Luka 2
2
Mwasa Yesu
1Mye nee də, a vor bətɨngɨn, a nzata həmə kpanə Roma a mya wa atɨ Kaisar Agustus, nda hiwa a vor njiya Roma kat, atɨ a mya bəl ɓwaare kat. 2Kotə hiwatɨ kwamətə a nzata Koriniyus nggwamnatɨ Siriya.#2.2 Hama Siriya nee a pukə Hama kpanə Roma, Kaisar Agustus. 3Ɓwaare kat, nagi ndo ma a muɗə vɨrasən gə myaa bəltən. 4Sə mgban Yusufu a maɗə a ɗaka Nazarat a vor njiya Galili a muɗə Betalami ite a vor njiya Yawudiya, gə mya bəltən a Betalami, a vɨraa mwasa həmɨn Dawuda. Gə ndi Yusufu sɨnə dɨ kada baagə yə Dawuda. 5Nda muɗə ka Maryamu, ite nda tiyagərə ɓa dɨmə, itɨngɨn waptɨ darə kən mwasati. 6Ite təne də shee a vor Betalami, yedi mwasatə a markarə, 7də Maryamu a mwasa nzə-kwamətə darə. Ngga vuttən a takrən ka sɨbaashe a bədən a nə kaaka a vor koombote mya dɨ və sɨgɨrtə shee də. Gə taa haa jangati kaarən a hwoɗi omye.
Malyene a janga ka ji-jinshe
8Ka tukote mya mwasa Yesu də, ji-jinshe nee a vor kaakə Betalami dɨ gɨra doomi mbage darən. 9A hangɨn malyene da Həmɨnpwa a janga ka ji-jinshe, ɓɨrta Həmɨnpwa a takadərən, kala a gərən. 10Malyene a sarən, “Ɓe kala aa gəwnə. Ləmə femə ka hanɨngti na shikəwnə kan, a la haa ɓa nɨngəwnə kan ka mbiɗiti ɓwaare kat. 11Supo a vor vɨratɨnə da Dawuda, myee mwasəwnə Nzə-mbəha. Sɨnə Ma Həmɨnpwa a Yaɓwarən, sɨnə Həmɨmiye. 12Ɗate hwun ɓa ɗa hwuna leerən nə yang: Hwun ɓa pa nzə-kpalame nə mya vuttən a takrən ka sɨbaashe a bədən a nə kaaka a vor koombote mya dɨ və sɨgɨrtə shee də.”
13Də a hangɨn təkə-təkətɨ i malyeni a janga dɨ pwa a pa malyena nə, tən ta ɓondi Həmɨnpwa a kalan-gbəətə, tən ta sa atɨ, 14“Fukatə kat hɨnggə Həmɨnpwa arə a vor pwa nə. Ɗolta Həmɨnpwa kotɨnə ga a haka minə a vɨratə, a myee haa a dɨ nɨngə Həmɨnpwa kaarən.”
15Naya malyenye a ɗaka ji-jinshe a mɨnə pwa, ji-jinshe a boyəsə atɨ, “Ndɨka mya zəmə vor Betalami gə mya naa sa ɗa, ka la Həmɨnpwa a boyəm.”
16Təna maɗə tan-tan, a zə a pa Maryamu ka Yusufu, təna naa nzə-kpalaməngɨn a nə kaaka a vor koombote mya dɨ və sɨgɨrtə shee də. 17Ite ji-jinshe ɓe naa Yesu, təna boyə yə sɨnggən ka mbiɗiti ɓwaare kat, sa təna nan, ka la malyene a boyə nə Yesu. 18Myee kat kɨl la ji-jinshe a boyo a ndələ ka ləngɨn. 19Hɨnggə Maryamu, ngga kɨr ləməgingɨn ta verəwdərən a hubosə, nggi ta ndəli ka naarə ləməgingɨn. 20Ji-jinshe a mɨnə haa nzaasərən, tən ta ndukodə Həmɨnpwa ta ɓondirən gə shee təna naarən ka ləməgyee təna kɨlə ɓətɨya malyene a boyərən.
