ရှာန်လုကာ 6
6
အခန်း (၆)
ဥပုသ်မာန်းရာတ်ပင်းအရှာန်
(ရှာန်မဿဲ ၁၂:၁-၈။ ရှာန်မာကု ၂:၂၃-၂၈)
1ဥပုသ်မာန်းရာတ်ရအာမှါခ့်ခါ ကိုယ်တော်ယေရှုယောက် တပယ့်တော်တာတ်ကား အန်ကလာန်တေဒေ ဖြတ်သောလာန်ဘဲမှါခ့်ခါ တပယ့်တော်တာတ်ကား အန်သတူတေဒေကွန်ဘန်း လာပ်ခေါက်တေဒေ သဟူးတေယောက် ဆဘွတ်ပန်း သတူတေဒေ ယုတ်ကြီးမှာ။ 2အန်၌မှါခ့်ခါ ဖာရိရှဲစယ်ယာတာတ်ကား “ကိုယ်တော်ယေရှုဘင်းတပယ့်တော်တာတ်တေ ဟနိမ်ကား ဥပုသ်မာန်းရာတ်တုံန်းဘေ အအွန်သင့်သဘင်းအရာတေ ဟမာန်ငှါးအွန်ကြီးဒေ” ညယ် ငှေါကြီးမှာ။
3ကိုယ်တော်ရီးဒါး “ရှာန်းပလာန်ဒါဝိဒ်ယောက် ဟိန်နောက်လိုက်သမီဆတာတ်ကား ယုတ်ခေါ့ပ်နင်းကြီးမှါခ့်ခါ ရှာန်းပလာန်ဒါဝိဒ်ဟာနိမ်အွန်နီမှာ ငှေါဘင်းနာတေ ကျမ်းကျိန်းနောင်းဘေ ဟနိမ် အကျယ်ပတ်ကြီးရားရဲ။#6:3 အန်ဘင်းအချိန်ကား ရှာန်းပလာန်ဒါဝိဒ်ကား ရှောလုရှာန်းပလာန်တုံန်းဟက် ကတ်ပန်းနင်းဘင်းအချိန်ထှာမှာ။ ၁ရာ ၂၁:၁-၆ 4ဟိန်ကား ဘုရားရှာန်ဘင်း တဲတော်နောင်းပါ#6:4 တဲတော်ငှေါဘင်းနာကား ဘုရားရှာန်ကျေမ်းတေ ရည်ညွှန်းသလားထှာမှာ။ ဟမာန်တွာတ်ငှေါဘန်းတာတ်ငှေါ အန်ကားအချိန်ဘေ ဗိမာန်တော်အဘိုနွန်းဟွန်ထှာမှာ။ ဆာန်ဘန်း ပုရောဟိတ်တာတ်ဆာ ယုတ်လားလူဘင်း ဘုရားရှာန်နင်းလှူသပဲဘင်း ပေါင်မုန့်တေ#6:4 ပေါင်မုန့် - ဥပုသ်မာန်းရာတ်၌တိုင်း ပေါင်မုန့်နယားတေလှူသဘန်း ပေါင်မုန့်ကာန်သလားဒေ ချသထှာမှာ။ အန်ဘင်းချသပဲဘင်းပေါင်မုန့်ဒေ ပုရောဟိတ်တာတ်၌ယုတ်လားလူလား။ ဝတ် ၂၄:၅-၉ လာယုတ်ပန်း ဟိန်နောက်လိုက်တေဒေရီဒါး အီယုတ်အာန်မှာ” ညယ် ပြန်သဘန်းငှေါဟာန်းရာန်မှာ။ 5“သမီဆာဆားတော်ထှာဘင်း ငါကား ဥပုသ်မာန်းရာတ်ပင်း အရှာန်ထှာမှာ” ညယ် မိန့်တာန်မှာ။
ညာပါဘင်းသဟူးရှီးဘန်းနင်းဘင်းဆိတ်ဟော်ဝါ
(ရှာန်မဿဲ ၁၂:၉-၁၄။ ရှာန်မာကု ၃:၁-၆)
