ମାଥିଉ 8
8
ଗଟେକ୍ କୁଷ୍ଟରଗିକେ ଯୀଶୁ ବ୍ଲ୍କ୍ଲା
(ମାର୍କ ୧:୪୦-୪୫; ଲୁକ ୫:୧୨-୧୬)
1ଜ୍ଡେବ୍ଳ୍ ଯୀଶୁ ଡଙ୍ଗ୍ରେ ହ୍ଣି ତ୍ଳେ ଉତ୍ରି ଆଇଲା, ସେଡେବ୍ଳ୍ ବେସି ଲକ୍ମ୍ନ୍ ତାର୍ ହ୍ଚେ ହ୍ଚେ ଗ୍ଲାଇ। 2ଆରେକ୍ ଦ୍କା, ସେଡେବ୍ଳ୍ ଏକ୍ଲା କୁଷ୍ଟରଗି ଯୀଶୁର୍ ଲ୍ଗେ ଆସି ଗଡେ ହ୍ଳି ଜୁଆର୍ କ୍ରି କଇଲା, “ଏ ମାପ୍ରୁ, ତୁଇ ଯଦି ମ୍ନ୍ କ୍ରୁଲିସ୍, ତ୍ବେ ମକେ ବ୍ଲ୍ କ୍ରୁହାର୍ସି।” 3ସେତାକ୍ ଯୀଶୁ ନିଜାର୍ ଆତ୍ ଲାମାଇ ତାକେ ଚୁଇଲା ଆର୍ କଇଲା, “ମୁଇ ମ୍ନ୍କ୍ରୁଲେ, ତୁଇ ବ୍ଲ୍ ଅଉ।” ସେ ଦାହ୍ରେ ସେ କୁଷ୍ଟରଗେ ହ୍ଣି ବ୍ଲ୍ ଅଇଲା। 4ଯୀଶୁ ସେ ଲକ୍କେ କଇଲା, “ସାବ୍ଦାନ୍, ମୁଇ ତକେ ବ୍ଲ୍ କ୍ରିଆଚି ବ୍ଲି କାକେ କ୍ଉନାଇ, ମ୍ତର୍ ଜାଇ ଜାଜକାର୍ ଲ୍ଗେ ନିଜ୍କେ ଦ୍କାଉ, ଆରେକ୍ ମୋଶା ଜୁଇ ଜୁଇ ବିଷୟ୍ ଇଶ୍ଵର୍କେ ଦାନ୍ ଦେତାର୍ ଗିନେ ଆଦେଶ୍ ଦେଇଆଚେ, ସେରି ସେମ୍ନ୍କାର୍ ଲ୍ଗେ ସାକି ଦେତାର୍ ଗିନେ ମାନ୍ସି କ୍ର୍।”
ଯୀଶୁ ରୋମୀୟ ସେନାପତିକେ ବ୍ଲ୍କ୍ଲା
(ଲୁକ ୭:୧-୧୦)
5ଯୀଶୁ କପର୍ନାହୁମ୍ ସ୍ହରେ ହଚ୍ଲା ମାଡେ ରମ୍ ରାଇଜାର୍ ଶଏଗଟ୍ ସେନା ମ୍ନ୍କାର୍ ମୁକିଆ ତାର୍ ଲ୍ଗେ ଆସି ଗ୍ୱାରି କ୍ରି କଇଲା, 6“ଏ ମାପ୍ରୁ, ମର୍ ଚାକର୍ ନିର୍କୁଳୀ ରଗେ ହ୍ଳି ବେସି ଡଣ୍ଡ୍ ବଗୁଲା, ଅବେ ସେ ଗ୍ରେ ଟାଟିଏ ସଇଲା ଆଚେ।” 7ଯୀଶୁ ତାକେ କଇଲା, “ମୁଇ ଆସି ତାକେ ବ୍ଲ୍ କ୍ରିନ୍ଦ୍।” 