Luka 16
16
Byelə səɗe a nə kpanaa taa diyalə kan
1Yesu a mɨna ɗa lagbe dan byelə səɗe, nda sarən atɨ, “A nzə-gɨnəti nee də ka kpana dan. Mya san atɨ kpanangɨn taa diyalə kan, nda dɨ kɨɗan a gɨnətɨ dan. 2Nzə-gɨnətɨngɨn a wa kpanangɨn a ɗiyən le, ‘Ya gətɨ la na dɨ kɨlə nanga? Ge dimsə sa hye ɗa ka taa na vu, gəkɨlə hɨnə ɓa omra gə lyentə.’
3“Kpanangɨn a nza a səɗə ka yedingɨn, nda ɗiyə nəngɨn, ‘ɓə ya na ɗa gəngnə? Həmɨ-hwoɗye nə ɓa omri gə lyentə. Gəngnə taayə mba itɨ lyenti a ɗa, taayə maasə ke na mba ɗaw njiya, sopi wete na woyo ta nyitshe ɓa gi mgban. 4Mbam ɗəng! Hɨn lee sa na ɗa gə ɓwaare a gwadi a luri a hwodarən mye kana omri gə lyentə.’
5“Nda waga myee həmɨ-hwodan a dɨ koɗərən kerye. Nda ɗiyə ma hiɗə atɨ, ‘Nda kiirə ya həmɨ-hwode a dɨ koɗu? Mɨnə hye luwo?’
6“Mangɨn a san atɨ, ‘Maare gange haru fwa-fwat.’
“Kpana a san, ‘Nza tan-tan dorshe ɗɨkdə haru fwat. Hye ɗaka 'ye mbiɗi.’
7“Nda mɨna ɗiyə ma kpeyətə atɨ, ‘Ɓə hye mgban, ya mya dɨ koɗu?’ Mangɨn a san atɨ, ‘Mya dɨ koɗi zumwe ɓwetə haru bəw.’ Kpanangɨn a san atɨ, ‘Nza tan-tan dorshe ɗɨkdə haru fwa-fwat ɓəmbə. Hye ɗaka 'ye mbiɗi.’ She nda pɨrə humwa a ɗa ka myee mbiɗi mya dɨ koɗərən kerye.
8“Nagi a nə sate atɨ taa diyalə ka kpanangɨn, kat ka angɨn Həmɨ-hwodan a humwan gəkɨlə wule kuta nda ɗa gələ nda gwadə nəngɨn gə kɨɗa. Sə mgban a vɨratə, myee aa lee Həmɨnpwa a lee kuta nzaa vɨratə a pɨrgə myee lee Həmɨnpwa. 9Gə-angɨn na dɨ səwnə atɨ, zə kəsəm ndewetə ka gɨnə vɨratɨnə. Nagi ngga mbəə mgban, mya lurəwnə a hwoɗirə a vor pwa.
10“Ma kat mya mwakan gələ nda kɨt sa ɓyeləng ka diyale, ndi ɓa kɨt a kpane mgban ka diyale. Ma kat mgban myaa mwakan a nə sa ɓyeləng, ndaa dɨ kɨt a kpane mgban ka diyale. 11Anda myaa mwakəw a nə gɨnə vɨratɨnə 'ye mya vu atɨ nidərən ka diyale, wonə ɓa mwa a vu gɨnə diyala gaarə a vor pwa? 12Anda tee mba shee da ama a kɨsə a nidərən ka diyale, wonə ɓa vu hɨnggu a nənanga?
13“Kɨsa hiɗə aa dɨ pedə həmi-hwoɗye kpe a ɗarən lyentə a kwa-hiɗə. Ndi ɓa kwo ma hiɗə a mwo ma hiɗə, naasə mgban ndi ɓa koddə ma hiɗə nda ushi ma hiɗə. Sə mgban tee dɨ pedə koɗə Həmɨnpwa ka taa dɨ kpeyə a ɗarən kɨsawne a kwa-hiɗə.”
14Farise a 'ye mya leetɨrən ka mwo taa, tən ɓe kɨl la Yesu a boyo, təna dɨttən a mɨndən ɓaa. 15Nda sarən, “Di hwuna dɨ nggur nəngəwnə a humwa ɓwaare gə mya nəwnə ɓətɨ hwun mi fyemi, shezə Həmɨnpwa lee shee a vor hubosəwnə. Sa ɓwaare a dɨ ngguro atɨ səfemə tən ta ndukodən, a haka Həmɨnpwa sətakɨmə.