21Beetɨ bətə fwa-fwat, yə sɨnggə Yesu a ɗa sa ɓashite Həmɨnpwa a və Musa a nə lakəwne. Təna ɗɨkə nze kwake atɨ Yesu. Sɨnə kwaka malyene a ɗɨkə nze ite nuwogən nee ka wapsən.
Mye bɨladə Yesu a Shafe
22Ite bəte mya ɓiyə gə kwalə mwasatə kənə, Maryamu ka Yusufu a koɗə la ɓashite Həmɨnpwa a və Musa a boyə nə sa nuwotə ɓa ɗa ka nzəngrə beetɨ mwasatə. Gə-angɨn təna zə ka Yesu a Shafe a Urshelima gə təna bɨladən a haka Həmɨnpwa. 23Gəkɨlə ɓashita Həmɨnpwa a sa atɨ, “Anda nzə-kwaməte metə a mwasa nzə-muro, nggi ɓa zəkan a ɗifə Həmɨnpwa.”#2.23 Naasə: Dɨmatə 13.2,12. 24Sə mgban ɓashita Həmɨnpwa a sa atɨ, mbak-mbak yə sɨnggə nze a vədə həmtɨ, ji-guguyi kaake kpe, naasə mgban ji-guguyi gɨrtə kpe. Sə mgban yə Maryamu ka Yusufu a ɗa.
25A fərəngɨn ama nə də a vor Urshelima mya wa atɨ Simiyon, ma pepeyə ka kala Həmɨnpwa a hubosən. A nzaasən, sɨne dɨ kula fəra Həmɨnpwa ɓa shi ka mi Israila ka Nzə-mbəha də. Pitɨ Ɗəmɗəmtə nee dɨ koɗi kan. 26Pitə liya boyən atɨ, ndi ɓa naa Ma Həmɨnpwa a Yaɓwarən, a Nzə-mbəha da Həmɨnpwa, nda ɓə mbɨrə. 27A fərəngɨn Pitɨ Ɗəmɗəmtə a boyə Simiyon atɨ a nda zə Shafe. Maryamu ka Yusufu mgban shi ka Yesu a Kwa-Shafe#2.27 Kwa-Shafe nə haa bwangə Shafe da Yawude. gə təna bɨladən a haka Həmɨnpwa ɓətɨ ɓashita Həmɨnpwa a və Musa a boyo. 28A hangɨn Simiyon a ɗifdə tɨfəngɨn a luu nze. Nda ɓondi Həmɨnpwa ta sa atɨ,
29“Hye Həmɨmiye Magbake,
zə ɗaka kɨsa dəw
a nda ɗaka vɨratə
a muɗə ka hanɨngtə
ɓətɨya hye boyo.
30Hɨn naa Nzə-mbəhaa ka dii,
31hye vədən gə nda mbədə myee dəw,
ka mbiɗitɨ mi vɨratə kat.
32Sɨnə ɓɨrte ɓa bɨldə Həmɨnpwa
a haka myee aa leerən,
sɨnə fukata myee dəw,
a mi Israila.”
33Yə sɨnggə Yesu a ndələ ka ləməgye Simiyon a boyo. 34Simiyon a lama kaarən pepe. Nda sa Maryamu atɨ, “Gəkɨlə le da nzanga ɓwaare hananang a vor Israila ɓa pawo a fokə, ɓa ɗɨkdə imi mgban təna kangə dwat a ɗɨm mbətə. Imi hananang ɓa kworən, sɨnə ɓətɨ sɨgbəshi la ɓwaare a kwo tənaa mwakan. 35Maryamu, kwote mye ɓa kwo nzanga ɓa shikəw ka səɗə-yedye hashi-hashi, ka yedi-kɨttɨ mwasasən. Yedi-kɨttɨngɨn ɓa pasa ma mya zubrən ka sungwa. Sɨnə ɓa ɗɨkə mya mba la a hubo ɓwaare a dɨmaadən a haa bwange bwang.”