8ମ୍ତର୍ ଶଏଗଟ୍ ସେନା ମ୍ନ୍କାର୍ ମୁକିଆ ଉତର୍ଦିଲା, “ମାପ୍ରୁ ତୁଇ ମର୍ ଗ୍ରେ ଆସ୍ସି, ଅନ୍କ୍ରି ଯଗ୍ୟ ମୁଇ ନାଇ। ମ୍ତର୍ ସେତିହ୍ଣି ହ୍ଦେକ୍ ଆଦେଶ୍ ଦେ ମର୍ ଚାକର୍ ବ୍ଲ୍ ଅଇଦ୍। 9କାଇତାକ୍ ମୁଇ ଅଦିକାରି ମ୍ନାର୍ ତ୍ଳେ ରିଲେକ୍ ହେଁ, ମର୍ ତ୍ଳେ ସ୍ଇନ୍ମ୍ନ୍ ଆତ୍ତି। ମୁଇ ଗଟେଲକ୍କେ ଯା କଇଲେ ସେ ଯାଇଦ୍। ଆର୍ ଗଟେଲକ୍କେ ଆସ୍ କଇଲେ ସେ ଆସେଦ୍। ଆରେକ୍ ମର୍ ଚାକର୍କେ ଇରିକ୍ର୍ ବ୍ଲି କଇଲେକ୍, ସେ ସେରି କ୍ରେଦ୍।” 10ଯୀଶୁ ଇରି ଶୁଣି ଚାନିଆ ଅଇ ହ୍ଚେ ଆସ୍ତିରିଲା ଲକ୍ମ୍ନ୍କେ କଇଲା, “ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ଇସ୍ରାଏଲ୍ ଦେଶାର୍ ଲକ୍ମ୍ନ୍କାର୍ ବିତ୍ରେ ଅନ୍କ୍ରି ବିଶ୍ବାସ୍ କ୍ର୍ତା ଲକ୍ ମୁଇ ଦ୍କି ନ୍କେରି। 11ମ୍ତର୍ ମୁଇ ତୁମୁକ୍ମ୍ନ୍ କ୍ମ୍ଲେ, ହୁର୍ତିବିର୍ ସ୍ବୁ ଜାଗାର୍ ବେସି ବିଜାତି ଲକ୍ମ୍ନ୍ ଆସିକ୍ରି ଅବ୍ରାହାମ୍, ଇସ୍ହାକ୍ ଆର୍ ଯାକୁବାର୍ ସ୍ଙ୍ଗ୍ ସ୍ର୍ଗ୍ ରାଜିର୍ ବଜିତ୍ଇ କାମ୍କେ ବ୍ସ୍ତି, 12ମ୍ତର୍ ରାଜିର୍ ଯିହୁଦି ଲକ୍ମ୍ନ୍କେ ହ୍ଦାଇ ଅନ୍ଦାରେ ହ୍କାଉତି। ସେତି ସେମ୍ନ୍ ଦୁକ୍କ୍ଷ୍ଟ ହାଉତି ଆର୍ ଦାତ୍ କିଡି ମିଡି ଅଇଦ୍।” 13ଆରେକ୍ ଯୀଶୁ ଶଏଗଟ୍ ସେନାର୍ ମୁକିଆକେ କଇଲା, “ଗ୍ରେ ଯା, ତୁଇ ଜ୍ନ୍କ୍ରି ବିଶ୍ବାସ୍ କ୍ରି ଆଚ୍ସି, ତର୍ତ୍ଇ ସେହର୍ ଅଉଅ।” ସେମାଡେ ତାର୍ ଚାକର୍ ବ୍ଲ୍ ଅଇଲା।
ଯୀଶୁ ବେସି ରଗିମ୍ନ୍କେ ବ୍ଲ୍କ୍ଲା
(ମାର୍କ ୧:୨୯-୩୪; ଲୁକ ୪:୩୮-୪୧)
