Matai 17
17
Yesu kembiswa
1Nanima na bilumbu sambanu, Yesu bakaka Petelo ye Yakobi ye Yoane mpangi ya yandi, ye twalaka bau va mongo ya nda mu kinsona. Mal. 9:2; Luk. 9:28
2Yandi kitukaka nantwala na bau, luse ya yandi tentinaka bonso ntangu, mvwatu ya yandi kwizaka mpembe bonso mwini.
3Tala, Mose ye Elia monikaka kwa bau ye solulaka na yandi.
4Petelo vutulaka ye tubaka kwa Yesu: Mfumu, yo ikele mbote na beto ikele awa. Kana nge zola, mono tasala basombolo tatu, mosi ya nge, mosi kwa Mose, mosi kwa Elia.
5Bu yandi vanda kutuba, tala dituti ya mwini fukaka bau, tala, ndinga mu dituti tubaka: Yai ikele Mwana ya mono ya zolwa, ya yangidisa mono, beno kuwa yandi. Mal. 3:17; 2 Pet. 1:17
6Bu banlonguki kuwaka yo, bau kubwaka va luse ya bau, ye bau vandaka na boma mingi.
7Yesu kwizaka ye valakanaka bau ye tubaka: Telema, vanda na boma ve,
8Bu bau sendula meso ya bau, bau monaka muntu ve, kansi Yesu kaka.
Yesu binga Yoane Mbotiki Elia
9Bu bau kulumukaka va mongo, Yesu sikidikisaka bau, kutuba: Tuba kwa muntu ve mona mesa yai, ti Mwana ya muntu fulukisa tuka bafwa. Mat. 16:20; Mal. 9:9
10Banlonguki yuvulaka yandi, kutuba: Mpila nki bansoniki tuba na Elia fwiti kwiza ntete ?
11Yandi vutulaka ye tubaka: Elia takwiza kieleka, ye tavutula yonso bonso yo vandaka ntete. Mat. 11:14; Mal. 4:5; 9:11
12Kansi mono tuba kwa beno: Elia imene kwiza ye bau zabaka yandi ve, kansi bau salaka kwa yandi bonso bau zolaka. Mpilayai mpe, Mwana ya muntu tamoniswa mpasi kwa bau. Luk. 1:17
13Buna banlonguki zabaka na yandi tubaka sambu na Yoane Mbotiki.
Yesu belula mwana ya vanda na mbikula ya ngonda
14Bu bau kwizaka kwa kibuka, muntu kwizaka kwa yandi, ye fukamaka kwa yandi va makungunu, Mal. 9:14; Luk. 9:37
15ye tubaka: Mfumu, kuwila mwana ya mono nkenda, sambu yandi ikele na mbikula ya ngonda, ye ikele mona mpasi mingi, kadi mbala na mbala yandi ikele kubwa mu tiya, ye mbala na mbala mu masa.
16Mono twalaka yandi kwa banlonguki ya nge, kansi bau lendaka ve kubelula yandi.
17Yesu vutulaka ye tubaka: O mbandu yai ya konda lukwikilu ye ya mbi, bilumbu ikwa mono tavanda na beno ? Bilumbu ikwa mono tavibidila beno ? Twala yandi awa kwa mono.
18Yesu sembaka yandi, ye mpeve ya mbi basikaka na yandi; ye mwana belukaka tuka lokula yina.
19Buna banlonguki kwizaka kwa Yesu mu kinsona ye tubaka: Sambu na nki beto lendaka ve kubasisa yandi.
20Yandi tubaka kwa bau: Sambu na lukwikilu ya beno ikele fioti, kadi kieleka mono tuba kwa beno: Kana beno ikele na lukwikilu bonso nkeni ya mutade, beno tatuba ku mongo yai: Katuka awa kwenda kuna, ye yo takatuka; ye kima ikele ve ya beno lenda kusala ve. Mat. 21:21; Mal. 11:23; Luk. 17:6
21Kansi mutindu yai ikele kubasika ve, kansi kaka mu lombilu ya buya madia.
Yesu tuba kwa banlonguki ya yandi sambu lufwa ye mfulukulu ya yandi
22Bu bau vandaka mu Ngalili, Yesu tubaka kwa bau: Mwana ya muntu tayekulwa mu maboko ya bantu; Mal. 9:30; Luk. 9:42
23bau takufwa yandi ye lumbu ya tatu yandi tafulukiswa. Bau vandaka na ntantu mingi.
Yesu futa mpaku
24Bu bau kwizaka ku Kapenaumi, bau ya futisa ndambu ya mbongo ya sekeli ya mpaku, kwizaka kwa Petelo ye tubaka: Nlongi ya beno ikele kufuta mpaku ve.
25Yandi tubaka, E. Bu yandi kwizaka mu nzo, Yesu tubaka kwa yandi ntete, kutuba: Simoni, nge banza nki, bantinu ya ntoto ikele kubaka mpaku ya bima keti ya nsi ya banani ? Kwa bana ya bau keti na banzenza ? Mat. 22:21; Lom. 13:7
26Bu yandi tubaka: Kwa banzenza, Yesu tubaka kwa yandi: Mpilayai bana tafuta ve.
27Kansi na beto tatesa bau sakuba ve, kwenda ku mbu, losa ndobo, baka mbizi ya masa yange tasimba ntete; bu nge imene kukangula munoko ya yandi, nge tamona mbongo sekeli mosi, baka yo ye pesa yo kwa bau sambu na mono ye nge.
လက်ရှိရွေးချယ်ထားမှု
Matai 17: NTK50
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Nouveau Testament en Kikwango © BAliiance Biblique de la RD Congo, 1950.