Luki 14
14
Mɔgɔ yitireŋɛ lakendeya koe
1Sulen lɔ́gɛ́ do tɔ, Isa tagata don Farisinu la kuntige do la boŋɛ tɔ dɔmɔ dɔmɔ koe la. Minnu be dɔmɔri dula tɔ ɲɔ, wonu bɛ tota a lakɔrɔsila koola. 2Awa, bandibaga do be a ɲakɔtɔ tabɛŋɛ tɔ. Bande bata a bale bɛ layiti. 3Wo butɔ, Isa ka kuma da bita a ka a fɔ sariya karamɔgɛnu anun Farisinu ye, a ko: «A be kama le? Mɔgɛ lakendeya koe sulen lɔ́gɛ́ tɔ, wo be dagɛren de mɔ la sariya tɔ ba ka ade?» 4Anu ka anu mɔdɛ. Wo butɔ, Isa ka a bole sa bandibaga ma, a ka a lakendeya, a ka a boloka. 5Isa ka anu maɲininka wo butɔ, a ko: «Ka wo la den kayireŋɛ, ka wo ma wo la ninge jigita kɔlɔŋɛ tɔ, mɔgɛ be wo tɛma yan ba min te a layɛlɛ kisanna hali sulen lɔ́gɛ́?» 6Anu ma nɔ a jaabila wo la.
I fan majigi koe
7Mɔgɛnu minnu be keleren dɔmɔ dɔmɔ koe la, Isa be wonu bɛ lasagala anu to be jindɛren kuntigenu sigidula masubɛla anu yɛtɛ ye. Wo butɔ, a ka taale do sa anu ye, a ko: 8«Ka mɔgɔ do ka i kele a la musu jigan murade tɔ, i kana taga sigi kuntigenu sigidula dɔmɔ dɔmɔ tɛmuɛ, bayi tumado wo si a taran, mɔgɛ do be keleren ɲɔ, min fisa ile ko. 9Kɔtɛ, min ka wo fila bɛ kele, ka wo nata a ni a fɔ i ye: ‹I ni wuli, i si naa wo sigidula dii doe ma.› Wo butɔ, i si wuli i be maluren, i ni sigidula do ɲini jama kɔma. 10Awa, ka i bata kele murade tɔ, taga sigi kɔma. Wo butɔ, min be wo bɛ keleren, wo tini na, a ni a fɔ i ye: ‹Kayi, i madon yan, i ni na sigi kuntigenu sigidula tɔ.› Wo butɔ, i si biliya sɔtɔ muradilanu bɛ ɲala. 11N ni a fɔ wo ye: mɔgɔ yo be a fan mayɛlɛla, Ala si wo majigi le, kɔnɔ mɔgɔ yo be a fan majigila, Ala si wo mayɛlɛ le.»
Tɔɔrɔbaga kele koe
12Isa mɛn ka kuma do fɔ Farisi ye, min be a keleren, a ko: «Ka i be mɔgɛnu kelela kɔɔjɔbɔɛ la ka wo ma kimaŋɛ, hali i ma i kafuɲɔgɛnu kele anun i baaba dɔndɛnu, anun i bareŋɛnu, anun i sigiɲɔgɔ nafulu tigenu, bayi wonu tugun si nɔ i kelela le lun do, anu ni i la wale lasaagi i ma. 13Ka i be mɔgɛnu kelela dɔmɔ dɔmɔ koe la, i be fugarenu le kelela, anun mɔgɔ mabɛndeŋɛnu, anun minnu be jigila a ma, anun ɲabɔnɛnu. 14I si hɛra sɔtɔ wo tɔ, bayi fondo bele wonu bolo anu ni i la wale lasaagi i ma. I si i sɔŋɛ sɔtɔ Ala be telenbaganu lawulila lun min na.»