14ହ୍ଚେ ଯୀଶୁ ପିତରାର୍ ଗ୍ରେ ଆସି ପିତରାର୍ ସ୍ତୁର୍ସି ବେସି ଜ୍ର୍ଅଇ କ୍ଟେ ସଇରିଲାର୍ ଦ୍କ୍ଲା। 15ସେଡେବ୍ଳ୍ ଯୀଶୁ ତାର୍ ଲ୍ଗେଯାଇ ତାକେ ଚୁଇଲା, ଆର୍ ତାର୍ ଗ୍ଗାଳାର୍ ଜର୍ ଚାଡ୍ଲି, ଆରେକ୍ ସେ ଉଟିକ୍ରି ସେମ୍ନ୍କେ ସେବା କ୍ରୁକେ ଲାଗ୍ଲି। 16ଜ୍ଡେବ୍ଳ୍ ବେଳ୍ ବୁଡି ସ୍ଞ୍ ଅଇଲି, ସ୍ଡେବ୍ଳ୍ ବୁତ୍ଆତ୍ମା ଡ୍ସିରିଲା ଲକ୍ମ୍ନ୍କେ ଯୀଶୁର୍ ଲ୍ଗେ ଆନ୍ଲାଇ, ସେତି ଯୀଶୁ ଆଦେଶ୍ ଦେଇକ୍ରି ବୁତ୍ ମ୍ନ୍କେ ଚାଡାଇଲା ଆର୍ ସ୍ବୁ ରଗେଜ୍ରେ ହ୍ଳିରିଲା ଲକ୍ମ୍ନ୍କେ ହେଁ ବ୍ଲ୍କ୍ଲା, 17ଜ୍ନ୍କ୍ରି ଯିଶାଇୟ ବବିଶତ୍ କ୍ତା କ୍ଉତାଲକ୍ କଇରିଲା କ୍ତା ସ୍ତ୍ ଅଇଦ୍, ସେତାର୍ଗିନେ ଯୀଶୁ ଇସ୍ବୁକାମ୍ କ୍ଲା, ସେ ଅମାର୍ ଦୁକ୍କ୍ଷ୍ଟ ନିଜେ ହାଇଲା ଆର୍ ଅମୁକ୍ ବ୍ଲ୍କ୍ଲା।
ଯୀଶୁର୍ ଚେଲା ଅମ୍କେ ଯଗ୍ୟ?
(ଲୁକ ୯:୫୭-୬୨)
18ଯୀଶୁ ନିଜାର୍ ଚାରିହାକ୍ ଲକ୍ ରୁଣ୍ତଲାର୍ ଦ୍କି, ଗାଲିଲୀ ଜିଲାର୍ ସ୍ମ୍ଦୁର୍ ସେହାଟିକେ ଜ୍ମ୍କେ ତାର୍ ଚେଲାମ୍ନ୍କେ ଆଦେଶ୍ ଦିଲା। 19ଆରେକ୍, ଗଟେକ୍ ନିଆଇ ଶିକାଉତା ଲକ୍ ଯୀଶୁର୍ ଲ୍ଗେ ଆସି କଇଲା, “ଏଗୁରୁ, ତୁଇ ଜୁଇ ଜାଗାକେ ହେଁ ଯାସି, ମୁଇ ତର୍ ଚେଲା ଅମ୍କେ, ତର୍ ହ୍ଚେ ହ୍ଚେ ଆସିନ୍ଦ୍।” 20ସେଡେବ୍ଳ୍ ଯୀଶୁ ତାକେ କଇଲା, “କଲିଆ ମ୍ନ୍କାର୍ ହାର୍ ଆଚେ, ଆକାଶାର୍ ଚେଳେ ମ୍ନ୍କାର୍ ଗୁଡା ଆଚେ, ମ୍ତର୍ ମୁଇ ମାନାଇ ହିଲା ରେମ୍କେ କ୍ଣ୍ତେକ୍ ହେଁ ଜାଗାନାଇ।” 21ଆରେକ୍, ଚେଲାମ୍ନ୍କାର୍ ତ୍ଇହ୍ଣି ଗଟେକ୍ ଚେଲା ଯୀଶୁକେ କଇଲା, “ଏ ମାପ୍ରୁ, ମକେ ଗ୍ରେ ଜ୍ମ୍କେ ଆଦେଶ୍ ଦେ, ମର୍ ଉବା ମ୍ଲା ହ୍ଚେ ମୁଇ ତାକେ ମ୍ସ୍ଣେ ତହିକ୍ରି ତର୍ ଚେଲା ଅମ୍କେ ଆସିନ୍ଦ୍।” 