ɓlagge gà. 8De maga á wãã ga ma de ndar seen joŋge wo diŋ poɗge ɓo, fǐirin wo ɓuy kal wo ɓoʼ ɗee go ndar see. De maga á wãã ga : Ma de yergen wo diŋ poɗge ɓo, fǐirin wo ɓuy kal wo ɓoʼ ɗee go yer see.
9Baa yãã horogn wo le go doo pan ɓay hã ra go me.
10De wur maga horogn laa wo nen cege mokay, ndi maŋ nen ɓi ciŋ, ndi kal koge nen lwaʼge, ma twerpiiri maga ɗii wo ma tenaaren wo mokay hay wo de yer see, de ndar see de mbarge taɗ taɗe. 11Je peele Baa hay wii me de lwaʼge ga : Jakobe! Ndi kal fer wããre ga : Ndi yaŋ la! 12Á day ga : Maŋ nen ɓo ciŋ ko ɗa. Ma twerpiiri maga ɗii wo ma tenaaren wo mo deŋ ɓuy wo de yer see, de ndar see de mbarge taɗ taɗe, werga ndi ko fen maga Laban joŋ mo de ɓe mo ɓuy no.
13Ndi diŋ Baa ma Betel maga ndo jag húulì le deele ni mono, maga ndo kaa noo ne húulì ti ni day ndo haʼ ni mono. Patala ur go ciŋ men sir sen la go, see ɓi sir maga ndo biŋ ni mono.
14Rasel kal wo fer wããre ne hẽn de Leya ga : Nen mayse wùr bà le liŋ ma hooge ti taabúl pan wùr la ni pala? 15Wùr bay bà koge nen ɓe nà doo waare no wa pa, werga á yee wùr go, re solay wùrn go so lay no? 16Horog maga Baa yãã le go doo pan wùr mo deŋ kol patala diŋ ma wùr de weere wùr wora. Patala joŋ mbo fen maga Baa wããn mo mono.
17Jakob kal urgi, hoo weere ɓen wo de naare ɓen ti manyoŋyoŋ wo. 18Á raw de horog ɓen wo ɓuy, de fẽẽre maga se hay daʼ ra mo ɓuy, horog maga se hay daʼ ra le Paddan-Aram mo ɓuy. Á kal rawge ni Pan ɓe Isag ɓi sir Kanaan. 19Laban hay raw caw fũy fǐiri ɓe wo. Rasel kal hoo Terafẽẽ mani pan ɓen wo freŋ. 20Ma Jakob mo lay no, á baa bii Laban je Arameyẽẽ ti maga á daŋ mbe blam ɓe tuu wiin seŋ gà mo lay. 21Á daŋ de fẽẽre maga hay wo diŋ ɓe mo ɓuy. Á ur mokay cegaɗ maarogn go cegaɗ kal ferge wo nen ti húulì ma Galad wo no kay.
Laban baa blam Jakobe
22Wur naw ma de swaʼn mono à wo wii Laban so ga Jakob daŋ we. 23Á kal hoo fẽẽre ɓe wo, baa blam ɓe, joŋ wo síilí renam seege, wo wo daʼge ɓe ti húulì ma Galaad wo.
24Ama Baa kal nduugi wii Laban nen lwaʼge de suŋ ga : Ko see ɓo de el wãã mopo ma bay ngar ne Jakob wa.
25Laban wo daʼ Jakob so, Jakob hay de baa mburyug ciŋ ti húulì. Laban kal wo baa mburyug ma ɓaaran de hẽẽre ɓe ciŋ ti húulì ma Galad lay. 26Doo kay nono, Laban wii Jakob so ga : Ndo joŋ nà joŋge yaw ne? Ndo bag bii ɓi ma sen ga ndo daŋ mbo le de mayre ɓin wo doo daŋgay maga ndo hoo le jag jaw koɗ mono ẽ yaw ne? 27Diŋ wer may ga ndo ɗee le freŋ, bag bii ɓi daŋ wii me seŋ ga mo ne? Ndi de hay men mo rawge mo caw de fruygi, de siŋ wo, de tembale, de dilna ga page. 28Ndo hã faage me maga ndi mo klew weere ɓin wo de mayre ɓin wo seŋ gà ɓuy! Ndo joŋ sen mokay diŋ re ma bay ngare. 29Ndi de kããge ma joŋ nday de ɓlagge, day diŋ ga Baa mani pan ɓayn wii me suu ga : Ko see ɓo de el wãã mopo ma bay ngar ne Jakob wa!
30Patala ndo raw nà diŋ ma tum so, doo ga ndo hay go nà de sãy tiŋ pan ɓon ti seɓaa so mono, diŋ wer may ga ndo hoo baa ɓin wo freŋ lay muy la?
31Jakob kal fer wããre ne hẽn ga : Ndi hay joŋ hẽẽne, ɗiggi ɓi hay ga tiga day la ndo hoo mayre ɓon wo go me wer yawla.
32Ama je maga ndo daʼge baa ɓon doo ma sen mokay la, men ge duniyã go an tawa! Pel hẽẽre naa wo mo taʼ la ɓuy kiɗ fen maga diŋ ɓo mono, ni ndo maŋn go. Jakob hay bay de koge ga Rasel le de hoo rage freŋ wa.