Muradi banba la ko taale
15Isa dɔmɔri maɲɔgɛ do ka kɛ kuma mɔɛ, a ka a fɔ a ye, a ko: «Min be dɔmɔre mala Ala la mansabaya tɔ, hɛra si to le wo tigi ye.» 16Isa ka a fɔ a ye, a ko: «Kaye do le be ɲɔ, a be muradi banba tabɛnna, a ka mɔgɔ siyama kele. 17Dɔmɔri ma wagate to bata ke, a ka a la jon kaye kii mɔgɛnu kɔma a be minnu keleren nun, anu ni na, bayi dɔmɛ bata tabɛn. 18Kɔnɔ anu bɛ ka bɔɔ ɲa ɲini a bolo kɛɲa dɔndɔ la. A tagata mɔgɔ fɔlɛ min keledula, wo ka a fɔ, a ko: ‹N bata duge do san, a fɛrɛ bele fɔ n ni taga a fɛlɛ. N bata i táran, i ni hakkɛ to n ɲɛ, n te nɔ tagala.› 19Mɔgɔ filaɲɔgɛ tugun ko: ‹N bata sarin ningi fila sigidula loolu san, n be tagala wondelen mafɛlɛdula. N bata i táran, i ni hakkɛ to n ɲɛ, n te nɔ tagala.› 20Mɔgɔ sabaɲɔgɛ tugun ko: ‹N be bɔɔren muse jiganna kɔtɛ. Wolo be a maren n te nɔ tagala.› 21Jon kaye la saagireŋɛ a ka wo lasaagi a tige ma. Wo butɔ, bon tige dumɛnta koola, a ka a fɔ jon kaye ye: ‹I teriya i ni taga saa butɔ fɛfɛ bɛ tɔ, kila banbanu anun kila mɛsɛŋɛnu. Ka i ka fugare minnu yen, anun mɔgɔ mabɛndeŋɛnu, anun ɲabɔnɛnu, anun minnu be jigila a ma, i ni anu bɛ nati yan.› 22Jon kaye tagata, a nata. A la nareŋɛ a ka a fɔ a tige ye: ‹N tige, i ka n yamɔri min na, n bata wo ban mala, kɔnɔ han bi i la boŋɛ ma fa betun.› 23A tige ka a fɔ a ye, a ko: ‹I mɛn ka taga saa fɛfɛ tɔ. I ka mɔgɔ min yo taran kilanu tɔ ɲɔ anun daakanu tɔ, i ni anu karahan anu ni don, alako anu ni na n na boŋɛ lafa. 24N mɛn ni a fɔ wo ye, n ka minnu fɔlɛ kele nun dɔmɔ dɔmɔ koe la, wonu hali dɔndɔ te n na dɔmɛ mafɛlɛ.› »
Sɔ ɲa Isa kɔma
25Wo tɛmuɛ, jama banba be Isa jokkiren. A ka a firifiri anu ma, a ko: 26«Ka mɔgɔ min be diren sɔla n kɔma, ka a ma n kanu tanbi a baaba la nun a nɛɛnɛ la nun a la muse la nun a la deŋɛnu la nun a kɔtɔnu la nun a dɔgɛnu la, ka a ma n kanu tanbi hali a yɛtɛ nɛ la, wo te nɔ mala n na talibe la. 27Min ma sɔn a tɛn lɔgɔ bangalandeŋɛ jiganna a faga koe la, a ni sɔ n kɔma, wo te nɔ mala n na talibe la#14:27 Wo wagate, mɔgɛ min bɛnta fagala, wo be lɔgɔ bangalandeŋɛ jiganna a faga lɔgɛ la..
28Ɲɔmɔ le be wo tɔ yan, min be diren bon toireŋɛ sɔla, a ni to a ma sigi betunna a ni a mira, a ni a sɔ sɔŋɛ kɔnti, a ni a lɔn min be a bolo ka wo si a ban? 29Ka a ma wo fɔlɔ ma, ka a ka boŋɛ fondoma kɔɔrin, a si bon sɔ koe to ɲɔ, awa mɔgɛnu tini a yen, anu bɛ si a majele le wo tɔ, 30anu si a fɔ: ‹Wo kaye ka bon toireŋɛ sɔɛ fɔlɔ, kɔnɔ a ma nɔ a labanna feu!›
31Mansa miniman tugun si sɔn, sɔɔri mɔgɔ wulu tan be min bolo, a ni taga mansa do kɛlɛ, min be nala sɔɔri mɔgɔ wulu mugan fɛ, a ni gali sigila betunna a ni fɛrɛ ɲini, alako a ni a lɔn ka a si a nɔ? 32Ka a ka a yen a te a nɔ, yannun wo mansa ni sutuya a la, a si kiila lasanba a ma, alako kɛlɛ si nɔ makimala ki min na.
33Awa, mɔgɔ yo mɔgɔ be wo tɛma, ka i te i bolofeŋɛ bɛ boloka, i te nɔ mala n na talibe la.
34I ka a lɔn kɔɔkɛ mu ko ɲinma le la. Kɔnɔ ka a bata sɛɛya#14:34 Kɔɔkɛ min si sɔtɔ ba tɔ, wo te sɛɛya. Kɔnɔ kɔɔkɛ do be ɲɔ, min si sɔtɔ duge tɔ, wo si nɔ sɛɛyala., a si kunaya kama le bitugun? 35A te ma fenfen na duge tɔ, hali suntukuŋɛ tɔ; mɔgɛnu si a lafili tun. Awa, tole be minnu la a mɔɛ koe la, anu ni anu tolomasɔ kɛ taale la koola.»
လက်ရှိရွေးချယ်ထားမှု
Luki 14: MOG
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