22ମ୍ତର୍ ଯୀଶୁ ତାକେ କଇଲା, “ମର୍ ଚେଲା ଅମ୍କେ ମର୍ହ୍ଚେ ଆଉ, ମ୍ଲା ଲକାର୍ ଗିନେ ଚିନ୍ତା କ୍ର୍ନାଇ, ଯେମ୍ନ୍ ଆତ୍ମାୟ୍ ମ୍ରି ଆଚ୍ତି, ସେମ୍ନ୍ ଇ ମ୍ଲାଲକ୍କେ ମ୍ସ୍ଣେ ତ୍ହ୍ତି।”
ହାଣି ହ୍ବନ୍କେ ଯୀଶୁ ତିର୍କ୍ଲା
(ମାର୍କ ୪:୩୫-୪୧; ଲୁକ ୮:୨୨-୨୫)
23ଯୀଶୁ ଗଟେକ୍ ଡଙ୍ଗାଇ ଚ୍ଗ୍ଲାକେ, ତାର୍ ଚେଲାମ୍ନ୍ ହେଁ ତାର୍ ହ୍ଚେ ଗ୍ଲାଇ। 24ଆରେକ୍, ଦ୍କା, ସ୍ମ୍ଦୁରେ ଅନ୍କ୍ରି ହାଣି ହ୍ବନ୍ ଅଇଲି ଯେ, ଉଲ୍କି ମାରି ଡଙ୍ଗାଲ୍ଗେ ହାଣି ବ୍ର୍ତି ଅମ୍କେ ଲାଗ୍ଲି, ମ୍ତର୍ ଯୀଶୁ ଡଙ୍ଗାଇ ହ୍ଚ୍ବାଟ୍ ସଇରିଲା। 25ଆର୍ ଚେଲାମ୍ନ୍ ଯୀଶୁକେ ଉଟାଇକ୍ରି କଇଲାଇ, “ଏଗୁରୁ, ଉଦାର୍ କ୍ର୍, ଅମି ମ୍ଲୁ।” 26ଯୀଶୁ ସେମ୍ନ୍କେ କଇଲା, “ଏ ଅଳ୍କ୍ ବିଶ୍ବାସିମ୍ନ୍, ତୁମିମ୍ନ୍ କାଇତାକ୍ ଏଡେକ୍ ଡିରୁଆ?” ସେଡେବ୍ଳ୍ ଯୀଶୁ ଉଟିକ୍ରି ହ୍ବନ୍ ଆର୍ ଉଲ୍କିକେ ଦ୍ମ୍କାଇ କ୍ରି କଇଲା, ଆରେକ୍ ସ୍ବୁ ତିର୍ ଅଇଲି। 27ସେଡେବ୍ଳ୍ ଲକ୍ମ୍ନ୍ ଚ୍ମ୍କି କ୍ରି କଇଲାଇ, “ଏ କ୍ନ୍କା ଲକ୍, ଏ କେ ଯେ, ହ୍ବନ୍ ଆର୍ ସ୍ମ୍ଦୁର୍ ଆର୍ ଆଦେଶ୍ ମାନ୍ତି।”
ବୁତ୍ଆତ୍ମା ଡ୍ସ୍ଲା ଦୁଇଲକ୍କେ ଯୀଶୁ ବ୍ଲ୍କ୍ଲା
(ମାର୍କ ୫:୧-୨୦; ଲୁକ ୮:୨୬-୩୯)
28ହ୍ଚେ ଯୀଶୁ ସ୍ମ୍ଦୁର୍ ଲିଙ୍ଗି ସେହାଟି ଗଦରୀୟ ମ୍ନ୍କାର୍ ସହ୍ରେ କେଟ୍ଲା, ବୁତ୍ଆତ୍ମା ଡ୍ସ୍ଲା ଦୁଇ ଲକ୍ ମ୍ସ୍ଣେ ହ୍ଣି ବାରି ତାକେ ବେଟ୍ଲାଇ। ସେ ବୁତ୍ଆତ୍ମା ଡ୍ସ୍ଲା ଲକ୍ମ୍ନ୍ ଭୟ୍କାର୍ ଡିରାଉତି ରିଲାଇ, ସେତାର୍ଗିନେ ଡିରିକ୍ରି ସେବାଟ୍ ଦେଇ କେ ହେଁ ଜା ଆସ୍ କ୍ରୁନାହାର୍ତି ରିଲାଇ। 