36Itɨngɨn mgban kpalte mya dɨ wa atɨ Hanatu nee a Shafe. Kotə njita Fanuwel, dɨ kwirə Asha, matɨ kpantɨ iirati. Ngga nzaa hwoɗye ite kote rikiti, aa ɓongə, beetɨ kyawatə tukolukpe murəngrə a mbɨrə. 37Ngga nzaa nggamsawne kyawatə bəwtə fwa-fwat a mbiɗi-fwat. A vor kyawatɨngɨn kat, kote a Shafe mba-dɨ-mba, tukotə ka fəre. Ngga dɨ kala Həmɨnpwa gbəətə, ka hiwtə, ka gone. 38Ite Simiyon nee dɨ lama ka Maryamu ka Yusufu, Hanatu a pɨra a tiya ɓondi Həmɨnpwa. Nggi ta bwe le a nə Yesu ka myee dɨ kula fəra Urshelima ɓa ɗɨm nəngrə də ka gwadəha da Ma Həmɨnpwa a Yaɓwarən.
39Beetɨ ite Maryamu ka Yusufu ɗa sa kat ɓashita Həmɨnpwa a boyo, təna mɨnə Nazarat vɨraa nzaasərən a vor Galili. 40Yesu a pɨrə humwa ta nduko. Ndi ta la ka lele, gwadəha da Həmɨnpwa mgban nee ɓwaa kan.
Yesu ka mi kpan-kpani ji-lee kəndəshe a Shafe
41Wanə-wanə, yə sɨnggə Yesu a dɨ zə Urshelima gə kwalə Lawuttə, a ite mi Israila a dɨmagə kɨsawne gə njiya Ijip. 42Beetɨ ite Yesu a ɗa kyawatə bəw a mbiɗi-kpe, yə sɨnggən a zəkan a Urshelima gə Kwaləngɨn. 43Mye ɓe ɗa kwalə Lawuttɨngɨn mbəə, yə sɨnggən a kɨsa tɨfe ta muɗə hwoɗye, tənaa leyə atɨ tən ɗaka Yesu a bee a vor Urshelima. 44Təna woyo a ɗa bətə hiɗə təne dɨ kana atɨ Yesu nee a vor ɓwaaree dɨ muɗa. Ite təna niyə tənaa nan, təna tiya ɨlsən a vor mi leetə ka yə ndeweye. 45Tən ɓe woyo ɨltən dɨ ɗi le tənaa nan, təna ɓə mɨnə vor Urshelima ta ɨltən də. 46Beetɨ bətə mwaakɨn, təna pan a vor Shafe, sɨne nza waka mi kpan-kpani ji-lee kəndəshe, dɨ sa kwakingɨn dɨ kɨl la təna dɨ boyo, ndi ta ɗiyərən ləməgye mgban. 47Tən myee a hangɨn kat ta ɗa ndəle ka wule lele dan ka ləməgyee dɨ dɨma dɨ kwaamɨngɨn. 48Ite yə sɨnggən a pan a Shafe, təna ɗa ndəle kɨr-kɨr. Nuwogən a ɗiyən, “Nze de, mɨnə ɗa hye ɓə ɗenə yang? Hɨn ka baagu hina pɨrə ɨlsa a mbəgə hee ka yedi-kɨttə kɨr-kɨr gə hinaa nəw!”
49Nda ɗiyərən, “Mɨnə ɗa hwun ɓa ɓə ɨlti? Hwuna leyə atɨ ɓə kana na gə vor hwoda Baagi?” 50Tənaa lee naarə la nda dɨ boyo.
51Nda koɗərən təna mɨnə Nazarat. Nda pɨrə humwa ta koddə yə sɨnggən. Nggi nuwogən mgban ngga kɨr ləməgingɨn ta səɗə nəngrən a hubosə. 52Yesu a pɨrə humwa ta nduko ka lele, ta ɗɨm humwa-shengtə dɨ haka Həmɨnpwa ka ɓwaare.
