TĨĨGI WERE 35
35
Jakob men Sikem go ma woge Betele
1Baa wii Jakob ga : Ur go ciŋ see Betel ni ndo hay wo ni. Wo ni mo no, ni ndo joŋ ngel sii jag ne Baa maga hay naa nen mo de maga ndo hay ti ɗee doo hẽn ɓo Esaw mono. 2Jakob riŋ jar ni ɓe wo de jar maga hay wo wer ɓe ni ɓuy ga : Lag we baa ma waare ma yoo ɓayn wo go, fãã we go, coo we õõbe ma ti ɓay wo no. 3Naa pud gi mokay la, naa raw wo Betel, ndi joŋ ge ngel siɗ jag wo ne Baa maga hay yiŋ jag me ti wur maga ndi hay nen bone, day hay de ɗaw mege ti faage raŋge maga ndi hay maŋn ɓuy mono. 4Á kal wo hã baare ma waare maga hay wo doo ɓaara ɓuy ne Jakobe, de kelelew ma sug ɓaaran wo no. Jakob raw tee rage go wer koo terebẽŋte maga hay ɓiŋ Sikem ni mono. 5Blam ɓe á kal wo rawge. Joŋge hẽẽne doo Baa kal dusgi wo go ɓi leege ma ti jeŋ wo ni ɓuy, jobo baa blam jar ni Jakob wo gà.
6Jakob day go Lus maga hay diŋ Betel de Jar maga hay wo wer ɓe ni mo ɓuy ɓi sir Kanaan. 7Kal joŋ ngel sii jag ti ngel ni, kal ɗe ngel sen ga : El-Betel, werga Baa hay naa nen ne hẽn nà diŋ ti ngel sen ni, de maga á hay ti ɗee doo hẽn ɓen mono. 8Debora, wãy ma hã pãã ne Rebekan huu go. À teen go wer Betel ni, wer koo Cen maga à ɗen ga Cen-ma-Ro mono.
9Baa naa nen ne Jakob tigriŋ, blam maga á nduu le Paddan-Aram mono, á kaŋ bosaʼ ne hẽn ti. 10Baa wiin ga :
Ɗúu ɓo ga Jakobe,
Ama á ɗe ge ndo
De ɗúu Jakob sen gà so.
Ɗúu ɓo joŋ ge ga Israyele
Á kal kaŋ ɗúu Israyeln ne hẽn nà diŋ doo sen nono.
11Baa wiin ga :
Ndi diŋ Baa ma de Egre-Ɓuy no
Tese, dus wer ɓo go
Sir tiʼ, wo de wer sir wo ngaɓa
Biŋgi wo yaŋ le go see ɓo.
Day waŋre laa ge wo yaŋ le go ɓil ɓo
12Sir maga ndi hay hãn go ne Abraham wo de Isag mono,
Ndi hãn ge ne ndo,
Ne wer mani ɓon wo blam ɓo
Ndi hã ge sir sen yaŋ ge ne hara.
13Baa kal urgi go ciŋ ti ɓe, ti ngel maga á hay fer wããre ne hẽn ni mono. 14Jakob kal jag húulì ti ngel maga Baa hay fer wããre ne hẽn ti ngel ni mono, húulì maga se mee yii ne hẽn ti ni, kaa noo ne hẽn ti lay. 15Jakob kal kaŋ ɗúu ne ngel maga Baa hay fer wããre ne hẽn ni ga Betel.
Biŋgi Benjame, húulí Rasel
16Á pud wo le Betel, day holaŋ ngeln hay yaŋ de gwaʼge ma dayge go Efrata ɗa. Rasel raw biŋgi de gaali. 17De maga á de biŋgi mono, wãy ma de ko biŋ naaren wiin ga : Joŋ hẽẽne wa, ndo daʼ wel we ni pa! 18Rasel hay go huugi, de maga tenen ɓen kal yaŋ go mono, á raw ɗe weln ga : Ben-Oni, ama pan ɓe kal ɗege ɓe ga Benjamen. 19Rasel huu go, à teen go ti faage Efrata, maga diŋ Betlehem mono. 20Jakob kal jag húulì ti tipaale ɓe. Á diŋ húulì roo Rasel maga yaŋ hãã wara mono.
21Israyel kal rawge yaʼ go baa mburyug ɓen ɓaŋla Migdal-Eder.
22De maga Israyel ɓi sir sen ni mono, Ruben kal woge suugi de Bilha, wãy pan ɓe ma klee no, Israyel kal laage ɓe. Jar ni Jakob hay wo hwal ti ɓoge.
23Jar ni Leya wo : Ruben jag wel Jakob no, Simeyoŋ, Lefi, Juda, Isakar wo de Sabulon. 24Jar ni Rasel wo : Josef wo de Benjamen. 25Jar ni Bilha wo, maygebe Raseln wo no : Daŋ wo de Neftali. 26Jar ni Silpa maygebe Leyan wo no : Gad wo de Aser. Mo lag so no diŋ jar ni Jakob maga á biŋ ra le Paddan-Aram mono.
Ferge Jakob ɓiŋ pan ɓe, húulí Isage
27Jakob wo dayge ɓiŋ pan ɓe Isag Mamre, wo Kiryat-Haarba, maga diŋ Hebroŋ, ti ngel maga Abraham hay raŋ wo de Isag ni mono. 28Isag joŋ kiŋgi ɓuy kis ti ɓe doo nenmaʼa. 29Á kal tawge go. Á huu mokay wo tayge de pããre ɓe maga hay wo go de húulí mono, gay doo kiŋgi wo de naw. Jar ni ɓe Esaw wo de Jakob tee wo ne.
လက္ရွိေရြးခ်ယ္ထားမွု
TĨĨGI WERE 35: TUP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Tupuri Bible © Bible Society of Cameroon, 2016. All rights reserved.