yuhanna 2
2
aza 2
ṯaga ṯete kezir weni kaana
1mer nani ŋwamin ṯɔɽɔl, na ṯaga nani ṯete kezir weni kaana weḏi jaliilŋw, na gwu lenyin kweḏi Yecu-ŋa nani ki ṯaga-na tɔk. 2ner ornuti Yecuŋwuzi limeḏgen li eḏele ki ṯaga. 3mezi nabiṯ amɽiṯaḏa, ta na lenyin kweḏi Yecu ŋa eca ŋwu: liti ledi klu nabiṯa mac. 4na Yecu eca ŋwu: kwaw kwalu, a kweḏi ŋa karḏa nani nyi gwu a? lomur linyi liti limenyi ṯimayinizi kineni mac. 5na lenyin eca yaḏaama ŋwu: muŋw andaci ŋaŋwuzi eḏerri kwɔmne kwere, e ta erri. 6na ŋwii nani nyirlil kinaŋw ŋwukitarzelu, ŋweḏi ŋaw, kaka eḏi gwu yahuuḏ əḏya weḏi ṯuzuɽa nana. ŋwii ŋweḏi ŋaw-na ŋwere ŋwere ŋwir ŋaw lizapiya kaka ṯuḏni ya dufɔkwɽeny. 7nezi Yecu eca ŋwu: urezer ŋwii ŋaw. ner zi urezi kworɔ dedep. 8ta nuŋw zi eca ŋwu: pezerzi ma ŋɔkɔ, ezefizi kwijowiṯi kweḏi ṯaga. ner zi efizi. 9na ma kwijowiṯ nyeŋlani ŋaw ŋimɔ rɔḏine nabiṯ, nuŋw zi ere elŋece ezir winḏir gwu mac, na yaḏaam yipezezi orɔ yilŋiicazi. na kwijowiṯ ornuti kworu kweḏi ṯaga, 10nuŋw eca ŋwu: lizi leṯi pa inḏeḏa lirina nabiṯa kwizaw kerreny, mindaŋ mer adiḏi eḏi be ta, eṯir zi ma inḏeḏa kwajila kworɔ; na ŋa kwumɔ duŋgweci kwizaw mindaŋ kirem kwumorɔ. 11na Yecu erri kwɔmne ŋgwu ṯayṯi kwir ŋilim kezir weni kaana weḏi jaliilŋw, nuŋw gi ruwezi ŋiniṯi lu ŋuŋun. ta na gwu ma limeḏgen emnizi, ner alliḏa ŋunduŋwu rugwori nana. 12kwaḏan ta, ner ele kafranahum lenyin ŋali, lieŋgen li, na limeḏgen tɔk, ner gwu nani ŋwamin ŋwere caw.
Yecu muŋw gwu ruta lizi liruza heykala luŋw
13na iid weḏi yahuuḏ weni ṯiṯamḏa ŋiɽany adiḏi, na Yecu taŋi urzaliim. 14nuŋw zi kaṯazi ki heykal-na kla leṯiilila nyiḏri, yaŋal yi, lurru li-na rac, na kla leṯupupi kwuruuza-na tɔk, linanalu. 15muŋw emme luta, nuŋw li ruti yaŋali, nyiḏri nyi-na rac, nuŋw zi ru ki heykal-na. nuŋw balaci loru kla kwuruuza lu, nuŋw zi ṯanyaci rarbeza la. 16nuŋw zi andaci kla leṯiilila lurruŋi, nuŋw zi eca ŋwu: uṯir zi kiṯay, eṯi ruza duənuŋw lu kweḏi Papa kwinyi kaka ḏukwan ṯeḏi yiili mac. 17na limeḏgen aɽazi yey ŋiɽaŋal ŋa dap, ŋuluḏina, ŋaruŋw:
zurum kwenyi yaḏa ki duənu kwɔŋwa.
18nezi yahuuḏ aalanizi, ner eca ŋwu: ŋilim ŋir ṯaŋ ŋenyji baŋaci, erra ŋa ma kwɔmne ŋgwu? 19nezi Yecu eŋnici, nuŋw zi eca ŋwu: kiyazar heykala lu wu wirlinelu ter, enyi ta aci, enyi ta ṯimazi ki ŋwamin ṯɔɽɔl. 20ta na yahuuḏ eca ŋwu: ner aci heykala wu yiḏleyu ruɽi-riɽen-nyirlil, na a kwiili ḏa mindaŋ ma yi aru ŋwu: ki ŋwamin ṯɔɽɔl enyi aɽazi? 21lakin na aŋna wuŋwun orɔ wandizaŋw yi, wuruzaŋw heykal. 22muŋw ṯa diɽi ŋiɽany-na, ta na gwu limeḏgen aɽazi yey ŋa ŋandizaŋw zi; ner zi emni ŋuluḏina, na ŋa ŋandizazi Yecu tɔk.
23kinaŋw muŋw nani urzaliim, ki iid-na weḏi kuruu keni tiṯamḏa ŋiɽany, ner alliḏa luru yiriny yuŋwun rugwori nana, mer eze ŋilima ŋerraŋw zi. 24lakin na Yecu ere alliḏa ŋunduŋwuzi ṯugwori nana mac, 25kaka ilŋiicaŋw gwu ŋundu lizi tatap; nuŋw ere naŋni kwere mac eḏi zi ŋi unḏizi ki ŋeḏi kwizigwunaŋ, kaka ilŋiicaŋwzi gwu ŋundu rac ŋinani kwizigwunaŋ-na.
လက္ရွိေရြးခ်ယ္ထားမွု
yuhanna 2: KIB1967
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nuba, Koalib Ngirere New Testament © First published by the British and Foreign Bible Society in Khartoum in 1967.