လက္ရွိေရြးခ်ယ္ထားမွု
Luka 2: bcy
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
Luka 2
2
Mwasa Yesu
1Mye nee də, a vor bətɨngɨn, a nzata həmə kpanə Roma a mya wa atɨ Kaisar Agustus, nda hiwa a vor njiya Roma kat, atɨ a mya bəl ɓwaare kat. 2Kotə hiwatɨ kwamətə a nzata Koriniyus nggwamnatɨ Siriya.#2.2 Hama Siriya nee a pukə Hama kpanə Roma, Kaisar Agustus. 3Ɓwaare kat, nagi ndo ma a muɗə vɨrasən gə myaa bəltən. 4Sə mgban Yusufu a maɗə a ɗaka Nazarat a vor njiya Galili a muɗə Betalami ite a vor njiya Yawudiya, gə mya bəltən a Betalami, a vɨraa mwasa həmɨn Dawuda. Gə ndi Yusufu sɨnə dɨ kada baagə yə Dawuda. 5Nda muɗə ka Maryamu, ite nda tiyagərə ɓa dɨmə, itɨngɨn waptɨ darə kən mwasati. 6Ite təne də shee a vor Betalami, yedi mwasatə a markarə, 7də Maryamu a mwasa nzə-kwamətə darə. Ngga vuttən a takrən ka sɨbaashe a bədən a nə kaaka a vor koombote mya dɨ və sɨgɨrtə shee də. Gə taa haa jangati kaarən a hwoɗi omye.
Malyene a janga ka ji-jinshe
8Ka tukote mya mwasa Yesu də, ji-jinshe nee a vor kaakə Betalami dɨ gɨra doomi mbage darən. 9A hangɨn malyene da Həmɨnpwa a janga ka ji-jinshe, ɓɨrta Həmɨnpwa a takadərən, kala a gərən. 10Malyene a sarən, “Ɓe kala aa gəwnə. Ləmə femə ka hanɨngti na shikəwnə kan, a la haa ɓa nɨngəwnə kan ka mbiɗiti ɓwaare kat. 11Supo a vor vɨratɨnə da Dawuda, myee mwasəwnə Nzə-mbəha. Sɨnə Ma Həmɨnpwa a Yaɓwarən, sɨnə Həmɨmiye. 12Ɗate hwun ɓa ɗa hwuna leerən nə yang: Hwun ɓa pa nzə-kpalame nə mya vuttən a takrən ka sɨbaashe a bədən a nə kaaka a vor koombote mya dɨ və sɨgɨrtə shee də.”
13Də a hangɨn təkə-təkətɨ i malyeni a janga dɨ pwa a pa malyena nə, tən ta ɓondi Həmɨnpwa a kalan-gbəətə, tən ta sa atɨ, 14“Fukatə kat hɨnggə Həmɨnpwa arə a vor pwa nə. Ɗolta Həmɨnpwa kotɨnə ga a haka minə a vɨratə, a myee haa a dɨ nɨngə Həmɨnpwa kaarən.”
15Naya malyenye a ɗaka ji-jinshe a mɨnə pwa, ji-jinshe a boyəsə atɨ, “Ndɨka mya zəmə vor Betalami gə mya naa sa ɗa, ka la Həmɨnpwa a boyəm.”
16Təna maɗə tan-tan, a zə a pa Maryamu ka Yusufu, təna naa nzə-kpalaməngɨn a nə kaaka a vor koombote mya dɨ və sɨgɨrtə shee də. 17Ite ji-jinshe ɓe naa Yesu, təna boyə yə sɨnggən ka mbiɗiti ɓwaare kat, sa təna nan, ka la malyene a boyə nə Yesu. 18Myee kat kɨl la ji-jinshe a boyo a ndələ ka ləngɨn. 19Hɨnggə Maryamu, ngga kɨr ləməgingɨn ta verəwdərən a hubosə, nggi ta ndəli ka naarə ləməgingɨn. 20Ji-jinshe a mɨnə haa nzaasərən, tən ta ndukodə Həmɨnpwa ta ɓondirən gə shee təna naarən ka ləməgyee təna kɨlə ɓətɨya malyene a boyərən.
