Luki 13
13
Tuubɛ koe
1Wo tɛmuɛ le, mɔgɛnu donu keta ɲɔ, anu ka Galile kaanu la ko kibare ɲamakaran Isa ye, mansa Pilati ka minnu taran anu be kolofeŋɛnu bɔɔla sarika la, a ka wo mɔgɛnu faga. Wo butɔ, kolofeŋɛnu base nun mɔgɛnu base bɛ basanta. 2Isa ka anu jaabi, a ko: «Anu to ka ɲagankata sɔtɔ wo mɔɔle la, a be toren de wo ye ba wo mɔgɛnu mu junubutɔɛ le la ka tanbi Galile mɔgɔ tɔɛ bɛ la? 3Ade, wo ma! N ni a fɔ wo ye: wole ɲan, ka wo ma tuubɛ, wo bɛ be halagila ɲɔgɔnna le. 4Silɔmu bon toireŋɛ tugun boeta mɔgɔ tan nun sagiŋɛ min ma nun, a ka anu faga Darisalamu saa butɔ, a be toren de wo ye ba wonu mu hakkɛ sɔtɔla le la, ka tanbi Darisalamu kaa bɛ la? 5Ade de, wo ma! N ni a fɔ wo ye: wole ɲan, ka wo ma tuubɛ, wo bɛ be naala halagila ɲɔgɔnna le.»
Toori lɔgɔ wolo bale la ko taale
6Isa mɛn takumata, a ka kɛ taale fɔ anu ye, a ko: «Kaye do be toori lɔgɛ kiiren a la sunte tɔ. Lun do, a tagata toori deŋɛ ɲini wo lɔgɛ kanna, a ma fenfen yen. 7A ka a fɔ a la suntu kantala ye, a ko: ‹A san saba le ka n be nala toori deŋɛ ɲinila kɛ lɔgɛ kanna, kɔnɔ n bele fenfen yenna. A tɛgɛ, i ni a bɔɔ yan. Tɔnɔ bele a la, a kana to yan a ni n na duge makankan!› 8Suntu kantala ka a jaabi, a ko: ‹N tige, a to ɲɔ, diɲa ɲinan dɔndɛ ni tanbi. N si naa a la miliŋɛ majatin, n ni bɔrɛ sa. 9Tumado yaari a si naa wolo, ka wo ma i ni a tɛgɛ i ni a bɔɔ ɲɔ.› »
Isa la muse do lakendeya koe sulen lɔ́gɛ́
10Sulen lɔ́gɛ́ do tɔ, Isa be mɔgɛnu kawandila kawandi ma bon dɔndɔ tɔ. 11Wo ka a taran, muse do be ɲɔ, a be tɔɔrɔren, a bata san tan nun sagin bɔɔ jinna be a kɔma, a bata a labutin. A te nɔ a lawulila feu a ni telen. 12Isa to ka wo muse yen, a ka a kele. A ka a fɔ a ye, a ko: «N na, i la tɔɔrɛ bata bɔɔ i ma feu.» 13A to ka a bolenu sa muse kuŋɛ tɔ, a telenta kisanna, a tota Ala tantula. 14Kawandi ma bon kuntige mɔnɛta Isa ma, a to ka malakendeya ma sulen lɔ́gɛ́ tɔ, a ka a jaabi, a ka a fɔ jama ye: «Tele wɔɔrɔ be wo mɔ ye, wo mɔ ni wale ma. Wolo mu, wo na kendeya ɲini wo tele wɔɔrɛ kɔtɔ, wo kana na wo la sulen lɔ́gɛ́ de!» 15Marige Isa ka kawandi ma bon kuntige jaabi, a ko: «Wole nɛn fila tigenu! Wo bɛ bele wo la ningenu anun wo la sofalenu fulenna anu la kula tɔ sulen lɔ́gɛ́ ba, wo ni anu doni ji min dula? 16Kɛ muse mu Iburahima bɔnsɛ do le la, kɔnɔ Sentanɛ ka a bita a san tan nun sagin de ka. Kaa a ma bɛn n ni ale tugun nafulen sulen lɔ́gɛ́ tɔ?» 17Isa to ka wo fɔ, wo ka a jague bɛ malu. Kɔnɔ jama bɛ kan sɛɛwata koola a la ko makaabɛreŋɛ bɛ la, a be min mala.