6တခြားဘင်း ဥပုသ်မာန်းရာတ်ရအာဘေ ကိုယ်တော်ယေရှုကား ဓမ္မာရုံဘေ ဟောသကာ ဆွောန်သကာနင်းမှါခ့်ခါ အန်ဘင်းနေရာဘေ ညာပါဘင်း သဟူးရှီးနင်းဘင်းဆိတ် ဟော်ဝါငှါမှာ။ 7ဖာရိရှဲယောက် ကျမ်းကျိန်းပေါ့ပင်း အိုးဆကြီးစယ်ယာကား ဥပုသ်မာန်းရာတ်ပေ ဟော်ဝါဟော်ဝါတေ ကုသအီမှာငှေါဘန်းကား စွပ်စွဲသရန်ကွန်း ကိုယ်တော်ဒေ ဒဲဘန်းယူနင်းကြီးမှာ။ 8အန်နိမ်စါန်းငှေါဒီ အန်တာတ် ဟာနိမ်တွေးသနင်းမှာငှေါဘင်းနာဒေ မိန်းရှာတ်ခါဘင်းအတွာတ် ကိုယ်တော်ယေရှုကား အန်ဘင်းညာပါဘင်း သဟူးရှီးနင်းဘင်းဆိတ်တေ “သမီဆတာတ်မန်းဘေ ရဲဘန်းစပ်နာန်” ညယ် မိန့်သမှာ။ စီးမှါခ့်ခါ အန်ဘင်းဆိတ်ရီးဒါး ရဲဘန်း စပ်နာန်မှာ။
9စီးမှါခ့်ခါ ကိုယ်တော်ယေရှုကား “ဟနိမ်တေ ငါစားနူစိန်ယူကူ။ ဥပုသ်မာန်းရာတ်ပေ ဟာဘင်းနာကား ပညတ်တော်ယောက်ညီသောတေ။ မဲဘင်းနာတေအွန်ဘင်းလဲ၊ အမဲဘင်းတေ အွန်သင့်သောလဲ အန်နိမ်အချီ ဟော်ဝါ ဟော်ဝါဘင်း အဆာတ်တေ ကယ်တာန်သဘင်းရဲ၊ သာန်းရှီးဘင်းရဲ” ညယ် စိန်ယူမှာ။ 10ကိုယ်တော်ကား သမီဆတာတ်တေ လှည့်သဘန်းယူဝါမ်ဘန်းနာ ညာပါဘင်းသဟူးရှီးနင်းဘင်းဆိတ်တေ “နာန်ဘင်းသဟူးဒေ ဆန့်တာန်စါန်း” ညယ် မိန့်သမှာ။ အန်ဘင်းဆိတ်ရီးဒါး သဟူးဒေဆန့်တာန်မှါခ့်ခါ ဟိန်သဟူးကား မလဲအတိုင်းထှာဟာန်းရာန်မှာ။ 11အန်၌မှါခ့်ခါ ဖာရိရှဲတာတ်ယောက် ကျမ်းကျိန်းပေါ့ပင်း အိုးဆကြီးတာတ်ကား ဒေါသအကြီးကျယ်ပူဘန်း ကိုယ်တော်ယေရှုတေ ဟာနိမ်အွန်ကြီးကူငှေါဘင်းနာတေ အချန်းချန်း တိုင်ပါန်သနင်းကြီးမှာ။
သာဝကရှစ်နူဘန်းကလိန်းဟူး
(ရှာန်မဿဲ ၁၀:၁-၄။ ရှာန်မာကု ၃:၁၃-၁၉)
12ရအာမှါခ့်ခါ ကိုယ်တော်ယေရှုကား ဆုစိန်ဒင် ကယာစောက်ပါလာန်ဘန်း နာတ်ကြယ် ကျယ်ရာလုံး ဘုရားရှာန်ဘေ ဆုစိန်ဘန်းနင်းမှာ။ 13ဟလာန်းယားမှါခ့်ခါ တပယ့်တော်တာတ်တေ ဟိန်ပါကော်ဘန်း အန်တာတ်နောင်းဟက် ရှစ်နူဘန်းကလိန်းဟူးတေမယ်ဘန်း သာဝက#6:13 သာဝက - ကိုယ်တော်ယေရှုကိုယ်စား ဘုရားရှာန်ဘင်းအမှုတော်တေဒေ ဖဲဒင်အတွာတ် ကိုယ်တော်ယေရှု အထူးအနေယောက် မယ်ဘန်းပဲဘင်း တပယ့်တော်တေထှာမှာ။ညယ် ကော်ရာန်မှာ။
14အန်ဘင်းဆိတ်တာတ်ကား ပေတရုညယ် ကိုယ်တော်နာမယ်အီရီဘင်း ရှိမုန်ယောက် ဟိန်နရှီထှာဘင်း အန္ဒြေ၊