21Beetɨ bətə fwa-fwat, yə sɨnggə Yesu a ɗa sa ɓashite Həmɨnpwa a və Musa a nə lakəwne. Təna ɗɨkə nze kwake atɨ Yesu. Sɨnə kwaka malyene a ɗɨkə nze ite nuwogən nee ka wapsən.
Mye bɨladə Yesu a Shafe
22Ite bəte mya ɓiyə gə kwalə mwasatə kənə, Maryamu ka Yusufu a koɗə la ɓashite Həmɨnpwa a və Musa a boyə nə sa nuwotə ɓa ɗa ka nzəngrə beetɨ mwasatə. Gə-angɨn təna zə ka Yesu a Shafe a Urshelima gə təna bɨladən a haka Həmɨnpwa. 23Gəkɨlə ɓashita Həmɨnpwa a sa atɨ, “Anda nzə-kwaməte metə a mwasa nzə-muro, nggi ɓa zəkan a ɗifə Həmɨnpwa.”#2.23 Naasə: Dɨmatə 13.2,12. 24Sə mgban ɓashita Həmɨnpwa a sa atɨ, mbak-mbak yə sɨnggə nze a vədə həmtɨ, ji-guguyi kaake kpe, naasə mgban ji-guguyi gɨrtə kpe. Sə mgban yə Maryamu ka Yusufu a ɗa.
25A fərəngɨn ama nə də a vor Urshelima mya wa atɨ Simiyon, ma pepeyə ka kala Həmɨnpwa a hubosən. A nzaasən, sɨne dɨ kula fəra Həmɨnpwa ɓa shi ka mi Israila ka Nzə-mbəha də. Pitɨ Ɗəmɗəmtə nee dɨ koɗi kan. 26Pitə liya boyən atɨ, ndi ɓa naa Ma Həmɨnpwa a Yaɓwarən, a Nzə-mbəha da Həmɨnpwa, nda ɓə mbɨrə. 27A fərəngɨn Pitɨ Ɗəmɗəmtə a boyə Simiyon atɨ a nda zə Shafe. Maryamu ka Yusufu mgban shi ka Yesu a Kwa-Shafe#2.27 Kwa-Shafe nə haa bwangə Shafe da Yawude. gə təna bɨladən a haka Həmɨnpwa ɓətɨ ɓashita Həmɨnpwa a və Musa a boyo. 28A hangɨn Simiyon a ɗifdə tɨfəngɨn a luu nze. Nda ɓondi Həmɨnpwa ta sa atɨ,
29“Hye Həmɨmiye Magbake,
zə ɗaka kɨsa dəw
a nda ɗaka vɨratə
a muɗə ka hanɨngtə
ɓətɨya hye boyo.
30Hɨn naa Nzə-mbəhaa ka dii,
31hye vədən gə nda mbədə myee dəw,
ka mbiɗitɨ mi vɨratə kat.
32Sɨnə ɓɨrte ɓa bɨldə Həmɨnpwa
a haka myee aa leerən,
sɨnə fukata myee dəw,
a mi Israila.”
33Yə sɨnggə Yesu a ndələ ka ləməgye Simiyon a boyo. 34Simiyon a lama kaarən pepe. Nda sa Maryamu atɨ, “Gəkɨlə le da nzanga ɓwaare hananang a vor Israila ɓa pawo a fokə, ɓa ɗɨkdə imi mgban təna kangə dwat a ɗɨm mbətə. Imi hananang ɓa kworən, sɨnə ɓətɨ sɨgbəshi la ɓwaare a kwo tənaa mwakan. 35Maryamu, kwote mye ɓa kwo nzanga ɓa shikəw ka səɗə-yedye hashi-hashi, ka yedi-kɨttɨ mwasasən. Yedi-kɨttɨngɨn ɓa pasa ma mya zubrən ka sungwa. Sɨnə ɓa ɗɨkə mya mba la a hubo ɓwaare a dɨmaadən a haa bwange bwang.”
