मत्ती 13
13
बीज राहवणे आले ची मिसाल
(मरकुस 4:1–9; लूका 8:4–8)
1ओही ङिओ ईशु घरा महु निकलती कर झील चे किनारे जती ब़ेहला। 2#लूक 5:1–3ते ओचे गोढु इसड़ी बङी भीड़ भेली हुली कि ओ हेक ब़ेड़ी उपर चढ़ती गेला ते सारी भीड़ भोंये उपर झील चे किनारे लारे भिली रेहली। 3ते ओणे वानु मिसाला मां ब़ोहत सारीया बाता केहलीया,
“हेक बीज राहवणे आला बीज राहवणे वास्ते निकड़ला। 4राहते बेले कोच्छ मार्ग़ चे किनारे ढेले ते पखीयां ने आती कर वानु चुग़ती गेले। 5कोच्छ बीज पत्थरीली भोंये उपर ढेले, जिठे वानु घणी माटी कोनी मिड़ली ते गहरी माटी ना मिलणे ची वजह वे जल्दी उग़ती आले। 6ते जब सूरज निकड़ला तां ब़लती गेले, ते ज़हड़ ना पकड़ने ची वजह सूखती गेले। 7कोच्छ बीज झाड़ीया मां ढेले ते झाड़ीया बङीया हुती कर वानु दब़ाती नाखले। 8पर कोच्छ बीज आच्छी भोंये उपर ढेले, ते फल आणला, कुई साऔ गुणा, कुई साठ गुणा, ते कुई त्रीस गुणा। 9जाये सुणने चे कान हो ऊं सुणती गिहो।”
मिसाल चा मकसद
(मरकुस 4:10–12; लूका 8:9,10)
10चैला ने गोढु आती कर ईशु नु केहले, “तु लौका लारे मिसाला मां कां बाता करी ?”
11ओणे उत्तर ङिला, “तम्हानु तां स्वर्ग़ चे राज़ चे भेदा ची समझ ङिली गेली, पर वानु कोनी। 12#मत्ती 25:29; मरकु 4:25; लूक 8:18; 19:26कांकि जाये कनु छै, ओनु ङिले जई, ते ओचे कनु घणे सारे हुती जई। पर जाये कनु कोच्छ कोनी, ओचे कनु जको कोच्छ ओचे गोढु छै, ऊं वी गेहती गेले जई। 13मैं वांचे लारे मिसाला मां ऐवास्ते बाता करे कि,
“वे ङेखते हुले ना ङेखी,
ते सुणते हुले ना सुणी।
14“तां वांचे बारे मां यशायाह ची हा भविष्यवाणी पुरी हुली,
“ ‘तम्ही काना लारे तां सुणा, पर समझा ना,
ते आंखी लारे तां ङेखा, पर तम्हानु कहीं सूझी ना।
15कांकि जा लौका चे मन मोटे हुती गेले,
ते काना लारे ऊंचे सुणी
ते आपणीया आंखीया बन्द करती गेलीया,
कङी इसड़े ना हो कि वे आंखीया लारे ङेखी,
ते काना लारे सुणी,
ते मना लारे समझी
ते फिरती जई
मैं वांचा उद्धार करी।’
16 #
लूक 10:23,24 “पर धन्न छी तम्चीया आंखी, कि वे ङेखी, ते तम्चे कान कि वे सुणी। 17कांकि मैं तम्हानु सच्च किहे पला कि ब़ोहत से भविष्यवक्ता ने ते धर्मीया ने चाह्ले कि जको बाता तम्ही ङेखा पले, ङेखो, पर कोनी ङेखलीया, ते जको बाता तम्ही सुणा पले, सुणो, पर कोनी सुणलीया।
बीज राहवणे ची मिसाल चा मतलब
(मरकुस 4:13–20; लूका 8:11–15)
18“हमा तम्ही बीज राहवणे आले ची मिसाली चा मतलब सुणा। 19जको कुई राज़ चा वचन सुणती कर ना समझी, ओचे मना मां जको कोच्छ राहले गेले हुते, ओनु ओ दुष्ट आती कर खोसती कर चाह्ला जाये, ईं ऊंही बीज छै, जको मार्ग़ चे किनारे राहले गेले हुते। 20ते जको पत्थरीली भोंये उपर राहले गेले, ये वे छी, जको वचना नु सुणती कर तुरन्त खुशी लारे मनती गिही। 21पर आपणे भीतर ज़हड़ ना राखणे ची वजह कनु वे थोड़े ही ङिहां चे छी। ते जिसे बेले वचना ची वजह कनु वांचे उपर क्लेश जा परेशानी आवे, तां वे तुरन्त ठोकर खाती जई। 22जको झाड़ीया मां राहले गेले, ईं ऊंही बीज छै, जको वचना नु सुणे, पर ऐ संसारा ची चिन्ता ते धन चा धोक्का वचना नु दब़ाती नाखे, ते ऊं फल ना आणी। 23जको आच्छी भोंये मां राहले गेले, ये वे छी, जको वचना नु सुणती कर समझे, ते फल आणे, कुई साओ गुणा, कुई साठ गुणा, ते कुई त्रीस गुणा।”