ယာကုပ်၊
ယောဟန်၊
ဖိလိပ္ပု၊
ဗာသောလမဲ၊
15မဿဲ၊
သောမ၊
အာလဖဲဘင်းဆာ ယာကုပ်၊
ကိုယ်အမျိုးတေမစ်ပင်း#6:15 အမျိုးဒေမစ်နာငှေါဘင်းကား ဂျူးသမီဆာတာတ်တေ ရောမအုပ်ချုပ်သလားတွန်ဟက် လွှတ်မြောက်သဒင် တိုက်ပွဲဆာန်ရီဘင်း အဖွဲ့နောင်းဟက် အဖွဲ့ဝင်ဟောင်းဟော်ဝါထှာမှာ။ ရှိမုန်၊
16ယာကုပ်ဆာ ယုဒယောက်
အနားမန်းပါကိုယ်တော်ဒေ သစ္စာဖောက်သကူဘင်း ယုဒရှာကာရုတ်တာတ် ထှာကြီးမှာ။
ကိုယ်တော်ယေရှုဟောသကာဆွောန်သကာဘင်းယောက် ကုသအီဘင်း
(ရှာန်မဿဲ ၄:၂၃-၂၅)
17စီးမှါခ့်ခါ ကိုယ်တော်ကား တပယ့်တော်တာတ်ယောက်အတူ ကယာစောက်ဟက်ဆပ်ပန်း ကာညီသလားဘေ စပ်ပန်းနင်းမှာ။ အန်ဘင်းနေရာဘေ ဟိန်ဘင်း တခြားဘင်းတပယ့်တော်တာတ်ရီး ငှါနင်းဘန်း ယုဒပြေတစ်ခွာမ်ယောက် ဂျေရုဆလင်မြို့ဟက်ဒီဘင်း သမီဆတာတ်၊ ဇိဒုန်မြို့ယောက် တုရုမြို့ပတ်ပတ်လည်ဘင်း ပါမ်လယ်ကမ်းရိုးဟက်ဒီဘင်း သမီဆာကလောင်းတုံန်းရီးဒါး ငှါကြီးမှာ။ 18အန်တာတ်ကား ကိုယ်တော်ယေရှု ဟောသကာဘင်းတေဒေ သက်ပန်း ကိုယ်ဘင်းကမာရောဂါတေဒေ ကုသကြီးဒင်အတွာတ် ဒီကြီးမှာ။ အမဲဘင်းနနူ ကပ်ခံသထှာဘင်း ဆိတ်တာတ်ရီးဒါး မလဲကလဲ ထှာဟာန်းကြီးရီမှာ။ 19ကိုယ်တော်ကား တန်ခိုးတော်ယောက် ကမာရောဂါတေဒေ ကယာစိန်းဘင်းအတွာတ် သမီဆတာတ်ရီးဒါး ကိုယ်တော်ယေရှုတေ ထိသလူကွန်း ကြိုးစားသနင်းကြီးမှာ။
မန်းအီလားခံသထှာဘင်းဆိတ်တာတ်
(ရှာန်မဿဲ ၅:၁-၁၂)
20စီးမှါခ့်ခါ ကိုယ်တော်ယေရှုကား ဟိန်တပယ့်တော်တာတ်ပါ မန်းဘန်း
“ဘုရားရှာန်ကား ဆာန်းရဲသဘင်းဟနိမ်တေ မန်းအီကူ။
ဟမာန်တွာတ်ငှေါဘန်းတာတ်ငှေါ ဘုရားရှာန်ဘင်းသာသနာတော်ကား ဟနိမ်အတွာတ် ထှာမှာ။
21ဘုရားရှာန်ကား ယုတ်ခေါ့ပ်နင်းကြီးဘင်း ဟနိမ်တေ မန်းအီကူ။
ဟမာန်တွာတ်ငှေါဘန်းတာတ်ငှေါ ဟနိမ်ကား ကျဲကွန်း ယုတ်ကြီးလူကဘန်းဘင်းအတွာတ်ထှာမှာ။
ဘုရားရှာန်ကား အရာတ်ဟပ်ပန်းနင်းကြီးဘင်း ဟနိမ်တေ မန်းအီကူ။ ဟမာန်တွာတ်ငှေါဘန်းတာတ်ငှေါ ဟနိမ်ကား မွန်းဘန်းပျော်သကြီးထှာကူဘင်းအတွာတ်ထှာမှာ။
