ဟေရှာယအနာဂတ္တိကျမ်း 23

တိုင်ရာမြို့နှင့်ဆိုင်သောဗျာဒိတ်တော်

1တိုင်ရာမြို့နှင့်ဆိုင်သောဗျာဒိတ်တော်။ တာရှုသင်္ဘောတို့၊ ညည်းတွားငိုကြွေးကြလော့။ အကြောင်းမူကား တိုင်ရာမြို့သည် အိမ်မရှိ၊ ဆိပ်ကမ်းမရှိတော့သည့်တိုင်အောင် ဖျက်ဆီးခံရလေပြီဟု ဆိုက်ပရပ်#23:1 တိုက်ရိုက်ပြန်ဆိုလျှင် “ခိတ္တိမ်”။ပြည်မှတစ်ဆင့် ကြားသိရပြီ။ 2ကမ်းရိုးတန်းဒေသ၌နေထိုင်သောသူတို့၊ ငြိမ်ဝပ်စွာနေကြလော့။ ပင်လယ်ကိုဖြတ်သန်းသွားလာသော ဆီဒုန်ကုန်သည်တို့သည် သင်တို့ကို ကြွယ်ဝစေကြ၏။ 3ပင်လယ်လမ်းမှဝင်ရောက်လာသော ရှိဟောရမြစ်၏မျိုးစေ့၊ နိုင်းမြစ်၏အသီးအနှံသည် တိုင်ရာမြို့အတွက် အမြတ်အစွန်းဖြစ်၏။ ထိုမြို့သည် တိုင်းနိုင်ငံတို့ကူသန်းရောင်းဝယ်ရာအရပ်ဖြစ်၏။ 4အို ဆီဒုန်မြို့၊ ရှက်ကြောက်လော့။ ပင်လယ်က ပြောလေပြီ။ ပင်လယ်ခံတပ်မြို့က “ငါသည် ဝမ်းမနာခဲ့၊ သားမဖွားခဲ့။ လူပျို အပျိုတို့ကိုလည်း မကျွေးမွေး၊ မပြုစုခဲ့”ဟု ဆိုလေပြီ။ 5တိုင်ရာမြို့၏သတင်းသည် အီဂျစ်ပြည်သို့ရောက်လာသောအခါ ထိုသတင်းကြောင့် သူတို့တုန်လှုပ်ကြလိမ့်မည်။ 6အို ကမ်းရိုးတန်းဒေသ၌နေထိုင်သောသူတို့၊ တာရှုမြို့သို့ကူးသွားကြလော့။ ညည်းတွားငိုကြွေးကြလော့။ 7ထိုမြို့သည် သင်တို့အဖို့ ပျော်ပါးစရာကောင်းသောမြို့လော။ ထိုမြို့သည် ရှေးရှေးကတည်းက တည်ရှိခဲ့၏။ မြို့သားတို့သည် ခြေဆန့်၍ ရပ်ဝေးသို့သွားရောက်နေထိုင်တတ်ကြ၏။ 8တိုင်ရာမြို့သည် အခြားမြို့များကို သရဖူဆောင်းပေးတတ်သောမြို့ဖြစ်၏။ ထိုမြို့၏ကုန်သည်တို့သည် မှူးမတ်များ၊ ကူးသန်းရောင်းဝယ်သူတို့သည် မြေကြီးပေါ်တွင် ချီးမြှောက်ခံရသူများဖြစ်ကြ၏။ ထိုမြို့ကို ထိုသို့ဖြစ်အောင် မည်သူကြံစည်သနည်း။ 9ကောင်းကင်ဗိုလ်ခြေအရှင်ထာဝရဘုရားသည် ထိုသို့ ကြံစည်တော်မူ၏။ ဤသည်ကား ဂုဏ်သရေမာန်တက်ခြင်းအလုံးစုံကို ရှုတ်ချရန်နှင့် မြေကြီးပေါ်တွင် ချီးမြှောက်ခံရသောသူအပေါင်းတို့ကို နှိမ့်ချရန်အတွက် ဖြစ်၏။ 10အို တာရှုမြို့သမီးပျို၊ အထိန်းအချုပ်#23:10 သို့မဟုတ် “ခွန်အား”။မရှိတော့ပြီဖြစ်၍ နိုင်းမြစ်ကဲ့သို့ ကိုယ့်မြေပေါ်မှာ ဖြတ်သန်းသွားလာလော့။ 11ထာဝရဘုရားသည် ပင်လယ်ပြင်ပေါ် လက်တော်ကိုဆန့်တော်မူပြီ။ တိုင်းနိုင်ငံတို့ကို ထိတ်လန့်တုန်လှုပ်စေတော်မူပြီ။ ခါနာန်ပြည်၏ခံတပ်များကိုဖျက်ဆီးရန် မိန့်တော်မူပြီ။ 12ကိုယ်တော်က “နှိပ်စက်ခြင်းခံရသောဆီဒုန်သမီးပျို၊ သင်သည် နောက်တစ်ဖန် ရွှင်မြူးရတော့မည်မဟုတ်။ ထ၍ ဆိုက်ပရပ်ပြည်သို့ ကူးသွားလော့။ ထိုအရပ်၌လည်း သင့်အတွက်ငြိမ်းချမ်းခြင်းရှိမည်မဟုတ်”ဟု မိန့်တော်မူ၏။ 13ခါလဒဲပြည်ကို ကြည့်ကြလော့။ လူမရှိတော့ပြီ။ အဆီးရီးယားလူမျိုးသည် ထိုပြည်ကို ကန္တာရသတ္တဝါတို့နေစရာနေရာ ဖြစ်စေ၏။ သူတို့သည် မျှော်စင်တို့ကို တည်ဆောက်၍ ထိုပြည်၏နန်းတော်ကိုဖြိုဖျက်၏။ ထိုပြည်ကို ပြိုပျက်ရာဖြစ်စေကြ၏။ 14တာရှုသင်္ဘောတို့၊ ညည်းတွားငိုကြွေးကြလော့။ သင်တို့၏ခံတပ်သည် ဖျက်ဆီးခြင်းခံရလေပြီ။