33Laban kal ɓil mburyug ni Jakobe, ni Leya, ni mayre gebeere ma ɓog wo no, daʼ mopo ni gà. Á kal leʼ ge go ɓil mburyug mani Leyan no kay, kal kalge ɓil mburyug mani Rasel no. 34Rasel hay hoo Terafẽẽn wo mokay hay laa ra wer deɗaare manyoŋyoŋ gesiŋ, kal hayge ne hara ti, Laban kiɗ ɓil mburyugn wo go ɓuy, hay daʼ mopo gà. 35Rasel wii pan ɓe ga : Daga ɓil waŋ ɓin mo cen wa, hayga ndi ur we go ciŋ pel ɓe gà no, werga ndi de mo wùr naare no. Laban ngar doo kiɗgi daʼ terafẽẽn gà.
36Jakob kal car jiili go, kal kiɗ dekwãy de Laban. Á kal maŋ wããre ga : Re maga ndi joŋn gen so la, ɓlagge maga ndi joŋn mo ɓa, ga ndo maŋ blam ɓi le de hãã doo kay no mo ɓa? 37De maga ndo kiɗ fẽẽre ɓin wo go ɓuy so, fẽẽre maga ndo daʼ la ni ga diŋ ma liŋ ni ɓo wo le so mono diŋ ma hon wo so ne? Kaŋ nen ɓi go ni pel hẽẽre ɓin wo, pel hẽẽre ɓon wo lay nen maga á mo hay wo diŋ jar ma ti holaŋ naa ɓog ɓuy. 38Ko ɗa, ndi joŋ kiŋgi ni ɓo doo ɓoge, sããre ɓon wo de fǐiri ɓẽẽre ɓon cwaa wo ɓiili go gà ndi re gamlara ma yoo horog ɓon wo gà. 39Ndi á daʼ moge ti boŋ de horog maga này baan go gà. Sen hay ɓuy diŋ re ɓi. Ndo hay ferge wiɗ nen mo maga á hay baan we go see ɓi de suŋ noga de cege mono. 40Ndi hay ni tum, hãã cege gay me go haɓge nà fah-fah ɓuy, de suŋ mo lay no ceere da goŋ me ge, nen ɓi kol go mo kay bay joŋ naa wa so. 41Ndi joŋ kiŋgi joŋ sen ni ɓo doo ɓoge, ndi joŋ joŋre mo kiŋgi hwal ti naa ti mayre ɓo ma ɓog wo no, joŋ mo kiŋgi hiiraʼ ti horoge, ndo dog coo poɗge ɓin ɓaale hwale. 42Hayga Baa mani pan ɓi no, Baa mani Abraham no. Je joŋ hẽẽne mani Isagn mo de hay we de ɓi gà no, ndo de hay men me le rawge mo caw la doo koɗe. Baa ko ferge ti ɓi gesiŋ no, ko gayge maga ndi gay coo doo ɓo mono, suu á joŋ nen ooge ti holaŋ naa. 43Laban kal fer wããre ne Jakob ga : Mayren wo mo lag diŋ mayre ɓi, weeren wo mo lag diŋ weere ɓi, horogn wo mo tiʼ diŋ horog ɓi, fẽẽre maga ndo ko ra mo deŋ ɓuy wo diŋ ɓi. Day ndi joŋ bà may see mayre ɓin wo de weere ɓaara wo pala? 44Patala a le, naa joŋ tayge jag ti holaŋ naa, daga je sedewa mo hay ti holaŋ naa!
45Jakob kal maŋ húulì jagn deele.
46Jakob wii hẽẽre ɓen wo ga : Hoo we húulì. Á kal wo hoo húulì, coʼn wo ti kẽẽ. Á kal wo rege ciŋ ti húulì ma de coʼgen ni. 47Laban kal ɗe ngeln ga Yegar-Sahaluta, Jakob kal ɗege ɓe ga Galed. 48Laban ga : Húulì se ma de taygen mo lag diŋ je sedewa ti holaŋ naa wara! Diŋ wersen ga á kal kaŋ ɗúu ne hẽn ga Galed. 49À ɗen mbe ga Mitspa lay, werga Laban hay wãã ga : Daga Manwur mo koɗ mo, mo koɗ me lay, de maga naa yeɗ nen kããra we go no. 50Ndo yaʼ we joŋ bon mayre ɓin wo, yaʼ we da naare ma tigriŋ no, sen joŋ ge diŋ re je táabay gà ko see ɓo de ele, joŋ ge diŋ je sedewa naa diŋ Baa. 51Laban wii Jakob ga : Húulì ma de taygen mo lag no, ma de jagge deelen mo taʼ lay no, wo diŋ mo maga ti holaŋ naa mono. 52Húulì ma de taygen wo de ma de jagge deelen mo lag wo diŋ sedewa, nen ɓo ga ndo cegaɗ húulì se ma de taygen wo de húulì ma de jagge deelen mo lag le go see ɓi la de ɗiggi ma de ɓlagge gà lay, ndi cegaɗ ge see ɓe wo go see ɓo de ɗiggi ma de ɓlagge gà lay. 53Daga Baa mani Abraham wo de mani Nahor no, daga Baa mani pan ɓaaran mo hay diŋ je caa kiida naa. Jakob kal haʼge de Je maga Pan ɓe Isag joŋ hẽẽne ɓe mono.
54Jakob kal joŋ siigi jag ciŋ ti húulì ni, kal ɗe hẽẽre ɓen wo re hoole. Á re wo hoole se no, kal wo nage ciŋ ti húulì ni.
လက္ရွိေရြးခ်ယ္ထားမွု
TĨĨGI WERE 31: TUP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Tupuri Bible © Bible Society of Cameroon, 2016. All rights reserved.