Matai 18
18
Yesu longa mambu ya nani kuluta nene
1Mu lokula yina banlonguki kwizaka kwa Yesu, kutuba: Nani ikele kuluta nene mu kimfumu ya zulu. Mal. 9:33; Luk. 9:46
2Yandi bingaka mwana fioti, ye tulaka yandi nakati na bau,
3ye tubaka: Kieleka, mono tuba kwa beno, kana beno pindula ve ye kwiza bonso bana fioti, beno lenda ve kukota mu kimfumu ya zulu. Mat. 19:14; 1 Kol. 14:20
4Sambu na yai konsonani ya dikulumusa bonso mwana fioti yai, yandi ikele kuluta nene mu kimfumu ya zulu.
5Ye konsonani ya baka mwana fioti mpilayai mu nkumbu ya mono, ikele kubaka mono. Mat. 10:42
6Kansi konsonani ya tesisa sakuba mwana mosi fioti yai ya kwikila mono, ikele mbote kwa yandi kana ditadi ya nene ya nikuna fufu takangwa va nkingu ya yandi, ye yandi loswa mu kati mbu. Mal. 9:42; Luk. 17:1
7Ndola kwa nsi sambu na mambu ya sakuba! Kadi mambu ya sakuba fwiti kwiza, kansi ndola kwa muntu yina ya tesisa sakuba. 1 Kol. 11:19
8Kana diboko ya nge keti dikulu ya nge tesisa nge sakuba, zenga yo ye losa yo. Kadi yo luta mbote kwa nge kukota mu moyo na kieta keti tembila, keti kuvanda na maboko zole ye makulu zole ye kuloswa mu tiya ya mvu ya mvu. Mat. 5:29; Mal. 9:43; Kolo. 3:5
9Kana disu ya nge tesisa nge sakuba, katula yo ye losa yo. Kadi yo luta mbote kwa nge kukota mu moyo na disu mosi, keti kuvanda na meso zole ye kuloswa mu bilungi ya tiya.
10Ya bafioti yai, beno tala na beno saula mosi ve; kadi mono tuba kwa beno, na banjo ya bau mu zulu ikele kutala kilumbu na kilumbu luse ya Tata ya mono ya ikele mu zulu. Nk. 34:7
11Kadi Mwana ya muntu imene kwiza kuvulusa ya vilaka.
12Beno banza nki ? Kana muntu ikele na mameme nkama, ye mosi vilaka, yandi tabika ve makumi uvwa ye uvwa va miongo, ye kwenda kusosa ya vila ? Luk. 15:4
13Kana yo vanda mpilayai, na yandi mona yo, kieleka mono tuba kwa beno: Yandi tayangalala mingi sambu na yo, ye fioti sambu na makumi uvwa ye uvwa ya vilaka ve.
14Mpilayai mpe, yo ikele luzolo ve ya Tata ya beno ya ikele mu zulu na mosi ya bafioti yai tavila.
Mpilamosi beto fwiti kuvanda na bampangi ya sala masumu
15Kana mpangi ya nge sala masumu, kwenda nge kaka kusonga yandi. Kana yandi kuwa nge, buna nge imene kubaka mpangi ya nge ndandu. 3 Mose 19:17; Luk. 17:3; Ngal. 6:1; Yak. 5:19
16Kana yandi kuwa nge ve, twala mpe mosi keti zole yankaka, na ndinga yonso lenda kuvanda kieleka sambu na munoko ya bantemo zole keti tatu. 5 Mose 19:15; Yoa. 8:17; 2 Kol. 13:1; Eb. 10:28
17Kana yandi buya kuwa bau, songa yo kwa dibundu, kansi kana yandi buya kuwa dibundu mpe, bika yandi vanda kwa nge bonso paien ye mufutisi. Lom. 16:17; 1 Kol. 5:11
18Kieleka, mono tuba kwa beno: Yonso ya beno takanga va ntoto takangwa mu zulu, ye yonso ya beno kangula va ntoto takangulwa mu zulu. Mat. 16:19; Yoa. 20:23
19Diaka mono tuba kwa beno: Kana zole ya beno ndimana va ntoto mu konsokima ya bau talomba, Tata ya mono ya ikele mu zulu tasadila beno yau. Mat. 21:22; 1 Yoa. 3:22; 5:14; Yak. 4:3
20Kadi konsosika na zole keti tatu kutakana mu nkumbu ya mono, kuna mono ikele nakati ya bau.
Yesu longa nsiku ya vidisa masumu: kingana ya nkwa mfuka
21Buna Petelo kwizaka ye tubaka kwa yandi: Mfumu, mpangi ya mono tasadila mono mbi mbala ikwa ye mona vidisa yo ? Ti mbala nsambwadi ? Luk. 17:4
22Yesu tubaka kwa yandi: Mono tuba kwa nge: Ti mbala nsambwadi ve, kansi ti makumi nsambwadi mbala nsambwadi.
23Sambu na yai kimfumu ya zulu ikele mpilamosi ntinu mosi ya zolaka kutanga ntalu ya bima ya yandi ya vandaka na bampika ya yandi.
24Bu yandi yantikaka kutanga, bau twalaka mosi kwa yandi ya vandaka na mfuka ya matalanta mafunda kumi.
25Sambu na yandi vandaka na kima ve kufuta yo, mfumu ya yandi sikidikisaka, na yandi tatekwa ye nkento ya yandi ye bana ye bima yonso ya ikele na yandi, na kufuta mfuka.
26Buna mpika yina fukamaka ye bombidilaka yandi, kutuba: Mfumu, kuwila mono nkenda ye mono tafuta yonso.
27Mfumu ya mpika yina kuwilaka yandi nkenda, ye bikaka yandi ye vidisaka mfuka ya yandi.
28Kansi bu mpika yina basikaka, yandi monaka mpika yankaka ya vandaka na mfuka kwa yandi ya mbongo ya fioti denali nkama. Yandi bakaka yandi ye simbaka yandi va nkingu, kutuba: Futa mfuka.
29Buna mpika yina fukamaka ye bombidilaka yandi, kutuba: Kuwila mono nkenda ye mono tafuta nge.
30Yandi buyaka, kansi kwendaka ye losaka yandi mu boloko ti yandi tafutaka mfuka yina.
31Bu bampika yankaka monaka mambu ya salwaka, bau vandaka na ntantu mingi, bau kwendaka ye tubaka kwa mfumu ya bau mambu yonso ya salwaka.
32Buna mfumu ya yandi bingaka yandi ye tubaka kwa yandi: Nge mpika mbi, mono vidisaka mfuka ya nge yamvimba, sambu na nge bombidilaka mono.
33Yolunga ve na nge kuwila mpika yankaka nkenda bonso mono kuwilaka nge nkenda ?
34Mfumu ya yandi vandaka na makasi ye pesaka yandi kwa bantu ya monisa mpasi, ti yandi tafuta mfuka yonso.
35Mpilayai mpe Tata ya mono ya zulu tasadila beno, kana beno vidisila ve mpangi ya beno mu ntima ya beno. Mat. 6:14; Mal. 11:26
လက်ရှိရွေးချယ်ထားမှု
Matai 18: NTK50
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Nouveau Testament en Kikwango © BAliiance Biblique de la RD Congo, 1950.