22သမီဆာဆားတော်တေ ယုံကြည်သဘင်းအတွာတ် သမီဆတာတ်ကား ဟနိမ်တေ ယူးနီကြီးမှါခ့်ခါ၊
ဟနိမ်တေ တက်ပဲဘန်း ရိုင်းရိုင်းကားကား ငှေါခံသထှာမှါခ့်ခါ၊
ဟနိမ်တေ အမဲဘင်းနနူညယ် ကော်ကြီးမှါခ့်ခါ ဘုရားရှာန်ကား ဟနိမ်တေ မန်းအီကူ။
23မာအယ်ဟက် အန်တာတ် အုတ်တာတ် အတော်တာတ်ရီးဒါး ပရောဖက်တာတ်တေ အန်နိမ်အတိုင်း အွန်ကြီးရီဘင်းအတွာတ် အန်နိမ်ထှာဘန်းကား မွန်းဘန်း ကသကြီးရာန်။ ဟမာန်တွာတ်ငှေါဘန်းတာတ်ငှေါ ရွှေမြို့တော်ဘေ ဟနိမ်လူကူဘင်းဆုတုံန်းကား အကြီးကျယ်တုံန်းဘင်းအတွာတ်ထှာမှာ” ညယ်မိန့်သမှာ။
ဒုက္ခထုတ်ကူဘင်းဆိတ်တာတ်
24ပန်းနူ ကိုယ်တော်ကား
“အန်နိမ်စါန်းငှေါဒီ ဆွာမ်းဘင်းဆိတ်တာတ်၊
ဟနိမ်ကား မဲဘင်းဘဝဘေ လူစီးကြီးရီဘန်းဟွန် ဟနိမ်ကား ဒုက္ခထုတ်ကြီးကဘန်း။
25အရာတ် ကျဲကွန်းယုတ်ပန်း နင်းလူကြီးဘင်းဆိတ်တာတ်၊ ဟနိမ်ကား ဒုက္ခထုတ်ကြီးကဘန်း။
ဟမာန်တွာတ်ငှေါဘန်းတာတ်ငှေါ ဟနိမ်ကား ငတ်သကြီးကဘန်းဟွန် ထှာမှာ။
အရာတ်မွန်းဘန်း ပျော်သနင်းကြီးဘင်းဆိတ်တာတ် ဟနိမ်ကား ဒုက္ခထုတ်ကြီးကဘန်း။
ဟမာန်တွာတ်ငှေါဘန်းတာတ်ငှေါ ဟနိမ်ကား အဆေင်တေကားဘန်း ဟပ်ကြီးထှာကဘန်းဘင်းအတွာတ်ထှာမှာ။
26သမီဆာတာတ်ကား ဟနိမ်ဘင်းအကြောင်းဒေ မလဲငှေါကြီးဘန်းကား ဟနိမ်ဒုက္ခထုတ်ကြီးကဘန်း။
ဟမာန်တွာတ်ငှေါဘန်းတာတ်ငှေါ အန်ဘင်းဆိတ်တာတ်ပင်း အုတ်တာတ် အတော်တာတ်ရီးဒါး အယောင်ဆောင်သပဲဘင်း ပရောဖက်တာတ်တေ အန်နိမ်အတိုင်း မလဲငှေါကြီးရီဘင်းအတွာတ်ထှာမှာ” ညယ် မိန့်တော်မူသမှာ။
ရန်သူတာတ်တေမေတ္တာပဲကြီး
(ရှာန်မဿဲ ၅:၃၈-၄၅၊ ၇:၁၂)
27ကိုယ်တော်ယေရှုကား ဆာတ်သဘန်း “အန်နိမ်စါန်းငှေါဒီ အရာတ်သက်ပန်းနင်းကြီးဘင်း ဟနိမ်တေ ငါငှေါကူ။ ဟနိမ် ရန်သူတာတ်တေ မေတ္တာပဲကြီး။ ဟနိမ်တေယူနီဘင်း သမီဆတာတ်စောက်ပေ မဲဘင်းနာတေဒေ အွန်အီရာန်။ 28ဟနိမ်တေသန်သဘင်း ဆိတ်တာတ်တေဒေရီးဒါး ဘုရားရှာန်ဟက် မန်းအီကွန်း ဆုစိန်အီကြီး။ ဟနိမ်တေ နှိပ်စာတ်သဘင်းဆိတ်တာတ် အတွာတ်ရီးဒါး ဆုတေစိန်အီကြီး။ 29ဟော်ဝါဟော်ဝါကား ဟနိမ်လပါမ်ပယ်အာဒေ သန်းဘန်းကား အနားပယ်အာဒေပါ လှည့်သအီရာန်။ ဟော်ဝါဟော်ဝါကား ဟနိမ်တော်ပဲဘင်း ပြာန်ဘင်းဆာန်ဆုန်တေ စိန်ဘန်းကား နောင်းဘင်း ဆာန်ဆုန်ဒေပါအီရာန်။ 30နာန်ဟက် စားနူစားနာ စိန်ရီဘင်းဆိတ်တာတ်နင်းရီးဒါး အီကြီး။ ဟော်ဝါဟော်ဝါဟက် နာန်ပိုင်သဘင်းတေဒေ လာပဲဘန်းကား အန်ဘင်းဆိတ်ဟက် ပြန်သဘန်း အစိန်ဟာန်းဆာ။ 31ကိုယ်ဒေ ငှေါစိန်းကာတ်ပင်းအတိုင်း သမီစောက်ပေရီးဒါး ငှေါအီကြီး။
32ဟနိမ်တေ မေတ္တာပဲဘင်းဆိတ်တေ၌ဆာ ဟနိမ်ကား မေတ္တာပဲနင်းဘန်းကား ဘုရားရှာန်ကား အန်ဘင်းအတွာတ် ဟနိမ်တေ ချီးမွမ်းသကလဲ။ အပြစ်ဆားတေစဲ အန်တာတ်တေ မေတ္တာပဲဘင်းဆိတ်တေ မေတ္တာပဲကြီးရန်မှာ။ 33ဟနိမ်တေ မဲဘင်းဆိတ်တေ၌ဆာ ဟနိမ်ကား မဲဟာန်းရန်ဘန်းကား ဘုရားရှာန်ကား အန်ဘင်းအတွာတ် ဟနိမ်တေ ချီးမွမ်းသကလဲ။ အပြစ်ဆားတေစဲ အန်နိမ်မဲရန်ကြီးမှာ။ 34ဟနိမ် ပြန်သဘန်းလူဟာန်းကူညယ် မန်တာတ်ပန်း သမီတေဟယ်အီဘန်းကား ဘုရားရှာန်ကား ဟနိမ်တေ ချီးမွမ်းသကလဲ။ အပြစ်ဆားတေစဲ ဟယ်အီရာန်ဘင်းအတိုင်း လူဟာန်းကွန်း အန်တာတ်အချန်းချန်း ဟယ်အီကြီးဟာမှာ။ 35အန်နိမ်စါန်းငှေါဒီ ဟနိမ်ကား ရန်သူတေဒေ မေတ္တာပဲဘန်း အန်တာတ်အတွာတ် မဲဘင်းနာတေဒေအွန်အီကြီး။ ဟာဘင်းနာတေစဲ ပြန်သဘန်းလူဟာန်းကူညယ် အမျှော်လင့်သောညယ် ဟယ်အီကြီး။ အန်နိမ်အွန်ဘန်းကား ဟနိမ်ကား တုံန်းဘင်းဆုန်တုံန်းတေ လူကြီးကူထှာဘန်း အမြင့်မြတ်ဆုံးထှာဘင်း ဘုရားရှာန်ဆာဆအိတ်တေ ထှာကြီးရီကူ။ ဟမာန်တွာတ်ငှေါဘန်းတာတ်ငှေါ ဟနိမ်အီဘင်းပမာဏအတိုင်း ဟနိမ်ပြန်သဘန်း လူဟာန်းကြီးကူဘင်းအတွာတ်ထှာမှာ။ 36ဟနိမ်ဘင်း အဝါဘုရားရှာန်ကား မေတ္တာကရုဏာတော်ယောက် ပြေ့စုံသောနိမ် ဟနိမ်ရီးဒါး မေတ္တာကရုဏာယောက် ပြေ့စုံသကွန်းနင်းကြီး” ညယ် မိန့်တော်မူသမှာ။
သမီတေအဝေဖန်သကြီးဆာ
(ရှာန်မဿဲ ၇:၁-၅)
