Luka 17
17
Yesu a kənə lagbe dan shee a nə səhase ka nggurgə səhase
(Matta 18.6-7,21-22; Markus 9.42)
1Yesu a sa lagbe dan, “Myaa dɨ ɗongə shee ɓa ɗɨkdə ɓwaara a ɗa səhase, shezə sə oti ka ma ɓa gəə mgbaalə səhasəngɨn. 2Wule mangɨn, ɓa pɨrən mya ɓoyən tɨmtə a wurangɨn a ɗiman a vor gbɨnuwtɨ sɨkorən, ka ite nda ɗɨkdə nzə-ɓyelənge a ɗa səhase. 3Gə-angɨn, nzam ka ɗaasɨtə.
“Kpeyəsa kana ɗəw səhase, gɨrarən, ndi kana por-njiya, nggurən gən. 4Ndi kana ɗəw səhase a laka tukolukpe a fəre hiɗə, ndi kana nyisu a laka tukolukpe atɨ, ‘Hɨn poru-njiya,’ nggurəngə səhasəngɨn.”
5Kpe-lagbe dan a san, Həmɨmiye, “Zə nyerədə mwadiyale denə.”
6Yesu Həmɨmiye a luwa a sarən, “Hwun kana gə ka mwadiyale nagi kəng-kəng ɓətɨ daasə bagalə, hwun ɓa mba bwetə a boyə kaɓa kada kpanaa ɓətɨ jiike atɨ, ‘Muɗa hye kangə vor gbɨnuwtɨ sɨkorən,’ kadangɨn ɓa koddə korminga.
7“Na hye nee ka kɨsa dɨ ɗəw lyentə a gaashe, naasə mgban mbage nda dɨ jinu a kaake, ndi kana mɨna a hwoɗye, hye ɓa san atɨ, ‘Zə wa tan-tan nza piya hye zɨmshe’? 8Ə'ə! Ndaa dɨ san atɨ, ‘Zə ɗe sɨzɨmtɨ kaade hye sɨ vi, hɨn kana zɨmshe a mbəə, hye shea ɗa hɨnggu a zɨma’? 9Ndi ɓa kangə ta ɗa kɨsangɨn usəkətə gəkɨlə nda ɗa lyentɨ dan? 10Sə mgban hwun kana ɗa sa mya ɗɨkdəwnə atɨ a hwuna ɗa, ɓə kana hwuna sa atɨ, ‘Hin kɨse ɓəmbə, lyente mya ɗɨkdenə atɨ a hina ɗa, kotə mbak-mbak hina ɗa.’ ”
Yesu a dɨmdə dagde dɨ sɨtɨ imi bəw
11Ite Yesu nee dɨ muɗə Urshelima, nda koɗə dɨ ɓoro-njiya waka Samariya ka Galili. 12Nda tɨla gbyel ka itɨ vɨraa ɓyeləngti, sɨne dɨ pɨrə vor vɨratɨngɨn, nda peyə ka ji-dagde bəw təne kangə haɓongətə. 13Təna maddə kormingrən a waha bərəng, “Yesu Həmɨ-hwoɗye, zə ɗa purusenə.”
14Yesu a nidərən a sa, “Zə wudəmə haka kɨsehəmye da Yawude, hwuna bɨlərən sɨsəwnə təna, pyeltəwnə kat.” Təne a nə tɨfe dɨ muɗi dagde a dɨmgə sɨsərən, təna gə shet-shet.
15Manə hiɗə dɨ vorsərən, ndi ɓe niyə dagde dɨmə ɓə piya, nda mɨna ka beesən a haa Yesu a gə də nda maddə kormɨngɨn ta ɓondi Həmɨnpwa. 16Nda shi a fukə mbwayi Yesu ta ɗan usəkətə. Mangɨn nəə nzə-Samariyati.
17Yesu a ɗiyə, “A ɓwaare bəw mya dɨmərən də dagde ma? Ɓə a ndo haa gə myee mbiɗi dombiɗa? 18Taa ama də mgban ɓa mɨna asɨ humwa Həmɨnpwa a ndukodən, rumanə nə ɓəmba?” 19Yesu a san, “Zə maɗi muɗi, mwadiyale dəw vu sɨtɨ dwattə.”