36Itɨngɨn mgban kpalte mya dɨ wa atɨ Hanatu nee a Shafe. Kotə njita Fanuwel, dɨ kwirə Asha, matɨ kpantɨ iirati. Ngga nzaa hwoɗye ite kote rikiti, aa ɓongə, beetɨ kyawatə tukolukpe murəngrə a mbɨrə. 37Ngga nzaa nggamsawne kyawatə bəwtə fwa-fwat a mbiɗi-fwat. A vor kyawatɨngɨn kat, kote a Shafe mba-dɨ-mba, tukotə ka fəre. Ngga dɨ kala Həmɨnpwa gbəətə, ka hiwtə, ka gone. 38Ite Simiyon nee dɨ lama ka Maryamu ka Yusufu, Hanatu a pɨra a tiya ɓondi Həmɨnpwa. Nggi ta bwe le a nə Yesu ka myee dɨ kula fəra Urshelima ɓa ɗɨm nəngrə də ka gwadəha da Ma Həmɨnpwa a Yaɓwarən.
39Beetɨ ite Maryamu ka Yusufu ɗa sa kat ɓashita Həmɨnpwa a boyo, təna mɨnə Nazarat vɨraa nzaasərən a vor Galili. 40Yesu a pɨrə humwa ta nduko. Ndi ta la ka lele, gwadəha da Həmɨnpwa mgban nee ɓwaa kan.
Yesu ka mi kpan-kpani ji-lee kəndəshe a Shafe
41Wanə-wanə, yə sɨnggə Yesu a dɨ zə Urshelima gə kwalə Lawuttə, a ite mi Israila a dɨmagə kɨsawne gə njiya Ijip. 42Beetɨ ite Yesu a ɗa kyawatə bəw a mbiɗi-kpe, yə sɨnggən a zəkan a Urshelima gə Kwaləngɨn. 43Mye ɓe ɗa kwalə Lawuttɨngɨn mbəə, yə sɨnggən a kɨsa tɨfe ta muɗə hwoɗye, tənaa leyə atɨ tən ɗaka Yesu a bee a vor Urshelima. 44Təna woyo a ɗa bətə hiɗə təne dɨ kana atɨ Yesu nee a vor ɓwaaree dɨ muɗa. Ite təna niyə tənaa nan, təna tiya ɨlsən a vor mi leetə ka yə ndeweye. 45Tən ɓe woyo ɨltən dɨ ɗi le tənaa nan, təna ɓə mɨnə vor Urshelima ta ɨltən də. 46Beetɨ bətə mwaakɨn, təna pan a vor Shafe, sɨne nza waka mi kpan-kpani ji-lee kəndəshe, dɨ sa kwakingɨn dɨ kɨl la təna dɨ boyo, ndi ta ɗiyərən ləməgye mgban. 47Tən myee a hangɨn kat ta ɗa ndəle ka wule lele dan ka ləməgyee dɨ dɨma dɨ kwaamɨngɨn. 48Ite yə sɨnggən a pan a Shafe, təna ɗa ndəle kɨr-kɨr. Nuwogən a ɗiyən, “Nze de, mɨnə ɗa hye ɓə ɗenə yang? Hɨn ka baagu hina pɨrə ɨlsa a mbəgə hee ka yedi-kɨttə kɨr-kɨr gə hinaa nəw!”
49Nda ɗiyərən, “Mɨnə ɗa hwun ɓa ɓə ɨlti? Hwuna leyə atɨ ɓə kana na gə vor hwoda Baagi?” 50Tənaa lee naarə la nda dɨ boyo.
51Nda koɗərən təna mɨnə Nazarat. Nda pɨrə humwa ta koddə yə sɨnggən. Nggi nuwogən mgban ngga kɨr ləməgingɨn ta səɗə nəngrən a hubosə. 52Yesu a pɨrə humwa ta nduko ka lele, ta ɗɨm humwa-shengtə dɨ haka Həmɨnpwa ka ɓwaare.
လက္ရွိေရြးခ်ယ္ထားမွု
:
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.