जंगली बीजा ची मिसाल
24ईशु ने वानु हेक ङुजी मिसाल ङिली, “स्वर्ग़ा चा राज़ ओ बन्दे चे आलीकर छै जेह्णे आपणे खेता मां आच्छे बीज राहले। 25जिसे बेले बन्दी नूहली ही पलती ली ते ओचा दुश्मन आती कर कणकी चे बीजा मां जंगली बीज राहली कर चाह्ला गेला। 26जिसे बेले कणकी ची सीटी लाग़ली ते जंगली खड़ा ची ब़ूटी वी ङिसली। 27ऐचे उपर घरा चे दासा ने आती कर मालिका नु केहले, ‘ओ स्वामी, का तु आपणे खेता मां आच्छे बीज कोनी राहले हुते? बल्ति जंगली खड़ा ची ब़ूटी ओचे मां किठु आली?’ 28ते ओणे वानु केहले, ‘ईं कुई दुश्मना चे काम छै’। दासा ने ओनु केहले, ‘दुधी का इच्छा छै, कि अम्ही जती कर वानु भेली करती गिहुं?’ 29ओणे केहले, ‘ना इसड़े ना हो कि जंगली ब़ूटा नु भेले करते समय उपर तम्ही कणकी चे ब़ूटा नु वी पटती नाखा। 30फसल बाढणे चे समय तक ङुंहु नु हेकी लारे बध्धु ङिया, ते बाढणे चे समय उपर मैं बाढणे आला नु किही कि पेहले तां जंगली खड़ा चे ब़ूटा नु चुणती कर ब़ालणे वास्ते वांचे ग़ंढे ब़ांहती गेहजा, ते कणकी नु माये पिएड़ा मां भेले करती नाखा।’ ”
राई चे ङाणा ची मिसाल
(मरकुस 4:30–32; लूका 13:18,19)
31ईशु ने वानु हेक नेरी मिसाल ङिली, “स्वर्ग़ चा राज़ राई चे हेक ङाणे आलीकर छै, जानु कुई बन्दे ने चती कर आपणे खेता मां राहती ङिले। 32ऊं सारे बीजा महु छोटे तां हुवे पर जिसे बेले बङे हुती जाये, तब सब साग़-पात कनु बङे हुवे, ते इसड़े ब़ूटे हुती जाये कि आसमाना ची पखीयें आती कर ओचे लड़ीया उपर बसेरा करी।”
खमीरा ची मिसाल
(लूका 13:20,21)
33ईशु ने वानु हेक नेरी मिसाल सुणाली, “स्वर्ग़ा चा राज़ खमीरा आलीकर छै जानु कुई असतरी ने चती कर तीन पंसेरी आट्टे मां मिलाती ङिला ते हुते-हुते सारे आट्टे खमीर हुती गेले।”
मिसाल चा इस्तेमाल
(मरकुस 4:33,34)
34ये सारीया बाता ईशु ने मिसाला मां लौका नु केहलीया, ते बिना मिसाला चे ओ वानु कहीं ना केहता। 35कि जको वचन भविष्यवक्ता चे जरिये केहला गेलता, ओ पूरा हो, “मैं मिसाल केहणे वास्ते आपणे मुँह खोली ते वा बाता नु जको सृष्टि ची शुरुआत कनु लुकलीया पलतीया वानु किही।”
जंगली खड़ा ची मिसाल
36बल्ति ओ भीड़ी नु छोड़ती कर घरे आला, ते ओचे चैला ने ओचे गोढु आती कर केहले, “खेता चे जंगली खड़ा ची मिसाल अम्हानु समझाती ङे।”