29ଆର୍ ଦ୍କା, ସେ ବୁତ୍ଆତ୍ମାମନ୍ ଯୀଶୁକେ ଦ୍କି ବେଲ୍କି ଅଇକ୍ରି କଇଲାଇ, “ଏ ଇଶ୍ଵରାର୍ ହଇସି, ଅମାର୍ ଲ୍ଗେ ତର୍ କାଇ କାମ୍? ଇଶ୍ୱର୍ ଆମୁକେ ଡଣ୍ଡ୍ ନ୍ଦେତା ଆଗ୍ତୁ, ତୁଇ କାଇରି ଆମୁକେ ଡ୍ଣ୍ତ୍ ଦେମ୍କେ ଇତି ଆଇଲିସ୍?” 30ଆରେକ୍ ସେମ୍ନ୍କାର୍ ତ୍ଇହ୍ଣି ଦୁରି ଗଟେକ୍ ଗୁଷ୍ରା ମ୍ନ୍ଦା ଚ୍ର୍ତି ରିଲାଇ। 31ସେତାକ୍ ବୁତ୍ଆତ୍ମାମ୍ନ୍ ଯୀଶୁକେ ଗ୍ୱାରି କ୍ରି କ୍ମ୍କେ ଲାଗ୍ଲାଇ, “ଜ୍ଡେବ୍ଳ୍ ଅମୁକ୍ମ୍ନ୍ ଚାଡାଉସି, ସେଡେବ୍ଳ୍ ଆମୁକେ ଗୁଷ୍ରାମ୍ନ୍କାର୍ ବିତ୍ରେ ହ୍ଟାଇ ଦେ।” 32ଯୀଶୁ ସେମ୍ନ୍କେ କଇଲା, “ଯାହା।” ସେତାର୍ଲାଗି ବୁତ୍ଆତ୍ମାମ୍ନ୍ ବାରି ଗୁଷ୍ରା ମ୍ନ୍କାର୍ ବିତ୍ରେ ହୁର୍ଲାଇ। ଆରେକ୍ ଦ୍କା, ଗୁଷ୍ରାମ୍ନ୍ ବେଗି ଦ୍ବ୍ଳି ଜାଇ ଗ୍ଡିଆ ବାଟ୍ ଦେଇ ସ୍ମ୍ଦୁରେ ଅଦ୍ରି ବୁଡି ମ୍ଲାଇ। 33ଆରେକ୍, ଗୁଷ୍ରା ଚ୍ରାଉତା ଲକ୍ମ୍ନ୍ ହ୍ଳାଇ ଜାଇ ସ୍ହରେ ଆର୍ ଗାମେ, ସେ ସ୍ବୁ ଗଟ୍ଣା ବିଷୟେ ଆର୍ ବୁତ୍ଆତ୍ମା ଦ୍ର୍ଲା ଲକ୍ମ୍ନ୍କାର୍ ସ୍ଙ୍ଗ୍ ଜୁଇରି ଜୁଇରି ଗଟିରିଲି, ସେ ସ୍ବୁକ୍ତା କଇଲାଇ। 34ଆରେକ୍ ଦ୍କା, ସ୍ହରାର୍ ଆର୍ ଗାମାର୍ ସ୍ବୁଲକ୍ ଯୀଶୁକେ ବେଟ୍ ଅମ୍କେ ଆଇଲାଇ, ଆରେକ୍ ତାକେ ବେଟି ସେମ୍ନ୍କାର୍ ସ୍ନ୍ଦିଏ ହ୍ଣି ବାରି ଜ୍ମ୍କେ ଗ୍ୱାରୁକେ ଲାଗ୍ଲାଇ।
လက္ရွိေရြးခ်ယ္ထားမွု
ମାଥିଉ 8: BDVNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.