15ထိုနေ့ရက်၌ တိုင်ရာမြို့သည် ရှင်ဘုရင်တစ်ပါး၏နန်းသက်အတိုင်း နှစ်ပေါင်းခုနစ်ဆယ် မေ့လျော့ခြင်းခံရမည်။ နှစ်ပေါင်းခုနစ်ဆယ်အဆုံး၌ တိုင်ရာမြို့သည် သီချင်းထဲက ပြည့်တန်ဆာမကဲ့သို့ ဖြစ်မည်။ 16အို အမေ့ခံရသောပြည့်တန်ဆာမ၊ စောင်းကိုယူ၍ မြို့ထဲတွင်လှည့်ပတ်လော့။ သာသာယာယာတီးခတ်လော့။ သီချင်းများများသီဆိုလော့။ သို့မှ သင့်ကို သတိရကြမည်။

17နှစ်ပေါင်းခုနစ်ဆယ်အဆုံးတွင် ထာဝရဘုရားသည် တိုင်ရာမြို့ကို အကြည့်အရှုကြွလာတော်မူမည်။ ထိုမြို့သည် တစ်ဖန် အခကြေးငွေနောက်သို့ လိုက်ပြန်၍ ကမ္ဘာမြေပြင်ပေါ်ရှိ တိုင်းနိုင်ငံအားလုံးတို့နှင့် ကာမဂုဏ်ခံစားလိမ့်မည်။ 18သို့သော် ထိုမြို့၏အကျိုးအမြတ်နှင့် ဝင်ငွေတို့ကို ထာဝရဘုရားအား ဆက်ကပ်ကြရမည်။ စုဆောင်းခွင့်မရှိ၊ သိုမှီးခွင့်မရှိ။ ထိုမြို့၏အကျိုးအမြတ်သည် ထာဝရဘုရားရှေ့တော်၌နေသောသူတို့ ဝဝလင်လင်စားရရန်နှင့် ကောင်းကောင်းမွန်မွန်ဝတ်ရရန်အတွက် ဖြစ်လိမ့်မည်။

လက်ရှိရွေးချယ်ထားမှု

ဟေရှာယအနာဂတ္တိကျမ်း 23: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။

ဟေရှာယအနာဂတ္တိကျမ်း 23