ယောရှုမှတ်စာ 16

ယောသပ်အမျိုးအနွယ်တို့ရသောအမွေမြေ

1ယောသပ်အမျိုးသားတို့ မဲချ၍ရရှိသောအမွေမြေမှာ ဂျေရိခေါစမ်းရေတွင်းအရှေ့ဘက် ဂျေရိခေါမြို့အနီးရှိ ဂျော်ဒန်မြစ်မှ ကန္တာရတစ်လျှောက်ကိုဖြတ်၍ ဂျေရိခေါမြို့မှ ဗေသလတောင်ပေါ်ဒေသသို့တက်သွား၏။ 2ဗေသလမြို့မှ လုဇမြို့သို့ရောက်၏။ ထိုမှ အာခိလူမျိုးတို့၏နယ်မြေ အတရုတ်မြို့ကိုဖြတ်ပြီး 3အနောက်ဘက် ယာဖလက်နယ်နိမိတ်သို့ ဆင်းသွား၍ အောက်ဗေသောရုန်နယ်နိမိတ်မှ ဂေဇာမြို့အထိဆက်သွားပြီး ပင်လယ်၌ဆုံးလေ၏။ 4ဤသည်ကား ယောသပ်၏သား မနာရှေနှင့် ဧဖရိမ်တို့ ရရှိသောအမွေမြေဖြစ်သတည်း။

ဧဖရိမ်အမျိုးအနွယ်တို့ရသောအမွေမြေ

5ဧဖရိမ်အမျိုးသားတို့ မျိုးနွယ်စုအလိုက် ရရှိသောနယ်မြေကား ဤသို့တည်း။ သူတို့ရရှိသောအမွေမြေနယ်နိမိတ်မှာ အရှေ့ဘက် အတရုတ်အဒ္ဒါမြို့မှ အထက်ဗေသောရုန်မြို့တိုင်အောင် ဖြစ်၏။ 6ထိုနယ်နိမိတ်သည် ပင်လယ်ဘက်သို့ရောက်၍ မြောက်ဘက်မိတ်မေသမြို့အထိရောက်၏။ ထိုမှ အရှေ့ဘက်တာနတ်ရှိလောမြို့သို့ ကွေ့သွားကာ အရှေ့ဘက် ယာနောမြို့သို့ ရောက်၏။ 7ယာနောမြို့မှ အတရုတ်မြို့၊ နာရမြို့တို့ဘက်သို့ ဆင်းသွားပြီး ဂျေရိခေါမြို့သို့ရောက်၍ ဂျော်ဒန်မြစ်၌ ဆုံးလေ၏။ 8ထိုနယ်နိမိတ်သည် တာပွာမြို့မှ အနောက်ဘက်ကာနချိုင့်ဝှမ်းသို့ ဆက်သွားပြီး ပင်လယ်၌ ဆုံး၏။ ဤသည်ကား မျိုးနွယ်စုအလိုက် ဧဖရိမ်အမျိုးအနွယ်ရရှိသောအမွေမြေဖြစ်၏။ 9ဤသည်ကား မနာရှေအမျိုးသားတို့ရရှိသောအမွေမြေထဲမှ ဧဖရိမ်အမျိုးသားတို့အားခွဲပေးသော မြို့ရွာများ ဖြစ်၏။ 10ဧဖရိမ်အမျိုးသားတို့သည် ဂေဇာမြို့၌နေထိုင်သော ခါနာန်လူမျိုးတို့ကို မနှင်ထုတ်ဘဲ ယနေ့တိုင်အောင် ခါနာန်လူမျိုးတို့နှင့်အတူနေထိုင်ကြ၏။ သို့သော် သူတို့ကို အလုပ်ကြမ်းလုပ်စေ၏။

လက်ရှိရွေးချယ်ထားမှု

ယောရှုမှတ်စာ 16: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။

ယောရှုမှတ်စာ 16