ဓမ္မရာဇဝင်စတုတ္ထစောင် 11

အာသလိက အာဏာလုယူခြင်း

1အာခဇိမင်းကြီး၏မယ်တော်အာသလိသည် မိမိ၏သားတော်အနိစ္စရောက်သည်ကို သိမြင်သည်နှင့်ထ၍ တော်ဝင်မင်းမျိုးမင်းနွယ်အားလုံးကို သုတ်သင်ပစ်လေ၏။ 2သို့သော် အာခဇိမင်းကြီး၏နှမဖြစ်သူ ယောရံ#11:2 “ယဟောရံ” (၆ရာ 22:11)။မင်းကြီး၏သမီးတော်ယောရှေဘက အာခဇိမင်းကြီး၏သားတော်ယောရှကို အသတ်ခံရမည့်ဘုရင့်သားတော်များထဲမှ ခိုးယူ၍ အထိန်းတော်နှင့်အတူ အတွင်းခန်းထဲတွင်ဝှက်ထားသဖြင့် အာသလိရန်မှကင်း၍ အသတ်မခံရတော့ပေ။ 3တိုင်းပြည်ကို အာသလိဘုရင်မ အုပ်စိုးစဉ် ယောရှသည် အထိန်းတော်နှင့်အတူ ထာဝရဘုရား၏အိမ်တော်တွင် ခြောက်နှစ်ပတ်လုံး ပုန်းရှောင်နေခဲ့ရ၏။

အာသလိအားနန်းချခြင်း

4ခုနစ်နှစ်မြောက်တွင် ယောယဒသည် ကိုယ်ရံတော်#11:4 တိုက်ရိုက်ပြန်ဆိုလျှင် “ခါးရိလူမျိုး”။တပ်နှင့် အစောင့်တပ်တို့၏ရာတပ်မှူးများကို လူလွှတ်ခေါ်၍ သူတို့သည် ထာဝရဘုရား၏အိမ်တော်သို့ ရောက်လာလျှင် ထာဝရဘုရား၏အိမ်တော်တွင်ပင် သူတို့နှင့် ကတိသစ္စာပြု၍ ကျိန်ဆိုစေပြီးမှ ဘုရင့်သားတော်ကို ထုတ်ပြ၏။ 5ထို့နောက် သူတို့အား “သင်တို့ ဤသို့ပြုရမည်။ ဥပုသ်နေ့တွင် တာဝန်ကျသောသူတို့ကို သုံးစုခွဲပြီး တစ်စုသည် ဘုရင့်နန်းတော်ကို စောင့်ကြပ်ရမည်။ 6နောက်တစ်စုသည် သုရတံခါးကို စောင့်ကြပ်ရမည်။ နောက်တစ်စုသည် ဘုရင့်ကိုယ်ရံတော်တို့၏အနောက်ဘက်ရှိတံခါးကို စောင့်ကြပ်ရမည်။ ဤနည်းဖြင့် အိမ်တော်ကို စောင့်ကြပ်ကြရမည်။

7ဥပုသ်နေ့တွင် တာဝန်မကျသောသူနှစ်စုသည် ရှင်ဘုရင်ကိုကာကွယ်ရန် ထာဝရဘုရား၏အိမ်တော်ကို အထူးစောင့်ကြပ်ရမည်။ 8သင်တို့တစ်ဦးချင်းစီသည် လက်နက်ကိုကိုင်ဆောင်ထားပြီး ရှင်ဘုရင်ကို ဝိုင်းရံထားရမည်။ စောင့်ကြပ်သောနေရာသို့ ရောက်လာသူတိုင်းကို သုတ်သင်ပစ်ရမည်။ ရှင်ဘုရင်သွားလာလေရာရာသို့ သင်တို့လိုက်ပါစောင့်ရှောက်ရမည်”ဟု မှာကြားလေ၏။

9ရာတပ်မှူးတို့သည် ယဇ်ပုရောဟိတ်ယောယဒ မှာကြားသည့်အတိုင်း ပြုကြ၏။ သူတို့အသီးသီးသည် ဥပုသ်နေ့တွင် တာဝန်ကျသောကိုယ့်လူနှင့် တာဝန်မကျသောကိုယ့်လူတို့ကိုခေါ်၍ ယဇ်ပုရောဟိတ်ယောယဒထံသို့ လာကြ၏။ 10ယဇ်ပုရောဟိတ်သည် ထာဝရဘုရား၏အိမ်တော်၌ရှိသော ဒါဝိဒ်မင်းကြီး၏လှံများ၊ ဒိုင်းလွှားများကို ရာတပ်မှူးတို့အား ပေးအပ်၏။ 11အစောင့်တပ်သားတို့သည် လက်နက်ကိုယ်စီကိုင်လျက် အိမ်တော်တောင်ဘက်ထောင့်မှ မြောက်ဘက်ထောင့်အထိ၊ ယဇ်ပလ္လင်အနား၊ အိမ်တော်အနားတို့၌ နေရာယူလျက် ရှင်ဘုရင်ကို ခြံရံပေးကြ၏။

12ထို့နောက် ယဇ်ပုရောဟိတ်သည် ဘုရင့်သားတော်ကို ထုတ်ဆောင်လာ၍ သရဖူနှင့်တကွ ကတိဝန်ခံလွှာကို အပ်နှင်း၏။ လူတို့သည်လည်း သူ့အား ဘိသိက်ပေးမင်းမြှောက်လိုက်ကြ၏။ သူတို့သည် လက်ခုပ်ဩဘာပေးလျက် “မင်းကြီး သက်တော်ရှည်ပါစေ”ဟု ကြွေးကြော်ကြ၏။

