သုတ္တံကျမ်း 21

1ရှင်ဘုရင်၏စိတ်နှလုံးသည် ထာဝရဘုရား၏လက်တော်၌ရှိ၍ ရေစီးသောချောင်းများကဲ့သို့ဖြစ်၏။

ကိုယ်တော်သည် ၎င်းကို အလိုတော်ရှိသည့် နေရာတိုင်းသို့ လှည့်စေတော်မူ၏။

2လူသည် မိမိပြုမူကျင့်ကြံသမျှသောအမှုအရာတို့ကို မှန်သည်ဟု ထင်မြင်တတ်၏။

သို့သော် ထာဝရဘုရားသည် စိတ်နှလုံးကိုချိန်တွယ်တော်မူ၏။

3ထာဝရဘုရားသည် ယဇ်ပူဇော်ခြင်းထက်

ဖြောင့်မတ်ခြင်းနှင့် တရားမျှတခြင်းကို ပို၍နှစ်သက်တော်မူ၏။

4ဆိုးယုတ်သောသူတို့၏မီးခွက်တည်းဟူသော ထောင်လွှားသောမျက်နှာနှင့်

မော်ကြွားသောစိတ်နှလုံးတို့သည် အပြစ်ဖြစ်၏။

5ဝီရိယရှိသောသူ၏အကြံအစည်တို့သည် အကျိုးအမြတ်ကို ဧကန်ဖြစ်စေ၏။

အလျင်စလိုပြုမူသောသူတိုင်းကား ချို့တဲ့နွမ်းပါးခြင်းသို့သာရောက်တတ်၏။

6မုသားသုံးသောလျှာဖြင့် ဥစ္စာဘဏ္ဍာများကိုဆည်းပူးခြင်းသည်

လွင့်သွားသောအခိုးအငွေ့ဖြစ်ပြီး သေခြင်းကိုရှာဖွေခြင်းဖြစ်၏။

7ဆိုးယုတ်သောသူတို့သည် တရားသောအမှုကိုမပြုလိုကြသောကြောင့်

သူတို့၏အကြမ်းဖက်မှုသည် သူတို့ကိုသုတ်သင်ရှင်းလင်းလိမ့်မည်။

8အပြစ်ရှိသောသူ၏လမ်းသည် ကွေ့ကောက်၏။

သန့်ရှင်းစင်ကြယ်သောသူ၏လုပ်ဆောင်ချက်မူကား ဖြောင့်မှန်၏။

9ငြင်းခုံရန်တွေ့တတ်သောမယားနှင့် တစ်အိမ်တည်းအတူနေရခြင်းထက်

ခေါင်မိုးပြင်ထောင့်၌နေရခြင်းသည် ပို၍ကောင်း၏။

10ဆိုးယုတ်သောသူ၏စိတ်ဝိညာဉ်သည် မကောင်းမှုကို တောင့်တတတ်၏။

သူ၏အိမ်နီးချင်းသည် သူ့မျက်ဝန်း၌ သနားတတ်သောသဘောကိုရှာမတွေ့။

11ပြက်ရယ်ပြုတတ်သောသူ အပြစ်ဒဏ်ခံရသောအခါ

အသိဉာဏ်နည်းပါးသောသူသည် ဉာဏ်ပညာရှိလာတတ်၏။

ပညာရှိသောသူသည် သွန်သင်ခြင်းခံရသောအခါ

အသိပညာတိုးပွားတတ်၏။

12ဖြောင့်မတ်တော်မူသောအရှင်သည် ဆိုးယုတ်သောသူ၏အိမ်ကိုမှတ်၍

ထိုဆိုးယုတ်သောသူတို့ကို ပျက်စီးခြင်းထဲသို့ ပစ်ချတော်မူ၏။

13ဆင်းရဲသောသူ၏ငိုကြွေးသံကိုမကြားလို၍ မိမိနားကိုပိတ်ထားသောသူသည်

ကိုယ်တိုင်ဟစ်ခေါ်သောအခါ မည်သူမျှ သူ့ကိုထူးလိမ့်မည်မဟုတ်။

14တိတ်တဆိတ်ပေးသောလက်ဆောင်သည် အမျက်ကိုလည်းကောင်း၊

လျှို့ဝှက်စွာပေးသောတံစိုးလက်ဆောင်သည်

ပြင်းထန်သောအမျက်ဒေါသကိုလည်းကောင်း ပြေစေတတ်၏။

15တရားသောအမှုကိုပြုခြင်းသည် ဖြောင့်မတ်သောသူတို့အတွက် ဝမ်းမြောက်ခြင်းဖြစ်၍

အပြစ်ဒုစရိုက်ပြုသောသူတို့အတွက် ထိတ်လန့်ခြင်းဖြစ်၏။

16ပညာသတိလမ်းမှလွဲသွားသောသူသည်