Mɨni i kəndəshi
16“Ite Yohana nzə-ɗa batisɨmatə aa nda shi vɨratə, ɓashita Musa ka dorshe da kpalye nə dɨ kənə ɓwaare təfəgye da Həmɨnpwa ka sa tən ɓa ɗa. Ɓəgəng a shitɨ de, myenə dɨ hiwa ka ləmə feme ka həmne da Həmɨnpwa a hakəwnə, nagi ndo ma nee dɨ ɓəri gə nda ɗɨm pɨrtə a həmnəngɨn. 17Nagi pwa ka njiya ɓa pɨrə a mbəə ɓaa, taa ndəng kəng-kəng dɨ vor ɓashita Həmɨnpwa a mya doro ɓa fukə njiya a pɨrə ɓaa.
Kəndəshe a nə taka nzaa hwoɗye
(Matta 19.1-12; Markus 10.1-12)
18“Ma taka nzaa hwoɗye om mesən, mɨni ɗɨm itɨ mati som, sharawnə nda dɨ ɗa ka matɨngɨn. Ma mgban ɗɨm mate mya omtɨrə, sharawnə nda dɨ ɗa ka matɨngɨn.”
Byelə səɗe a nə nzə-gɨnətə ka Liyazarus
19Yesu a mɨna ɗarən a byelə səɗə atɨ, “A nzə-gɨnəti nə də, sɨɓwetɨ dan ɗuwo gaaɗəti, baase dan nə wula nggaara kɨr-kɨr. Sɨzɨmtɨ pepeyi nda dɨ zɨmə fərə-fərə. 20A nzə-poriti nə də a hangɨn mya dɨ warən atɨ Liyazarus ka ngaashe a sɨsən. Nda dɨ bə kwatɨfə hwoda nzə-gɨnətɨngɨn gə nyitshe. 21Liyazarus a dɨ nza njiya gə nda ɗəm mosəryi sɨzɨmte dɨ kajiya dɨ vor kpaa zɨmta nzə-gɨnətɨngɨn. Sakye mgban a dɨ shi ta nəə ɓokyee a sɨsən.
22“Aa ɓongə nzə-poritɨngɨn a mbɨrə, malyenye a nggutən a muɗə kan a haka Ibɨraim. Nzə-gɨnətə mgban a mbɨrə mya ɗɨk wongɨn. 23Gaarə a vɨrata won, a haa nzə-gɨnətɨngɨn a dɨ tənəə də, nda maddə nəngɨn a niyə a naa Ibɨraim a haa ɓongətə, Liyazarus nee nza gyengəngɨn. 24Nda waha a sa, ‘Baa Ibɨraim, zə ɗa purushi, lyana Liyazarus a nda shipdə gyelsən a haɓye, nda shi asɨ tənyi a jiima, gəkɨlə hɨnə dɨ tənə kɨr-kɨr a vor ɗiya nə.’
25“Ibɨraim a luwa a san, ‘Nze de, zə ɗyanga pee, ite hyene gaarə a vɨratə ka myentə, hye ɗɨm shi-pepeye kat, haa ta nɨngu ka nzaa vɨratə. Liyazarus mgban a itɨngɨn sɨne a vor tənətə ka poritə. Ɓəgəng ɓə piya, hye pɨrə vor tənətə. 26A liya lanə ɓəmbə, tee niyi kaɓa gwe nə bə wakasəm, gəkɨlə ɓe ama aa maɗə dɨ hanəkenə a zə harəkəwnə, ɓe ama mgban a maɗa dɨ harəkəwnə a shi hanəkenə.’
27“Nzə-gɨnətɨngɨn a luwa a san, ‘Kuso-kuso baa, hɨn poru nzə-njiya, zə lyen Liyazarus a nda zə ka lyenshe a hwoda baagi. 28Hɨnə ka mwafe də tuf, a nda zə gəkɨlə nda dɨ nggəl kwakingrən gə ɓe tənaa mɨna kwaɗa tɨfə ɗiya nə na gə də, tən kana mbərə.’
29“Ibɨraim a san, ‘Di gaarə a vor vɨratə mwafenga nee ka ɓashita Musa ka dorshe da kpalye da Həmɨnpwa, a tənaa kɨl Fyel-kwakye ka gɨraha darən.’
30“Mangɨn a mɨna san, ‘Ə'ə, aa sə kwe baa Ibɨraim. Di hye kana niyə ama a maɗə dɨ taane, a wudə a boyərən le, tən ɓa sardə kwakingrən ka le da mangɨn, tən ɓa por-njiya a haka Həmɨnpwa.’
31“Ibɨraim a san, ‘Anda mwafenga aa dɨ koddə la ɓashita Musa ka dorshe da kpalye a boyo, nagi ama a maɗə dɨ taane a zə hakarən a boyərən le, tənaa dɨ mwaka mangɨn.’ ”
လက္ရွိေရြးခ်ယ္ထားမွု
Luka 16: bcy
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.