13အာသလိဘုရင်မသည် အစောင့်တပ်သားများနှင့်လူတို့ ကြွေးကြော်သံကိုကြားလျှင် လူတို့စုဝေးရာ ထာဝရဘုရား၏အိမ်တော်သို့ လာ၏။ 14ရှင်ဘုရင်သည် အစဉ်အလာအတိုင်း တိုင်နားတွင် ရပ်နေပြီး မှူးမတ်များ၊ တံပိုးခရာမှုတ်သူများက ရှင်ဘုရင်အား ခြံရံလျက် ရှိနေသည်ကိုလည်းကောင်း၊ ပြည်သူပြည်သားအပေါင်းတို့က ဝမ်းမြောက်ပျော်ရွှင်စွာတံပိုးခရာမှုတ်နေကြသည်ကိုလည်းကောင်း အာသလိဘုရင်မ မြင်ရလျှင် သူ့အဝတ်ကိုဆုတ်ဖြဲလျက် “လျှို့ဝှက်ကြံစည်မှုပါတကား၊ လျှို့ဝှက်ကြံစည်မှုပါတကား”ဟု အော်ဟစ်လေ၏။ 15ယဇ်ပုရောဟိတ်ယောယဒက စစ်သည်တို့ကို အုပ်ချုပ်ရသောရာတပ်မှူးများအား “သူ့ကို စောင့်ကြပ်ထားသောနေရာမှ ဆွဲထုတ်လိုက်ပြီး သူ့နောက်လိုက်တို့ကိုလည်း ဓားနှင့်ကွပ်မျက်လိုက်ကြ”ဟု အမိန့်ပေးလိုက်၏။ ယဇ်ပုရောဟိတ်က “သူ့ကို ထာဝရဘုရား၏အိမ်တော်တွင် မသတ်ကြနှင့်”ဟု မှာထားသဖြင့် 16သူ့ကိုဖမ်းချုပ်ခေါ်ဆောင်သွားပြီး ဘုရင့်နန်းတွင်း မြင်းဝင်ရာတံခါးဝသို့ရောက်သောအခါ သူ့ကို ကွပ်မျက်လိုက်ကြလေ၏။

ယောယဒ၏ပြုပြင်ပြောင်းလဲမှု

17ထို့နောက် ယောယဒသည် ရှင်ဘုရင်နှင့် ပြည်သူပြည်သားတို့ကို ထာဝရဘုရား၏လူမျိုးတော်အဖြစ် တည်နေစေရန် သူတို့ကို ထာဝရဘုရားနှင့် ပဋိညာဉ်ဖွဲ့စေ၏။ ထို့အတူ ရှင်ဘုရင်နှင့်ပြည်သူပြည်သားတို့ကိုလည်း အချင်းချင်းကတိသစ္စာပြုစေ၏။ 18ထို့နောက် ပြည်သူပြည်သားအပေါင်းတို့သည် ဗာလဘုရားဝတ်ကျောင်းသို့သွား၍ ထိုဝတ်ကျောင်းကိုဖြိုဖျက်ပစ်ပြီး ယဇ်ပလ္လင်များ၊ ရုပ်တုများကို အကုန်အစင်ချိုးဖျက်ပစ်ကြ၏။ ဗာလဘုရား၏ယဇ်ပုရောဟိတ်မဿန်ကိုလည်း ယဇ်ပလ္လင်ရှေ့တွင် ကွပ်မျက်လိုက်ကြ၏။ ယောယဒသည် ထာဝရဘုရား၏အိမ်တော်တွင် အစောင့်များကို ချထားပြီးလျှင် 19ရာတပ်မှူးများ၊ ကိုယ်ရံတော်#11:19 တိုက်ရိုက်ပြန်ဆိုလျှင် “ခါးရိလူမျိုး”။များ၊ အစောင့်တပ်သားများနှင့် ပြည်သူပြည်သားအပေါင်းတို့ကို ဆင့်ခေါ်၍ ရှင်ဘုရင်ကို ထာဝရဘုရား၏အိမ်တော်မှခေါ်ထုတ်လာကာ ကင်းစောင့်တံခါးရှိရာလမ်းအတိုင်း ဘုရင့်နန်းတော်သို့ ကြွချီစေသဖြင့် ရှင်ဘုရင်သည် ရာဇပလ္လင်ပေါ်တွင် စံမြန်းလေ၏။ 20ပြည်သူပြည်သားအပေါင်းတို့သည်လည်း ဝမ်းမြောက်ပျော်ရွှင်ကြ၏။ အာသလိဘုရင်မကို ဘုရင့်နန်းတော်တွင် ဓားနှင့်ကွပ်မျက်လိုက်ပြီဖြစ်၍ တစ်မြို့လုံးငြိမ်းချမ်းလေ၏။ 21ယဟောရှ#11:21 “ယောရှ” (၆ရာ ၂၄:၁)။နန်းတက်သောအခါ သက်တော်ခုနစ်နှစ်သာ ရှိသေး၏။

လက်ရှိရွေးချယ်ထားမှု

ဓမ္မရာဇဝင်စတုတ္ထစောင် 11: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။

ဓမ္မရာဇဝင်စတုတ္ထစောင် 11