37ईशु ने वानु उत्तर ङिला, “आच्छे ङाणा नु राहवणे आला मैं इन्साना चा पूत छै। 38खेत संसार छै, आच्छे ङाणे राज़ ची ऊलाद्ध छै, ते जंगली ङाणे दुष्ट ची ऊलाद्ध छै। 39जिसे दुश्मना ने ओनु राहले ओ शैतान छै, फसल बाढणे ऐ जग़त चा अन्त छै, ते फसल बाढणे आले स्वर्ग़दूत छी। 40तां जिसे बेले जंगली खड़ भेले करले जई ते बाढले जई, ते इसड़े ही जग़त चे अन्त मां हुवी। 41मैं इन्साना चा पूत आपणे स्वर्ग़दूता नु भेज़ी, ते वे ओचे राज़ महु सारे पापीया नु, ते जको बन्दा कनु पाप करवावी वानु भेले करे। 42ते वानु जाखते ची भट्टी मां नाखती ङिये जिठे रोवणे ते ङांत पीसणे हुवी। 43ओ समय धर्मी आपणे ब़ा चे राज़ मां सूरजा आलीकर चमके। जाये सुणने चे कान हो ऊं सुणती गिहो।
लुकले आले खजाने ची मिसाल
44“स्वर्ग़ा चा राज़ खेता मां लुकले आले धन आलीकर छै, कुई बन्दे ने ओनु सोहले ते बल्ति लुकाती नाखले, ते खुशी लारे जती कर आपणे सारा कोच्छ बेचती नाखले ते ओ खेत मोल गेहती गेला।
अनमोल मोतीयां ची मिसाल
45“बल्ति स्वर्ग़ा चा राज़ हेक व्यपारीया चे आलीकर छै, जको आच्छे मोतीयां ची खोज मां हुता। 46जिसे बेले हेक कीमती मोत्ती मिड़ला ते ओणे जती कर आपणे सारे कोच्छ बेचती नाखले ते ओनु मोल गेहती गेले।
जाल ची मिसाल
47“बल्ति स्वर्ग़ा चा राज़ ओ बङे जाला चे आलीकर छै जको समुन्दरा मां नाखती ङिला जाये, ते हर-प्रकार चीया माछलीया नु समेटती आवे। 48ते जिसे बेले जाल भरीती जाये, ते मछुवारे ओनु किनारे उपर छिकती आवी ते ब़ेसती कर आच्छीया-आच्छीया माछलीया नु ठांवा मां भेलिया करी, ते निक्कमीया-निक्कमीया नु भुकाती नाखी। 49ऐ जग़त चे अन्त मां इसड़े ही हुवी। स्वर्ग़दूत आती कर दुष्टा नु धर्मीया कनु अलग़ करे। 50ते वानु जाखते ची भट्टी मां नाखती ङिये जिठे रोवणे ते ङांत पीसणे हुवी।”
पुराणी ते नवीं शिक्षा चा मतलब
51ईशु ने आपणे चैला नु केहले, “का तम्ही ये सारीया बाता समझलीया?” वाणे केहले, “हव्वे।”
52ईशु ने वानु केहले, “ऐवास्ते हर हेक शास्त्री जको स्वर्ग़ा चे राज़ ची शिक्षा पाती चुकला, ओ घरा आलीकर छै, जको आपणे भीतरु नवींया ते पुराणीया चीजा नु काढ़ी।”
नासरत मां ईशु चा कद्दर कोनी करला
(मरकुस 6:1–6; लूका 4:16–30)
53जिसे बेले ईशु ये सारीया मिसाला केहती चुकला, तां उठु चाह्ला गेला। 54ते आपणे शहरा मां आती कर वांचे प्राथनाघरा मां वानु इसड़ा उपदेश ङिऊं लाग़ला, कि वे अचम्भित हुती कर किहुं लाग़ले, “ऐनू हा ज्ञान ते सामर्थ चे काम किठु मिड़ले? 55का हा दरखाणा चा पूत कोनी? ते का ऐची आई चे नां मरियम कोनी ते ऐचे भावां चे नांवे याकूब, यूसुफ, शमौन ते यहूदा कोनी? 56ते का ऐचीया ब़ेहणी अम्चे बीच मां ना रिही? बल्ति ऐनू हा सब ज्ञान किठु मिड़ला?” 57#यूह 4:44 यूं करती वाणे ओचे बारे मां ठोकर खाली।
पर ईशु ने वानु केहले, “भविष्यवक्ता चे आपणे देश ते आपणे घरा नु छोड़ती नेरे किठी निरादर ना हुवी।” 58ते ओणे ओठे वांचे अविश्वास ची वजह ब़ोहत से सामर्थ चे काम कोनी करले।
လက္ရွိေရြးခ်ယ္ထားမွု
मत्ती 13: ODR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
CC BY-NC-ND 4.0