သေသူ၏ဝိညာဉ်အစုအဝေးထဲ၌ နေရာကျလိမ့်မည်။

17အပျော်အပါးကိုနှစ်သက်သောသူသည် ချို့တဲ့နွမ်းပါးသောသူဖြစ်သွားလိမ့်မည်။

စပျစ်ဝိုင်နှင့်ဆီကိုနှစ်သက်သောသူသည်လည်း ချမ်းသာကြွယ်ဝလာလိမ့်မည်မဟုတ်။

18ဆိုးယုတ်သောသူသည် ဖြောင့်မတ်သောသူအတွက်လည်းကောင်း၊

သစ္စာမဲ့သောသူသည် ဖြောင့်မှန်သောသူအတွက်လည်းကောင်း

ရွေးနုတ်စရာအဖိုးအခဖြစ်ရလိမ့်မည်။

19စိတ်ဆတ်၍ ငြင်းခုံရန်တွေ့တတ်သောမယားနှင့် နေရခြင်းထက်

တောကန္တာရအရပ်၌နေရခြင်းသည် ပို၍ကောင်း၏။

20ပညာရှိသောသူ၏အိမ်၌ နှစ်လိုဖွယ်ကောင်းသောဥစ္စာဘဏ္ဍာနှင့် ဆီရှိ၏။

မိုက်မဲသောသူကား ထိုအရာတို့ကို သုံးဖြုန်းတတ်၏။

21ဖြောင့်မတ်ခြင်းနှင့် မေတ္တာကရုဏာကို လက်ကိုင်ပြုသောသူသည်

အသက်ရှင်ခြင်း၊ ဖြောင့်မတ်ခြင်းနှင့် ဂုဏ်သရေကို တွေ့ရှိလိမ့်မည်။

22ပညာရှိသောသူသည် သူရဲကောင်းတို့၏မြို့သို့ ချီတက်၍

သူတို့ကိုးစားသော ခိုင်ခံ့သည့်နေရာကို ဖြိုချတတ်၏။

23မိမိနှုတ်နှင့် လျှာကို စောင့်ထိန်းသောသူသည်

မိမိအသက်ကို ဆင်းရဲဒုက္ခမှ စောင့်ထိန်းသောသူဖြစ်၏။

24မာနထောင်လွှားလျက် ခက်ထန်မောက်မာသောသူ၏အမည်မှာ

“ပြက်ရယ်ပြုတတ်သောသူ” ဟူ၍ဖြစ်၏။

သူသည် အလွန်မာနထောင်လွှားသောစိတ်နှင့် ပြုမူတတ်၏။

25ပျင်းရိသောသူ၏လက်သည် အလုပ်လုပ်ရန်ငြင်းဆန်သောကြောင့်

သူ၏အလိုဆန္ဒသည် သူ့ကိုသေစေတတ်၏။

26သူသည် အလိုရှိသည့်အရာကို တစ်နေ့လုံး တောင့်တနေတတ်၏။

ဖြောင့်မတ်သောသူမူကား တွန့်တိုခြင်းမရှိဘဲ ပေးကမ်းတတ်၏။

27ဆိုးယုတ်သောသူ၏ယဇ်ကောင်သည် စက်ဆုပ်ရွံရှာဖွယ်ဖြစ်၏။

ထို့ထက်မက ၎င်းကို ဆိုးညစ်သောအကြံဖြင့် ယူဆောင်လာလျှင်

ပို၍ပင် စက်ဆုပ်ရွံရှာဖွယ်ဖြစ်၏။

28လိမ်လည်သောသက်သေသည် ပျက်စီးသွားလိမ့်မည်။

ကိုယ်တိုင်ကြားရသောသူမူကား အစဉ်ပြောဆိုနေလိမ့်မည်။

29ဆိုးယုတ်သောသူသည် မျက်နှာပြောင်တိုက်တတ်၏။

ဖြောင့်မှန်သောသူမူကား မိမိသွားရာလမ်းကို သိရှိနားလည်၏။

30မည်သည့်ဉာဏ်ပညာ၊ ထိုးထွင်းဉာဏ်၊ အကြံဉာဏ်မျှ

ထာဝရဘုရားကိုဆန့်ကျင်၍ မတည်နိုင်။

31စစ်တိုက်ရမည့်နေ့အတွက် မြင်းကိုပြင်ဆင်ထားသော်လည်း

အောင်ပွဲသည် ထာဝရဘုရားနှင့်ဆိုင်၏။

လက်ရှိရွေးချယ်ထားမှု

သုတ္တံကျမ်း 21: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

MYANMAR STANDARD BIBLE©

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။