Taali fila
18Isa mɛn ka fɔ, a ko: «Ala la mansabaya nun fen mulunta? N si a nun fen misali? 19Ala la mansabaya be toren iko fondo kole do, mɔgɛ do ka min jigan a tagata a lafili a la sunte tɔ. A fɛtɛnta, a mata lɔgɛ la han kondeŋɛnu ka boŋɛnu sa a boliŋɛnu tɔ.»
20A mɛn ko: «N si Ala la mansabaya lamulunya fen fɛ tugun? 21A be toren de iko lɛbinɛ, muse ka min jigan a ka a lamulan sumarifeŋɛ ɲa saba farin fɛ, farin bɛ si yɛlɛ.»
Don koe Ala la mansabaya tɔ
22Han bi, Isa be tagamanna Darisalamu sɔngɛ la, a keta saa banba nun saa lanma yo ma, a ni sɔ a ni ɲɔ mɔgɛnu kawandi. 23Do ka a maɲininka, a ko: «N marige, tɔɲa le ba, mɔgɛ minnu be kisila wonu ma siya?» Isa ka a fɔ anu ye, a ko: 24«Wo tirin don koe la bondandeŋɛ la. N ni a fɔ wo ye, mɔgɔ siyama si kata don koe la, kɔnɔ anu te nɔ. 25Lun do, bon tige si wuli a ni bonda balan, wo tɛmuɛ wole minnu bata fɔlɔ tola bara tɔ, wo si bonda kɔnkɔn, wo ni a fɔ, wo ko: ‹Marige, bonda laka mɔ ye!›. Wo butɔ, bon tige si wo jaabi: ‹N ma wo bɔɔ dula lɔn.› 26Wo butɔ, wo si fɔlɔ a fɔla: ‹Marige, kaa wo mɔ bɛ le ma dɔmɔre ma, mɔ nun ile ma minfeŋɛ tugun min? I ma kawande ma mɔ la saanu tɔ?› 27Marige si a fɔ wo ye wo lun, a ko: Wole ko koron malanu bɛ! Wo bɔɔ yan, n ma wo bɔɔ dula lɔn.#13:27 Jaburu, sora 6 haaya 9 28Wo lun wo si Iburahima, Isiyaka nun Yaguba, anun nabiyonmɛnu bɛ yen Ala la mansabaya tɔ. Kɔnɔ a taranta wole bata fili, wo si di ɲɔ han wo ni wo ɲiŋɛ takin. 29Mɔgɛnu si bɔɔ dunuya fɛfɛ bɛ tɔ, kabɔɔ tele yɛlɛ anun tele jige, kabɔɔ bolo mara anun bolo ɲinma, anu ni naa sigi anu ni dɔmɔre ma Ala la mansabaya tɔ. 30Wo butɔ, kɔma sɔlanu si ma ɲatɔ sɔlanu la, ɲatɔ sɔlanu tugun si ma kɔma sɔlanu la.»
Isa nun Darisalamu kaanu
31Wo wagati dɔndɛ tɔ, Farisinu donu nata anu ka a fɔ Isa ye, anu ko: «I bɛnta bɔɔla yan, i ni taga, bayi mansa Herodu be i faga koe tɔ.» 32A ka anu jaabi, a ko: «Wo taga a fɔ wo kalabante ye: a ni a fɛlɛ, n be jinnanu bɔɔla mɔgɛnu kɔma, n be bandibaganu lakendeyala. Bi nun sinan n be wo wale le kunma, a tele saba luŋɛ n na wale si ban. 33A fɛrɛ bele fɔ n ni tagaman Darisalamu sɔngɛ la bi nun sinan anun sinankɔ, bayi nabiyonmɛ te faga dula yo tɔ fɔ ɲɔ dɔrɔn.»
34A mɛn ko: «Darisalamu kaanu, Darisalamu kaanu, wo be nabiyonmɛnu fagala; Ala ka kiilanu minnu kii wo ma, wo be anu mabunna kurenu la, wo ni anu faga. N dita le kunɲama siyama n ni wo madɛn iko susu konbira be woofila a la deŋɛnu kunma ki min na a gabataŋɛnu kɔtɔ, kɔnɔ wo ma sɔn wo la. 35Kɔtɛ, Ala si naa wo la saa boloka wo bolo. N ni a fɔ wo ye: wo te n yen, han wo be a fɔla lun min na: Min be naren Marige Ala tɔgɛ la, barikɛ be wo tigi ye!#13:35 Jaburu, sora 118, haaya 26»
လက်ရှိရွေးချယ်ထားမှု
Luki 13: MOG
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