37စီးမှါခ့်ခါ ကိုယ်တော်ကား ဆာတ်သဘန်း “သမီဒေ အစီရာန်သကြီးဆာ။ အန်နိမ်မားဆာ ဘုရားရှာန်ကား ဟနိမ်တေ စီရာန်သကလားအချီရား။ သမီတေအပြစ်အတာန်သကြီးဆာ၊ အန်နိမ်မားဆာ ဟနိမ်တေ ဘုရားရှာန် အပြစ်တာန်သကလားအချီရား။ သမီတေခွာမ်းလွှတ်သကြီး၊ အန်နိမ်မားဆာ ဟနိမ်တေ ဘုရားရှာန် ခွာမ်းလွှတ်သအီကူ။ 38သမီတေ အီကြီး။ ဟနိမ်ရီးဒါး အီလားခံသထှာကူ။ ဟနိမ် ရှီထောင်းနောင်းပါ ပိုသောစါန်းလားလူကွန်း ထေင်ဘန်း၊ ခါသဘန်း ဖိန်းပက်နာန်ကွန်းထုတ် စါန်းအီလား ခံသထှာကူ ဟနိမ်သမီတေ အီနှယ်၌ဆာ ဘုရားရှာန်ကား ဟနိမ်တေ အီဟာန်းကူ” ညယ် မိန့်တော်မူသမှာ။
39စီးမှါခ့်ခါ ကိုယ်တော်ကား အန်တာတ်တေ ဥပမာစားနူယောက် မိန့်သမှာ။ ကိုယ်တော်ကား “မိတ်အကတုံန်ဘင်း ဆိတ်ဟော်ဝါကား တခြားမိတ်အကတုံန်ဘင်း ဆိတ်ဟော်ဝါတေ မန်းဟက်လာန်ဘန်း လမ်းကာရန်ကလဲ။ အန်တာတ်ကလိန်းဟူးစလုံး ချောက်နောင်းဘေ အက်နာန်ကလားအချီနော်။ 40အိုးဆကြီးထာတ် ပိုသောပေါ့ပင်း တပယ့်ညယ်အဘိုဝါး။ အန်နိမ်စါန်းငှေါဒီ သေချာပေါ့ကွန်း ဆွောန်သအီရီလူဘင်း တပယ့်တာတ်ကား အန်တာတ်အိုးဆကြီးနိမ် ထှာရီကူ။
41ဟနိမ်ကား ဟနိမ်အမူးနရှီတာတ် မိတ်တူရှီနောင်းဘေငှါဘင်း အမှိုက်ရှရှာတေ ကတုံန်ဘန်း၊ ဟနိမ်မိတ်တူရှီနောင်းဘင်း ဖွုန်းသလွောန်တုံန်းတေ ဟမာန်တွာတ် ဆတီးအပဲပတ်ကြီးတေ။ 42ဟနိမ်ကိုယ်၌ကား ဟနိမ်မိတ်တူရှီနောင်းဘင်း ဖွုန်းတလွောန်တုံန်းတေ အကတုံန်ညယ် ဟနိမ် အမူးနရှီတေ ‘အမူးနရှီ၊ ဟနိမ်မိတ်တူရှီနောင်းဘေငှါဘင်း အမှိုက်တေ ငါလာအီကူ’ ညယ် ဟာနိမ်ငှေါရန်ကူတေ။ သမီဆာမလဲနိမ် အယောင်ဆောင်သနင်းဘင်းဆိတ်တာတ်၊ ဟနိမ်မိတ်တူရှီနောင်းဘင်း ဖွုန်းတလွောန်တုံန်းတေအရာန် လာရာန်။ အန်နိမ်မားဆာ ဟနိမ်ကား ဟနိမ်အမူးနရှီမိတ်တူရှီနောင်းဘေငှါဘင်း အမှိုက်တေ လာအီဒင် ရှာန်းရှာန်းလာန်းလာန်း ကတုံန်လူကလား” ညယ်မိန့်သမှာ။
ကလွုန်ယောက်ရှရှီ
(ရှာန်မဿဲ ၇:၁၆-၂၀၊ ၁၂:၃၃-၃၅)