Shita həmne da Həmɨnpwa
(Matta 24.23-28,36-41)
20Ite i Farise a ɗiyən lə fəra həmne da Həmɨnpwa ɓa shikan, Yesu a sarən, “Di həmne da Həmɨnpwa aa dɨ shi bwang hwun ta nan ka diingəwna. 21Ɓwaare mgban aa dɨ nza ɗəng ta sa atɨ, ‘Niyəm sɨnə ganə!’ Naasə ‘Niyəm sɨndə gaarə!’ Səɓo həmne da Həmɨnpwa nə a wakasəwnə.”
22Nda mɨna sa lagbe dan, “Fəre nee dɨ shi, hwun ɓa hɨma atɨ giɓa hwuna naa fəra hɨn Nze da Ɓwaara ɓa mɨnakan, shezə hwunaa dɨ naa fərəngɨn. 23Ɓwaare ɓa maɗə ta səwnə atɨ, ‘Niyəm sɨndə gaarə!’ Naasə ‘Niyəm sɨnə ganə!’ Ɓe hwunaa maɗə ta gyeɓi ta mbəgə hee ɓaa, atɨ hwun ɓa ɨltən. 24Gəkɨlə shitɨ de hɨn Nze da Ɓwaara, ɓa gə ɓətɨ wuɗilta mgbarati a pwa, a nggi kana wuɗilə a gyenganə, ngga muɗə kiɗar a fukə gyengaarə. 25A kwamətə hɨn ɓa tənə kɨr-kɨr, mi wanetɨnə ɓa kwori.
26“Naya a gə kaaɗəng a nzata Nuhu, sə mgban ɓa gə a fəra hɨn Nze da Ɓwaara ɓa mɨna a vɨratə kan. 27Ɓwaare a pɨrə zəmshe ka soɓwe, tən ta ɗəməsə mandye baa tənaa yə lee fəra Nuhu a pɨrə koombote nda ɗa. Haɓye a shi pəltə a bəə, təna soɓwo a mbərə kat.
28“Sə mgban a nzata Lutu. Ɓwaare a nza ɗəng ta zɨməsəshe, ta soɓwi, ta ɗəri a ɗərdərən, ta hawi ta nwoshe, 29baa tənaa yə lee fəra Lutu a dɨmgə vor vɨratɨ Sodom də. Də ɗiye ka kundɨrə kyanatə a janga dɨ pwa ka jeemingɨn a njemə nəngrən, təna hyenə a mbərə kat.
30“Sə mgban ɓa gə a fəra hɨn Nze da Ɓwaara ɓa mɨna a vɨratə kan. 31A fərəngɨn ma kat a nə vɨne ɓe ndaa yə mɨna a pɨrə hwodan atɨ ɓa nggur asə nda ɓə giɓə a dɨmə. Ma mgban gaarə a gaashe dan, ɓe ndaa yə viriwa atɨ ɓa nggur asə nda ɓə giɓə. 32Hwuna ɗyanga ka sa bəng metɨ Lutu.#17.32 Naasə: Tiyatə 19.26. 33Ma kat ɓəri atɨ ɓa kəpdə myensən, ɓa ɗongərə, ma mgban ɗongə myensən, ndi ɓa kəpdə. 34Hɨnə dɨ səwnə a tukotɨngɨn ɓwaare kpe ɓa pukə dingɨltə ta sheni, mya nggur ma hiɗə a ɗaka hiɗə. 35Mandye kpe mgban ɓa kopo ta sɨda a mgbe-təmye, mya nggur mate hiɗə a ɗaka hiɗə.”#17.35 Kada 36 nə a nə, gə ɓə tam a nagi ndo dorshi. Kadangɨn a sa, “Morye kpe ɓa gə gaashe, mya nggur ɓwaara hiɗə a ɗaka ma hiɗə.”
37Lagbe dan a ɗiyən atɨ, “Həmɨmiye, a ndo haa shingɨn ɓa ɗa?”
Nda sarən atɨ, “Haa wo duwe a bə də, də mgban nzəkɨlikitə ɓa peyə.”
လက္ရွိေရြးခ်ယ္ထားမွု
Luka 17: bcy
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.