LUKAS 15
15
E ngale ntômba a nga jañ a e moné a nga jañ
(Mt 18:11-14)
1Benyoñe toya bese a bebo abé be nga zu Yésus bebé na be vôʼôlô nye. 2Befarizieñ a beyeme bekalate be nga kobô menyiñ be jôʼô na: e nyôna a nyoñe bebo abé , ba be be be jaʼak.
3Ve a nga kane be nkana wu: 4môte mbé ya be mia, nge a bili beyale mintômba ntet, a dimili wua, a bo te liʼi ba bevoʼo 99 e nkôte si, asu ya ke tôñe nyô a ne njañan akekui a yeneya nye? 5Eyoñ a yeneya nye, a beté nye e bitule bié a mevaʼa mese, 6mebulane ya nda , a loone bemvôé bé a bembômaʼane bé e nda jé a jô be na: e mboʼone mevak, amu me yeneya ngale ntômba wom a nga jañ. 7Avale te ma jô mia de na: mevak ma ye dañe bo e yôp amu mbo abé wua a kôñelane nlem a dañe bezôsôô 99 be nji yi nkôñelane nlem.
8Nge na minga mbé , nge a bili minsañ mi moné awôm, a dimili wua, a ye bo te boʼé lambe, a nga vose nda a tuʼa jeñ, akekui a yene wô?
9Eyoñ a yeneya wô, a loone bemvôé be binga bé a e binga baa be nye be too bebé e nda jé a jôʼô na: bia be mia e mvakan, amu me yeneya e nsañe mone me nga dimili. 10Avale te ma jô mia de na: mevak me ne asu beéngele be Zambe amu e mbo abé wua a kôñelane nlem.
E monafam a nga jañ
(Oz 14:1; Mik 7:7-8; 1 Jn 3:1)
11A nga beta jô na: môt éziñ a nga bili bobefame bebaé. 12Nyô a nga dañe mongô a nga jô ésaa wé na: A ésaa wom, vaʼa ma ngabe ya akume da yiane bo éndam. A ésaa a nga kabe be akume dé. 13Tyôtyôé melu é lôteya, nyô a nga dañe mongô a nga kôan e biôme bise a nga bili a ke e si é ne ôyap e vôm a nga mane dimili afoʼo dé a mboon ébamba. 14Eyoñ a maneya dimili biôme bise beta mfumbale zaé a nga kui e si éte, a a nga taté na a jembane biôme bise. 15A nga ke lat a wua ya bôte ya si éte, nye ve lôme nye e mefube mé na a ke baʼale bengôé. 16A nga ye bi nkômbane ya di bikôlaʼa bidi bengôé be mbe be jaʼak, ve teke môt a mbe a vaʼa nye bie. 17Eyoñ a nga bulane be émien, a nga jô émiene na: bebo bisaé e be ésaa wom bañembé be bili bidi abui, a ma, e vana, ma wu amu zaé. 18Ma ye kôlô si, ma ye ke e be ésaa wom a ma ye jô nye na: a ésaa wom, me boya yôp a wo abé , 19me nji yiane beta lobane na mone wôé; boʼo ma ane wua ya bebo bisaé bôé. 20A nga kôlô si a ke e be ésaa. A ngenan ôyap, ésaa a nga yene nye, éngôngole nlem é nga bi nye, a nga mate ke ku nye tyiñ , a wubane nye. 21Mon a nga jô nye na: A ésaa wom, me boya yôp a wo abé; me nji yiane beta lobane na mone wôé; boʼo ma ane wua ya bebo bisaé bôé. 22Ve ésaa a nga jô bebo bisaé bé na: Jikaʼa zuan ézingi ja dañ abeñ a jalé nye je; jalaʼane nye élondo ônyu a besilefase mebo. 23Zaʼane mone nyak a ne avoñ, a wôane nye. E njaʼan a e mvakan; 24amu e mone wome nyô a nga wu, a a beteya bulan ényiñ; a nga jañ, a a yenéya. A be nga taté na ba bo mevak. 25Nde ntôle monafam ô mbe mefup. Eyoñ ô nga bulan a subu nda bebé, a nga wôʼô mezik a mebôk . 26A nga loone wua ya bebo bisaé a yemelane jam da lôtan. 27Mbo ésaé ate a nga jô nye na: Monyoñ a bulaneya, a amu a te beta so nye mvoʼé , ajô te ésoo a te wôé mone nyak a ne avoñ. 28Ane a nga wôʼô ôlun a a nji kômbô nyiine nda . Esaa a nga kui atane na a nyiñeli nye nda été. 29E nde a nga yalan ésaa na: tame yen, abui mimbu, me saane wo, me nji veʼele bo mebendé môé melo éyoñ éziñ, ô nji ve ma mon ékela éyoñ éziñe na me vak bia bemvôé bam. 30Vʼéyoñe mone wôé ate a soya, e nyô a nga min akume dôé baa be binga bʼébamba, ô wôéya mone nyak a ne avoñ asu dé! 31Esaa a nga jô nye na: Wo a mone wom, bia wo bi ne éyoñ ése, a jôm ése me bili é ne énjôé; 32ve da yiane na bi vak a jem, amu monyoñ ate a nga wu a a beteya bulan ényiñ; a nga jañ, a a yenéya.
လက္ရွိေရြးခ်ယ္ထားမွု
LUKAS 15: BULU09
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© LʼAlliance Biblique du Cameroun, 2009