43ပန်းနူ ကိုယ်တော်ကား “မဲဘင်းကလွုန်ကား အမဲဘင်းရှရှီတေ အရှီရန်နိမ် အမဲဘင်းကလွုန်ရီးဒါး မဲဘင်းရှရှီတေ ရှီရန်ကလားအချီရား။ 44ရှရှီဒေယူဘန်း ကလွုန်အကြောင်းဒေ မိန်းရှာတ်ခါရန်နာ။ စောဟားကလွုန်ဟက် ဆာန်းညက်ရှီတေ ကွန်လားအလူနိမ် ချုံပုတ်ဟက် စပျစ်ရှရှီဒေရီးဒါး ကွန်လားအလူရန်နား။ 45မဲဘင်းသမီဆာကား ဟိန်အဆေင်နောင်းဘေ မဲဘင်းနာတေငှါဘင်းအတွာက် မဲဘင်းတေဒေ၌ဆာ အွန်ကြီးမှာ။ အမဲဘင်းသမီဆာတာတ်ကား အန်တာတ်အဆေင်ကား အမဲဘင်းနာတေ၌ဆာ ငှါဘင်းအတွာတ် အမဲဘင်းတေဒေ၌ဆာ အွန်ကြီးမှာ။ အမှာတွာတ် သမီဆာတာတ်ငှေါဘင်းနာတေကား အန်တာတ်အဆေင်နောင်းဘေငှါဘင်းနာတေ ပူကြီးရီလားထှာမှာ” ညယ် မိန့်သမှာ။
ကျေမ်းစာဘင်းဆိတ်ကလိန်းဟူး
(ရှာန်မဿဲ ၇:၂၄-၂၇)
46စီးမှါခ့်ခါ ကိုယ်တော်ယေရှုကား ဆာတ်သဘန်း “ဟနိမ်ကား ငါငှေါဘင်းတူးဒေ အသက်ညယ် ဟမာန်တွာတ် ငါတေ ‘အရှာန်၊ အရှာန်’ ညယ် ကော်နင်းကြီးတေ။ 47ငါပါဒီဘန်း ငါတရားတော်တေဒေ သက်ပန်း လိုက်နာသဘင်းဆိတ်၌တိုင်းကား ဟာဘင်းသမီဆာယောက် တူသမှာငှေါဘင်းနာတေ ဟနိမ်တေ ငါငှေါကာကူ။ 48အန်ဘင်းဆိတ်၌တိုင်းကား ကာတေ ထိန်ကွန်းထူဘန်း လုံးကရှီတေယောက် အုတ်မြစ်ချသပဲဘင်း ကျေမ်းစာဘင်းဆိတ်ယောက် တူသမာ။ မြစ်ဝဲကား ဝဲလွောမ်နီဘန်း အန်ဘင်းကျေမ်းတေ သန်းဒီဒါး အန်ဘင်းကျေမ်းကား မလဲကလဲစာပဲဘင်းအတွာတ် ယိုင်သဘန်း ပေါ်ရာန်ကလားအချီရား။ 49အန်နိမ်စါန်းငှေါဒီ ငါဘင်းတရားတေဒေ သက်ပန်း အလိုက်နာသဘင်းဆိတ်၌တိုင်းကား အုတ်မြစ်အချသောညယ် ကာစောက်ပေ ကျေမ်းစာပဲဘင်းဆိတ်ယောက် တူသမှာ။ ဝဲတေလွောမ်ဘန်း မြစ်ဝဲတေကား အန်ဘင်းကျေမ်းတေ သန်းနီမှါခ့်ခါ အန်ဘင်းကျေမ်းကား ချတ်ချန်းပြိုတာန်ဘန်း ပြတ်စီးတာန်ကူ။ အန်ဘင်းကျေမ်းပြတ်စီးသဘင်းနာရီး တုံန်းကူ” ညယ် မိန့်တော်မူသမှာ။
လက္ရွိေရြးခ်ယ္ထားမွု
ရှာန်လုကာ 6: ZKD
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Kadu Bible by Beyond Translation is licensed under Creative Commons Attribution-ShareAlike 4.0 License.